WIRIKAPAI 22
Waigu Rengbe Mo ka Tungusa Wene Pangbanga?
Wa mo nikaa wirika gu rengo nga ga Baibiri, mo ima rengba ka berã gupai nga ‘Aboro dũ si aida i ini gipai re!’ Nirengo, aboro dunduko si aida i inihe! Ono wa vura du he wo, mo ima rengbe kaa gunde ka pe gupai mo nawirikihe fu kura aboro. Ani sakingo pai tipa wai mo narengbe ka dia be gu gunde re na wai mo narengbe ka tona tungusa gu wene pangbanga nga ga Baibiri na ngbarago.
1. Waigu rengbe mo ka tungusa gupai mo na inihe fu agu aboro mo naini yo?
Ga Yesu abawiriki aya: Ani arengba nga ka mbu ‘gumba agu apai ani abi nigi he’ te. (Amokedi 4:20) I aabi rengo na nyanyakipaha gbe si ki sayo i idi ka pehe fu dungu aboro wa ome yo arengbe na ni. Ya mo kina gu bangisapai re du tipa paro? Ka singia wo duhe, mo ngere tipa agu amomu nga gu rengbe mo ka gumba gupai rogo irisayo fu gamo aborokporo gbiati abakureamo mo nawirikihe.—Mo gedi AKorosaio 4:6.
Gu bete agene rengbe mo ka tonaha ngbaha
-
Ho mo afura ni na gamo aborokporo, mo fura tipa Baibiri ni pe mo gupai nga: “Mi awiriki bawenepai rogo gi poso re.”
-
Mo gedi gu veresi nafu ngarasaro fu gu bakureamo nawoka watadu du rogo bakabangirise.
-
Mo gumba gupai mo nawiriki he ti regbo gamo wisigo Baibiri nisase watadu ti regbo adunguratise fu gu gamo badiasunge ka sanaro tipa wai ga poso adu.
-
Rogo gu gaani bangiriba nga ga Internet nga jw.org.
-
Mo yambu kura aboro i ye tipa wirika Baibiri ho mo amangaha ni na boro watadu mo yugu wai fu yo rengbe yo kasanahe tipaha rogo jw.org.
2. Tipagine du tungusapai ti ni na dungurati ni gu sásá si aida boro mangihe?
Ga Yesu abawiriki amangipai ki susi gu gbua nga ka tungusa wene pangbanga fu agu aboro i naini yo. Yesu ‘ki kedi yo ni ba ue ue ku mbata yo fu ko ku rogo akporo’ i tungusipai. (Ruka 10:1) Gi mbakadimbakadi gene tungusapai re afu momu fu dungu aboro i gi wene pangbanga. Tungusapai kina sa aye na bakere ngbarago fu abawiriki. (Ruka 10:17) Ya mo mo rengbe ka mangaha wo a ni gamo sasa ka tungusapai na dungurati?
MO WIRIKI KURA DUNGU APAI
Mo bingo wai mo narengbe ka dia be gunde na ki gbia gu ngbarago nga gu naye ti tungusa wene pangbanga.
3. Yekova nika du adu na mo
Gu kura bete aboro nga agu yo naida ka tungusapai ima rengba kaa gunde tipa pa wai aboro nikaa bi yo watadu wai aboro nikaa mangapai kuti gupai i atungusaha.
-
Ya mo mo nagunde agunde tipa ka tungusa gupai mo nawirikihe? Tipagine mo agundenga ti ni, watadu tipagine mo agundenga ti ni ya?
Mo bi gu VIDIO re, na tifuoho, mo ki sakipai tipa gu sanahe ngbefuoho.
-
Waigu gi paranga aDezire Yekova re adi be gayo gunde?
Mo gedi Yesaya 41:10, na tifuoho, mo ki sakipai tipa gi sanahe re:
-
Ho mo agunde ni be tungusapai, waigu rengbe kparakpee ka undo ro?
Ya mo mo iningo gipai re?
Badungu aDezire Yekova anaaberãha mbata nga, ka i tungusinga wene pangbanga fu kura aboro te. Ni kpiapai, Sergey aabi tiko nga sunge ti ko te, na ki bihe ni bakpakarakpakaraha ka fura na kura aboro. Ono tifuoho, ko awiriki Baibiri. Ko aya: “Wa vura duhe nga mi angia gu boro naagunde agunde, Mi atona fura fu kura aboro tipa gupai mi aawirikaha. Kina ngbare naazere nga fura fu kura aboro tipa Baibiri akiisi gu kido mi adu na ni kuti tire. Si aima nyakasa gu vovo ida mi adu na ni kpotore yo.”
