1. Gini kpakarapai ani dunduko agbia tirani na ni?

 AˈURU dunduko si aida ani mangi adiaberã. Betehe ima du taata ka mangaha, wa gu nga gine boro nika rihe wiso watadu gini regbo si aida boro ndu ka pi ti ni. Gu kura apai ima kpakara tipa boro mangi diaberã tipaha. Si ima rengba kadu na maapai kuriipa kpotorani, gaani ngbarago, kurii agu aboro ani akpinyemu yo, watadu kurii gaani irisombori. Ani naida gaani adiaberã undo rani na ki undo gaani aborokporo. Gu nyakipaha tie gbe nga, ani na gu kido nga gaani adiaberã nika sa ngbarago ti Yekova.—Rom. 12:1, 2.

2. Gini adiandue nika undo ro tipa mo mangi agu adiaberã du na tatamana?

² Si nawiraha wa mo nika manga gu diaberã amanga nga ga tatamana ka si du nga (1) mo ini agu arengo dunduko si aidaha, (2) mo wisigi ga Yekova aberã tipa apai, na (3) mo wisigi agu apai wenengai si aida mo mangihe. Gi kekeapai re nika sakapai tipa agi apai biata si aida ani mangihe re, na si nika undo rani a ani bi wai rengbe ani ka raba gaani tandu nga ga rugatinapai.—Snz. 2:11.

MO INI AGU ARENGO SI AIDAHA

3. Gini kpiapai duho rengbe ka undo rani ani rugutirani na ndu gupai si aida ani inipa agu arengo ti ni du ho mbata fu ani mangi diaberã?

³ Gu bambata diandue duho tipa ka manga wene diaberã nga ka inopai tipa agu arengo dunduko si aidaha. Tipagine du gipai re ti ni na nyanyakipaha? Mo berẽnga gupai nga boro kaza ndu fuo munganga mbiko ni na kere kpakarapai nga ga kaza. Ya mo munganga amanga diaberã tipa gini dawa si aida i fuhe mbata fu niwisigi borokaza watadu ka sana ni na asanahe? Wagusa te. Mo ima rengbe a ka manga wene adiaberã kina gu sa ka mo berẽ wenengai mbata kuriipa agu arengo du tipa gupai du mo rogoho re. Waigu rengbe mo ka manga gupai re?

4. Ringbisihe kuti Asanza 18:13, ginipai rengbe mo ka mangaha tipa ka ino arengo tipa apai? (Oni bi sura a.)

 ⁴ Mo rengbe dedede ka inopa agu arengo duho kina gu sa ka mo asana asanahe. Ni kpiapai, mo berẽnga gupai nga i yambu ro tipa sungo nga ga zambuasitise. Ya mo mo rengbe ka ndu tipaha? Ka si dunga mo ainongo pai tipa gu boro mbakadipai tipa gu sungo re te watadu mo ainongo agu apai ni nambakadihe tipa gu sungo re te, mo ima rengba ka sana ni na asanahe wa gu nga: “Wari gu sungo re nika du ni, na gini regbo si nika du ti ni? Bange aboro wai nika du pati ni? Da nikaa ngera kuriihe? Ada nika du pati ni? Gini apai mo nambakadihe tipa aboro mangihe pati gu sungo re? Ya mo mo aye na buda fu aboro kupati gu sungo re?” Akaragapai kuti agu asanahe re nika undo ro mo mangi gu diaberã du na tatamana.—Oni gedi Asanza 18:13.

