KURA APAI
Tingida Pakpio Yesu Nafu Irisa fu Mbori
I NAZINAHE fu aKristano tipa i naamanga gu dunguratise du tipa Tingida Pakpio Yesu. I nayamba gi dunguratise re a nga, “ga Gbia riahe.” (1 AKorindo 11:20) Gine nyakipa gu dunguratise re ti ni? Gini regbo si aida i naamangaha ti ni na wai si aida i naamangaha?
Yesu asigira gi mangaapai re rogo gu yuru nangia ga Pumbo Susiri rogo gu garã nangia 33 F.B.K. Pumbo Susiri angia gu pumbo i anaamangaha gbua bara sa rogo garã, rogo gu ga aYudo diwi nga Nisana ti rameru 14 fuo ti uru. Ho i anibi fogo gu diwi ni re u nakuru, i anitona ka geda arame 13 tipa ka manga gu pumbo re. Kangia kuti gu geda adiwi du awere, papara gu diwi nga Nisana re nati ku rogo Marungu gu ki ti ku rogo Zerekpe.
Yesu ari Pumbo Susiri na gako amokedi, ko ki fu gene fu Yuda Keriota ko guari dagba amokedi, fuoho, ko ki sigira pai tipa Ga Gbia Riahe. Gi riahe re adi ba gu nga ga Pumbo Susiri, sidu, si naida i naamangaha kina bara sa gbua rogo garã a wa si adu tipa Pumbo Susiri.
Gu Kitabu Wene Pangbanga nga ga Matayo naya: “Yesu ki di kpokuta ki fu tambuahe, ki kuadi he; ko ki nifu he fu abawiriki, ki ya, ‘Oni dí he ki ri he, gere nga borore.’ Ko ki di inga, ki fu tambuahe, ki fu he fu yo, ki ya, ‘Oni mbíri he ambira ti ngba gere dunduko; bambiko gere nga kurere nga ga vovo ndika, i niuka ha tipa roni na dungu aboro sa dia gbegberẽapai ti yo.’ ”
Gu kura aboro naya wẽ Yesu asa gu kpokuta re ni ndikidi pasioko na ki sa gu imekakue re ni kina boro ndikidi kureko. Ono tie, ti gu regbo Yesu afu gu kpokuta re fu gako abawiriki i rihe, pasioko adu kina tiko, papara ko aguaringa tiko te. Ya mo ga Yesu abawiriki aari kina boro pasioko na kini mbiri kina boro kureko? Oó, ka gure adu nga ri boro nga gupai ga Mbori arugute azahe aza ti ni. (Bambata Pai 9:3, 4; Pa Amotumo 17:10) Ringbisihe kuti Ruka 22:20, Yesu aya: “Gi inga re, si nga vovo ndika rogo kurere, nga kina gu nauka tipa roni.” Ya mo gu inga re asatihe ni “vovo ndika,” nga vovo mokido? Oó, si aarengbanga ka manga te, mbiko vovo ndika ni guhe ka boro zadihe wa inga te.
Gu kpokuta na imekakue re narukuba akura ahe. Gu kpakuta re narukuba kpoto Kristo naadu ni rengberengbehe. Yesu amangisunge na gu yangara kpokuta nanye ti regbo Pumbo Susiri. I amangi gu kpakuta re zanga agbooro (kamira). (Gate 12:8) Ziazia Kekeapai nafura gbe tipa agbooro ya si nga guhe narukuba ingapai watadu zirĩ hee. Gu kpokuta re arukuba kpoto Yesu naadu ni rengberengbehe ko afuhe ni motumo. Si aadunga na ingapai te.
Gu zamba imekakue re narukuba kure Yesu. Gu kure re nasa vovo mokido si du na sunge ti ni. Yesu aya wẽ kureko auka tipa ka dia ‘gbegberẽ apai kusayo.’ Si ata du were, Mbori kini rengbe ka bi aboro gigirii na i ki rengbe ka rimo ku rogo vovo mokido na ko. (AEbere 9:14; 10:16, 17) Gi vovo mokido re nasa gupai nga mbedimbedi aKristano du bangeyo nga 144,000 ndu ku ngbangbaturũ yo. I nandu koyo ka zogarago ni abakindo na kini mangisunge ni aboromotumo ka ye na amaku fu aboro auru kpotosende.
Ada rẽ tipa ka ri gu kpakuto na kini mbiri gu imekakue du tipa Tingida Pakpio Yesu? Kina agu aboro du rogo vovo mokido nga agu aboro du na maabangirise ka ga ku ngbangbaturũ yo, i nari gu kpakuto re na kini mbiri gu imekakue re. Ga Mbori ziazia toro nasa ngbatunga agu aboro re i idi kuti gupai zanga kapa nga i du Mbori nasia yo tipa i du ni abakindo ngbangbaturũ yo. (ARomo 8:16) I berewe rogo gu mokido nga ga Kindo Yesu amangihe na apefuoko.
Ginipai tigaha du tipa agu aboro du na maabangirise ka raka rogo Paradizo auru kpotosende? I nairisa ga Yesu zinahe airisa kadu pati Ga Gbia Riahe, ono i tigayo gbua nga adupatipai angianga i naye ka ri kpakuto na ki mbiri imekakue ya. Bara sa vuru garã yo, aDezire Yekova naadu pati Ga Gbia Riahe fuo ti uru rogo gu diwi nga Nisana ti rameru 14 ka tingida pakpio Kristo. Wa vura duhe nga kina bete akutu aboro naya wẽ i na gu maabangirise du tipa nduge ku ngbangbaturũ yo, pa gi dunguratise re ima nyaka fu aKristano dunduko. Si nga gu regbo aboro dunduko aberãkurii gu bakere nyemuse Yekova Mbori gbiati Yesu Kristo ayuguhe tipa aboro.
Gere Ima Rengba a ka Ngba Tiro
TINGIDA PAKPIO YESU
Tingida Pakpio Yesu
Ani nayambaro esuesu mo ye ani tingidi pakpio Yesu. Mo nika ino wai ga Yesu raka na kpio narengbe ka undoro.
AGU ASANAHE ABORO NASANAHA DEDEDE
Tipagine ADezire Yekova Amanga Tingida Pakpio Yesu ti ni Kia ti gu Gene Kura Apambori Amangaha Ngbaha?
Si nga yangara nyanyakipa mbakadapai fu aDezire Yekova i nayambaha a nga gu Yangara Riahe Nga ga Nyemu watadu Tingida Pakpio Yesu. Mo bingo gupai Baibiri apehe tipa gi mbakadapai re.
