1, 2. Mo yambungo rimo bete agu aboro Yekova anaabiyo ni abakureako.

GINI ngbatunga boro rengbe mo ka sia ní tipa ka zio bakure na ní? Si nawira guni nabi apai wakina gu mo abihe, du na nyemu agu apai tiní du a tiro, na du na gani arugute wakina gamo. Berewe a, mo rengbe ka ida ka zio bakure na gu boro nga irarengo na kingia boro weneringise.

² Bakuru kusayo, Yekova asia kura aboro i du ni abakureako. Ni kpiapai, Yekova aya ti Abarayama wẽ ko angia badiangbako. (Mo gedi Yesaya 41:8; Yakoba 2:23.) Yekova afura tipa Davide ya ko angia gu kumba ‘kpotokoyo adu wa gu Ko akpinyemuhe’ mbiko ko angia gu ngbatunga boro Yekova akpinyemuni. (Amokedi 13:22) Berewe, Yekova ‘akpinyemu Daniere gbe.’—Daniere 9:23.

3. Tipagine Yekova asia kura aboro ti ni ni abakureako?

³ Tipagine Yekova anaabi Abarayama, Davide, na Daniere ti ni ni abakureako? Ko aya fu  Abarayama wẽ: “Bambiko wa gi mo sangbare.” (Bambata Pai 22:18) Sidu, Yekova nambeda na agu aboro namanga gupai ko akpinyemuhe beyo. Ko aya fu aYisaraere wẽ: “Oni gí sangbare, mi ki du ni gaoni Mbori, oni ki du ni gimi aboro.” (Yeremaya 7:23) Ka mo agiasangba Yekova, mo du adu ni bakureako!

4, 5. Wai Yekova ayugo gako ome tipa gako aboro?

⁴ Mo berẽnga pa gupai namanga ho boro azio bakure ni na Mbori. Ziazia Kekeapai naya wẽ Yekova nagbata amomu “ka yugo tiko na pa nyaka fu agu yo du kpotoyo yo ziazia koyo du ko ni.” (2 Pekapai 16:9) Wai rengbe Yekova ka yugo gako ome tipa ro? Gene sa dagba agu akuraha ko amangaha ngbaha gudu ni kekehe rogo Atambuahe 32:8. Si naya: “Mi [nga Yekova] arába ro ki yugu pai foro ngba gu gene mo ka ndu ngba ha; mi arúga ro ni maa bangire ti ro.”

⁵ Nangba gupai Yekova amangaha tipa rani re! Ko nika fu agu arugute foro da tipa ro na kini bi ro wa mo amangaha rogo gamo raka. Mbori nakpinyemu ka undoro mo dibe gu fudifudiapai mo agbiatiro na ni. (Mo gedi Atambuahe 55:22.) Sidu, ka mo airiso Mbori na ngbaduroyo dunduko, si nika sa gupai nga mo du na gu bangisa kido bake apapara Atambuahe adu na ni ki ya: “Mi namaa Yekova ku mbata yo a fere dedede; bambiko ko du ku kumbabere, mi awõ nga te.” (Atambuahe 16:8; 63:8) Yekova rengbe ka undoro mo naaraka ngba gu gene nika fu ngbarago fuko. A wa mo naima inoho, vura Mbori gudu kinaho aidanga mo mangi gipai re ya.

6. Ginipai Satana akusihe tipa aboro?

⁶ Kapita 11 nga ga gi buku re afura tipa wai Satana Bakitingbanga akusipai kuti ga Mbori bakere pagbia. Satana aya tipa Mbori wẽ ko agumba ziree na ki gumbapai gii fugo yo ya si arunga fu Mbori ko ká na Adamu gbiati Eva ti diayo berã tipa gupai du ni ruruhe na gu du ni irairaha te. Fuo tona aboro ka nge auru kpotosende tingbafuo manga Adamu na Eva ingapai, Satana akusipai tipa ndu gupai aboro airiso Mbori ti ni. Gupai Satana agumbaha gii fugo yo nga, ‘Aboro amanganga sunge fu Mbori mbiko i nakpinyemuko te. Ono ka i fu momu fere, ai boro rengbe mi ka nyaga ní kusayo ti Mbori.’ Gu pangbanga du tipa gu kumba nangia Eyobo, si nayugo gupai nga si nangia gu berã Satana adu na ni. Da nangia Eyobo, gine nakodiko ku rogo gu sakapai Satana akusihe?

