1. Gini kparakpee ani ka sakapai tipaha awere?

AMIRIONI aboro ima ino gu kparakpee i ayambaha nga Barani watadu ga Gbia Kpee. Yesu amangisunge na gi kparakpee re tipa ka yugo wai si aida gako abawiriki kpari. Gini apai ko akpari tipaha? Na tipagine du gi kpee re ti ni na nyanyakipaha furani areme?

2. Gini nyanyakipa apai biata Yesu arugu rani ani nikpari tipaha?

² Yesu aya: “Oni kpári wa gere tie: Barani du ngbangbaturũ yo, Ani írisi rimoro airisa. Ga ngbi yé, Ani mángi rogo kpotosende wa mo akpi nyemu he, wa du he ngbangbaturũ yo.” (Mo gedi Matayo 6:9-13.) Tipagine Yesu arugu rani ti ni ani ni kpari tipa agu apai du biata re?—Mo bi gu 20 rukutu kekeapai du ti digido gi buku re.

3. Gini apai si aida ani inihe tipa ga Mbori Kindo?

³ Ani aima wirika gupai nga rimo Mbori nga Yekova. Na ani aima wisigopai tipa gupai Mbori akpinyemuhe tipa aboro na tipa kpotosende a. Ono ginipai Yesu aaida ka gumbaha ho ko aya ni wẽ: “Ga ngbi yé”? Ani nika wirikapai tipa ka ino ga Mbori Kindo, gupai si nika mangaha, na wai si nika ziasi rimo Mbori.

4. Ga Mbori Kindo nga gine, na da nga gaha Bakindo?

⁴ Yekova ima sigira gu zogarago nga ga ngbangbaturũ na ki sia Yesu ni gaha Bakindo. Baibiri nayamba gi zogarago re nga Ga Mbori Kindo. Yesu nga “bakindo ri abakindo, Gbia ri agbia.” (1 Timoteo 6:15) Yesu na rengba beko tipa ka manga wenepai kisusi agu abazogo  dunduko naatona ka zogarago, na ko ima du na ome kisusi agu abazogo nga wiri aboro.

5. Wari du ga Mbori Kindo azogarago ni? Na si nika zogarago kuri gine?

⁵ Yesu aga ku ngbangbaturũ yo tingbafuo arame biama bawe fuo zingako be kpio. Niyangaraha, Yekova amoi ko ni Bakindo ga Mbori Kindo. (Amokedi 2:33) Ga Mbori zogarago nika zogarago ngbangbaturũ yo ku auru kpotosende ane. (Yugoti 11:15) Gere nga ndu gupai Baibiri ayamba ga Mbori Kindo ti ni nga gu “ngbi [Kindo] du ngbangbaturũ yo.”—2 Timoteo 4:18.

6, 7. Gini apai nasa Yesu ko du ni wene bakindo kisusi agu abakindo nga awiri aboro?

⁶ Baibiri naya Yesu nga gu boro kiipa ni kisusi agu abakindo dunduko nga wiri aboro bambiko “kina ko sa ka akpi nga ya.” (1 Timoteo 6:16) Abazogo dunduko ninaakpi akpi, ono kina Yesu sa nika kpingo ya. Gu weneapai dunduko Yesu nika mangaha tipa rani nika nye anye kindi.

⁷ Gu sangbaanebi nga ga Baibiri naya Yesu nika du ni gu Bakindo du na nunga aboro tiko: “Ga Yekova Toro anyé ri ko, gu toro nga ga tatamana nga toro rugatinapai, nga toro rugapai nga toro tandu, nga toro inahe nga toro gunde ti Yekova. Gako ngbarago adú rogo pa gunde ti Yekova. Ko asápa nga ngbanga kuti bi pai ni bangiriko te, watadu za pai mbiko gia pai ni tuko a te; ono ko asára ngbanga rungorungo aboro na rurupai.” (Yesaya 11:2-4) Ya mo anga ngbatunga gu bakindo re mo aida na ni te?