4. Mo du ni boro irisa
Ho mo atungusa wene pangbanga ni, ka mo berãnga kina gupai sa mo nika pehe ya ono wai mo nika pehe a. Mo gedi 2 Timoteo 2:24, na 1 Petero 3:15, na tifuoho, mo ki sakipai tipa agi asanahe re:
-
Waigu rengbe mo ka mangapai kuti agi averesi re ho mo afura ni fu kura aboro tipa Baibiri?
-
Ka si du nga bete gamo aborokporo watadu abakureamo arengbanga ka ida kuti gupai mo apehe te. Ginipai rengbe mo ka mangaha? Ginipai si aidanga mo mangihe ya?
-
Tipagine duhe ti ni ni wenepai ka mangasunge na asasanahe rogo birĩ yo kuba gupai nga ka pe kina gupai fu aboro si aida i idi kutini?
5. Tungusa wene pangbanga naye na ngbarago
Yekova afu gu sunge fu Yesu nga ga tungusa wene pangbanga. Wai du Yesu aabi gu sunge re? Mo gedi Yoane 4:34, na tifuoho, mo ki sakipai tipa agi asanahe re:
-
Ri wene riahe naundo raka rani na kini sa rani ani du na ngbarago. Tipagine du Yesu aringbisi manga gupai Mbori akpinyemuhe ti ni—kodihe na tungusa wene pangbanga—kuti ri riahe?
-
Gini ngbarago mo aberã ha nga si rengbe ka ye mbiko tungusa wene pangbanga?
Aberãpai
-
Ti regbo gu dunguratise nga ga bebere poso, mo ngere tipa agu agene rengbe mo ka tona fugo na aboro ngbaha.
-
Mo berẽpa rimo gu sukuru ninaamanga ti regbo gu dunguratise nga ga bebere poso. Gu paparaha nga ga agude sukuru ima rengba ka undo ro tipa mo mbakadi tiro ka pe agu apai mo awirikaha fu kura aboro.
-
Mo mangisunge na agu afugo du rogo papara gi buku re nga “Gu Kura Aboro Nape Gupai Nga” watadu “Kura Boro Ima Rengba ka Sanahe Nga” tipa ka wirika wai rengbe mo ka karagapai kuti dungu asanahe na fu agu aboro na ka rengo.
GU KURA BORO IMA RENGBA KA SANAHE NGA: “Gini avovoho tie?”
-
Waigu mo narengbe ka mangasunge na gi momu re tipa ka pe gupai fu boro mo nawirikihe ti regbo gamo wisigo Baibiri?
GINIPAI MO NAWIRIKIHE?
Tungusa wene pangbanga fu kura aboro naye na ngbarago, na ho mo atona tungusaha ni, si ima rengba ka du taata ki susi wai mo aberãha.
Fugöpai
-
Tipagine si aida mo tungusi wene pangbanga ti ni fu kura aboro?
-
Waigu rengbe mo ka mangaha rogo irisa?
-
Waigu rengbe mo ka dia be ai gu gunde rengbe mo ka du na ni tipa tungusapai?
MO WETEKE GU KURA APAI
Mo bingo taata agene biama nga gu rengbe mo ka tungusa wene pangbanga ngbaha ni manga mo sunge na karte nayugo bara jw.org.
Mo wiriki asino biama nga gu rengbe ka undo ro mo tungusi wene pangbanga.
“Ya Mo Mo Mbakadi Tiro ka Da ni Ba Zi Aboro?” (Ngbaõbambu Sinziri, Mbirinvuo 2020)
Mo bingo wai gu kpiapai du rogo Baibiri narengbe ka ngarasa rani ani tungusi wene pangbanga ka si vura du vurũ nga paranga aboro nga ani.
Mo bi wai rengbe mo kaa fura tipa Baibiri fu gu gamo aborokporo awirikanga pai tipa Yekova ya.
“Wai ka Zio Ngbadu Agu Agumero Angianga Ndikidi Aidipase Ya” (Ngbaõbambu Sinziri, Marungu 15, 2014)
