Mbupai nayugo gupai nga mo nambu pa gu gbegberẽpai boro namangi ro na ni gbiati gu imisiri si naye na ni kuti ro. Anga ho mo ambupai ni fu boro si nga mo naabi gupai ni amangihe re na paha kusende watadu kaa manga tiro wa ka i ya si aamanganga te te.

BANGUA RENGO NGA GA BAIBIRI: Oni “Nihi pai fu akuaroni, nivu akuaroni, ka pai du bangiri gu boro kuti kura ni.”—AKorosaio 3:13.

“Ho mo nakpinyemu boro ni, si aidanga mo moi berãro sa kina gani azanga rengba te ono kuba gure, mo asadi ka bi gini ngbatunga boro ni aida ka du nga ni.”—Aaron

Ka mo mbuti ro fu gberãrago, mo ima rengba ka gbarasa pa tiro ti kpotoro na berãro yo—mo ima rengba a ka gbarasa pa ga rogatise.

“Ti kura regbo sa, kumbami aho mbupai tipa gupai naima imisa re nikerehe. Si aima kpakara fere tipa mi mbupai fuko. Ono niyangaraha, mi aima mangaha wo, ono mi abira tire tipa gupai nga mi aagumbanga ka mbupai fuko te. Si aima ye na kerepai kuti gaani pabakure.”—Julia

MO ASADI TIRO

Gu regbo gamo badiarogatise nika manga ro berewe na gupai naka gberã tiro gbe, mo sananga tiro nga:

• ‘Ya mo mi nga gu boro nazinga niipo?’

• ‘Ya mo gupai ni namangi re na ni re ima du ni kerepai gbe nga gu mi aida ni ho kina mbupai ti ni watadu mi ima rengba ka mbu berãpa gupai re?’

MO FURA NA GAMO BADIAROGATISE

• Bagiza regbo wai rengbehe ka dia rani tipa ani mbupai dagba tirani?

• Ginipai rengbe ani ka mangaha tipa kaa mbupai dagbarani niipo?

ABERÃPAI

• Ho rago nagberẽ tiro ni, ka mo naabingo ha nga ga badiarogatise du ye na gupai re ya.

• Mo asadi ka zanga gbeberã ro kuti gu mangapai nga ga ga badiarogatise, mo tingidi gupai nga, “ani nakota dunduko rogo dungu apai.”—Yakoba 3:2.

“Si taata ani mbupai dagbati rani ho duhe ni nga ani dunduko mangi ingahe, ono si ima du ni ba kpakarakpakaraha ho du he ni nga boro sa du mangi ingahe. Si naida na ndikidi umbasitise boro mbupai fu kurani na boro idi gu mbupai nga ga kurani.”—Kimberly.

BANGUA RENGO NGA GA BAIBIRI: “Mo ídi pai fu vuraro ni ipo.”—Matayo 5:25.