1. Waigu ani agbia undo ti du ani pati Tingida Pakpio Kristo nga gu ninaamanga na agarã dunduko?

 YEKOVA afu nyanyakipa gamahe gbe furani ho ko akedi Wiriko ni ko kpi tipa rani! (2 Kor. 9:15) Mbiko gupai nga Yesu akpi tipa rani, mo ima rengba ka da ni bakurea Yekova. Mo ima rengba a ka ngera kumbatayo tipa ka raka nyeanye kindi. Badungu ndu apai du berani tipa kadu na tambuahe fu Yekova nga gu ko nafu motumo tumorii mbiko ko ima kpinyemu rani ni bakerehe! (Rom. 5:8) Tipa ka undo rani ani nye kindi na tambuahe bangirani ki zanga go ti gupai aYekova na Yesu amangihe furani, Yesu afu zinahe furani ani du pati Tingida Pakpio ko nga gu ninaamanga na agarã dunduko.—Rk. 22:19, 20.

2. Ginipai i nika sakapai tipaha rogo gi kekeapai re?

² Rogo gi garã re, i nika manga Tingida Pakpio Yesu Rago Nzengu, Zerekpe 12, 2025. Zanga kapa, ani dunduko namanga mbakadapai tipa kadu pati ni. Ani nika gbia undo ni bakerehe ka ani di regbo ti agu aregbo ninaandu kuti Tingida Pakpio Yesu ka berãkurii a gupai aYekova na Wiriko namangihe furani. Rogo gi kekeapai re, ani nika sakapai tipa gupai motumo tumorii ayugoho furani tipa Yekova na Wiriko. Rogo gu kekeapai ngbefuo gere, si nika undo rani ani rugutirani na pa wai rengbe ani ka gbia undo ti motumo tumorii na wai rengbe ani ka yugo gaani tambuahe tipaha.

GUPAI MOTUMO TUMORII AYUGOHO FURANI TIPA YEKOVA

3. Waigu kpio bangisa boro sa arengbe ka batasa badungu aboro be ingapai na kpio? (Oni bi sura a.)

³ Motumo tumorii nayugopa ga Yekova ruru sarangbanga furani. (Pa Rug. 32:4) Ho Adamu abasasangba Mbori ni, ko ada ni boro ingapai na ki kpi. Mbiko gupai nga ani nga awiriko, ani a  nga aboro ingapai na ani nakpiko akpiko. (Rom. 5:12) Tipa ka batasa rani be ingapai na kpio, Yekova akedi Yesu ko ye ka fu Motumo tumorii. Ono wai gu kpio bangisa rengberengbe boro sa arengbe ka batasa badungu aboro be ingapai na kpio? Gu mokedi nangia Pauro asaki rogoyo nga: “Wa i amoi dungu aboro ni aboro ingapai mbiko ga [Adamu] basapai sa, kina wo i ka maa dungu aboro ni ruru aboro bangiri Mbori mbiko ga [Yesu] giasangba sa.” (Rom. 5:19; 1 Tim. 2:6) Sidu, gupai Pauro aapehe nga, aboro dunduko nga aboro ingapai na kini kpiki mbiko rengberengbe boro sa nabasa sangba Mbori. Sidu, tipa ka batasa rani be ingapai na kpio, si aaida rengberengbe boro gisangba Mbori.

4. Tipagine Yekova aambunga agu awiri Adamu ti ni naagiasangba Ko tipa i raki nyeanye kindi ya?

⁴ Ya mo si aaida gupai aida nzunzu nga Yesu kpi tipa ka batasa rani? Tipagine Yekova aambunga agu awiri Adamu naagiasangba Ko ti ni tipa i raki nyeanye kindi ya? Ani ima rengba ka berã gupai nga, gere aima rengba ka ngia wene gene tipa ka mangapai kuti gi kpakarapai re ngbaha. Ono gipai re aarengbanga kadu ni rurupai fu Yekova ko mangihe te. Mbiko ti gu regbo re, ka si adu wa ka i ya Adamu aamanganga kere ingapai te na awiriko aangianga aboro ingapai a te. Ono anga rengo nangia gipai re te.

