1, 2. Tipagine mo abihe ti ni nga kparakpee nga kparakpara momu, na tipagine ani aida ka ino gupai ti ni Baibiri ayugoho tipaha?

KA I ringbisi kpotosende na zegino, kpotosende ni wiri umbaha. Ho Yekova angerani ku auru kpotosende no, ko nabi gu rikaaboro dunduko du auru he wakina togoro ime ku akoro yo. (Atambuahe 115:15; Yesaya 40:15) Wa vura duhe nga ani ni wiri tooni rani ringbisihe kuti zegino, Atambuahe 145:18, 19 naya: “Yekova du mbembedi na agu yo dunduko nakpara fu ko, na agu yo dunduko ninakpara fu ko ni rengo. Ko nadigisa gu nyemuahe nga ga agu yo nagunde ti ko; ko nagia gayo kpe ku ari a, ki nibatasi yo.” Nairiwo gu bawene momu du berani re! Yekova nga gu Bakusiahe du na tandu apai dũ, ko naida kadu mbembedi na ani, na ko naida ka degatuko sa gaani akparakpee. Nirengo, kparakpee nga momu, nga gu kparakpara momu ko nafuhe furani ni basasa.

² Ono Yekova rengbe ka degatuko furani kina gu ka ani akpara fuko ngba gu gene ko aida na ni. Wai du rengbe ani ka manga gipai re? Ani bingo gupai Baibiri agumbaha tipa kparakpee.

3. Tipagine si aida ani kpari ti ni fu Yekova?

³ Yekova naida mo kpari fuko watadu ka fura na ko. Wai du ini ani gipai re? Mo gedinga AFiripoio 4:6, 7. Mo berẽnga kina pa ngbatunga gu yambahe re. Bazogo gi haurago re na nyemuro ni bakerehe na ko naida mo pepa gu bipai du mo na ni tipa gamo akpakarapai fuko.

4. Wai du pa kpara mo fu Yekova dedede anyakasa gamo pagume na ko?

 ⁴ Kparakpee naundo rani ani du na mbembedi pagume na Yekova. Ho abakure apeka pa agu apai ni du berãyo yo, gayo abakabangirise, na abipai, gayo pabakure nada ni nyanyakihe. Kina gu bangisapai re du tipa kpara fu Yekova. Vurube Baibiri, ko napeka pa gako aberãpai furani, na kini pepa gupai ko nika mangaha kumbatayo. Mo rengbe arengba ka pekapa gamo fudifudiapai rogo kparakpee yo fuko dedede. Wa mo nikaa manga gipai re, gamo pabakure na Yekova nika da ni nyanyakihe.—Yakoba 4:8.

5. Wai du ini ani he nga Yekova adeganga tuko sa akparakpee dunduko te?

⁵ Ya mo Mbori nadegatuko sa akparakpee dunduko? Oó, ko adeganga tuko sa ni dunduko te. Ti rago gu nebi nangia Yesaya, Yekova aya fu aYisaraere wẽ: “Ho oni ka nikpári kpe ni ni dungu he, mi ayé nga ture sa ni te; beroni yo hi be kure.” (Yesaya 1:15) Sidu, ka ani adunga na rubangirise ya, ani ima rengba ka manga agu apai rengbe ka  turuso rani ti Yekova, na ki sa ko ko zanga degatuko sa gaani akparakpee.

6. Tipagine du idapase ti ni na nyanyakipaha? Wai du rengbe mo ka yugoho nga idapase kina tiro?

⁶ Ka ani aida Yekova degetuko kuti gaani akparakpee, ani du wa ka ani du na idapase kuti ko. (Marako 11:24) Gu mokedi nangia Pauro aya: “Zanga idapase ga boro pai arengba nga na ngba bangiri Mbori te, bambiko gu ni naye koyo du Mbori ni gani pai nga ida ya Mbori kina ho, ko nafu mosoro fu agu yo nagbata ko.” (AEbere 11:6) Ono anga si naida ani ya gbua wẽ ani na idapase te. Si naida ani yugu gaani idapase gbaiga ni gia ani sangba Yekova na aˈuru dunduko.—Mo gedi Yakoba 2:26.

7. (a) Tipagine si aida ani du ti ni na umbasitise gbiati irisa ho ani akpara ni fu Yekova? (b) Wai du rengbe ani ka yugoho nga ani nape kina rengo ho ani akpara ni?

