1. Ginipai dungu aboro areme agbeberã yo tipa ha?

 YA MO mo bingo gupai nga badungu aboro areme naberã kina patiyo kisusi pa kura aboro? Ni kpiapai, gu kura aboro namangasunge na aũfugo-dagbase tipa ka manga rukö tipa tiyo na gupai i amangaha. Ono tie, kina bete aboro areme naida ka fu taarimo fu Yekova Mbori. Rogo gi kekeapai re, ani nika sakapai tipa gupai si ayugoho tipa ka fu taarimo fu Yekova na gupai rengbe ka fõngbaduraniyo ani mangihe wo. Ani nika wirikapai a tipa wai rengbe ani ka fu gu taarimo fu Mbori rẽ ko na ni na wai ko nitiko nika taasarimoko mbembedi kumbatayo.

KA FU TAARIMO FU YEKOVA NAYUGO GINIPAI?

2. Waigu Yekova ayugu gako taarimo rii Bagangara Sinai yo? (Oni bi gu sura duti kpotoho.)

² Ginihe nga taarimo? Rogo Baibiri yo, gu fugo nga “taarimo” ima rengba kadu tipa ai gupai nasa boro ni ngba bangiri kura aboro. Fuo bete aˈuru gbua tifuo Yekova kusi gu rikaaboro nangia aYisaraere Ezipeta yo, ko ayugu gako taarimo fuyo. Oni berẽnga kurii gipai re: Amirioni aYisaraere nadungura tiyo kurii Bagangara Sinai yo tipa ka gia gupai si adu nga Mbori nika pehe fuyo. Nibasa, nduundu dubo kini kisi rii bagangara yo. Ni tunguotunguoho, ngime kidu rogo aba dunduko pati bagangara. Sende ki tona ka zigizo tihe ni kerehe, imarago na gumba kidu gbiati bakere woro mbanya. (Gate 19:16-18; 24:17; Tam. 68:8) Ho Yekova amangi agi apai re ni, si nawiraha wa ngba aYisaraere aima zera ka bi gu bakere ome du tiko.

3. Gini agene ani afu taarimo ngbaha fu Yekova?

³ Ono ginipai tie du tipa aboro? Ya mo ani rengbe nzunzu ka ye na taarimo fu Yekova? Ii, ani ima rengba. Gene sa dagba agu akuraha yo ani afu taarimo ngbaha fu Mbori nga, nipe ani pa gako bakere ome na gako wene asino fu kura aboro. Ani nataasa  rimo Mbori a nifu ani taarimo fuko tipa agu apai dunduko ko aundo rani ani mangihe. (Yes. 26:12) Bakindo Davide nangia gu bawene kpiapai nga ga gu boro naafu taarimo fu Yekova. Rogo gu kparakpee yo Davide amangihe ku bangiri gu dungurati nangia ga aYisaraere, ko ape gupai fu Mbori nga: “Ako Yekova, ga pai du ni bahe, na tandu, na taarimo, na diabese, na irisa; bambiko agu ahe du ngbangbaturũ yo na auru kpotosende no dunduko nga gamo.” Tingbafuo Davide nyasi gako kparakpee, “gbuu dunduko ki sambua Yekova.”—1 Peka 29:11, 20.

4. Waigu Yesu afu taarimo fu Yekova?

⁴ Ho Yesu adu ni auru kpotosende, ko afu taarimo fu Bako nipe ko gupai fu aboro nga Yekova du nafu ome fuko ko naamanga iiriwo apai. (Mk. 5:18-20) Yesu aye na taarimo fu Yekova a ngba gu gene ko aafura ngbaha tipa Bako na gu gene ko amangipai ngbaha na aboro. Ti kura regbo sa, Yesu aayugopai bambutiria yo. Dagba agu aboro naadegatuyo, dee adu kinaho daimona adu na maapai kuri ri tipa agarã 18. Gu daimona re aima sa gu dee re ri naandu ni nugonugo ri ka ri arengbanga ka tumba rogoriyo kuari ya. Yesu aima rugatiko na gupai nga ri aima du na bakere gberãrago ni kerehe na ri kini idi na undo. Sidu, ko andu fuo ri na ki fura na ri ngba wene gene. Ko aya furi wẽ: “Na, i zaki ro ti ga kaza.” Na ko ki moi beko ri ri na ri ki ru kuari nzunzu na ni basa “ki taasi rimo Mbori,” kpotori angba wenengai na ri ki gbia irisa! (Rk. 13:10-13) Gu dee re aima du na wene ndupai ka fu taarimo fu Yekova, na kina wo du ani na wene ndupai areme a.