5. Tipagine rengbe ani kadu na gu kido ti ni nga Yekova nikaa manga kina gupai du ni ruruhe ti aregbo dũ?

⁵ Na berewe, ka Yekova aafunga motumo na ki mbu atita Adamu i raki nyeanye kindi si ki vura du vurũ nga i angia kpakpa aboro ya, ka si du nga Yekova amanganga pai kuti gako arugute du tipa rurupai na irairapai te. Ni sangbanaha, ka aboro ima rengba ka baka bangiriyo nga ko ima rengba ka zanga mangapai kuti gako rugute berewe, na ki zanga manga gupai ko aya ko nika mangaha kumbatayo. Ka aboro ima rengba kadu na kapa singia Yekova amangapai kuti gako akidohe dunduko. Ono si aidanga ani bakibangirani singia pai wa gure amanga te. Tipagine? Mbiko Yekova amangi gupai du ni ruruhe wa si avura du vurũ nga tipa ko mangihe wo, si aaida ko fu Wiriko ni motumo. Sidu, ani ima rengba kadu na gu kido nga ko nikaa manga gupai du ni ruruhe ti aregbo dunduko.

6. Gini kura sino nafõngbadu Yekova yo ko kedi Wiriko? (1 Yoane 4:9, 10)

⁶ Gu kura sino kinaho nafõngbadu Yekova yo ko kedi Yesu ko ye ka kpi tipa rani: Si nga gako nyemuse tipa rani. (Yo. 3:16; oni gedi 1 Yoane 4:9, 10.) Yekova akedi wiriko ko ye ka kpi tipa rani mbiko ko naida ani raki nyeanye kindi na mbiko ko naida a ani du ni papara gako aborokporo. Ho Adamu amangi ingapai ni, ko aarengbanga kadu ni papara ga Yekova aborokporo berewe te. Ni sangbanaha, i aavunganga rani a  ni papara ga Yekova aboro kporo te. Ono mbiko wa i aima afu motumo tumorii, agu aboro dunduko du na idapase kuti Mbori na kini gisangbako ima rengba kadu ni papara gako aborokporo rogo kura uru. Zavura awere, Yekova ima rengba ka mbupai furani ti gaani aingapai na ani ima rengba kadu na mbembedi pagume na ko gbiati awirinarani. Ni rengo, Yekova ima kpinyemu rani nzunzu!—Rom. 5:10, 11.

7. Waigu pa gu rungosiro Yesu agbiatiko na ni aundo rani ani rugutirani na pa bakio wai Yekova nakpinyemu rani?

⁷ Ani rengbe ka rugatirani na pa wai Yekova nakpinyemu rani ho ani aberãpa gu gberãrago ni ko adu rogoho ka bi Wiriko ko ni mbu. Satana ape gupai nga, ga Yekova moyambu arengbanga ka nye niruru ni fu Ko ho duhe ni ni kpakarakpakaraha ka mangaha wo te. Tipa gupai nga Yekova yuguhe nga Satana nga iraziree, ko ambu Yesu ko rungo mbata fu ko kpi. (Eyo. 2:1-5; 1 Pet. 2:21) Yekova abi aboro i ni sawia Yesu, abanzengere kini ta ko, na i ki banga ko kuti ngbunduru ngua. Na Yekova abi Wiriko ko ni kpi ngba kere iigirã gene. (Mt. 27:28-31, 39) Yekova adu na kina ome beko ka rugusa agi apai re dunduko ti ai regbo. Ni kpiapai, ho aboro ape gupai ni nga: “Ka Mbori kpi nyemu ko ko bátasi ko awere,” ka Yekova aima batasa ko. (Mt. 27:42, 43) Ono ka ko amangi gupai re, ka Yesu adunga na rengba ka fu unga ko ni motumo te na ka ani dunga na maabangirise a te. Sidu, Yekova ambu Wiriko ko hi rungosiro daho ko akpi ni.

