1. Tipagine dungu aboro aberã gupai ti ni nga ka i rakinga nyeanye kindi te?

 DUNGU aboro ninaˈasada ka ri wene riahe na kini mangi mangonvo dedede tipa kpotoyo du wenengai tipa wa ka i raki ni gbangaha. Wa vura duhe wo, i abingo ho nga wene riahe gbiati mangonvo nika sa yo i ne gbinza na kpio te. Ono si nawiraha wa, i naberã gupai aberã nga ka boro rakinga nyeanye kindi te. Ono Yesu ape gupai nga, aboro ima rengba ka gbia “nyenye unga,” a wa i nayuguhe rogo Yoane 3:16 na 5:24.

2. Ginipai Yoane kapita 6 apehe tipa nyenye unga? (Yoane 6:39, 40)

² Rogo kura uru sa, Yesu amangi iiriwopai ki kusi kpakuto na atĩo fu akutu aboro. a Gipai re aima du ni iiriwoho, ono gupai ko apehe rogo gu uru nangbefuo gure fu gu dungu aboro nape ko ku Kaparanauma yo aima zeresa ngba aboro gbe. Ko ape gupai fuyo nga ko nika zingisa agu aboro nakpiki na i ki gbia nyenye unga. (Oni gedi Yoane 6:39, 40.) Mo berẽnga pa gupai gipai re ayugoho fu agu abakureamo na gu gamo aborokporo niima kpiko. Gupai Yesu apehe nafu gu kido foro nga i ima rengba ka zingisa gu badungu aboro niima kpiko, na mo gbiati gamo aboro ima  rengba ka raka nyeanye kindi. Ono gupai Yesu apehe tifuo gure rogo agu averesi yo du rogo Yoane kapita 6 aima kpakara fu dungu aboro i gitiyo na ni. Ginipai Yesu apehe?

3. Ginipai Yesu apehe rogo Yoane 6:51?

³ Tingbafuo Yesu kusi riahe ngba iiriwo gene fu rimbasa aboro, i aberẽpa gu manu Yekova afuhe fu aYisaraere ho i adu ni ngbakungba yo. Agu aboro Yesu afura fuyo aima ino gupai nga Ziazia Kekeapai aayamba manu nga “riahe ngbangbaturũ” yo. (Tam. 105:40; Yo. 6:31) Yesu amangisunge awere na guhe rimbasa aboro aima inopai tipaha nga manu tipa ka yugo nyanyakipa pai fuyo. Wa vura duhe nga manu angia gu gamahe naaye be Mbori ngba iiriwo gene, agu aboro narihe aima ye ki kpiki. (Yo. 6:49) Ono tie, Yesu aya tipa tiko ko nga “ndikidi kpokuta . . . ngbangbaturũ yo,” “ga Mbori kpokuta,” na “kpokuta nga ga unga.” (Yo. 6:32, 33, 35) Yesu apepa gu kparakparapai naadu dagba manu gbiati ko. Ko aya: ‘Mi nga gu unga kpokuta naye ngbangbaturũ yo. Ka boro ri gi kpokuta re, ni nye anye ni ungani kindi.’ (Oni gedi Yoane 6:51.) Rago aima gberã ti agu aYudo re. I aarengbanga ka rugatiyo na ndu gupai Yesu arengbe ka pe gupai ti ni nga ko angia gu “kpakuto” naye ngbangbaturũ yo na gi kpakuto re nangba kisusi manu nga gu Mbori afuhe fu atitayo te. Na Yesu ape gupai fuyo nga: ‘Gu kpokuta mi ka fu si nga pasiore.’ Ginipai ko aaida ka pehe? Si ni nyanyakipa pai furani ani rugutirani na gupai ko aaida ka pehe mbiko karagapai kuti gu sanahe re nayugopa wai nyenye unga nika du furani gbiati gaani aboro. Ani bingo gupai Yesu aaida ka pehe.

UNGA KPAKUTO NA PASIOKO

4. Tipagine ngba kura aboro azere ti ni be gupai Yesu apehe?

⁴ Kina ngba bete agu aboro nagi gupai nga gu kpakuto si aaida i rihe angia pasioko ko nika fuhe “tipa gu unga nga ga aboro zegino dũ.” Isoke i aberẽ gupai nga ko aaida nzunzu i ri kina boro ndikidi pasioko. (Yo. 6:52) Ono Yesu ape gupai fuyo naima zigbä yo berewe gbe, ko aya: ‘Ka oni ari nga pasio Wiri boro ki mbiri kureko ya, unga du nga kpotoroni yo te.’​—Yo. 6:53.