7, 8. (a) Gine nasa Eyobo ko du kia ti agu aboro naadu ti ragoko? (b) Ginipai Satana akusihe ya si nangia ndu ga Eyobo mangasunge fu Mbori?

⁷ Eyobo araki bakuru kusayo mbata fu agarã wa 3,600. Ko angia ruru kumba mbiko Yekova aya tipa ko wẽ: “A nga boro ho du wa ko auru kpotosende yo te, nga ziazia kumba ni ruru ko, nga gu ko nagunde ti Mbori, ki nine gbigbitapai.” (Eyobo 1:8) Eyobo aima ngba ti Mbori nirengo.

⁸ Satana akusipai tipa ndu ga Eyobo mangasunge fu Mbori. Ko aya fu Yekova: “A nga kina ro naadua gbata pati ko kirikiri na gako kporo, na pati gako ahe dunduko, te? Mo nafu maku ku ri aũbeko si du moi gako ahe pai ti ni zegino. Mo táĩ nga bero awere, ki  zadi nga agu ahe du be ko dunduko, ko agbérã ngbako yo foro kina ku bangiro.”—Eyobo 1:10, 11.

9. Ginipai Yekova amangihe tipa gupai Satana akusihe re, na tipagine ko amangihe ti ni wo?

⁹ Satana aya wẽ Eyobo aamangasunge fu Mbori tipa kina agu ahe ko agbiaha be Mbori. Ko aya berewe wẽ ka i moi Eyobo rogo asada, ko mbu ga Mbori pai ambu. Ginipai Yekova amangihe tipa gupai Satana akusihe re? Wa duhe nga gupai re adu tipa ndu gupai Eyobo amangasunge ti ni fu Mbori, Mbori aidihe fu Satana ko moi Eyobo rogo asada. Si adu nga sangbana gi asada re nika du ziazia singia Eyobo nakpinyemu Mbori watadu ko akpinga nyemuko te.

10. Gini agberãngo nati kurii Eyobo, na ginipai ko amangihe?

¹⁰ Satana amoi Eyobo rogo dungu aˈasada. Gu bambatapai Satana amangihe nga ka ye na airadĩ i dĩ gako anya na ki imi agura. I aimi dungu gako amoyambu. Gipai re aye na bakere zingo mosoro fuko. Gu kura gberãngo amangi ho bavugumo ayeni ki imi awiriko bawe. Wa agi apai re avura manga, “Eyobo amanga nga ingapai te, ko agumba nga gbegberẽpai kuti Mbori a te.”—Eyobo 1:22.

11. (a) Gini uepai Satana akitingbanga Eyobo na ni, na ginipai Yekova amangihe tipaha? (b) Ginipai Eyobo amangihe wa ko aarungo be gako kaza?

¹¹ Satana aambunga fuo Eyobo na apai te. Ko aberẽ gupai nga, wa Eyobo avura nye kindi ni ruruko pa gako ahe ki vura gberã, gako amoyambu ki vura kpiko, na awiriko ki vura kpiko, ko anyenga kindi ni ruruko fu Mbori ka kaza ziko te. Yekova aidihe fu Satana ko ye na kere iigirã kaza kuti Eyobo. Ono  agi apai re aasanga Eyobo ko mbu ida kuti Mbori te. Kuba gure, ko aya: “Daho mi ka kpi ni mi ambu nga pa gi du ni irarengo te.”—Eyobo 27:5.

12. Wai Eyobo akaragapai kuti gupai Satana akusihe?

¹² Eyobo aaruganga tiko na gupai nga Satana du naamanga ko na apai te. Ko aberẽhe tigako nga Mbori du naye na agu arungo re sako mbiko ko aainongo nga Satana du nakusipai kuti ga Mbori bakere pagbia te. (Eyobo 6:4; 16:11-14) Wa si avura duwo, ko anye kindi ni ruruko fu Yekova. Pa nye Eyobo ni ruruko ayugu ga Satana pai ni ziree!

13. Ginipai namangi fuo nye Eyobo ni ruruko fu Mbori?

¹³ Pa nye Eyobo ni ruruko asa Yekova ko karagapai fu Satana kuti gupai ko akusihe. Eyobo adu nirengo ni bakurea Mbori, na Mbori ki fu mosoro fuko tipa nyeko ni ruruko.—Eyobo 42:12-17.

14, 15. Tipagine rengbe ani ka ya ti ni wẽ gupai Satana akusihe kuti Eyobo re, si nabi aboro dunduko?

