WIRIKAPAI 55
Mo Songodi Gamo Dungurati
Rogo zegino kirikiri, amirioni aboro nairiso Yekova na ngbarago rogo akutu adungurati. I na tambuahe tipa agu arugute gbiati arugapai i agbiaha, na i na kakaka nyemu ka songoda dungurati ngba dungu agene. Ya mo kina gu bangisa bipai re du mo na ni tipa gamo dungurati?
1. Gini bete agene rengbe mo ka mangasunge na gamo regbo gbiati omero tipa ka songoda dungurati ngbaha?
Ani dunduko niima rengba ka undo rogo dungurati. Ni kpiapai, ya mo gbinza aboro ho watadu kpokorokpokoro yo rogo gamo dungurati? Ya mo mo rengbe ka undo yo i ndu tipa adunguratise? Watadu mo rengbe ka undoyo rogo kurapai, wa gu nga ka ngbeka ahe fuyo watadu ka undoyo ti asunge kporo? (Mo gedi Yakoba 1:27.) Ani ima rengba a ka fu tirani ka undo ka giriso gaani Bambu Kindo na kini ngerefuoho. Boro ho nazio rani ngbaome ani mangi agi apai re te. Nyemuse tipa Yekova gbiati awirinarani nafõ rani ani ‘fú [tirani] zaza.’—Atambuahe 110:3.
Agu aboro niima zio bapatiza ki da ni aDezire Yekova ima rengba ka songoda dungurati ngba gu kura agene berewe. Agu awirina niima nyaka rogo toro yo na ki ima rẽ ima rengba ka mangasunge ni moundo abaakumba na, kusa, ki da ni abaakumba. Awirina nga akumba na adee ima rengba ka songoda sunge tungusapai ni mangayo sunge ni abazakigene. Gu kura aDezire Yekova ima rengba ka fubee ni undoyo na sunge meka aba irisombori watadu nindu yo kurogo agu aba adungurati aida na undo ngba gu kura agene rogoho.
2. Waigu rengbe ani ka mangasunge na agu ahe du berani ka songoda dungurati?
Ani ima rengba ka iriso ‘Yekova na [gaani] ahe dũ.’ (Asanza 3:9) Ani nabihe ni pa momu kafu marã watadu gu kura ahe tipa ka songoda gu dungurati du ani rogoho gbiati ka songoda gu sunge tungusapai namanga rogo zegino dũ. (Mo gedi 2 AKorindo 9:7.) Agu agamahe ani afuhe a nasongoda sunge fu undo asongoda. Dungu aboro nasia kaa ‘igo’ marã dedede tipa ka fuhe ni gamahe. (Mo gedi 1 AKorindo 16:2.) Ani ima rengba ka maa gaani gamahe ku rogo sanduki gamahe du ba gaani airisombori yo watadu ku rogo donate.pr418.com. Yekova nafu momu furani ani yugu gaani nyemuse fuko ngba gu gene ani asia ka mangasunge na gaani ahe ngbaha.
MO WIRIKI KURA DUNGU APAI
Mo bingo gu bete agene rengbe mo ka songoda dungurati ngbaha.
3. Ani ima rengba ka mangasunge na agu ahe du berani
Yekova gbiati Yesu nakpinyemu agu aboro nagamahe esuesu. Ni kpiapai, Yesu aima bi rungorungo dekurugbo na gu ome ri amangihe tipa kafu gamahe. Mo gedi Ruka 21:1-4, na tifuoho, mo ki sakipai tipa agi asanahe re:
-
Ya mo si naida ani fu kina kikii gamahe mbata tipa ka sa ngbarago ti Yekova?
-
Waigu aYekova na Yesu abi agu agamahe ani afuhe na ngbadurani dunduko.
Tipa ka bi wai i amangasunge na agu agamahe ani afuhe, mo bi gu VIDIO re. Tifuoho, mo ki sakipai tipa gu sanahe ngbefuoho.