5. Tipagine rengbe ani ka ya ti ni wẽ anga gupai Yesu aapehe nga si naida aboro mbiri ndikidi kure ko te?

⁵ Ti regbo Noa, Mbori aima za aboro ti ri kure. (Bam. P. 9:3, 4) Kusa, Yekova aima fu rugute a fu aYisaraere nga ka i ringa kure ya. Si adu nga i “kpara” watadu ka imo gu boro naniri kure. (Pa Mot. 7:27) Yesu ayugupai fu aYudo i mangipai kuti agu aNdiko dunduko Mbori afuhe fuyo. (Mt. 5:17-19) Sidu, ko aarengbanga ka sana agu aYudo re i ri ndikidi pasioko watadu ka mbira ndikidi kure ko te. Ono ni gumba Yesu agi afugo re, ko aaida ka yugo wai fu aboro rengbe yo ka gbia​—“nyenye unga.”​—Yo. 6:54.

6. Tipagine rengbe ani ka pe gupai ti ni nga agu afugo Yesu du tipa ri pasioko na ki mbiri kureko angia kpiapai?

⁶ Si tie ziazia nga, Yesu aamangasunge na kpiapai ho ko aafura ni fu rimbasa aboro. Yesu amangisunge na kpiapai ho ko ape gupai ni fu gu dee nangia boro Somorona nga: “Gu ni ka mbiri gu ime ka mi fu fu ni gomoro ime mangi nga ni berewe te; gu ime ka mi fu fu ni si du kpotoni yo ni gugaabi niguku ku ari sa nyenye unga.” (Yo. 4:7, 14) b Anga gupai Yesu aapehe nga gu dee Somorona re nika raka nyeanye kindi ka ri mbiri kura  ime rogo gu kura guga te. Wakina gure a, anga gupai ko aapehe nga gu rimbasa aboro ko aafura fuyo Kaparanauma yo nika raka nyeanye kindi ka i ri ndikidi pasioko na ki mbiri ndikidi kure ko te.

KPARAKPARAPAI DAGBA AREGBO UE

7. Ginipai kura aboro apehe tipa agu afugo Yesu du rogo Yoane 6:53?

⁷ Gu kura aboro aape gupai nga rogo Yoane 6:53, Yesu aasakapai tipa gupai si aaida aboro mangihe ti regbo Ga Gbia Riahe mbiko ti gu regbo re, ko amangisunge na kina ngbatunga afugo wa gure. (Mt. 26:26-28) I nape gupai nga ai gu boro nandu tipa Ga Gbia Riahe si aida ni ri kpakuto na ki mbiri imekakue nga gu nasusa dagba aboro. Ya mo gupai re ruaru? Si ni nyanyakipa pai furani ani ini karagapai kuti gu sanahe re bambiko rogo agarã ni basasa, amirioni aboro rogo zegino dunduko ni naadunguratiyo na ani tipa gu mbakadapai re. Ani bingo gu kparakparapai du dagba gupai du ni kekehe rogo Yoane 6:53 na gupai ko apehe ti regbo Ga Gbia Riahe.