8. Wai du ini ani he nga Yesu azoganga rago nisako te?

⁸ Mbori ima sia wiri aboro i zogorago na Yesu ngbangbaturũ yo. Ni kpiapai, gu mokedi nangia Pauro aya fu Timoteo wẽ: “Ka ani ru fu pai, ani azoga rago a na ko.” (2 Timoteo 2:12) Bange aboro wai nika zogarago ni abakindo na Yesu?

9. Bange aboro wai nika zogarago na Yesu? Na ti gini regbo du Mbori atona ka sia yo ti ni?

 ⁹ A wa ani awirikihe rogo Kapita 7, gu mokedi nangia Yoane abi yuguyugupai nga gu Yesu adu rogoho ni Bakindo ngbangbaturũ yo na kura abakindo fuoko nga 144,000. Ada nga agu aboro du bangeyo nga 144,000 re? Yoane asakipai tipa yo nga i nga aguyo “du na rimoko [Yesu] ni keke he ti ngbanda kpakpuyo, na rimo Bako a.” Ko agbia gu kurapai kutini nga: “Agi yo re nga agu yo naapeka Wiri Kandoro [nga Yesu] ku ho ko andu ku ho ni dunduko. I atumo agi yo dagba aboro yo re.” (Mo gedi Yugoti 14:1, 4.) Agu aboro du bangeyo nga 144,000 re nga gu ruru aKristano Mbori nasia yo i “nizogo rago [ku] auru kpotosende” na Yesu. Ho i akpi ni, i nazingisa yo nibasa i ga ku ngbangbaturũ yo. (Yugoti 5:10) Natona ti rago amokedi, Yekova aima digo nisia gako ruru aKristano tipa i du ni papara gu riko nga ga agu abakindo du bangeyo nga 144,000 re.

10. Tipagine du duhe ti ni ni wenepai Yekova sia Yesu na agu aboro du bangeyo nga 144,000 i zogorago kurii wiri aboro?

¹⁰ Yekova na berãpa rani aberã ni bakerehe si du ko namangi mbakadapai ti ni tipa aboro zogorago na Yesu. Yesu nika du ni wene bazogo mbiko ko ima rugatiko na ani wenengai. Ko ima ino wai du gu raka nga ga aboro na gu rungo i arungo ho. Pauro aya Yesu naberãpa rani aberã, ko rengbe arengba ka ‘rungo na ani rogo gaani arungbura,’ na “i aima asada ko rogo apai dunduko wa kina rani.” (AEbere 4:15; 5:8) Agu aboro du bangeyo nga 144,000 re, i ima inopa gu raka a nga ga aboro. Na i ima sota na zangarengba gbiati akaza. Sidu, ani ima rengba kadu na gu kido nga Yesu na agu aboro du bangeyo nga 144,000 ima rugatiyo na pa wai du ani gbiati agu akpakarapai ani agbiatirani na ni.

11. Tipagine Yesu ayugupai ti ni fu gako abawiriki i kpari tipa gupai Mbori akpinyemuhe mangi ngbangbaturũ yo?

¹¹ Yesu ayugupai fu apefuoko i nikpari tipa gupai Mbori akpinyemuhe mangi auru kpotosende wa duhe ngbangbaturũ yo. Tipagine? Ani awirikipai rogo Kapita 3 nga Satana Bakitingbanga asamungu kuti Yekova. Tingbafuo Satana samungu, Yekova ambu gene fuko na gako gbegberẽ amaraika watadu adaimona i raki ngbangbaturũ yo tipa bete regbo. Sidu, anga agu amaraika dũ naadu ngbangbaturũ yo naamanga gupai Mbori aakpinyemuhe te. Rogo Kapita 10, ani nika wirika badungu apai yo tipa Satana na adaimona.

12. Gini ngbatunga nyanyakipa apai ue furayo tipaha rogo gu buku nga Yugoti 12:10?

¹² Baibiri nagumba gupai nga ngbutuko tifuo Yesu da ni Bakindo ga Mbori Kindo, ko asovura kuti Satana. (Mo gedi Yugoti 12:7-10.) Veresi 10 nasakapai tipa nyanyakipa apai ue. Ga Mbori Kindo atona ka zogarago na Yesu kidu ni gaha Bakindo, na i ki ba Satana ngbangbaturũ yo ku auru kpotosende no. A wa ani ka wirikaha, agi apai re aima manga.

