Asanahe be Agedihe
Waigu si aida ani girogo gupai yo du rogo Atambuahe 12:7
Rogo Atambuahe 12:1-4, ani nageda gupai yo nga, “yososo aidipase nyasi dagba wiri aboro.” Na rogo Atambuahe 12:5-7, ko ape gupai nga:
“‘Bambiko pa gbu ga rungorungo aboro ahe,
Na gu uko nga ga airazingo ahe,
Mi agúari awere.
‘Mi amáa gu ni ku rogo ba bata i naapayasi pa ni.’
Gu gumbapai nga ga Yekova nga ziazia apai;
Wa kina gu feda i afurũsi he rogo gbigiwi yo auru sende, ki furũsi he bara saba.
Ako Yekova, mo ká kuti rani;
Mo bánda rani be gi rika ngbatunga aboro re nye anye kindi.”
Veresi 5 nafura tipa gupai Mbori nika mangaha tipa “rungorungo aboro.” Ko nika batasa yo.
Veresi 6 nagbia gupai kuti ni nga “gu gumbapai nga ga Yekova nga ziazia apai; wa kina gu feda i afurusi he.” Gere nga gu fugo aKristano niima ida kuti ni.—Tam. 18:30; 119:140.
Rogo kura sasa-afugo Baibiri, Atambuahe 12:7 nape gupai nga: “Mo aká kuti ni.” Na mbiko gupai nga i pe gupai rogo gu veresi du mbata fu he nga “gu gumbapai nga ga Yekova” gu kura aboro dakuti gu digisopai nga si nayugo gupai nga Mbori ‘nakuti’ fugoko.
Na ani ima ino gupai nga Mbori aima banda Baibiri, agu aboro naasoga ha ki vura manga asadatise vurũ tipa ka gbarasaha kusayo.—Yes. 40:8; 1 Pet. 1:25.
Ono tie, gupai i napehe rogo veresi 5 nga kina rengo. Yekova aima digo ni batasi “rungorungo aboro” na ko nikaa ndu kumbatayo kindi kaa mangaha wo na kini batasi aguyo ‘nauko nga airazingo ahe.’—Eyo. 36:15; Tam. 6:4; 31:1, 2; 54:7; 145:20.
Sidu, ada du Yekova akakuti yo wa gu i napehe rogo veresi 7, aboro watadu Fugoko?
Ho ani abi agu apai ni du rogo Atambuahe, si ziazia nga si nafura tipa aboro.
Ti tonatona gupai du rogo Atambuahe 12, Davide afura tipa ruru airisi Yekova nga aguyo gbegberẽ aboro ape ziree fuyo. Na rogo veresi 3, ani nabi gu fugo yo nga Yekova nika mangapai na agu aboro namangasunge na mirã yo ngba gbegberẽ gene. Atambuahe nafu gu kido furani nga, ani ima rengba ka kido kuti Mbori nga ko nika mangapai amanga kuba gako aboro mbiko agu apai ko apehe ni ziaziaha.
Sidu, agu aboro Yekova nika banda yo wa gu i napehe rogo veresi 7 yo nga, gako aboro, nga agu aboro i amanga yo gbegberẽ.
Ono tipagine gu kura sasa-afugo Baibiri amangasunge ti ni na gu fugo nga “ni” watadu ha? Gi fugo re rogo gu Ziazia Kekeapai nga ga pa-Ebere du aboro adu na kido kutini. Ono rogo gu Bibiri nga ga pa-Giriki i ayambaha nga Septuagint, si mangisunge na agu afugo nga “ko akakuti rani” na “ko abanda rani.” Sidu, si nafura tipa gu ruru aboro i arungosi yo. I nika banda yo “be gi rika ngbatunga aboro re” be agu aboro naye na gbegberẽpai. (Tam. 12:7, 8) Rogo gu sasapai nga ga Ziazia Kekeapai nga ga Ebere ku rogo pa-Arama, gi veresi re nape gupai nga: “Ako, GBIA, mo abanda ruru aboro, mo abanda yo be gi gbegberẽ rikaaboro re nyeanye kindi.” Gi gopai re nayugo gupai nga Atambuahe 12:7 afuranga tipa gupai Mbori apehe te.
Mbiko gi ndupai re, gi veresi re nafu maabangirise fu “yososo aidipase” watadu ruru aboro tipa kumbatayo nga—Mbori nika mangapai amanga.