8. Gini bete kparakparaapai duho dagba agu aregbo naadu ue re? (Oni bi asura a.)

⁸ Ani bingo gu kparakpara apai ue du dagba agu apai re. Ni bambataha, ti gini regbo na wari du Yesu ape agu afugo ni du ni kekehe rogo Yoane 6:53-56? Ko ape agi apai re Gariraya yo rogo gu garã nangia 32 Fuo Batikayo  Kristo. Ko ape gipai re garã sa mbata fu ko sigira Ga Gbia Riahe Yerusarema yo. Uepai nga, ada du ko aafura fuyo? Ko ape agi apai re fu agu aboro naadu na bakere nyemu ka ri kina riahe be Yesu kuba gupai nga ka wirikapai tipa Yekova watadu ga Mbori Kindo. (Yo. 6:26) Ni rengo, ho Yesu ape gupai ni si aima kpakara fuyo ka rugatiyo na ni, i ambu du na idapase kuti ko. Zavura gu kura gako abawiriki aima mbu pekafuo ko. (Yo. 6:14, 36, 42, 60, 64, 66) Agi aboro re adu kia ti gu ruru amokedi naadu 11 nga aguyo naadu na Yesu wa garã sa kusayo ti regbo Ga Gbia Riahe. Ti gu regbo re, ga Yesu ruru amokedi naadu 11 adu na kina ko wa si avura du vurũ nga i aaruganga tiyo wenengai na agu apai dunduko ko aayugoho te. Wa si avura duwo, ga Yesu ruru amokedi aadunga wa agu aboro naadu Gariraya yo te, gako ruru amokedi aima du na gu kido nga Yesu angia Wiri Mbori nga gu ko naye ngbangbaturũ yo. (Mt. 16:16) Ko afu tambuahe fuyo ki ya: “Oni nga agu yo naadu na mi ho i aasadi re ni.” (Rk. 22:28) Gu kparakpara apai re nayugo gupai nga rogo Yoane 6:53, Yesu aˈasadanga ka sakapai tipa gupai rengbe ka manga pati Ga Gbia Riahe te. Ono gu kura dungu kparakparaapai kinaho du dagba agi aregbo ue re.

GUPAI AFUGO YESU AYUGOHO FORO

9. Agu afugo Yesu ko apehe ti regbo Ga Gbia Riahe adu fu gini badona aboro?

⁹ Ti regbo Ga Gbia Riahe, Yesu afu kpakuto zanga agbooro rogoho fu gako amokedi na ki pe gupai fuyo nga si narukuba kpotoko. Fuo gure, ko ki fu imekakue fuyo i mbirihe na ki pe gupai nga si narukuba ‘Kureko nga ga ndika.’ (Mk. 14:22-25; Rk. 22:20; 1 Kor. 11:24) Gupai ko apehe tipa ndiko na nyanyakipaha gbe. Ko ayambuhe nga “vovo ndika” na kina agu aboro nika zogarago na Yesu rogo gako Kindo du rogo gi vovo ndiko re, angianga aboro dunduko ya. (Eb. 8:6, 10; 9:15) Amokedi aaruganga tiyo na apai dunduko tipa ndiko watadu mozunga ti gu regbo re te, ono si adu nga i nika mbeda yo na ziazia toro mbembedi tipa i du ni papara gu vovo mozunga re na kidu na bangiriba beyo na Yesu ngbangbaturũ yo.​—Yo. 14:2, 3.

10. Gini kura kparakparapai du dagba gupai Yesu apehe ti regbo Ga Gbia Riahe na gupai ko apehe Gariraya yo? (Oni bi sura a.)

¹⁰ Agu apai Yesu apehe ti regbo Ga Gbia Riahe adu fu “umba rika aboro” watadu umba avusende. Gi tooni badona re atona na gako ruru amokedi nga aguyo naadu na ko ti gu regbo re. (Rk. 12:32) I du Yesu asana yo i ri kpakuto na ki mbiri imekakue rogo gu nyemu re. Si adu nga agu aboro nika da ni papara gi badona re kusa nika ri gu kpakuto re na ki mbiri gu imekakue re a ho i nikaa manga Ga Gbia Riahe ni. I du nga agu aboro nika gbia ba ngbangbaturũ yo na Yesu. Sidu, gere gu nga gu kura kparakparapai du dagba Ga Gbia Riahe na gupai namangi kusayo Gariraya yo. Gupai Yesu apehe pati Ga Gbia Riahe nabipa kina umba rikaaboro. Agu afugo ko apehe Gariraya yo adu tipa dungu aboro.

11. Ginipai Yesu apehe Gariraya yo nga gu nayugu gupai nga ko aafuranga fu bete aboro gbua te?

¹¹ Badungu agu aboro Yesu afura fuyo Gariraya yo aaida kina gu riahe nga ga borose gbua beko. Ono Yesu aˈasadi ka undo yo i rugutiyo na gupai nga, gu kura he adu kinaho paha anyaki gbe kisusi riahe. Si angia guhe ka fu nyenye unga fuyo. Na zavura Yesu ape gupai nga i ima rengba ka zingisa agu  aboro nakpiki ti yangara regbo na i ki raki nyeanye kindi. Ko aafuranga ane tipa bete aboro wa gu ko amangihe ti regbo Ga Gbia Riahe te. Kuba gure, ko afura tipa gu maku si adu nga aboro dunduko nika gbiaha. Ko ape gupai nirengo nga: ‘Ka boro ri gi kpokuta re, ni nye anye ni ungani kindi . . . Gu kpokuta mi ka fu si nga pasiore, tipa gu unga nga ga aboro zegino dũ.’​—Yo. 6:51. c

