Gu mokedi nangia Pauro akepai fu gu kurako bakumba nangia Timoteo ki ya: “Mi naruga ro ku bangiri Mbori na Kristo Yesu na siasia amaraika, mo ká kuti agi apai re ni soki te, ka mo mángi nga pai ni kpara aboro wa sa ya.”​—1 Tim. 5:21.

Tipa ka undo rani ani ini ada nga agi amaraika re, ani nika sakapai tipa agu amaraika i arengbanga ka koda yo ku dagba gi badona amaraika yo re ya. Si tie ziazia nga, agi amaraika re arengbanga kadu nga papara 144,000 te. Ho Pauro akepai ni fu Timoteo, i aatonanga zingisambedimbedi aKristano ti gu regbo re ku ngbangbaturũ yo te. Amokedi gbiati mbedimbedi aKristano aadanga ni agu aboro nga atoro te, sidu, i aarengbanga ka ya tipa yo i nga “siasia amaraika” te.​—1 Kor. 15:50-54; 1 Tesa. 4:13-17; 1 Yo. 3:2.

Berewe a, “siasia amaraika” aarengbanga ka du nga agu amaraika nabasasangba ti regbo Ime Akangbii te. Agi amaraika re apekefuo Satana na ki da ni adaimona, na ki ngia avura Yesu. (Bam. P. 6:2; Rk. 8:30, 31; 2 Pet. 2:4) Kumbatayo, Yesu nika ba yo ku rogo gu due zanga mburuhe, i nika du yo tipa garã 1,000. Tifuo gure, i nika gbarasayo wa sa na Satana.​—Yuda 6; Yugo. 20:1-3, 10.

Gu “siasia amaraika” Pauro aafura tipa yo re arengbe kadu nga agu amaraika du ngbangbaturũ yo nga aguyo nasongoda “Mbori na Kristo Yesu,” nga aguyo i nafura tipa yo kina rogo gu bangisa veresi re.

Badungu akutu ruru amaraika du ti ni. (Eb. 12:22, 23) Si nawiraha wa anga amaraika dunduko Yekova naafu kina bangisa sunge fuyo i mangihe te. (Yugo. 14:17, 18) Ni kpiapai, Yekova aya fu bangisa maraika sa ko imi agu abanzengere nangia ga aAsuro yo bangeyo adu nga 185,000. (2 Aba. 19:35) Badungu amaraika aima rengba kadu na gu sunge nga ka ‘dúngura agu ahe dunduko rogo [ga Yesu] ngbi aboro nakota ti ni, na agu yo dunduko namanga gbegberẽ pai.’ (Mt. 13:39-41) Agu akurayo aima rengba ka “dungura gako siasia aboro” ku ngbangbaturũ yo. (Mt. 24:31) Na gu kura amaraika ‘nabanda rani ngba gaani agene dunduko.’​—Tam. 91:11; Mt. 18:10; oni ringbisinga ha na Matayo 4:11; Ruka 22:43.

Gu “siasia amaraika” i nafura tipa yo rogo 1 Timoteo 5:21 si nawira gupai nga i na gu sunge beyo nga ga undo ka ngerafuo dungurati. Rogo gupai du mbata fu gere, Pauro afu rugute tipa wai si aida abaakumba naamanga gayo asunge, na wai si aida agu aboro dunduko du rogo dungurati du na irisa koyo du abaakumba ni. Pauro aya si aidanga abaakumba mangipai “ni soki te” watadu kadu na iraira bipai tipa kura aboro watadu ka “kpara aboro wa sa” te na si aidanga i mangi adiaberã mbata fu i berẽ wenengai te. Pauro afu wene ndupai tipa i pekefuo gako rugute. Ko aya abaakumba naundo awirinayo “ku bangiri Mbori na Kristo Yesu na siasia amaraika,” nayugo gupai nga, Yekova, Yesu, gbiati “siasia amaraika” nabi wai abi abaakumba angerafuo dungurati. Sidu, kura amaraika na gu sunge beyo nga ga undo dungurati. Dagba gu kura apai yo i amangaha nga ka banda ga Mbori amoyambu, ka undo na sunge tungusapai, na ka gumba agu apai fu Yekova i abihe.​—Mt. 18:10; Yugo. 14:6