ZIAZIA KEKEAPAI agumbanga pa gu regbo furani i abatika Yesu ti ni te. Wa vura duhe wo, si naundo rani aundo ani dakuti gupai nga i aabatikanga ko rogo Banduru te.

 Ani wisigingo pai tipa gu gbata nangia Betereme nga gu ba i abatika Yesu rogoho. Gu ga aYudo diwi nga Kisireu (natona rogo Ngbangba ki rimi ku rogo Banduru), aningia regbo zere na regbo mai. Gu diwi naye fuo guru re nga Tebete (natona rogo Banduru ki rimi ku rogo Ngi), aningia gu diwi nazere kisusi kura adiwi dunduko rogo garã na nga gu diwi misimisi morogumba anaaná rogo ru. Ani bingo gupai Ziazia Kekeapai agumbaha furani tipa wai sino wege adu rogo gu ringara re.

Fugo gu bake papara Ziazia Kekeapai nangia Ezara nayugo gupai nga wẽ Kisireu adu nirengo nga diwi zere na regbo ná-mai. Ezara aya wẽ ndurumo aboro adunguratiyo ku Yerusarema yo ‘rogo ribua diwi (nangia Kisireu) ti rameru 20. Aboro dunduko kini kio akio be zere mbiko mai aaná aná gbe.’ Agu aboro nadunguratiyo aya tipa gu regbo re wẽ: ‘Rago bakere mai du, ani arengbanga ka ru zegi rogo mai te.’ (Ezara 10:8-13; Yeremaya 36:22) Agu ababanda akandoro naanidu rogo gu ringara re anaabanda tiyo rogo Banduru tipa ka yuru gbianga yo na gayo anya nvuo yo ya!

 Ono tie, Ziazia Kekeapai naya furani wẽ ababanda akandoro adu yuru nvuo yo nibanda gayo anya rogo gu yuru i abatika Yesu. Si nga gupai Ruka akehe ki ya “ababanda akandoro adu kina rogo gu ringara re, nanidu pati gayo rimbasa akandoro yuru nvuo yo” pati Betereme. (Ruka 2:8-12) Mo kparia gupai nga, agu ababanda akandoro re asungu asungo pati agu anya re yuru, angianga i aasusa asusa na ami uru ya. Ya mo gi ringbisapai nga aboro asungu yuru nvuo yo na gayo anya re nayugo gupai nga i amangihe rogo Banduru Betereme yo? Oó, ka si amangingo yo te. Sidu, agu apai namangi ti regbo batika Yesu nayugo gupai furani nga, i aabatikanga ko rogo Banduru te.

Ziazia Kekeapai nayugo gu regbo ayugo furani nzunzu Yesu akpi ti ni, ono si nayugo kina mboimboi gu regbo gbua i abatikako ti ni. Gipai re nasa rani ani tingidi gupai Bakindo Soromo agumbaha ki ya: “Wo wene rimo boro ngba susi kikiipa furũ nzeme; na rago kpio ni ti rago vunga boro.” (Batungusipai 7:1) Si du nga ndu gupai Ziazia Kekeapai afura ti ni gbe tipa kina ga Yesu sunge gbiati pakpioko ono ki peke kina wiri bete apai gbua tipa gu regbo i abatikako ti ni.