¹⁴ Gupai Satana akusihe nibipa nye Eyobo ni ruruko fu Mbori aadunga tipa kina Eyobo nisako te. Si nabiro abi a. Gipai re ziazia rogo Asanza 27:11, yo Yekova ayani wẽ: “Ako wire, mo dú ni iratatamana, ka fu ngbarago fu kpotore yo, ya mi karaga pai fu gu ni nasoa pai kuti re.” Agi afugo i akehe dungu akama agarã naima susa fuo kpio Eyobo re, si nayugo gupai nga Satana aasoapai kindi kuti Mbori na kuti gako amoyambu. Ho ani araka ni ngba gu gene nafu ngbarago fu Yekova, gure nga ani nafubee tipa Yekova karagapai kuti ga Satana aziree, si ki tadu were, ani kini fu ngbarago fu Mbori. Mo nabi gupai re wai? Ya mo si adunga ni wenepai ka mo kodi bero  kuti gu karagapai Yekova afuhe fu Satana kuti gako aziree, ka si vura ida gupai bero nga mo mangi kura aˈariapai rogo gamo raka te?

¹⁵ Mo kparianga gupai Satana agumbaha ki ya: ‘Agu ahe dunduko du be boro ni afu kinaha tipa ungani.’ (Eyobo 2:4) Gu fugo ko agumbaha nga “boro” re, si ayugu gupai ziazia nga gupai ko akusihe re nabi aboro dunduko. Gupai re nga nyanyakipa pai mbiko gupai re nabi ro abi singia mo akakuti gamo ruru mangapai fu Mbori watadu mo akanga kutini te. Satana naida mo basasangba Mbori na ki mbu ruru mangaapai ho fudifudiapai akura ni sa ro. Wai Satana narengbe ka manga gupai re?

16. (a) Gini agene Satana amangasunge na ni ka nyaga aboro kusayo ti Mbori? (b) Wai rengbe Satana ka mangasunge na agi agene re ka ingisaro?

¹⁶ A wa ani afura tipaha rogo Kapita 10, Satana namangasunge na dungu agene ka nyaga aboro kusayo ti Mbori. Ko namanga tiko ti kura aregbo “wa bahu nata ki nipoi, nigbata boro ka rita ni.” (1 Petero 5:8) Satana rengbe ka mangasunge na abakureamo, agumero, na kura aboro i za ro ti wisigo Ziazia Kekeapai na ti manga mo agu apai si agumbaha. * (Yoane 15:19, 20) Gu kurapai Satana amangaha nga ko “nambakada tiko ni maraika imarago.” (2 AKorindo 11:14) Bakitingbanga rengbe ka biriko ro tipa ka ingisa ro na ka sa ro mo mbu gu ngbatunga raka Mbori aidaha. Ko rengbe  arengba ka zeresa kpotoroyo, nga ka sa ro mo bi tiro nga mo arengbanga ka sa ngbarago ti Mbori te. (Asanza 24:10) Singia Satana namanga tiko ‘wa gu bahu nata ki nipoi’ watadu ‘ni maraika imarago,’ gupai ko agumbaha, si kina sa nga: Ka mo gbiatiro na aˈasada watadu fudifudiapai, mo asusanga ku mbatayo na gamo irisombori te. Wai rengbe mo ka karagapai kuti gu soapai re ki nye ni ruru ro wa gu Eyobo adu?

17. Gini bangua ndupai duho si aida ti ni boro naairisa ga Yekova arugute?

¹⁷ Mo rengbe arengba ka karagapai kuti gupai Satana akusihe ni raka mo ngba gu gene nafu ngbarago fu Mbori. Gini apai si akodaha? Ziazia Kekeapai nakaragapai niya: “Oni kpí nyemu Yekova nga gaoni Mbori na kpotoroni yo dũ, na mbisimoroni dũ, na omeroni dũ.” (Pa Fu Rugute ni Ue he 6:5) Wa nyemu Mbori nikaa maapai tiro, mo nika du na nyemu ka manga gupai ko akpinyemuhe bero. Gu mokedi nangia Yoane akepai ki ya: “Gi nga du [ani] na nyemu Mbori re, nga ka ani kuti gako rugute.” Ka mo akpinyemu Yekova na ngbaduroyo dũ, mo nika bi gupai nga “gako rugute asusa nga omerani te.”—1 Yoane 5:3.

18, 19. (a) Gine nga bete ga Yekova arugute? (Mo bi gu  sanduki du ti kpewaraga 140.) (b) Wai ani aino gupai nga, Mbori asananga rani ani mangi gupai ani arengbanga na ni ya te?