5. Ginipai si aida mo mangihe tifuo ino mo agu arengo dunduko du tipa pai?

⁵ Fuo gure, tifuo ino mo arengo pai, mo berẽ wenengai tipa gupai du tipa gupai re naabaha. Ni kpiapai, na ka si du nga mo ini gupai nga gu kura aboro adunga na irisa tipa gu bangua arugute nga ga Yekova ya nika du adu pati gu sungo re watadu buda nika du adu yo, ono boro adunga ho nika sa aboro ka i mbiringa ha ni bakerehe gbe ya te? Ya mo mo abingo ho nga rengba kinaho tipa gu sungo re satihe kurogo gbegberẽ pumbo yo te? (1 Pet. 4:3) Watadu ginipai si aida mo mangihe ka si du nga nduge tipa gu sungo re nika sa gupai nga mo kpa gu dunguratise nga ga dungurati watadu ka mo ndunga tipa tungusapai  ya? Ho mo aberã ni kuriipa agu arengo dunduko du na maapai kurii gupai re, si nika saha foro taata tipa mo mangi wene diaberã. Ono kura pai kinaho berewe si aida mo mangihe. Mo ima ino wai du gamo bipai tipa gupai re; ono waigu du ga Yekova bipai tipaha?—Snz. 2:6.

MO WISIGIPA WAI YEKOVA ABERÃ

6. Ringbisihe kuti Yakoba 1:5, tipagine si aida ani kpari ti ni fu Yekova tipa undo?

⁶ Mo sana Yekova tipa ko undo ro mo rugutiro na gako aberã. Yekova nakido rani nga ko nika fu tatamana furani ani rugutirani singia gu diaberã ani nika mangaha nika sa ngbarago ti ko. Ko nafu ngbatunga gu tatamana re ‘fu aboro dunduko, ko azinga nga fu boro te.’—Oni gedi Yakoba 1:5.

7. Waigu rengbe mo ka ino ga Yekova aberã tipa pai? Oni funga kpiapai tipa gipai re.

⁷ Bara sa kindi mo nakpari tipa ga Yekova rugapai, mo moiberãro wenengai tipa gako karagapai. Tipa ka yugoho na kpiapai: Ka mo ingi ho mo andu nunguro ni, mo ima rengba ka sana gu boro naraka rogo gu dagbarago re tipa undo. Ono ya mo mo rengbe ka guari barabangirini mbata fu ni karagapai? Wagusa te. Mo ima rengba ka degaturo wenengai sa gani arugapai. Wakina gure a, tifuo mo sana Yekova tipa tatamana, mo asadi ka ino gako karagapai ni ino mo pa gini andiko nga ga Baibiri na bangua arengo rengbe mo ka mangapai kuti ni rogo gupai du mo rogoho re. Ni kpiapai, ho mo adiaberã ni singia si naida mo ndu kupati ngbatunga sungo wa gu i nifura tipaha mbata re, mo ima rengba ka  makia gupai Baibiri apehe tipa gbegberẽ apumbo, gbegberẽ kpamiatise, na gupai si aida ani peresipa agu apai nga ga Kindo ti ni mbatayo fu gaani nyemuapai.—Mt. 6:33; Rom. 13:13; 1 Kor. 15:33.

8. Ginipai rengbe mo ka mangaha ka si du nga mo naida na undo ka gbia agu apai mo agbataha? (Oni bi sura a.)

⁸ Wa vura duhe wo, ti kura aregbo, mo ima rengba ka ida na undo tipa ka gbia gupai mo agbataha. Mo ima rengba ka gbia aberãpai be gu wirina du na inohe nga kumba watadu dee. Ono tie, mo ima rengba a ka gbia undo ti manga mo gamo wetekapai ni tiro. Badungu ahe kinaho du na undo ti ni rogo gaani aũsunge yo, wa gu nga Research Guide for Jehovah’s Witnesse gbiati Averesi Tipa gu Raka Nga ga AKristano. Mo tingidi gupai nga gamo sasa nga: ka manga gu diaberã nika sa ngbarago ti Yekova.

9. Waigu rengbe ani kadu na gu kido nga gaani diaberã nika sa ngbarago asa ti Yekova? (AEfeso 5:17)

⁹ Waigu rengbe ani ka du na gu kido nga gaani diaberã nika sa ngbarago asa ti Yekova? Bambatapai nga, si naida ani iniko wenengai. Baibiri na ya, “Ina pa gu ko du ni Ziazia Ko nga rugatinapai.” (Snz. 9:10) Nirengo, ndikidi rugatinapai naye be ino asino Yekova, gako ringbisapai, na gupai ko akpinyemuhe watadu gu ko asogaha. Mo sananga tiro nga, ‘Ringbisihe kuti gupai mi nainihe tipa Yekova, gini diaberã rengbe mi ka mangaha nga gu nika sa ngbarago tiko?’—Oni gedi AEfeso 5:17.

