I avungu re rogo 1927 rogo tooni gbata mbembedi na Chicago, Illinois, Amerika yo. Buba na Nina adu na agude beyo dunduko bisue nga​—Jetha, Don, mi, Karl, gbiati Joy. Ani dunduko aima diaberã ka iriso Yekova na kpotorani yo dunduko. Dawire nga Jetha andu ku rogo ue riko nga ga Girada rogo 1943. Don andu ka mangasunge Betere Brooklyn yo, New York yo rogo 1944. Karl andu ku Betere yo rogo 1947, na ti fuo gure, Joy ki ndu rogo 1951. Gayo wene kpiapai angarasi re tipa mi mangi bakere apai ti ngba ga Yekova sunge.

ABuba na Nina anaageda Baibiri na i aima kpinyemu Mbori na i angarasi rani tipa ani mangi dungu apai ti ngba ga Yekova sunge. Ono tipa buba tigako, ko aadunga na irisa tipa kanisa berewe te tifuo ko mangisunge ni banzengere Putu yo ti regbo Bambata Vura Nga ga Zegino. Nina adu na bakere tambuahe fu Mbori nga buba ayego berewe ba vura yo, sidu, ri aya fuko: “Karl, ani ndu berewe ku kanisa yo wa gu ani anaamangaha mbata.” Buba akaragapai nga: “Mi nika gasa ro ko yo, ono mi arimongo ku dimo yo te.” Ri asanahe nga: “Tipagine?” Ko akaragapai nga: “Ti regbo vura, abarumbatayo rogo pambori du kina rogo bangisa pambori aafu maku fu abanzengere ono nga aguyo naasovura dagba tiyo bavura yo! Ya mo Mbori aasongoda agu abanzengere re asongoda dunduko?”

Kusa, ho nina adu ni kindi kanisa yo, aDezire Yekova ue aye ku kpurani. I afu abuku ue fu Buba du rimoho nga Light, nga gu naasakapai tipa gu buku nga Yugoti. Rago aima ngba ti buba na ko ki di agu abuku re. Bara sa kindi Nina abi agu abuku re, ri atona ka gedaha. Tifuo gure, rogo kura uru sa, ri abi kekeapai rogo waraga apangbanga nga gu naayamba agu aboro du na nyemu wirika Baibiri tipa i ndu ka gbia undo ti gu buku nga Light. Ri adiberã tipa ka ndu. Ho ri ada ni yo, sosono dee aye ku ngbadimo. Ki zadi buku sa dagba agu abuku re, Nina asanahe nga, “Mo nawirika gi buku re ane?” Gu de re akaragapai ki ya: “Ii, wire, mo ye ku dimo no.” Gu poso nangbefuo gure, Nina adi rani nga agude ani ndu na ri, na tifuo gure, ani anaandu na aposo dunduko.

Ti regbo kura dunguratise sa, banungusihe asana re tipa mi gedi Atambuahe 144:15, nga gu nape gupai nga agu aboro nairiso Yekova i na ngbarago. Gu veresi re aima ngba tire wa kina gu du rogo​—1 Timoteo 1:11, nga gu naya Yekova nga “betedi Mbori,” watadu Mbori ngbarago na AEfeso 5:1, nga gu nangarasa  rani tipa ani “wíriki Mbori.” Mi aini gupai nga si naida mi du na ngbarago kaa iriso Bakusi re na si naida mi naatambua ko tipa wa ko nafu momu tipa mi mangihe wo. Gure nga agu apai ue mi naˈasada kaa mangaha ti aregbo dũ.

Baturõ gu dungurati nambedi na ani adu nga akirometere 32 (amairo 20) ti Chicago. Wa si avura duwo, ani anaandu andu, na gimi inohe rogo Baibiri yo asono. Mi natingida gupai nga ti kura regbo sa, banungusihe asana Jetha tipa ri fu karagapai. Wa mi adege ture kuti gari karagapai, mi aberẽ gupai nga: ‘Mi niima ino gure. Mi ima rengba ka tumba bere kuari ka karagapai.’ Mi atona kaa mbakada adunguratise na ki ni fuku akaragapai. Gupai paha anyaki tie gbe nga, awirinina ue nga akumba na adee a ue gbiati re aye kadu mbembedi na Yekova. Mi azi bapatiza rogo 1941.

Mi natingida pa gu bakere dunguratise gbe ani adu pati ni rogo 1942 Cleveland yo, Ohio yo. Gaani aborokporo asungu tii bamburoko wa sa na kura dungu ariikporo mbembedi pati gu ba bakere dunguratise aamanga rogoho. Berewe a, awirina rogo agbata niima susa 50 Amerika yo aadegatuyo kuti gu mbakadapai re rogo terefuni. Ue Vura Nga ga Zegino aamanga kindi na i aarungosi aDezire Yekova kina kumbatayo. Rogo gu nyemu re, mi abi badona nga ga awirina i narugusi gayo atorombiri na si kini zigi awe kusayo ti bataya. Aboro dunduko naidi kuti gupai nga aboro duku rogo atorombiri dunduko tipa ka banda rago sasasa rogo gu yuru re. Ho i anibi kpia ai kerepai ni, awirina anizigi gayo awe torombiri tipa si vurosi bangiri agu aboro nanaaida ka zubo yo na ki vudi ambanya. Kura aboro anizubo koyo tipa ka undo. Mi aberẽ gupai nga, ‘ga Yekova aboro ima mbakada tiyo wenengai tipa ai pai!’ Gbegberẽpai aamanganga te, na bambiko wa mi aabi tire ni bandabanda re, mi adu na rengba ka ra zezeredi.