12. Ka boro aida ka gbia nyenye unga, ginipai si aidaha?

¹² Ya mo gupai Yesu aaida ka pehe nga ai gu boro naraki nika gbia nyenye unga? Oó, kina agu aboro nari ‘gi kpokuta re’ nayugo gupai nga agu aboro du na idapase kuti Yesu nika raka nyeanye kindi. Badungu aboro areme nape gupai nga i na idapase kuti Yesu na kini yambu ko nga gayo batasi. (Yo. 6:29) Ono kura dungu apai kinaho si aidaha. Badungu aboro adu kinaho Gariraya yo nape gupai ti tonatonaha nga i na idapase kuti Yesu ono i aima mbu pekafuo ko. Tipagine i ambu pekafuo ko ti ni?

13. Ginipai si aidaha tipa ka da ni ndikidi pefuo Yesu?

¹³ Badungu aboro dagba gu rimbasa re aapekafuo Yesu mbiko ko afu guhe fuyo i aaidaha. I aaida ko husi yo, kini fu riahe fuyo, na kini pe agu apai fuyo i aakpinyemu ka giaha. Ono Yesu ayugu gupai nga, kura dungu apai kinaho si aidaha be ndikidi apefuoko. Anga gu yangarapai ko aye tipaha ku auru kpotosende nga ka mbisa ga aboro nyemupai nga ga borose te. Si aaida i ye fuoko, nayugo gupai nga i degetuyo fuko na  kini mangi pai kuti agu apai dunduko ko ayuguhe.​—Yo. 5:40; 6:44.

14. Ginipai si aida ani mangihe tipa ka gbia undo ti pasio Yesu na kureko?

¹⁴ Yesu ayugupai fu rimbasa aboro nga pa fuko pasioko na kureko nika saha fuyo taata tipa i raki nyeanye kindi. Si aaida i du na idapase kuti gupai re. Ngbatunga gu idapase re adu na nyanyakipaha fu agu aYudo re, na si kindi na nyanyakipaha areme. (Yo. 6:40) Tipa gupai nga ani gbia undo ti pasio Yesu na kureko wa gu i napehe rogo Yoane 6:53, si naida ani du na idapase kuti motumo tumorii. Gu momu re fu dungu aboro.​—Ef. 1:7.

15-16. Gini nyanyakipa apai ani awirikaha rogo Yoane kapita 6?

¹⁵ Rogo Yoane kapita 6, ani nawirika dungu apai yo nga gu du na nyanyakipaha gbe na du ni pa ngarasaro furani dunduko. Ani nawirika gupai nga, Yesu na berãpa aboro ni bakerehe. Ko ahusi aboro kaza, ki yugupai fu aboro tipa ga Mbori Kindo, na ko afu gu riahe fuyo i aaidaha. (Rk. 9:11; Yo. 6:2, 11, 12) Gu nyakipaha anyaka gbe nga, ko ayugu gupai fu aboro nga ko “nga gu kpokuta nga ga unga.”​—Yo. 6:35, 48.

¹⁶ Si ni rengo nga, agu aboro Yesu aya tipa yo “gu kura akandoro” aringa gu kpakuto na ki mbiri gu imekakue du pati Ga Gbia Riahe te. (Yo. 10:16) Ono tie, i nagbia undo agbia ti pasio Yesu Kristo na kureko. I namanga gipai re nidu yo na idapase kuti motumo tumori nga ga Yesu gbiati gu wene apai si aye na ni. (Yo. 6:53) Ono agu aboro si aida i ri kpakuto na ki mbiri imekakue nayugu gupai nga i nga papara vovo Ndiko na i na gu maabangirise nga ga zogarago rogo ga Mbori Kindo. Sidu, singia ani nga mbedimbedi aKristano watadu gu kura akandoro, gu pangbanga du rogo Yoane kapita 6 na nyanyakipaha gbe furani ani wirikipai tipaha. Si nayugo gupai furani nga ani dunduko si aida ani du na nyanyaki idapase kuti motumo tumorii tipa ka raka nyeanye kindi.