8. Ya mo Yekova adu na gberãrago ho ko abi Wiriko ni i nirungosi ko? Oni sakingo rogoyo. (Oni bi sura a.)

⁸ Si aidanga ani berẽ gupai nga, ka rago gberẽnga ti Mbori mbiko gupai nga ko na tandu apai dunduko ya te! Ko akusi aboro na gu tandu nga ga du na ngbarago watadu gberãrago. Na mbiko gupai nga Baibiri nape gupai nga ko akusi rani rogo kpiako yo, gure nayugo gupai nga ko nidu adu a na ngbarago watadu gberãrago. Baibiri nasakapai tipa ko nga, “nirungosi” ko na “nizingisi” ko watadu ko adu na imisiri kpotoko yo na ki du na rungo. (Tam. 78:40, 41) Oni bingo gu kpiapai a nga ga Abarayama na Yisaka. Yekova ape gupai fu Abarayama nga ko fu bangisa wiriko ni motumo. (Bam. P. 22:9-12; Eb. 11:17-19) Oni berẽnga pa wai Abarayama adu na gberãrago ho ko adu ni regerege ka imo wiriko. Oni berẽnga pa gu bakere gberãrago tie Yekova arengbe kadu na ni ho ko aabi aboro ni i nirungosi Wiriko na ki imi ko!—Oni bi gu vidio rogo jw.org nga, Oni Wiriki Gayo Idapase—Abarayama, Ue Paparaha.

9. Ginipai rengbe mo ka wirikaha rogo ARomo 8:32, 38, 39 tipa ga Yekova nyemuse?

⁹ Motumo tumorii nayugo gupai furani nga, boro ho kpinyemu rani wa gu Yekova nakpinyemurani te—zavura agumerani watadu bawene bakurearani a te. (Oni gedi ARomo 8:32, 38, 39.) Zanga kapa, Yekova kpinyemu rani susi wai ani nakpinyemu tirani. Ya mo mo naida ka  raka nyeanye kindi? Yekova naida gupai nga mo raki nyeanye kindi kisusi wai mo aidaha. Ya mo mo naida i mbupai foro ti gamo aingapai? Yekova naida i mbupai foro kisusi wai mo aidaha. Gupai ko aidaha berani gbua nga, ani yugu gaani tambuahe tipa gi nyanyakipa gamahe nga motumo re, kidu na idapase kuti ko, na kini gisangbako. Motumo tumorii nga gu nyanyakipa gamahe nga gu nayugo ga Yekova dudunguro nyemuse koyo du ani ni. Na rogo vovo zegino, ani nika wirika badungu apai tipa ga Yekova nyemuse.—Batu. 3:11.

GUPAI MOTUMO TUMORII AYUGOHO FURANI TIPA YESU

10. (a) Tipagine Yesu adu ti ni na bakere gberãrago tipa pakpio ko? (b) Yesu aziasi rimo Yekova ngba gini agene? (Oni bi gu sanduki a nga, “ Ga Yesu Padu Niruruse Aziasi Rimo Yekova.”)

¹⁰ Yesu naberãpa rimo Bako nyanyaki. (Yo. 14:31) Yesu adu na bakere gberãrago nga aboro aaberã gbegberẽ apai tipa Bako mbiko si adu nga i nika imo ko ni gu boro nayugu zanga irisa fu Mbori na ni bamangi gbegberẽ apai. Si du nga ndu gupai ko amangi kparakpee ti ni nga: “Ako Buba, ka si du wo, gi inga guari pati re re.” (Mt. 26:39) Ono mbiko gupai nga Yesu anye ni ruruko fu Yekova daho ko akpi ni, ko ayugu gupai ziazia nga agu apai Satana apehe tipa Bako aangianga rengo te.