Fuo agarã kusa, mi aberẽkurii gu bakere dunguratise re, na mi aye ka ino gupai nga nina aabakanga bangiri watadu ka gunde te. Ri amoi gari kido naabaha kuti Yekova na gako riigbu. Ka bangire gonga ti gari wene kpiapai te.

Ngbutuko mbata fu gu bakere dunguratise re, Nina ada ni nazakigene. Ri aima maa berãri wenengai tipa agu agumbapai naasakapai tipa sunge Kindo ti aregbo dũ. Ho ani aaga ni ku kporo yo, ri aya, “Mi naida kaa ndu kindi kumbatayo kaa mangasunge anazakigene ono mi arengbanga kita manga gu sunge re na kini ngerefuo kpurani wenengai te.” Ri asana rani singia ani rengbe ka undo. Ani aya ii, sidu, ri afu abambu furani nibasasa dunduko sa watadu ue tipa ani naagirisoho mbata fu riahe nga ga wiso. Na ho ani anindu ni ku sukuru yo, ri anaabiko abambu dunduko ka bihe singia si gigiri, na tifuo gure tie, ri kini ndu gene tungusapai yo. Ri anaamangasunge kakaka, ono ri aambunga awiiri te. Ho ani aniye ni ku kporo yo ti regbo riahe nga ga bebere uru na tifuo sukuru, ri anidu kinaho ti aregbo dũ furani. Rogo gu kura aˈuru tingbafuo sukuru, ani aakura na ri gene tungusapai yo, gure nga gupai naundo rani ani rugutirani na pa gu sunge abazakigene amangaha.

Mi atona sunge abazakigene ho garã re adu ni 16. Wa Buba aavura nga da ni Dezire Yekova ya, ko aima kpinyemu wai mi aamangasunge tungusapai.  Rogo kura nyemu sa, mi ape gupai fuko nga wa mi avura kaa manga ome kakaka, mi ata bingo boro sa idi ka wirika Baibiri te. Tingbafuo, mi ongo tooni, mi asanako nga, “Ya mo mo nakpinyemu mi wirikipai na mo?” Ko aberẽkurii he tipa bete regbo, na ko ki idi ka wirika Baibiri.” Ni rengo, gu bambata boro mi awiriki Baibiri na ni angia buba. Si aima du fere nipa momu!

Ani awiriki gu buku nga “The Truth Shall Make You Free.” Tifuo regbo ngbutuko, mi aye ka ino gupai nga, Buba aaundo re mi du nga wene bawisigi Baibiri na ki ngia wene bayugupai. Ni kpiapai, rogo kura nyemu sa tifuo geda ani genewaraga, ko aya: “Mi ima bi gupai gi buku re apehe. Ono waigu rengbe mo ka ino nga gupai si apehe nga rengo?” Mi aambakada nga tire tipa gipai re te, sidu mi aya: “Ka mi yugungo ho foro awere te, ono tingbafuo gu gaani wirikapai naye re, mi nika fu karagapai foro.” Na mi aima mangaha wo. Mi abi averesi nga gu naasongoda gu memepai ani aasakapai tipaha re. Tingbafuo gure, mi anaambakada tire wenengai tipa gaani wirikapai, na mi awiriki wai ka manga wetekapai. Gupai re aundo re mi du nga wene bawisigi Baibiri, na si aima undo buba a. Ko amangipai kuti gupai ko aawirikaha na ko azi bapatiza rogo 1952.

Mi aguari kporo ho garã re adu ni 17. Kina bara ti gu regbo re, Jetha a ada nga mokedi, na Don, ki ndu ku Betere yo. I dunduko aima kpinyemu gayo asunge nga gupai naima ngarasa re nibakerehe gbe. Sidu, mi asanahe tipa sunge Betere gbiati gu Sukuru Nga ga Girada na mi ambu apai ku be Yekova. Sangbanaha angia gine? I ayambu re ku Betere yo rogo 1946.

Vuru agu agarã ninaasusa, i aima fuka dungu asunge fere nibakiakia Betere yo, sidu, mi adu na rengba ka wirika dungu vovo apai. Mi ima dia agarã awere ku Betere yo nga 75, na vuru agu aregbo re dunduko, mi awiriki wai ka gbingbida abuku gbiati wai ka mangasunge ngerafuo marã. Mi ima wirika wai ka ngbeka agu ahe ani aidaha ku Betere yo na wai ka keda gu kura nyanyakipa ahe ku rogo gu kura aba. Gu tie karagaha akaraga gbe nga, mi nagbia ngbarago ti agu ayugopai dunduko nga ga Baibiri ani agbiaha Betere yo ti regbo gu irisombori nga ga wiso na gu kura ambakadapai.

