Tipa ka sa ngbarago ti Yekova, si naida ani du na idapase. Ono wa vura duhe wo, Baibiri nape gupai nga, “i na idapase dunduko te.” (2 Tesa. 3:2) Ho gu mokedi nangia Pauro ape gipai re ni, ko aafura tipa “ruguzuruguzu gbegberẽ aboro,” nga aguyo naarungosi ko. Ono gupai ko apehe tipa idapase nga kina rengo a tipa kura aboro. Gu kura aboro diberã ka zanga ida kuti gupai nga Mbori kinaho nakusiahe dunduko. (Rom. 1:20) Agu akurayo ima rengba ka pe gupai nga i na idapase kuti kurahe watadu kuti kura boro du na bakere ome ti ni kisusi Mbori. Ono anga si nga gu idapase si aidaha tipa ka sa ngbarago ti Yekova te.

Si naida ani du na gu kido nga Yekova kina ti ni na ko “nafu mosoro” fu agu aboro du na nyanyaki idapase. (Eb. 11:6) Idapase nga papara zuzu ziazia toro. Ka ani aaida ka gbia ziazia toro, si naida ani sana Yekova tipaha. (Rk. 11:9, 10, 13) Gu kura nyanyakipa gene rengbe ani ka gbia ziazia toro ngbaha nga ni geda ani Baibiri nga gu ziazia toro adu kugii abakehe. Ani ima rengba ka berãkurii gupai ani agedaha na ki asadi ka mangapai kuti gupai ani awirikaha. Ni manga ani agi apai re, ani nambu ziazia toro si undo rani ani raki gaani raka ngba gu gene nayugo gupai nga ani na gu idapase nasa ngbarago tiko.