⁷ Si naida ani du na umbasitise gbiati irisa ho ani akpara ni fu Yekova. Tipagine? Ho ani afura ni na bakindo watadu bazogo, ani nafura na ni rogo irisa yo. Yekova nga gu Mbori Duna Tanduapai Dũ, ya mo si aidanga ani yugu bakere irisa na bakere umbasitise ho ani afura ni na ko te? (Bambata Pai 17:1; Atambuahe 138:6) Si naida ani pe kina rengo na kini fura na Yekova kina boro kpotoraniyo, angianga kaa dogoda kina bangisapai ti aregbo dunduko ya.—Matayo 6:7, 8.

8. Ho ani akpara ni tipa pai, gini kurapai si aida ani mangihe?

⁸ Ni yangaraha, ho ani akpara ni tipa he, si naida ani mangi ome ni bakerehe tipa ka mangasunge tipa guhe ani akpara tipaha re. Ni kpiapai, ka si du nga ani kpari fu Yekova ko fu agu ahe du ani na zingoho na aˈuru dunduko, si aidanga ani du na nyomoro kini berẽhe nga Yekova nika fu agu ahe dunduko furani ani aidaha si ki vura du nga gene kina berani tipa ka mangasunge tipaha ya te. Si naida ani mangisunge nyanyaki na ki idi ka manga agu asunge dunduko rengbe ani ka gbiaha. (Matayo 6:11; 2 ATesaroniko 3:10) Watadu  ka si du nga ani kpari fu Yekova tipa ko undo rani ani mbu manga gupai du ni gbegberẽhe, si naida ani ne agu apai dunduko rengbe kadu ni asada furani. (AKorosaio 3:5) Awere tie, ani wisigingo bete agu asanahe dungu aboro naasanaha tipa kparakpee.

9. Da du si aida ani kpari funi? Ginipai Yoane 14:6 ayugoho furani tipa kparakpee?

⁹ Da du si aida ani kpari funi? Yesu ayugupai fu apefuoko i kpari fu “Barani du ngbangbaturũ yo.” (Matayo 6:9) Ko ape kurapai nga: “Mi nga gene, nga rengo, nga unga a; a nga boro sa ka ye koyo du Buba ni gbua te, kina mbiko re.” (Yoane 14:6) Sidu, si naida ani kpari fu kina Yekova sa rogo rimo Yesu yo. Kpara rogo rimo Yesu yo nayugo gine? Tipa Yekova idi na gaani kpee, si naida ani yugu irisa kuti gu kparakpara sunge Yekova nafuhe fu Yesu. A wa ani awirikihe, Yesu aye ku auru kpotosende tipa ka batasa rani be kpio. (Yoane 3:16; ARomo 5:12) Yekova ima sia Yesu a ko du ni Gbiamotumo na ni Basapungbanga.—Yoane 5:22; AEbere 6:20.

10. Ya mo kparakpara gene kinaho si aida ani kpari ngbaha? Mo sakingo rogo yo.

¹⁰ Ya mo kparakpara gene kinaho si aida ani kpari ngbaha? Oó, Yekova asananga rani tipa ani kuku, sungu, watadu ka ru kuari ho ani akpara ni te. Baibiri nayugo gupai furani nga si naida ani fura na Yekova ngba gu gene du ni iriirihe. (1 Pekapai 17:16; Nemaya 8:6; Daniere 6:10; Marako 11:25) Anga gupai nyakipaha fu Yekova nga gu gene ru ani, kuku ani, watadu sungu ani ngbaha tipa ka kpara te, ono si naida ani fura na ko na gu bipai du ni ruruhe. Ani rengbe ka kpara na fugo rani kuari watadu kusende ti aregbo dunduko uru watadu yuru. Ho ani akpara ni fu Yekova si naida ani du na gu kido nga ko agia rani agia zavura ho kura aboro adeganga tuyo ni furani ya.—Nemaya 2:1-6.