¹⁸ Ga Yekova arugute nga gine? Agu akuraha nabipa agu apai si aidanga ani mangihe ya. Ni kpiapai, mo bingo gu sanduki du ti kpewaraga 140, du riihe nga, “ Mo Ne agu Apai Yekova Asogaha.” I tangara  agu apai Ziazia Kekeapai asogaha rogo gi sanduki re. Ti bambata bibihe, boro rengbe ka bihe nga gu kura mangaapai kinaho dagba agu tangarayo ho re agberãnga gbe ya. Ono fuo mo berẽkurii agu averesi du pati ni, mo nika bi gupai nga tatamana kina rogo ga Yekova andiko yo. Si nawira wa si nika kpakara akpakara foro ka manga ariapai rogo gamo raka. Ono ka si vura duwo, raka ngba gu gene nafu ngbarago fu Mbori nika fu ngbarago foro a. (Yesaya 48:17, 18) Si  nga gupai rengbe mo arengba ka mangaha. Wai ani ainoho wo?

¹⁹ Yekova asananga rani ani mangi gupai arengbanga omerani na ni ya te. (Mo gedi Pa Fu Rugute ni Ue he 30:11-14.) Ko ima ino gupai rengbe ani ka mangaha na gu ani arengbanga ka mangaha ya. (Atambuahe 103:14) Kurigure, Yekova rengbe arengba ka fu ome furani ani irisi fugoko. Gu mokedi nangia Pauro akepai ki ya: “Mbori du ni irarengo,  ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.” (1 AKorindo 10:13) Tipa ka undoro mo hipai, Yekova rengbe arengba ka fu “bakere tandu” foro. (2 AKorindo 4:7) Fuo Pauro hi dungu aˈasada, ko aya: “Mi rengbe na manga apai dunduko rogo gu ko nanyakasa re.”—AFiripoio 4:13.

20. Gini asinombori si aida mo sonosihe, na tipagine duhe ti ni ni nyanyakipa pai?

²⁰ Rengo ngaha nga, tipa ka fu ngbarago fu Yekova, si naida boro mangi gu kura apai amanga kupati gu nga ka ne agu apai ko asogaha. Si naida mo naakpinyemu agu apai a ko akpinyemuhe. (ARomo 12:9) Ho mo aida ka zio bakure ni na boro, mo nasia guni nabi apai wakina gu mo abihe, du na nyemu agu apai tiní du a tiro, na du na gani arugute wakina gamo. Yekova namanga kina gu bangisapai re a. Sidu, mo wiriki wai ka kpinyemu agu apai ngba ti Yekova. I fura tipa bete agu apai ko akpinyemuhe rogo Atambuahe 15, yo ani agedapa agu aboro ni Yekova azio bakure na yo. (Mo gedi Atambuahe 15:1-5.) Abakurea Yekova nayugo agu asino Ziazia Kekeapai ayambaha nga “zuzu Toro.” Gi zuzu toro re nakoda ‘nyemuse, ngbarago, zereda, hipai, mangapase, weneringise, du ngangarã [rogo idapase yo], zera, na rugatise.’—AGaratio 5:22, 23.

21. Ginipai nika undoro mo sonosi asinombori?

²¹ Geda Ziazia Kekeapai dedede na kini wisigihe nika undoro mo sonosi agi asino re. Na pa ino mo agu apai Mbori akpinyemuhe nika undoro mo aria  ga berã si duwa ga Mbori. (Yesaya 30:20, 21) Wa mo nikaa kiiso gamo nyemuse tipa Mbori, kinawo mo nika du na bakere nyemu kaa raka ngba gu gene nika fu ngbarago fuko.

22. Ka mo araka ngba gu gene nafu ngbarago fu Mbori, gure nga mo namanga ginipai?

²² Bakere asadatise si aida boro mangihe tipa ka raka ngba gu gene nafu ngbarago fu Mbori. Ziazia Kekeapai nangarasa rani ani mangi ariapai rogo gaani raka ni dia ani kuru borose kusayo ki ukadi vovoho. (AKorosaio 3:9, 10) Nibipa ga Yekova arugute, bake Atambuahe akepai ki ya: “Bakere mosoro du tipa ka kuti ni.” (Atambuahe 19:11) Mo a wo, mo nika bi gupai abi nga pa raka mo ngba gu gene nafu ngbarago fu Mbori naundo ro aundo. Ka mo amangaha wo, gure nga mo nafu karagapai kuti gupai Satana akusihe na si ki fu ngbarago fu Yekova!