1-2. Gini yambahe Yekova afuhe fu ruru airisiko?

 KA BORO sana ro ki ya, ‘Da nga Yekova foro?’ Ginipai rengbe mo ka pehe funi? Mo ima rengba ka karagapai nga, ‘Yekova nga Buba, gi Mbori, na Bakureami.’ Mo ima rengba a ka mangasunge na kura afugo ka sakapai tipa Yekova na ni. Ono ya mo mo rengbe ka berãpa ‘Yekova ni gu boro ka di ro ni gino ku kpuni?’

² Bakindo Davide aringbisi pa gu pabakure du dagba Yekova na ruru airisoko kuti gu pabakure du dagba gu boro nadia agino kugume na gaani agino. Ko asanahe nga: “Ako Yekova, da ka sungu rogo ga bamburoko? Da ka anye ri ga kparakpara ziazia bagangara?” (Tam. 15:1) Rogo gi veresi re, ani nawirika gupai nga ani ima rengba kadu ni agino rogo gako bamburoko du rogoyo nga kadu​—ni abakureako. Ya mo anga gipai re nga bakere yambahe be Yekova furani te?

YEKOVA NAIDA ANI DU NI GAKO AGINO

3. Da du nangia ga Yekova bambata gino, na wai du Yekova na gako bambata gino aabi tiyo?

³ Mbata fu Yekova kusi ahe, ko adu nisako. Ono tingbafuo gure, ko akusi bambata Wiriko. Yekova adu wa gu boro nadia aboro kugume nga gu boro yambu gako bambata gino kutii gako bamburoko yo na ko adu na ngbarago ka manga gipai re. Baibiri nape gupai nga “rago angba ti ko mbiko” Wiriko. Na gako bambata gino, “ki ningi na auru bara bangiri [Yekova].”​—Snz. 8:30.

4. Ada berewe naada ni ga Yekova agino?

⁴ Tifuo gure, Yekova akusi amaraika, na ko ayambuyo tipa i  du ni gako agino a. Baibiri nayamba amaraika nga “awiri Mbori” na si nayugo gupai nga i na ngbarago kadu na Yekova. (Eyo. 38:7; Dan. 7:10) Tipa dungu agarã, ga Mbori agino angia kina agu aboro naaraka na ko ngbangbaturũ yo. Kusa, ko akusi aboro na i ki da ni gako agino a. Fuo bete regbo kusa, agu aboro naadu dagba agu agino re angia Enoka, Noa, Abarayama na Eyobo. I nasakapai tipa gu ndikidi airisimbori re nga, i angia abakurea Mbori watadu i “anata na Mbori.”​—Bam. P. 5:24; 6:9; Eyo. 29:4; Yes. 41:8.

5. Ginipai rengbe ani ka wirikaha ti gu sangbaanebi du ni kekehe rogo Yezekere 37:26, 27?

⁵ Vuru dungu agarã, Yekova nandu kumbatayo kindi kaa yamba abakureako i du ni gako agino. (Oni gedi Yezekere 37:26, 27.) Ni kpiapai, rogo gu sangbaanebi yo nga ga Yezekere, ani nawirika gupai nga Mbori nakpinyemu gupai nga ruru airisiko du na mbembedi pagume na ko. Ko nakidohe ka manga “mokido nga ga zereda na yo.” Gu sangbaanebi re nafura tipa gu regbo agu aboro du na gu maabangirise nga ga ga ku ngbangbaturũ yo na aguyo du na gu maabangirise nga ga raka auru kpotosende nika du ni kodikodi yo rogo ga Yekova bamburoko wa ‘rimbasa akandoro sa.’ (Yo. 10:16) Gu regbo re nga awere!

MBORI NANGERA ANGERA FUO RANI ROGO AGU ABA DU ANI ROGOHO DUNDUKO

6. Waigu rengbe boro kadu ni gino rogo ga Yekova bamburoko, na wari rengbe ani ka gbia Gako bamburoko ni?

⁶ Ti agu aregbo i ake Baibiri ti ni, ga boro bamburoko angia gu ba ni anirengbe ka ongoda rogoho na ki du ni bandabanda ni be agu apai du pati ni. Ho boro anidu ni ni agino rogo ga boro bamburoko, gu gino re anidu na gu maabangirise nga irakporo nika ngerafuo ni wenengai. Ho ani akpara gaani raka ni fu Yekova, ani nada ni agino rogo gako bamburoko. (Tam. 61:4) Ani nagbia ngbarago ti gu riahe nga ga toro du kpaima na ani ki da ni abakurea agu aboro du ni ga Yekova agino a. Aboro rogo aringara dunduko rengbe kadu ni agino rogo ga Yekova bamburoko yo. Si nawiraha wa mo aima ndu kurogo kura ringara tipa bakere dunguratise, na mo agbia agu aboro yo du na ngbarago tipa kadu rogo ga Mbori bamburoko. Ga Yekova bamburoko rogo ai gu ba du gako ruru amoyambu rogoyo.​—Yugo. 21:3.

7. Tipagine rengbe ani ka ya ti ni wẽ, gu ruru aboro nakpiki i kindi nga agino rogo ga Yekova bamburoko? (Oni bi sura a.)