11. Gini bete apai duho rengbe ani ka fura na Yekova tipaha?

 ¹¹ Ginipai si aida ani kpari tipaha? Ani rengbe ka kpara tipa agu apai dunduko Yekova aida na ni. Baibiri naya: “Ani ini ka ani ho gu he ku sangba gako nyemuhe yo, ko gi pa rani agia.” (1 Yoane 5:14) Ya mo ani rengbe arengba ka kpara tipa agu apai nabi rani? Ii. Si naida kpara fu Yekova du wa fura na wene bakure. Ani rengbe ka pe agu apai dunduko du rirani yo watadu kpotorani yo fu Yekova. (Atambuahe 62:8) Ani rengbe ka kpara fuko ko fu gako ziazia toro furani tipa si undo rani ani mangi gupai du niruru he. (Ruka 11:13) Ani rengbe arengba a ka kpara fu Yekova ko fu tatamana furani ani mangi ruru adiaberã, na ani rengbe arengba ka kpara fuko ko fu ome furani ani hi akpakarapai a. (Yakoba 1:5) Si naida ani sana Yekova a ko mbupai furani ti gaani ingapai. (AEfeso 1:3, 7) Si naida ani kpari a tipa kura aboro, kodihe na gaani aborokporo na awirinarani rogo dungurati.—Amokedi 12:5; AKorosaio 4:12.

12. Ginipai si aida paha nyaki rogo gaani kparakpee yo?

¹² Ginipai si aida paha nyaki gbe rogo gaani kparakpee yo? Yekova gbiati gupai ko akpinyemuhe. Si naida ani tambuako kina boro kpotoraniyo tipa gu wene apai dunduko mangi ko ho furani. (1 Pekapai 29:10-13) Ani ini gipai re mbiko ho Yesu adu ni auru kpotosende ane, ko ayugu wai si aida gako abawiriki ni kpari. (Mo gedi Matayo 6:9-13.) Ko aya si naida i kpari mbata tipa rimo Mbori du ni taasitaasi he, nga aboro nibihe ni ziaziaha. Fuo gure, Yesu ayugu gupai nga si naida ani kpari tipa ga Mbori Kindo ye na tipa gupai Mbori akpinyemuhe mangi auru kpotosende ane. Fuo fura Yesu tipa gu nyanyakipa apai re dũ, ko kini ru kusa ka ya ani rengbe arengba a ka kpara tipa gaani azingo. Ho ani aperesa pa Yekova ni na gupai ko akpinyemuhe mbatayo rogo gaani kparakpee yo, gure nga ani nayugo gupai nyakipaha furani.

13. Si naida bagizo gaani kparakpee du wai?

 ¹³ Si naida bagizo gaani kparakpee du wai? Baibiri afuranga tipaha te. Gaani kparakpee rengbe kadu ni gbangaha watadu ni guruhe, ringbisihe kina kuti gupai namanga rani. Ni kpiapai, ani rengbe ka manga wiri guru kparakpee ho ani ari riahe ni ono ki mangi gbanga kparakpee ho ani atambua Yekova ni watadu ho ani apepa gaani abakabangirise ni fuko. (1 Samuere 1:12, 15) Ani aidanga ka manga gbanga kparakpee tipa aboro bi rani na ni nga ani ini ka kpara  wenengai, a wa aboro anaamangaha ti rago Yesu te. (Ruka 20:46, 47) Rago angbanga ti Yekova na agu aboro namanga ngbatunga agu akparakpee re te. Gupai Yekova aida na ni nga ani peke kina boro agu apai naye kpotoraniyo.

14. Si naida ani kpari bara wai, na ginipai si ayugoho furani tipa Yekova?

¹⁴ Si naida ani kpari bara wai? Yekova naida ani kpari fuko dedede. Baibiri naya ani “kpatagara kuti kpe kindi,” na ka ani “pirigi nga ti kpara kpe ya.” (ARomo 12:12; 1 ATesaroniko 5:17) Yekova ti aregbo dunduko regerege tipa ka degatuko furani. Ani rengbe arengba ka tambuako na aregbo dunduko tipa gako nyemuse gbiati gu sino nga ga gamahe. Ani rengbe arengba a ka sana ko tipa gako ngbembatayo, ome gbiati ko fu wasa furani. Ka si du nga ani nabi gu momu du berani nga ga fura na Yekova na nyanyakipaha, ani rengbe ka manga apai dunduko tipa ka fura na ko.