13. Ginipai namangi ngbangbaturũ yo fuo do yo Satana yo kusayo?

¹³ Baibiri napepa gu ngbarago ruru amaraika adu na ni tingbafuo i do Satana na gako adaimona ngbangbaturũ yo kusayo. Ani nagedapai nga: “Ako angbangbaturũ, si du ka oni ngi angi ti ni, na agu roni naraka rogo ho!” (Yugoti 12:12) Bakere zereda na kodatise du awere ngbangbaturũ yo bambiko agu aboro dunduko du yo namanga gupai Mbori akpinyemuhe.

14. Ginipai namanga auru kpotosende no mbiko wa i aba Satana kono?

¹⁴ Ono raka auru kpotosende ane tigaha kia. Kere  gbegberẽ apai namanga aboro “bambiko bakitingbanga zorõ” kono na ko na “bakere zinga, bambiko ko ini he ya kina bete rago nye fu ko.” (Yugoti 12:12) Satana na bakere zinga. I aima do ko ngbangbaturũ yo, na ko ima inoho nga i nika gbarasa ko barambeda. Ko namanga ngbatunga apai dunduko tipa ka ye na kpakarapai, aima na arungo ku auru kpotosende no.

15. Ga Mbori ringbisapai tipa kpotosende nga gine?

¹⁵ Ono ga Mbori ringbisapai tipa kpotosende aˈarianga tihe te. Ko kindi nakpinyemu gupai nga rengberengbe aboro raki rogo Paradizo auru kpotosende. (Atambuahe 37:29) Wai du ga Mbori Kindo nika sa gipai re si mangi?

16, 17. Gini apai Daniere 2:44 agumbaha furani tipa ga Mbori Kindo?

¹⁶ Gu sangbanebi du rogo Daniere 2:44 naya: “Rago agu abakindo re Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.” Ginipai gu sangbanebi re ayugoho furani tipa ga Mbori Kindo?

¹⁷ Bambatapai nga, si nape gupai furani nga ga Mbori Kindo nika tona zogarago “rago agu abakindo re.” Gere nayugo gupai nga gu kura azogarago nika duadu auru kpotosende ane tigu regbo ga Mbori Kindo nika tona zogarago ti ni. Uepai nga, si nagumba gupai furani nga ga Mbori Kindo nika nyeanye kindi na kura zogarago ho nika diabaha te. Na biatapai nga, vura nika du dagba ga Mbori Kindo na agu azogarago nga ga gi zegino re. Ga Mbori Kindo nika du na diabese na kinaha nika ngia gu bangisa zogarago nika du auru kpotosende. Si du tie, aboro nika du na gu bawene zogarago ngba kisusi.

18. Rimo gu yangara vura nika du dagba ga Mbori zogarago na gu zogarago nga gi zegino re nga gine?

 ¹⁸ Wai du ga Mbori Kindo nika diabe agu azogarago nga ga kpotosende? Mbata fu gu yangara vura nga gu i ayambaha nga Aramegido, adaimona nika nanga “abakindo zegino dunduko ka dungura yo sa gu vura nga ga gu bakere rago nga ga Mbori, nga gu ko du na tandu apai dũ.” Nirengo, gu zogarago nga ga aboro nika sovura kuti ga Mbori Kindo.—Yugoti 16:14, 16; mo bi gu 10 rukutu kekeapai duti digido gi buku re.

19, 20. Tipagine du ani aida ga Mbori Kindo zogorago ye ti ni ku auru kpotosende?