11. Waigu Yesu ayugu bakere nyemuse fu aboro? (Yoane 13:1)

¹¹ Ga Yesu Motumo nayugo gupai furani nga, Yesu naberãpa aboro aberã, gbe agu aboro napekafuo ko. (Snz. 8:31; oni gedi Yoane 13:1.) Ni kpiapai, Yesu aima ino gupai nga gu kura apai kinaho si nika ida ko mangihe auru kpotosende nga gu nika du ni kere kpakarakpakaraha, gbe, ka kpi iigirã kpio. Ono Yesu aima manga gi kpakarakpakara apai re dunduko, angianga mbiko si nga gupai Yekova afuhe fuko ko mangihe ya, ono gbe mbiko ko aima kpinyemu aboro. Yesu ayugu bakere nyemuse  tipa aboro ni tungusa ko pai fuyo, kini yugupai fuyo, na kini undo yo. Zavura rogo gu uru si adu nga Yesu nika kpi rogoho, ko adi regbo ka zunda ndu gako abawiriki, ka yugopai fuyo, ka ngarasa yo, na ka fu wasa fuyo. (Yo. 13:12-15) Na zavura wa si avura du vurũ nga ko adu rogo bakere igirã na kini kpi ti ngbunduru ngua, ko afu maabangirise fu gu bamangi gbegberẽ apai naadu mbembedi na ko nipe ko gupai fuko nga ko nika duadu Paradizo yo, na ko adu a na bakabangirise tipa nako na ki sana Yoane ko ngerefuo ri. (Rk. 23:42, 43; Yo. 19:26, 27) Yesu ayugu gupai nga ko ima kpinyemu aboro ni bakerehe ni manga ko pai na yo rogo nyemuse na weneringise, angianga kina nikpi ko tipa yo sa ya.

12. Waigu Yesu andu kindi kumbatayo kaa undo rani awere?

¹² Si nirengo nga Yesu akpi “bara sa,” ono ko namanga dungu apai kindi furani. (Rom. 6:10) Gini apai ko amanga furani? Ko nandu kindi kumbatayo kaa mangasunge tipa ka fu dungu wene ahe furani nga gu ani agbiaha awere mbiko motumo tumorii. Oni bingo gupai ko andu kumbatayo kaa mangaha. Ko namangasunge ni gaani Bakindo, Gbiamotumo, na ni barii dungurati. (1 Kor. 15:25; Ef. 5:23; Eb. 2:17) Ko du nangera kurii gu sunge nga ga dungura mbedimbedi aKristano gbiati bakere rimbasa aboro, nga gu sunge nika digo mbata fu bakere gberãngbi digi. b (Mt. 25:32; Mk. 13:27) Na ko naundo ruru kangara moyambu a i naandu kumbatayo kindi kaa fu agu ahe furani nga gu ani aidaha tipa kaa iriso Yekova ni rururani rogo gi yangara arame re. (Mt. 24:45) Na ho ko nikaa zoga rani ni ti regbo agarã sa kutu, ko nikaa ndu kindi kumbatayo kaa manga apai furani. Ho Yekova afu Wiriko ni tipa rani, anga gu yangarapai Ko afu ko ti ni nga ko kpi tipa rani te, ono tipa ko mangi dungu apai furani!

ONI NAANDU KINDI KUMBATAYO KAA WIRIKA VOVO APAI

13. Waigu rengbe mo kaa ndu kindi kumbatayo kaa wirikapai tipa gu nyemuse du Mbori gbiati Kristo na ni koyo du ani ni?

¹³ Mo ima rengba kaa wirikapai kindi tipa gu nyemuse Yekova Mbori na Kristo Yesu nayuguhe furani ni ndu mo kumbatayo kindi kaa berãkuriihe. Rogo agu aposo yo du mbata fu Tingida Pakpio Yesu na tifuoho rogo gi garã re, mo ima rengba ka geda Kitabu Wene Pangbanga sa watadu ni dunguhe sirisiri. Ka mo asadingo ka geda dungu akapita ti bangisa regbo sa ya. Kuba gure, mo gedihe zezeredi na kini ngere tipa gu  kura nduapai si aida ani kpinyemu aYekova na Yesu ti ni. Na kini pe agu apai fu aboro mo na wirikihe ti regbo gamo gedapai.

