1, 2. Gini sanahe si aida mo sana tiro na ni fuo kura mo kusayo rogo zire pambori, na mo naberãha nga tipagine nyakipa gipai re ti ni?

KA MO bi gupai nga boro uka kere he ku rogo gamo guga, si kidu nga ka mo ambiraha kindi, pai gbiaro agbia, ginipai ka mo mangihe? Ya mo mo mbunga mbira gu guga re te? Na ka mo vura mbu mbira gu guga re, mo nibakibangiro abaka kindi nga, ‘Ya mo kaza aziongo re be gu mbiri mi he te?’

² Zire pambori wakina gu guga du na kere he rogoho. Ziazia Kekeapai nayugo gupai nga zire pambori ima gberã be bibiriko ayugopai na mangaapai. (2 AKorindo 6:17) Si du duhe ti ni foro ni nyanyakipa pai mo kuru kusayo rogo ‘gu bakere bakporo nga Babera,’ nga zire apambori. (Yugoti 18:2, 4) Ya mo mo ima kura yo? Ka si duwo, ani natambua ro tipa gupai mo namangihe re. Ono kura apai kinaho si aida mo mangihe fuo gu nga ka kpara tiro ti zire pambori watadu ka kusa rimoro kusayo yo. Fuo manga mo gere, si naida mo sana tiro nga, ‘Ya mo kurapai ho nga ga zire pambori du kindi rogore yo?’ Mo bingo bete akpiapai.

3. (a) Ginipai Ziazia Kekeapai agumbaha tipa mangasunge na kpiaahe, na tipagine rengbehe kadu ti ni ni mbumbupai fu boro ní mbu mangasunge na ni? (b) Ginipai si aida mo mangihe na agu ahe du bero nga gu nabipa zire irisombori?

³ Dungu aboro du na kpiaahe watadu atuka na angbama kpuyo. Ya mo he ho dagba agu ahe re kpuro? Ka si duho, mo rengbe ka berãha nga mo arengbanga ka kpara fu Mbori zangaha te, watadu mo arengbanga ka raka zanga du mo na ni kporo te, bambiko mo nabihe nga si naye na amaku foro. Mo nabihe nga si nga guhe ka mo ambunga ha ya. Ono kina Mbori si aida ani mbuko ko gumbapa gu gene furani si aida ani naairisoko ngbaha, na Ziazia Kekeapai naya wẽ ko aidanga ani naamangasunge na kpiaahe watadu kaa kido kuti agu ahe duwa atuka na angbama te. (Mo gedi Gate 20:4, 5; Atambuahe 115:4-8; Yesaya 42:8; 1 Yoane 5:21) Sidu, mo rengbe ka kakuti ndikidi irisombori ni dia mo agu ahe kusayo nabipa zire irisombori. Si naida mo asadi tiro kaa bi agu ahe re wa gu Yekova abihe. Ko nabihe ni kere “gbegberẽhe.”—Pa Fu Rugute ni Ue he 27:15.

4. (a) Wai ani aino ya iriso atitase nga kungbopai? (b) Tipagine Yekova aza gako aboro ti ni ti asadatise ka fura na kpikpi aboro?

 ⁴ Iriso atitase ima kumuko a rogo dungu zire apambori. Kura aboro naima wirika rengo adumbata na gu ida nga kpikpi aboro kina ti ni naraka rogo gu ngbii nga ga atoro na i rengbe arengba ka undo unga aboro watadu ka mangayo gbegberẽ. Isoke mo anaamanga dungu apai amanga tipa ka sa ngbarago ti agu atitaro naima kpiko. Ono rogo Kapita 6 nga ga gi buku re, mo awiriki gupai nga kpikpi aboro ho ti ni rogo kura ba te. Wiri undo ho ka boro gbiaha ka ní asadi ka fura na yo te. Ai gu pangbanga boro abihe wa si naye be gu gani boro naima kpi, si naye nzunzu be adaimona. Si du Yekova aza aYisaraere ti ni ti asadayo tiyo ka fura na kpikpi aboro watadu ka rimisotise ku rogo gu mangaapai nga ga adaimona.—Mo gedi Pa Fu Rugute ni Ue he 18:10-12.