⁷ Na ginipai tigaha du tipa gu ruru aboro naima kpiko? Ya mo ani rengbe kada kuti gu digisopai nga i kindi ni agino rogo ga Yekova  bamburoko? Ii! Tipagine rengbe ani ka pehe ti ni wo? Bambiko Yekova natingidapa yo wenengai, i bangiriko ni kina unga yo. Yesu ape gupai nga: “Gu nga i azingisa aboro be kpio kina Mose ayugu he, rogo gu pai nga ga zigidiri ngua, ho ko aya ni ti Gbia ko nga ga Abarayama Mbori, nga ga Yisaka Mbori, nga ga Yakoba Mbori. Were ga kangba aboro Mbori nga ko te, ga unga aboro Mbori nga ko; bambiko bangiri ko aboro dunduko du ni unga yo.”​—Rk. 20:37, 38.

GINI AUNDO ANI AGBIAHA, ONO GINIPAI SI AIDA ANI MANGIHE KADU NI GA YEKOVA AGINO?

8. Waigu ga Yekova agino agbia undo ho du yo ni rogo gako bamburoko?

⁸ Ga Yekova bamburoko nabanda gako agino be gupai rengbe ka gbarasa gayo pagume na ko na kini fu ndikidi maabangirise fuyo tipa gu raka du kumbatayo. Ho ani anye ni mbembedi na Yekova, Satana arengbanga ka manga gupai rengbe ka imisa rani nyeanye kindi te. (Tam. 31:23; 1 Yo. 3:8) Rogo vovo zegino yo, Yekova nikaa ndu kindi kumbatayo kaa banda ruru abakureako angianga kina be gupai rengbe ka gbarasapa yo rogo toro yo ya, ono zavura be kpio a.​—Yugo. 21:4.

9. Ginipai Yekova aida gako agino mangihe?

⁹ Si ni bakere pa mamu kadu ni gino tii ga Yekova bamburoko yo​—ani ima rengba kadu na mbembedi pagume na ko nga gu rengbe ka nyeanye kindi. Ginipai si aida ani mangihe ka ani aida kaa ndu kumbatayo kindi kaa du ni gako agino? Ka si du nga i yambu ro kurogo kporo, mo du na nyemu ka ino gupai ka mo mangihe ka sa ngbarago ti gamo irakporo. Ni kpiapai, ni ima rengba ka ida gupai nga mo uru gamo rakata ngbadimo mbata fu mo rimi ku dimo yo, mo du adu regerege ka manga gipai re. Wakina gure a, ani na nyemu ka ino gupai Yekova aidaha be agu aboro naida kaa ndu kumbatayo kindi kaa du ni gako agino tii gako bamburoko yo. Gaani nyemuse tipa Yekova nasarani ani mangi agu apai rengbe ani ka mangaha nga gu ko “akpi nyemu he.” (Koro. 1:10) Kina rengo du ngaha nga Yekova nga bakurearani, ono ko a nga gaani Mbori na Barani na ko rẽ arẽ tipa ani irisiko. (Tam. 25:14) Na gupai re berãrani yo, si aidanga bangirani go ti gupai nga si naida ani du na dudunguro irisa koyo du ko ni te. Gi ngbatunga dudunguro irisa re nika undo rani ani zanga mangapai gupai rengbe ka ba gberãrago tiko. Ti aregbo duduko, ani na nyemu “ka ta ni umbasitise” na gaani Mbori.​—Mika 6:8.

YEKOVA AMANGIPAI NA AYISARAERE DUNDUKO KINA SA

10-11. Waigu Yekova amangipai na aYisaraere rogo gu ngbakungbo nangia ga Sinai, na waigu gipai re ayugo gupai nga ko akparanga aboro te?

¹⁰ Yekova namangapai na gako agino zanga kparakaro. (Rom. 2:11) Ani rengbe ka wirikapai tipa gipai re ngba gu gene ko amangipai na aYisaraere ngbaha rogo gu ngbakungba nga ga Sinai.

¹¹ Tingbafuo Yekova kusiyo tii sunge kanga Ezipeta yo, ko asia aboromotumo i naamangasunge banye yo. Ko afu gu sunge fu aRevi nga i naangerafuo gu kura apai banye yo. Ya mo Yekova aangera sa kina fuo agu aboro naamangasunge banye yo watadu naaraka mbembedi koyo? Oó! Yekova akparanga boro te.

12. Waigu pa wai Yekova aamangapai na aYisaraere ngbakungbo yo ayugu gupai nga ko akparanga aboro te? (Gate 40:38) (Oni bi sura a.)