-
Waigu i amangasunge na agamahe tipa si undo adungurati rogo zegino dũ?
4. Ani ima rengba kafu tirani ka undo
Ti agu aregbo i aakeka Baibiri ti ni, airisi Yekova anaamangasunge zaaza ka ngerafuo gayo aba irisombori. Gi pai re akodanga kina fu marã gbua sa te. Mo gedi 2 Pekapai 34:9-11, na tifuoho, mo ki sakipai tipa gi sanahe re:
-
Waigu aYisaraere dunduko anaaundo nangerafuo ga Yekova bambu watadu ba irisombori?
Tipa ka bi wai aDezire Yekova apekafuo gu kpiapai nga ga Baibiri re, mo bi gu VIDIO re. Tifuoho, mo ki sakipai tipa agu asanahe ngbefuoho.
-
Tipagine duhe ti ni ni nyanyakipa pai ka banda gaani aBambu Kindo si du ni gigirihe na kini mbakadihe?
-
Gini bete agene rengbe mo ka undo ngbaha?
5. Agu awirina nga akumba ima rengba ka manga ome ka rẽ tipa dungu asunge rogo dungurati
Ziazia Kekeapai nangarasa agu aKristano nga akumba i mangi ome wa rengbe omeyo na ni tipa wa ka i rengbe ka rẽ ka songoda dungurati. Tipa ka bi kpiapai, mo bi gu VIDIO re. Tifuoho, mo ki sakipai tipa gu sanahe ngbefuoho.
-
Rogo gu vidio re, waigu Ryan nimangi ome tipa ka rẽ ka songoda dungurati wenengai?
Baibiri nasakapai tipa agu apai si aidaha be agu awirina nga akumba tipa i rẽ ka mangasunge ni amoundo abaakumba na ni abaakumba. Mo gedi 1 Timoteo 3:1-13, na tifuoho, mo ki sakipai tipa agi asanahe re:
-
Ginipai si aidaha be agu awirina namanga ome ka da ni amoundo abaakumba na abaakumba?
-
Ginipai si aidaha be gayo aborokporo?—Mo bi veresi 4 na 11.
-
Ho awirina nga akumba amanga ome ni tipa ka da ti agi apai si aidaha re, waigu rengbe aboro dunduko rogo dungurati ka gbia undo?
KURA BORO RENGBE KA SANAHE NGA: “Waigu aDezire Yekova naagbia marã tipa gayo asunge?”
-
Gamo karagapai nga gine?
GINIPAI MO NAWIRIKIHE?
Yekova na bakere tambuahe gbe tipa gu ome ani amangaha ka songoda dungurati nifu ani gaani regbo, omerani, gbiati agu ahe du berani.
Fugöpai
-
Waigu rengbe ani ka mangasunge na gaani regbo gbiati omerani ka songoda dungurati?
-
Waigu rengbe ani ka mangasunge na agu ahe du berani ka songoda dungurati?
-
Rogo gini agene mo akpinyemu ka songoda dungurati ngbaha?
MO WETEKE GU KURA APAI
Mo bingo ndu gupai Mbori aidanga airisiko naafu sa- dagba-bawe ti ni berewe ya.
“Ginipai Baibiri Apehe Tipa Sa-dagba-bawe?” (Gu kekeapai du rogo gaani bangiriba nga ga Internet)
Mo wiriki nga gupai “gbata sunge” rogo dungurati ayugoho.
“Ya Mo mo ‘Nagbata Sunge’?” (Ngbaõbambu Sinziri, Mbirinvuo 15, 2014)
Mo bingo gu kura aDezire Yekova nadu na wingbaduse kaa maa gayo raka ngbapai kaa ndu na awaraga fu akurayo airisimbori.
Kparaka Agu Awaraga du Mburuhe Rii Ziazia Kekeapai Congo Yo (4:25)
Mo bingo wai du gu gene ani agbia marã ngbaha tipa gaani asunge kia ti gu nga ga kura ariigbu pambori.