5. Ginipai si aida mo mangihe ka si du nga mangasunge na kpiaahe watadu iriso atitase nangia sinoro mbata?

⁵ Ka si du nga mo anaamangasunge mbata na kpiaahe watadu mo anaairiso atitaro, ginipai si aida mo mangihe? Si naida mo gedi agu apapara Ziazia Kekeapai nafura tipa wai Mbori abi agu ahe re na mo ki berẽkurii gupai mo agedaha. Mo nikpari fu Yekova na aˈuru dũ tipa gu nyemu kakuti ndikidi irisombori du tiro, na ki sanako ko undoro mo niberẽ wa gu ko aberã.—Yesaya 55:9.

6, 7. (a) Krisimasi nga gu pumbo i naamangaha ki ya i nauda gini uru, na ya mo gu ga Yesu abawiriki naadu mbata anaamanga Krisimasi? (b) Irisa aˈuru-batika angia sino ada ti rago ga Yesu bambata abawiriki?

⁶ Ga boro irisombori rengbe kadu ni bibirikoho ka ní amanga agu apai nabipa agu aˈuru badungu aboro audaha areme. Ani bingo pai tipa Krisimasi. Krisimasi nga  gu pumbo i naamangaha ki ya i nauda gu uru i abatika Yesu Kristo ti ni, na si mbedi kadu nga agu akanisa dunduko naya si nga ga aKristano namanga gi pumbo re. Gopai ho nayugoho nga gu ga Yesu abawiriki naadu rogo bambata sa kama agarã anaauda uru vunga Yesu te. Buku sa naya: “Vuru agu agarã 200 naye fuo vungayo Kristo, boro ho naini gu uru nzunzu i avunguko rogoho te, na ngenga agu aboro naadu na nyemu ka ino gu uru re a te.”—Sacred Origins of Profound Things.

⁷ Ka ga Yesu abawiriki avura ino gu uru i avunguko rogoho, ka i anaaudanga ha te. Tipagine? Bambiko agu aKristano naadu mbata “anaabi uda gu uru i avungu boro rogoho ni gupai nga sino apagano,” wo buku sa apehe. (The World Book Encyclopedia) Agu apumbo nga ga uda uru-batika nga gu Ziazia Kekeapai nafura tipaha, si nga kina gu nga ga agu abazogo ue naangianga airisi Yekova ya. (Bambata Pai 40:20; Marako 6:21) Aboro anaauda aˈuru-batika a tipa ka fu irisa fu agu ambori nangia ga apagano yo. Ni kpiapai, rogo Merekoko ti rameru 24, aRomo anaairisa gu uru-batika nga ga gu de-mbori nangia Diana. Rogo gu uru nangbe tifuoho, i anaairisa gu uru-batika nga ga gu mbori-uru nangia Aporo. Sidu tie, irisa uru-batika angia sino apagano, angianga sino aKristano ya.

8. Mo sakingo pai tipa gu kodatise du dagba iriso uru-batika na sangbaatoro.

⁸ Kura ndupai kinaho gu ga Yesu abawiriki naadu rogo bambata sa kama agarã aarengbanga ka uda uru vunga Yesu ti ni ya. Si nawira gupai nga i aima ino ya irisa uru-batika angia gupai naadu ni kodikodihe na pa sangbaatoro. Ni kpiapai, dungu aGiriki na aRomo adu na gu ida nga toro adu kinaho pati aboro dunduko ni basasa rogo uru batika yo, na gu toro re nabanda boro rogo gani raka dati kpio. Buku sa nafura tipa gipai re niya: “Gi toro re adu na  pagume dagbani na gu mbori i abatika ní kina rogo gu bangisa ramediwi i avungu gi boro re ti ni.” Rago arengbanga ka ngba ti Yekova na gu pumbo nakodapa vunga Wiriko na pa sangbaatoro te. (Yesaya 65:11, 12) Ono wai Krisimasi ada ni gu pumbo badungu aboro amangaha?

