AGU aˈuru-ongoda nga ga pambori na agu nga ga ringara aboro audaha areme rogo zegino, paha aenganga rogo Ziazia Kekeapai te. Si aenge tie wari? Ka mo gedi kura abuku, kina ngbaro nika zera ka bi gupai si agumbaha tipa agu aˈuru-ongoda aboro audaha rogo gu rago mo araka rogoho. Ani wisigingo betehe.

Pasika. Buku sa naya: “Vovo Ndika afuranga tipa uda Pasika te.” (The Encyclopædia Britannica) Pasika atona wai?  Apagano natonaha rogo gayo irisombori. Wa aboro avura niya wẽ gi uru-ongoda re nasa aboro i tingidipa ga Yesu zingabekpio, gu mangimangi apai nidu ragoho nga sino aKristano te.

Uda Vovo Garã. Gu ramediwi gbiati mangaapai aboro nasiaha tipa uda Vovo Garã na ni, si ni bakiakia rogo aringara. Buku sa nafura tipa wai gi mangapai re aenge niya: “Rogo gu garã nangia 46 M.B.K., gu ga aRomo bazogo nangia Yurio Kaisara asigira Ngi rameru 1 ni vovo Uru Nga ga Garã. ARomo akpara gi uru re fu gu mbori nangia Yunusi (Janus), nangia mbori angbadimo, na mbori tonatona apai. A wa gumba ani he kuari re, rimo gu diwi nga Ngi aenge ti Yunusi, nga gu mbori naadu na akpakpuko ue, gu nangera kusayo gu kini ngere ku mbatayo.” (The World Book Encyclopedia) Sidu, mburu uda Vovo Garã aenge ti apagano.

Uru-nangahe (Halloween). Buku sa naya: “Agu apai ninaamanga ti regbo uru-nangahe, si aenge ti kura sino irisombori nga ga apagano putu yo (Celts) mbata fu rago aKristano. . . . Agu aboro re anaamanga apumbo fu kindigi ambori ue, nga mbori uru na mbori kpikpi aboro . . . , nga gu mbori i anaamanga gako pumbo rogo Ngbangba ti rameru 1, na gu uru re nangia tonatona Vovo Garã nga ga agu aboro re. Aboro aye kusa ki rimisi gi pumbo nga ga kpikpi aboro re ku rogo gu mangaapai nga ga aKristano.”—The Encyclopedia Americana.

Gu Kura Aˈuru-Ongoda. Ani arengbanga ka sakapai tipa agu aˈuru dunduko aboro audaha rogo zegino te. Ono tie, Yekova aidanga na pa agu aˈuru natumbapa boro kuari watadu pa ariigbu te. (Yeremaya 17:5-7; Amokedi 10:25, 26) Mo tingidi gupai nga, Mbori nasoga gu mangapai asoga naenge rogo gu ba angbanga tiko ya. (Yesaya 52:11; Yugoti 18:4) Gu bangua arugute nga ga Ziazia Kekeapai furayo tipaha rogo kapita 16 rogo gi buku re nika undoro mo rugutiro na pa ga Mbori bipai tipa rimiso boro tiní ku rogo agu aˈuru aringara airisaha.