¹² AYisaraere dunduko narengbe kadu na mbembedi pagume na Yekova, singia i aamangasunge banye yo watadu i aamanganga sunge  yo te, na singia gayo bamburoko adu mbembedi na banye watadu si adu nga mbembedi na ni te. Ni kpiapai, Yekova asa gupai nga gu riko aboro dunduko re naabi gu dubo na dangba we naadu bari banye. (Oni gedi Gate 40:38.) Ho gu dubo re ani guari ni na ki tona ka ndu kurogo vovo ba, agu aboro naanidu tuturũ ti banye ani nidu na rengba ka bihe na i ki dungura gayo ahe na ki zaki gayo bamburoko na kini ndu sa na gu kura aboro. (Geda 9:15-23) Aboro dunduko nanaagia gu woro ambanya ue naanidu kuari nanaayugo gupai fuyo nga si naida i tona nduge. (Geda 10:2) Si tie ziazia nga, anga pa gupai nga boro aaraka mbembedi na banye ayugu gupai nga ni du na mbembedi pagume na Yekova susi guni naaraka tuturũ te. Kuba gure, aYisaraere dunduko aima rengba kadu ni ga Yekova gino na kidu na gu maabangirise nga ko nika ngbe fuyo kumbatayo na kini banda yo. Wakina gure areme a, ka ani vura kaa raka kina wari rogo zegino, Yekova ima kpinyemu rani, kini ngerefuo rani, na kini banda rani.

YEKOVA AKPARANGA ABORO AREME TE

13. Tipagine rengbe ani ka ya ti ni we, Yekova akparanga aboro areme te?

¹³ Bete ga Mbori aboro areme naraka mbembedi na rii-basunge nga ga zegino watadu mbembedi na be-basunge nga ga aDezire Yekova. Agu akurayo kinaho namangasunge rogo agi aba re. Ni sangbana gipai re, agi aboro re ima rengba ka manga agu asunge du rogo agi aba re, na i na mamu a kaa kodatiyo na agu aboro nangbembatayo rogo apai yo. Aguyo namangasunge ni agu ababiapai ninaata ata watadu namanga gu kura asunge Kindo ti aregbo dũ. Ka si du nga mo dagba agi aboro re te, mo du na gu kido nga mo kindi nga ga Yekova gino na ko ima kpinyemu ro. Ko ima ino ro wenengai na ko nafu guhe foro mo aida na ni. (1 Pet. 5:7) Yekova nafu gu riahe nga ga toro fu gako agino dunduko,  na ko nangbe fuyo kumbatayo na kini banda yo.

14. Gini kura gene Yekova ayugo gupai ngbaha nga ko akparanga kura aboro te wa ngia ko Bairakporo?

¹⁴ Gu kura kpiapai nayugo gupai nga Yekova akparanga aboro areme te na ko ni gu boro nadia agino kugume dunduko nga, ko sa gupai nga aboro gbia Baibiri rogo zegino dunduko. I ake Ziazia Kekeapai ni bambataha rogo afugo biata: pa-Ebere, pa-Arama na pa-Giriki. Ya mo agu aboro nageda Baibiri rogo agi afugo yo i ake Baibiri rogoyo ni bambataha re na mbembedi pagume dagbayo na Yekova kisusi gu kura aboro agedanga ha rogo agu afugo re ya? Oó, anga wo duhe te.​—Mt. 11:25.

15. Gini gopai duho nayugo gupai nga Yekova akparanga aboro te? (Oni bi sura a.)

¹⁵ Yekova ayambanga rani ani du ni abakureako kina gu sa ka si du nga ani wirikipai ni bakerehe watadu ani ini agu afugo i ake Baibiri rogoho ni bambataha te. Yekova nasa gupai nga gako tatamana du fu aboro rogo zegino dunduko angianga kina aguyo wirikipai ni bakerehe ya. I ima sa Fugoko nga Baibiri kurogo dungu afugo rogo zegino, na aboro rogo zegino dunduko rengbe ka gbia undo tigaha yugopai na ki wiriki wai rengbe yo ka da ni abakureako.​—2 Tim. 3:16, 17.

“ONI NYE NI GA YEKOVA AGINO”

16. Ringbisihe kuti Amokedi 10:34, 35, waigu rengbe ani ka nye ni agu aboro Yekova aida na yo?

¹⁶ Si ni bakerepa irisa Yekova di rani ni agino kutii gako bamburoko yo. Ko nga wenesino boro, boro nyemuse, na ni gu boro na gamahe kpaima adu nga kura boro ho wa ko ya. Kurigure, ko akparanga aboro te, ko nadia aboro dunduko kugume zanga bipa gu ba du yo rogoyo, agu apai du tipa yo, pa wai wiriki yo pai, rangi kpotoyo, ngbatunga yo, garã yo, na singia kumba watadu dee. Ono tie, Yekova nadia kina agu aboro nigako agino nagia sangbako.​—Oni gedi Amokedi 10:34, 35.

17. Wari gu ani nika gbia kura apai ni tipa kadu ni agino tii ga Yekova bamburoko yo?

¹⁷ A wa duhe ni kekehe rogo Atambuahe 15:1, Davide afu gu sanahe nga: “Ako Yekova, da ka sungu rogo ga bamburoko? Da ka anye ri ga kparakpara ziazia bagangara?” Yekova amangisunge na Davide ko karagapai kuti gu sanahe re rogo Atambuahe 15. Rogo gu kekeapai ngbefuo gere, ani nika sakapai tipa agu apai si aida ani mangihe ka sa ngbarago ti Yekova na ki nye ni abakureako.