9. Si amangi wai i sia Banduru ti rameru 25 kaa iriso uru vunga Yesu rogoho?

⁹ Badungu akama agarã asusi asusa mbata fuo kpi Yesu aboro kini tona kaa irisa uru vungako rogo Banduru ti rameru 25. Ono anga gu uru re i avungu Yesu ti ni te. * Tipagine tie i asia gu uru re ti ni? Si nawira wa pai amangi nga, agu aboro nasatiyo ni aKristano kusa “aidi uru pumbo vunga Yesu ringbisitihe sa na gu uru aRomo anaairisaha ya si ‘i abatika vovo uru rogoho.’ ” (The New Encyclopædia Britannica) Ho uru anaafaanga ni wenengai ya garã, apagano anaamanga pumbo tipa ka sa uru si karagatihe rogo gu rago si andu ku rogoho. I aberẽhe nga Banduru ti rameru 25 nga gu uru uru atona ka karagatihe rogoho. Wa abarumbatayo nga ga aKristano yo aidi ka sa apagano ni aKristano, i asia gu uru pumbo re ki saha ni gu pumbo nga ga aKristano, kini nangi aboro nga si nga gu uru i abatika Yesu rogoho. *

10. Ti agu aregbo naadu kusayo, tipagine kura aboro aairisanga Krisimasi ti ni ya?

¹⁰ Aboro aima ino gupai nga Krisimasi aenge ti apagano. Rogo 17 kama agarã, gu zogarago nangia ga aNgirisi gbiati agu arago naadu tiibe Amerika azahe ti manga  Krisimasi mbiko gupai nga pa Krisimasi rogo Ziazia Kekeapai te. Gu boro naanikpa ti sunge ka sungo kporo yo rago Krisimasi, i anifu mbusa funi nibasa. Ono fuo regbo kusa, aboro akaragatiyo berewe sa manga Krisimasi na ki tona kura vovo apumbo berewe. Krisimasi ada berewe ni bakere pumbo, na wo duhe rogo dungu aringara areme. Ono wa duhe nga Krisimasi nga sino zire pambori, agu aboro nakpinyemu ka sa ngbarago ti Mbori audanga gu uru re watadu gu kura uru pa udaha aenge rogo gu irisombori nga ga apagano te. *

11. Tipagine kura aboro naairisa kura aˈuru ti ni, ono ginipai si aida ani ni berẽpaha gbe?

¹¹ Kura aboro ima ida kuti gupai nga ngbatunga agu apumbo duwa Krisimasi aenge ti apagano, ono i kini bihe nga pai ho gberẽ ti mangaha te. Na berewe, i nabihe nga badungu aboro aberãnga pa zire irisombori ho i airisa agu aˈuru ni re te. Agu aregbo re nga wene aregbo a tipa aboro sungu na agumeyo. Ya mo wo mo abihe? Ka si duwo, gure nga nyemu agumero du, angianga nyemu zire pambori ya, nasaha foro ni mbumbupai mo kakuti ndikidi irisombori. Mo ini gupai nga, Yekova nakusi aboro na agumeyo, ko naida aida mo du na wene pagume na agumero. (AEfeso 3:14, 15) Ono si naida mo nyakasi gu pagume re ngba gu gene nafu ngbarago afu fu Yekova. Pauro akepai tipa gupai nyakipaha ki ya: “Oni nikpária pa gu he ngba ti Gbia.”—AEfeso 5:10.