10. Tipagine du gu bangua arengo nga ga Baibiri ti ni na nyanyakipaha kisusi sino atitarani watadu gu sino mangaapai du rogo gu dagbarago re?

¹⁰ Tipa ka sa ngbarago ti Yekova, ti kura aregbo, ani du wa ka ani mangi gupai nikaa sanga ngbarago ti agu aboro du mbembedi na ani ya. Ni kpiapai, gu kura avunguagude du na ruru bipai ima rengba ka sosoda gu wiriyo nga degude tipa ri di irakumuko watadu gu boro rengbe ka tumo bakere marã fuori ka si vura du vurũ nga ni amanganga bakere apai ti ngba ga Yekova sunge te. Kina rengo du nga ha nga, i naida boro ngere angerafuo wiriyo rogo borose yo, ono da nika undo ri tipa ri sono rogo toro yo? Waigu du Yekova abi gupai re? Ani nagbia karagapai rogo Matayo 6:33. Yo du i azungodi aKristano ni nga, i “gbáta gako ngbi mbata.” Wa vura duhe nga ani nairisa avungurani airisa gbiati agu aboro du rogo gaani dagbarago, gupai nyakipaha furani gbe nga pa sa ngbarago ti Yekova.

MO BERẼ WENENGAI TIPA AGU APAI SI AIDA MO MANGIHE

11. Gini sino i nasakipai tipaha rogo AFiripoio 1:9, 10 nga gu nika undo ro mo wisigi agu apai si aida mo mangihe?

¹¹ Bara sa kindi mo naini gu bangua arengo si aidaha tipa mo mangi gamo diaberã, si naida mo berẽ wenengai kurii agu apai si aida mo mangihe. (Oni gedi AFiripoio 1:9, 10.) Gu sino nga ga rugatinapai nika undo ro mo berẽpa gupai rengbe ka manga nisangbana gamo mangaapai. Ti kura aregbo, si ima rengba kadu taata boro mangi diaberã. Ono anga adiaberã dunduko du taata tipa ka mangaha te. Rugatinapai nika undo ro mo mangi agu adiaberã du na tatamana zavura ho du pai ni ni kpakarakpakaraha vurũ.

12-13. Waigu rengbe rugatinapai ka undo ro mo mangi gu diaberã nga ga tatamana nibipa gini ngbatunga sunge si aida mo mangihe?

¹² Oni bingo gi kpiapai re. Mo nagbata sunge tipa ka ngerafuo gamo aborokporo. Asunge ue kini kuru. Mo ki berẽpa agu arengo dunduko du tipa ha wa ngbatunga gu nga, gini ngbatunga sunge du, gu regbo sunge nikaa tona ti ni, bagizo gu regbo si nikaa dia ro na ni mo da baha yo, gbiati kura apai. Agi asunge ue re dunduko rẽarẽ tipa aKristano mangihe. Isoke, mo rengbe ka ida na gu kuraha sa mbiko mo nakpinyemu gu sunge re watadu mbiko mo nikaa zio bakere marã ti ni. Wa vura duhe wo, gu kura apai kina ho si aida mo berãkuriihe mbata fu mo mangi diaberã.

¹³ Ni kpiapai, ya mo sunge sa dagbaha yo atagbaga tihe na gamo regbo dunguratise nga ga  dungurati? Ya mo sunge dagbaha yo adia gu regbo kusayo mo aidaha tipa ka undo gamo aborokporo i du ni bandabanda yo, i du na ngbarago, na i du mbembedi na Yekova? Pa sana mo tiro na ngbatunga asanahe wa gure nika undo ro mo peresipa ‘agu apai nangba’ watadu pa agu apai du na nyanyakipaha nga, gamo irisombori na agu azingo nga ga gamo aborokporo, kuba gupai nga ka manga kina bakere marã gbe. Ngba gi gene re, mo ima rengba ka manga gu diaberã Yekova nika fu maku kuriihe.

