Wene Awirinarani nga Akumba na Adee:

Nyemuse tipa Mbori na tipa aboro nafõngbadurani yo ani “ndú . . . ki sa arikaaboro dunduko ni abawiriki, kini bapatizi yo.” (Mat. 28:19, 20; Mk. 12:28-31) Gu nyemuse zanga gbangbati na ome ti ni. Si ima rengba ka zio ngbadu agu aboro yo nga “aguyo i aima ringbisa yo sa nyenye unga.”​—Amokedi 13:48.

Mbata kusayo, ani anaagbe berãrani gbe kuti wai ka tingida kpia wai ka tungusapai gbiati mbu awaraga fu aboro. Ono awere, si naida ani mangi ome gbe ka mbakada gaani gene abirĩ nga ga fugodagbase. Si naida ani yugu nyemuse fu aboro ni fura ani tipa agu apai du yo na nyemuhe. Gipai re nayugo gupai nga si naida ani du ni agu aboro akonganga kina kuti bangisapai ya, ono ni agu aboro na wisigo agu abakabangirise sirisiri nga ga aboro ni basasa gbiati gayo nyemuapai. Waigu gi burosua re nika undo rani ani mangi gupai re?

Gi burosua re na awirikapai rogoho 12 nga gu nayugo agu asino si aida ani sonosihe tipa ka yugo nyemuse na ka sa aboro ni abawiriki. Awirikapai nibasasa du mburuhe rii gu pangbanga nga ga Baibiri nga gu Yesu watadu gu kura batungusi wene pangbanga naadu rogo bambata sa kama agarã ayugu kparakpara sino rogoho gene tungusapai yo. Gaha sásá nga kaa tingida akpia wai ka tungusapai te, ono ka ngera tipa agu agene rengbe ani ka yugo gaani nyemuse tipa aboro ngbaha. Wa vura duhe nga agi asino re nibasasa si aidaha tipa apapara gaani asunge tungusapai dunduko, ani nika wisigopai tipa wai du padu ani na kura bete asino na nyanyakipaha ho ani atona fugodagbase ni na boro, ho ani amanga karagatise ni fuo boro, watadu ho ani awisigo Baibiri ni na boro.

A wa mo nikaa wisigo awirikapai ni basasa, mo berẽ wenengai tipa wai rengbe mo ka yugo gu sino re ho mo afura ni na aboro rogo gamo dagbarago. Mo mangi ome ka nyakasa gamo nyemuse tipa Yekova na tipa aboro. Gu nyemuse re, nga gu paha naima nyaka kisusi gu kparakpara abirĩ rengbe mo kadu na ni, nika sa ro mo da ti gu gamo sásá nga ga sa aboro ni abawiriki.

Ani na tambuahe tipa gu bakerepa momu du ani na ni ka mangasunge na oni kubekube. (Zef. 3:9) Yekova funga amaku afu furoni kpaima wa oni andu kumbatayo kindi kaa kpinyemu aboro na kini sa yo ni abawiriki!