12. Mo gumbanga gu kpiapai nayugo gupai nga si aidanga ani naairisa agu aˈuru paha aenge ti apagano te.

¹² Isoke mo nabihe nga aboro audanga aˈuru areme na pa engaha berãyo yo te. Ya mo si naida ani berẽpa wai  irisa uru aenge, watadu pai ho ti ni te? Pai kinaho ti ni! Mo bingo gi kpiapai re: Ka mo bi arawa gene ime nafu na u ku rogo bibiriko ba, ya mo mo di ru ka riru? Oó. Gu arawa re ni bibiriko ru. Wakina gu arawa re, gu uru aboro audaha rengbe kadu wa si ni nzinzirihe, ono i adihe rogo bibiriko ba. Tipa ka kakuti ndikidi irisombori, si naida gaani bipai duwa ga gu nebi nangia Yesaya, naya fu airisimbori wẽ: “Ka oni zádi nga birikobiriko he wa sa ya.”—Yesaya 52:11.

13. Gini kpakaraapai rengbe ka kura ho boro akodanga tiní ni ku rogo irisa aˈuru ya?

¹³ Kpakaraapai rengbe arengba ka kura ka si du nga mo aidanga ka rimiso tiro ku rogo irisa aˈuru te. Ni kpiapai, ka gamo abadiasunge bi gupai nga mo amanganga kura apai nga ga agu aˈuru i airisaha te, si rengbe arengba ka kpakara bangiriyo. Na ka i fu gamahe foro nga ga Krisimasi, ya mo si du ni gbegberẽpai mo dihe? Na ka si du nga gamo badiarogatise nga gu boro nairisa agu aˈuru re airisa tigani, ginipai si aida mo mangihe? Wai rengbe mo ka sa awiro ka rago gberẽnga tiyo ya mbiko gupai nga i airisanga agu aˈuru aboro airisaha te?

14, 15. Ginipai rengbe mo ka mangaha ka i fu sene foro nga ga gu uru i airisaha watadu ka boro fu gamahe foro?

¹⁴ Si naida boro du na rugatinapai rogo agi abangiriba re dunduko. Ka boro asusa asusa ngba gani gene ní kini fu sene foro, wa ngbatunga gu sene nga ga Krisimasi watadu  ga vovo garã, mo rengbe ka ya funi gbua wẽ ‘tambuahe.’ Ono ka si du nga gu boro re nga guni mo naabi ní abi dedede watadu gu boro mo naamangasunge na ní, mo rengbe arengba ka fura ni gbangaha susi gu gbua nga ka fu tambuahe. Ono rogo agi apai re dũ, si naida mo du na rugatinapai gbiati tatamana. Ziazia Kekeapai nafu rugute niya: ‘Oni fura na undahe dedede, si ki hii na tikpo, si du oni ka ina wai ti ni oni ka karagapai fu akuaroni.’ (AKorosaio 4:6) Si aidanga mo fura ni zangairisa te. Mo fura funi ni tatamana. Mo pe gupai funi ziazia nga mo asoganga gupai asoga nga ga fu gamahe watadu sungo na aboro te, ono mo rengbe ka ida na ni rogo kura uru kia.

¹⁵ Na ka boro aida ka fu gamahe foro, ginipai rengbe mo ka mangaha? Gure nabipa gu gene gbe ní afuhe ngbaha. Gu boro nafu he re rengbe ka ya: “Mi ima ino nga mo airisanga gi uru re te. Ono mi naida mo di gi he re adia bere.” Mo rengbe ka bihe nga ka mo di gu he re ho duhe ni wa gure, anga gure nga mo ima rimiso tiro ku rogo irisa gu uru re te. Ka si du nga gu boro nafu he re aruganga tiní na pa gamo aida te, mo rengbe arengba ka pe gupai funi nga mo naairisanga gu uru re te. Gere rengbe ka sani a ní ini gupai mo adia gamahe adia ti ni beni ono ka mo afunga gamahe tigamo fu boro ti agu aregbo re ya. Ono ka mo bihe nga i nafu gamahe foro ka asada ro singia mo akakuti gamo ida watadu ka bihe singia mo rengbe arengba ka mbu gamo ida tipa ahe, si aidanga mo di gu gamahe re te.