¹⁹ Tipagine du ani aida na ga Mbori Kindo ti ni? Tipa nduapai biata. Bambataha nga, ani nga aboro ingapai, ani nawoka na kini kpiki. Ono Baibiri naya tii ga Mbori zogarago, ani nika raka nyeanye kindi. Nirengo, Yoane 3:16 naya: “Bambiko Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”

²⁰ Gu ue ndupai ani aida ga Mbori Kindo ti ni nga gbegberẽ aboro ke rani ake kirikiri. Badunguyo na gumba ziree, na biriko rani na aguyo kini raki wasiwasi raka. Pai ho rengbe ani ka mangaha tipa ka dia yo kusayo te, ono Mbori nika dia yo kusayo. Agu aboro nye kindi kaa manga gbegberẽ apai, i nika gbarasayo agbarasa kusayo ti regbo gu vura nga Aramegido. (Mo gedi Atambuahe 37:10.) Gu biata ndupai ani aida ga Mbori Kindo ti ni nga gu zogarago nga ga aboro anyakanga te, si ni gbegberẽ he watadu na iraira mangaapai rogoho. I na nyemu ka undo aboro tipa i gisangba Mbori te. Baibiri nagumba gupai nga ‘boro ni gbia kurii kura ni ka imisa ni.’—Batungusipai 8:9.

21. Wai du ga Mbori Kindo nika sa gupai Mbori akpinyemuhe si mangi auru kpotosende ane?

 ²¹ Tingbafuo Aramegido, ga Mbori Kindo nika sa gupai Mbori akpinyemuhe mangi auru kpotosende. Ni kpiapai, si nika dia Satana kusayo na gako adaimona. (Yugoti 20:1-3) Niyangaraha, boro ho nika woka watadu nika kpi te. Bambiko ga Yesu motumo, ruru aboro dunduko nika raka nyeanye kindi rogo Paradizo auru kpotosende ane. (Yugoti 22:1-3) Ga Mbori Kindo nika ziasi rimo Mbori. Ginipai gipai re ayugoho? Si nayugo gupai nga ho ga Mbori Kindo nika zogarago ni ku auru kpotosende ane, aboro dunduko nika irisa rimo Yekova.—Mo bi gu 21 rukutu kekeapai duti digido gi buku re.

22. Wai du ini ani he nga Yesu aadanga ni Bakindo nibasa ho ko adu ni auru kpotosende ane watadu nibasa fuo zingako be kpio te?

²² Yesu ayugupai fu apefuoko i kpari ki ya: “Ga ngbi yé.” Si adu ziazia nga ga Mbori zogarago nika yeaye kumbatayo. Si adu nga Yekova nika sigira gako zogarago mbata na ki moi Yesu ni gaha Bakindo. Ya mo i amoi Yesu ni Bakindo nibasa fuo gako ku ngbangbaturũ yo? Oó, si adu nga si nika ida ko sungudi mbata. Kusa fuo zinga Yesu be kpio, aPetero na Pauro ayugu gipai re gbaiga  ho i aringbisi gu sangbanebi ni du rogo Atambuahe 110:1 kuti Yesu. Rogo gu sangbanebi re, Yekova aya: “Mo sungu ku kumbabere daho mi ka maa avuraro ni ku tii nduro yo wa gbada.” (Amokedi 2:32-35; AEbere 10:12, 13) Si adu nga Yesu nika sungudo tipa Bagizo regbo wai mbata fu Yekova moi ko ni Bakindo?

23. (a) Gini regbo du Yesu atona zogarago ni Bakindo ga Mbori Kindo ti ni? (b) Ginipai ani nika wirikaha rogo gu kapita ngbefuo gere?

²³ Badungu agarã kusayo mbata fu gu garã nangia 1914, badona nga ga ruru aKristano aima rugatiyo na gupai nga gu garã re nika ngia nyanyakipa garã nga ga sangbaanebi. Agu apai natona ka manga rogo zegino tona rogo 1914 ima yugoho nga gayo pai angia rengo. Gu garã re du Yesu atona ka zogarago ni Bakindo ti ni. (Atambuahe 110:2) Fuoho aturongo te i ki ba Satana ku auru kpotosende ane, na awere “kina bete rago nye fu ko.” (Yugoti 12:12) Rogo gu kapita ngbefuo gere, ani nika bi badungu apai yo nayugoho nga ani naraka ti gu regbo re. Ani nika wirika gupai a nga barambeda ga Mbori Kindo nika sa gupai Mbori akpinyemuhe mangi auru kpotosende ane.—Mo bi gu 22 rukutu kekeapai duti digido gi buku re.