14. Waigu rengbe wetekapai ka undo rani ani naandu kumbatayo kindi kaa wirikapai tipa motumo gbiati kura ayugopai? (Atambuahe 119:97) (Oni bi sura a.)

¹⁴ Ka si ngia mo ima du rogo rengo yo tipa dungu agarã, mo ima rengba ka bakabangiro singia vovo apai kindi ho foro si aida mo wirikihe tipa ga Mbori ruru sarangbanga, gako nyemuse, na motumo tumorii. Nirengo, ani nikaa wirika vovo apai kindi tipa agi apai re. Sidu, ginipai rengbe mo ka mangaha? Mo gedi na ki wisigi gu wene apai du rogo gaani awaraga nga gu du mburuhe ri Baibiri. Ho mo ageda pai ni rogo Baibiri yo nga gu mo aruganga tiro na ni ya, mo mangi wetekapai. Na rogo gu uru re dunduko, mo naaberãkurii gupai mo nawisigihe na gu mo nawirikihe tipa Yekova, Wiriko, gbiati gayo nyemuse tipa ro.—Oni gedi Atambuahe 119:97.

15. Tipagine duhe ni nyanyakipa pai ti ni tipa kaa wirika vovo apai rogo Baibiri yo?

¹⁵ Ka si du nga mo agbianga vovo pai ti ai gu regbo mo asungo ka gedapai watadu ka wetekapai te, ka rago gberẽnga tiro ya. Mo berẽpa tiro wa gu boro naˈasada ka gbia dahabu. Dedede, si naaida gu boro nagbata dahabu di badungu asaa watadu aˈuru mbata fu ni gbia bete dahabu. Ono ni ambunga gbataha te na ni nandu kindi kumbatayo kaa gbataha ni zerangbaduse mbiko ai gu papara dahabu ni abihe, ka si vura du kina tooni vurũ, si na nyanyakipaha funi. Pa gu vovo arengo ani awirikaha rogo Baibiri yo ima nyaka kisusi dahabu! (Tam. 119:127; Snz. 8:10) Sidu, mo naandu kindi kumbatayo kaa geda Baibiri na kini gbata vovo apai kindi tipa ka wirikaha.—Tam. 1:2.

16. Waigu rengbe ani ka wirika aYekova na Yesu?

¹⁶ Sidu, mo naandu kindi kumbatayo kaa geda Baibiri na kini gbata vovo apai ka wirikaha. Ni kpiapai, mo wiriki ga Yekova ruru sarangbanga ni manga mo pai na aboro ni ruruhe ki zanga kparakaro. Mo wiriki ga Yesu nyemuse tipa Bako ni du mo na nyemu ka manga gupai Yekova aidaha na kini undo kura aboro ka si vura du vurũ nga si nika sa raka ni kere kpakarakpakaraha foro ti kura aregbo. Mo wiriki Yesu ni manga mo dezirepai fu kura aboro tipa wa ka i gbia gu momu a nga ka ino pai tipa gu bawene apai Yekova aima digo ni mangihe fu aboro na i kidu na idapase kuti motumo.

17. Ginipai ani nika sakapai tipaha rogo gu kekeapai ngbefuo gere?

¹⁷ Ka ani aandu kindi kumbatayo kaa wirikapai tipa motumo, si nika sa gupai nga ani kpinyemu aYekova na Yesu ni bakerehe gbe. Na mbiko gupai nga ani nakpinyemu yo ni bakerehe, i nika kpinyemu rani ni bakerehe a. (Yo. 14:21; Yak. 4:8) Sidu, ani mangisunge na agu ahe Yekova nafuhe furani tipa kaa ndu kumbatayo kindi kaa wirikapai tipa motumo tumorii. Rogo gu kekeapai ngbefuo gere, ani nika wirikapai tipa agu amaku ani agbiaha mbiko Yesu akpi tipa rani na wai rengbe ani ka yugo gaani tambuahe tipa ga Yekova nyemuse.