16. Wai si aida mo du na tatamana nibipa agu apai nabi agu aˈuru i airisaha?

¹⁶ Na ka si du nga kura gamo aborokporo kinaho adunga na gamo aida ya, ginipai rengbe mo ka mangaha? Si  naida mo du a na tatamana. Ndupai ho mo nifura tipa agu asino na apumbo dunduko agumero nadiberã kaa mangaha te. Ono gupai si aidaha nga, mo du na irisa tipa gu rengo du yo na ni ka manga gayo diaberã, a wa mo aida i du na irisa tipa gu rengo du mo na ni ka manga gamo diaberã nitiro. (Mo gedi Matayo 7:12.) Mo banda tiro ti ai gupai rengbe ka sa ro mo du ni gu boro rimisi tiní ku rogo irisa gu uru re. Ono si naida mo ini agu apai aino angianga rimisotise ku rogo irisa uru ya. Ono tie, si naida mo nimangipai ti aregbo dũ ngba gu gene nika sa ro mo du na gigiri sangbakpotoseyo.—Mo gedi 1 Timoteo 1:18, 19.

17. Ginipai rengbe mo ka mangaha ka sa awiro ka rago gberẽnga tiyo ya mbiko gupai nga i airisanga agu aˈuru aboro airisaha te?

¹⁷ Ginipai rengbe mo ka mangaha ka sa awiro ka rago gberẽnga tiyo ya mbiko gupai nga i airisanga agu aˈuru aboro airisaha te? Gure nabi gupai gbe mo naamangaha ti kura aregbo vuru garã yo. Kura avunguagude naasia uru ka fuka agamahe fu awiriyo rogoho. Gamahe sa dagba gu nyanyakipa agamahe rengbe mo ka fuhe fu awiro nga, ka dia regbo kaa sungo na yo na kini moiberãro fuoyo.

18. Wai rengbe pa ndu mo sa agu adunguratise nga ga ndikidi aKristano ka undoro mo kakuti ndikidi irisombori nyanyaki?

¹⁸ Tipa ka sa ngbarago ti Mbori, si naida mo sogo zire irisombori ki kakuti ndikidi irisombori nyanyaki. Kakuti ndikidi irisombori nakoda gini apai? Ziazia Kekeapai naya: “Ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani, wa du sino agu yo ya, ono ani rúgu akuarani aruga; ki nimangi he susi, wa bi oni he ya gu uru re si nambeda.” (AEbere 10:24, 25) Agu adunguratise nga ga ndikidi aKristano nga gu bawene he naundo rani  ani naairiso Mbori ngba gu gene ko aidaha. (Atambuahe 22:22; 122:1) Ti regbo agu adunguratise re, ani nagbia ‘wasa be akuarani’ nga aguyo ani airiso Yekova na yo.—ARomo 1:12.

19. Tipagine duhe ti ni ni nyanyakipa pai mo naagumba agu apai fu aboro mo nawirikihe rogo Ziazia Kekeapai yo?

¹⁹ Gu kura gene rengbe mo ka kakuti ndikidi irisombori ngbaha nga kaa gumba agu apai fu aboro mo nawirikihe rogo Ziazia Kekeapai yo na aDezire Yekova. Badungu aboro “nauka omeyo ki nikpari” mbiko gu gbegberẽ apai namanga rogo zegino. (Yezekere 9:4) Isoke mo ima ino bete agu aboro re a. Si ngbaangba ka mo agumba agu apai fuyo Ziazia Kekeapai agumbaha tipa gu raka du ku mbatayo. Wa mo nikaa koda tiro na ndikidi aKristano na kini gumba agu apai fu aboro mo nawirikihe rogo Ziazia Kekeapai yo, mo nika bi gupai nga nyemu agu asino nga ga zire pambori ka du rogoroyo nika kura kusayo dunduko. Si naida mo ini gupai nga, mo nika gbia bakere ngbarago agbia na badungu amaku ka mo kakuti ndikidi irisombori nyanyaki.—Maraki 3:10.