15. Tipagine si aida ani ya “amina” ti ni ti digido kparakpee?

 ¹⁵ Tipagine si aida ani ya “amina” ti ni ti digido kparakpee? Gu fugo nga “amina” rogoyo nga “nirengo” watadu “si mangi kinawo.” Gure wa ka i ya ani ima ida kuti gupai pe ani he rogo gaani kparakpee yo nga kina rengo du. (Atambuahe 41:13) Baibiri nayugo gupai furani a nga si ni wenepai ka ya “amina,” singia ku kpotorani yo watadu kuari, ti gu regbo boro namangi kparakpee dagba dungu aboro tipa ka yugo na ni nga ani ima ida kuti gupai pe ni he re.—1 Pekapai 16:36; 1 AKorindo 14:16.

16. Ya mo Yekova nakaragapai nzunzu kuti gaani akparakpee? Mo sakingo rogo yo.

¹⁶ Ya mo Yekova nakaragapai nzunzu kuti gaani akparakpee? Ii, ko namangaha amanga. Baibiri naya tipa ko wẽ ko “ninagia kpetambuahe!” (Atambuahe 65:2) Yekova nagia gu kpee agia nga ga aboro na kini karagapai fu gu amirioni aboro du na ruru kpotoyo yo na ko namangaha rogo dungu agene yo.

17. Wai du Yekova amangasunge na gako amaraika gbiati gako amoyambu auru kpotosende ka karagapai kuti gaani akpee?

¹⁷ Yekova namangasunge na gako amaraika gbiati gako amoyambu auru kpotosende ane tipa ka karagapai kuti gaani akpee. (AEbere 1:13, 14) Dungu akpiapai duho nga ga agu aboro nakpari tipa undo ka giarogo Baibiri yo na ngbutuko fuo gayo kparakpee Dezire Yekova ki ye ka bi yo. Baibiri nayugo gupai nga amaraika natungusa “nyenye pangbanga” auru kpotosende dunduko. (Mo gedi Yugoti 14:6.) Na berewe a, dungu rani naaima kpara fu Yekova tipa pai watadu zingo na fuo gure ani ki gbia undo be agu awirina nga aKristano.—Asanza 12:25; Yakoba 2:16.

18. Wai du Yekova amangasunge na gako ziazia toro gbiati Baibiri tipa ka karagapai kuti gaani akparakpee?

 ¹⁸ Yekova namangasunge na gako ziazia toro tipa ka karagapai kuti gaani akparakpee. Ho ani akpara ni tipa undo ka sovura kuti kpakaraapai, ko ima rengba ka fu gako ziazia toro tipa si ngbembatayo furani na ki fu ome furani. (2 AKorindo 4:7) Yekova namangasunge na Baibiri a tipa ka karagapai kuti gaani akparakpee na ka undo rani ani mangi ruru diaberã. Ho ani ageda Baibiri ni, ani ima rengba ka gbia gu veresi rengbe ka undo rani. Yekova ima rengba ka ngarasa boro a badunguratise yo ni pe gupai ani aida ka giaha watadu bakumba rogo dungurati ima rengba ka ngarasa rani rogo Baibiri yo.—AGaratio 6:1.

19. Tipagine rengbehe kadu ti ni ti gu kura aregbo wa Yekova akaraganga pai kuti gaani akpee te?

¹⁹ Ono tie, ti gu kura aregbo, ani ima rengba ka bakabangirani nga, ‘Tipagine Yekova akaraganga pai ti ni kuti gimi kpee ya?’ Mo tingidi gupai nga, ko ima ino wai rengbe ko ka karagapai kuti gaani kparakpee na ti gini regbo. Ko ima ino guhe ani aidaha. Si ima rengba ka ida ani kpatagara kuti kpee ti gu kura aregbo ka yugo na ni nga ani naida gupai re mangi amanga furani nzunzu, na ka yugo na ni a nga ani na idapase kuti ko. (Ruka 11:5-10) Ti gu kura aregbo Yekova na karagapai kuti gaani akpee ngba agu agene ani naaberãnga ha ya. Ni kpiapai, ani ima rengba ka kpara tipa kpakarapai, ono kuba gupai nga ko dihe kusayo, ko ima rengba ka fu ome furani tipa ani hihe.—Mo gedi AFiripoio 4:13.

20. Tipagine si aida ani kpari ti ni fu Yekova dedede?

²⁰ Nairiwo gu wene momu du berani nga ga kpara fu Yekova re! Si naida ani du na kido nga ko nika gia gaani kpee agia. (Atambuahe 145:18) Na ka ani aakpara fu Yekova dedede kina boro kpotoraniyo, gaani pabakure nako nika nyaka ni bakerehe.