14. Waigu du pa manga ani sunge na rugatinapai na kini yugu nyemuse nika undo rani ani ne kotosa kura aboro?

¹⁴ Rugatinapai a nika sarani ani berẽkuriipa wai rengbe gaani adiaberã kadu namaapai kurii kura aboro tipa wa ka ani ne manga agu apai rengbe ka “sa kura aboro i koto.” (Frp. 1:10, NW) Gipai re na nyanyakipaha ho ani amanga agu adiaberã ni nabi kina pa tirani rogo agu abangiriba nabipa vo roko na mbakadatise. Ni kpiapai, ani ima rengba ka kpinyemu gu kura ngbatunga vo roko watadu mbakadatise. Ono na ka  singia si nika ba gberãrago ti agu aboro du rogo dungurati watadu aguyo adunga rogo dungurati ya? Rugatinapai nika undo rani tipa ani du na irisa tipa gayo abipai. Nyemuse nika fõngbaduraniyo tipa ani mangi agu apai ngba ‘ti kura aboro’ na agu apai du ni iriirihe. (1 Kor. 10:23, 24, 32; 1 Tim. 2:9, 10) Sidu tie, ani nika manga gu diaberã nika yugo gaani nyemuse na irisa ko yo du kura aboro ni.

15. Gini mbakadapai si aida mo mangihe mbata fu mo mangi nyanyakipa diaberã?

¹⁵ Ka singia mo namanga nyanyakipa diaberã, si naida mo berẽkurii gupai si aida mo mangihe tipa ka mangapai kuti gi diaberã re. Yesu ayugupai furani tipa “ka geda paha” watadu ka berãkuriipa agu apai si adiaha. (Rk. 14:28) Sidu, si naida mo wisigi bakio gu regbo si nika diaha, ahe, gbiati gu ome si nika ida mo mangihe tipa ka sa gu diaberã re si mangisunge. Rogo kura apai yo, mo ima rengba ka fura na gamo aborokporo tipa gupai si aida ai borokporo mangihe tipa ka sa gu diaberã re si du na diabese. Tipagine du ngbatunga gi mbakadatise re ti ni na nyanyakipaha? Si ima rengba ka undo ro mo ini gupai nga si naida mo mangi aˈariapai amanga ti gamo diaberã watadu gu kurapai kinaho berewe du ni wenehe si aida mo mangihe. Na ho mo akoda gamo aborokporo ni ku rogoho yo na ki degeturo kuti gayo abipai, i nika duadu na nyemu ka mangapai na mo tipa ka sa gu diaberã re si du na diabese.—Snz. 15:22.

MO MANGI GU DIABERÃ NIKA DU NA DIABESE

16. Gini adiandue nika undo ro mo mangi gu diaberã nika du na diabese? (Oni bi gu sanduki a nga “ Wai ka Manga Adiaberã ni Tatamana.”)

¹⁶ Ka singia mo ima manga agu apai dunduko i napekehe kuari re, mo ima du nga regerege ka manga gu diaberã du na tatamana. Mo ima gbia agu arengo dunduko du tipa pai na ki ima wisigo gu bangua arengo nga gu rengbe ka undo ro mo mangi gu diaberã nika sa ngbarago ti Yekova. Awere tie, mo ima rengba ka sana Yekova ko undo ro mo mangi gu diaberã nika du na diabese.

17. Gini banguapai rengbe ka undo ro tipa mo mangi wene adiaberã?

¹⁷ Ka si vura du vurũ nga mo aima manga dungu adiaberã kusayo kidu na diabese rogoho, mo tingidi gupai nga gu memepai rengbe ka undo ro mo mangi wene adiaberã nga ka kido angianga kina kuti gamo inohe watadu birĩ ya, ono kuti gu tatamana naye be Yekova. Kina ko sa rengbe ka fu ndikidi inohe, rugatinapai, gbiati giarogopai yo nga gu du na nyanyakipaha tipa boro gbia ndikidi tatamana. (Snz. 2:1-5) Yekova ima rengba ka undo ro mo mangi agu adiaberã nika sa ngbarago tiko.—Tam. 23:2, 3.