Mi awirikipai a be temere nga Karl, naye ku Betere yo rogo 1947. Ko angia wene bawisigi Baibiri na wene bayugupai. Ti kura regbo sa, mi agbata gako undo tipa ka manga gumbapai i afuhe fere. Mi asaki rogo gupai yo fu Karl nga mi ima gbia dungu apai ono si ima mbu fere tipa mi ini wai ka manga sunge na ni. Ko asa gupai nga mi gbia karagapai ni fuko sanahe sa nga, “Joel, gamo rii gumbapai nga gine?” Mi arugu tire niipo na gupai ko aaida ka pehe. Si aaida mi mangisunge sa na kina agu apai naundo ka saka rogo gimi rii gumbapai yo angianga ka koda  apai ko yo dunduko ya. Bangire aagonga ti gupai mi awirikihe re te.

Tipa ka du na ngbarago Betere yo, si naida ani naamangasunge tungusapai amanga, na ani ima rengba ka gbia wene asangbanapai ti mangaha wo. Kpiapai sa mi atingidaha wenengai namangi ti ngba kura nyemu sa Bronx yo New York City yo. Ani na kura wirina sa andu ka bi kura dee nadi Ngbaõbambu Sinziri na Awake! Ani ape gupai ani aye na ni ki ya, “Rogo gi nyemu re, ani naundo aboro i wiriki wene apai rogo Baibiri yo.” Ri akaragapai ki ya, “Ka i ya si tipa Baibiri, oni ye ku dimo no.” Ani agedi dungu averesi furi nga gu nafura tipa ga Mbori Kindo na paye vovo zegino na ki sakirogoyo. Gipai re tigaha aima ngba tiri, mbiko ri ayambu badungu abakureari i ye fuo rani rogo gu poso nangbefuo gure. Ri gbiati kumbari ada kusa ni ga Yekova ruru amoyambu.

Mi adiberã nga si naida mi mangi rogatise. Fuo agarã 10 kusa, mi agbia gu wene boro si aaida mi mangi rogatise na ni. Ginipai naundo re tipa mi gbia wene dee? Mi akparikpee fu Yekova na mi aberẽpa gupai mi aaida ani mangihe na diare tingbafuo ani mangi rogatise.

Rogo gu bakere dunguratise namangi rogo 1953 Yankee Stadium yo, mi agbia wirina ni dee rimori angia Mary Aniol. Ri gbiati Jetha amangi gu ue riko nangia ga Girada, na aMary na dawire aamangasunge ni amokedi kina rogo ba sa. Mary adu na bakere ngbarago ka pe pa gari sunge ni mokedi fere Caribbean yo na pa agu aboro ri aawirikapai na yo vuru agu agarã susi. Wa ani atona ka ino tirani, ani aye ka ino gupai nga ani dunduko ue adu na kina bangisa asasa. Gaani nyemuse atona ka sona, na ani amangi rogatise rogo Zerekpe 1955. Mary ayugu gupai rogo dungu agene nga, ri nga gamahe be Yekova na ki ngia wene kpiapai ka wirika ri. Ri anidu na ngbarago ti ngba ai gu sunge i anifuhe furi. Ri anaamangasunge kakaka, kini ngerefuo aboro na nyemuhe, na kini peresipa agu apai nga ga Kindo nibambatapai rogo gari raka yo. (Mt. 6:33) Ani amangisunge biko adungurati tipa agarã biata, na rogo 1958, i ayambu rani ani mangisunge Betere yo.

Mi awirikipai ni bakerehe be Mary. Ni kpiapai, ho ani arogotirani aroga ni, ani adiberã kaa geda Baibiri kina sa, ani anaanyasa averesi 15 rogo uru sa. Tingbafuo boro sa dagbarani gedi paparaha, ani anaafu karagapai rogo agu averesi re na kini sakipai tipa wai rengbe ani ka mangapai kuti ni rogo gaani raka yo. Dedede, Mary anaapeka agu apai fere ri awirikihe Girada yo watadu ti ngba gari sunge ni mokedi. Agu apai mi awirikihe beri aundo re mi ini wai ka mbakada gimi agumbapai na mi ini wai ka ngarasa kura awirina nga adee.​—Snz. 25:11.

Bawene diare nga Mary akpi rogo 2013. Ono mi nangera tipa ka bi ri rogo vovo zegino! Wa du rago re, mi ima diaberã kaa ndu kumbatayo kaa wirikapai kindi na kini kido kuti Yekova na ngbadure yo dunduko. (Snz. 3:5, 6) Mi nagbia wasa na ngbarago ti berãkurii gupai ga Yekova aboro nikaa mangaha rogo vovo zegino. Gipai re nzunzu nakoda wirika vovo apai be gaani Bakere Bayugupai na wirikapai tipa ko! Ni rengo, mi nagasa bakere tambuahe tipa agu apai dunduko ko nayuguhe fere na tipa gako bakere weneringise arẽnga aboro tipa ya.