TIPAGINE ANI AFU TAARIMO TI NI FU YEKOVA?

5. Gini nduapai du berani tipa ka yugo irisa fu Yekova?

⁵ Ani nafu taarimo fu Yekova mbiko ani na bakere irisa koyo du ko ni. Badungu ndu apai du berani tipa kadu na irisa koyo du ko ni. Yekova na ome tiko ka manga ai gupai ko aida ka mangaha, na ko ambunga te. (Tam. 96:4-7) Gako bakere tatamana ni yuguyuguhe rogo agu ahe yo ko amangihe. Ko ima fu unga furani na agu ahe dunduko ani aidaha tipa kaa raka. (Yugo. 4:11) Ko ni ruruko. (Yugo. 15:4) Agu apai dunduko ko amangaha nadu na diabese, na ko ninaabanda gako akidohe ti aregbo dunduko. (Yos. 23:14) Si du nga ndu gupai gu nebi nangia Yeremaya ape gupai ti ni tipa Yekova nga: “Dagba agu airatatamana nga ga arikaaboro yo na rogo gayo angbi dunduko a nga boro yo sa du wa mo te”! (Yere. 10:6, 7) Badungu ndu apai duho si aida ani du ti ni na irisa koyo du gu Barani ni du ngbangbaturũ yo. Ono ani afunga kina irisa sa fu Yekova te. Ani ima kpinyemu ko.

6. Tipagine ani nakpinyemu Yekova ti ni?

⁶ Ani nafu taarimo fu Yekova mbiko ani ima kpinyemuko ni bakerehe gbe. Ani nakpinyemu Yekova mbiko gako dungu wene asino. Ko na inapai na nunga. (Tam. 103:13; Yes. 49:15) Ho du ani ni na gberãrago, ko a na gberãrago. (Zek. 2:8) Ko naundo rani ani mbedi na ko na ki da ni abakureako. (Tam. 25:14; Amo. 17:27) Na ko na umbasitise; ‘ko nangana agu ahe du ngbangbaturũ yo na ku auru kpotosende no a. Ko natumba rurungbura boro nvutu yo.’ (Tam. 113:6, 7) Ani naida ka fu taarimo fu gaani Mbori mbiko agi andu-apai re.—Tam. 86:12.

7. Gini kparakpara momu du berani?

⁷ Ani nafu taarimo fu Yekova mbiko ani naida kura aboro ini ko. Badungu aboro ainongo gu rengo du tipa Yekova te. Tipagine? Bambiko Satana ima kiso bangiriyo ni gbaraga ko kere aziree tipa Ko. (2 Kor. 4:4) Satana ima sa aboro i idi kuti gupai nga Yekova nga zingizingi Mbori, na ko aberãnga pa rani te, na ko du si  aida i birako tipa gu bakere rungo du rogo zegino. Ono ani ima ino gu rengo du tipa gaani Mbori! Ani na gu momu berani nga ga pepa gu ngbatunga Mbori nga ko nzunzu fuyo na ki undo yo i fu taarimo fuko a. (Yes. 43:10) Atambuahe 96 nafura tipa fu taarimo fu Yekova. Ani nika wirikapai rogo agi Atambuahe re tipa wai rengbe ani ka fu gu taarimo fu Yekova ko narẽ tipaha.

WAIGU RENGBE ANI KA FU GU TAARIMO FU YEKOVA RẼ TIPA KO?

8. Gini gene sa dagba agu akuraha yo ani afu taarimo ngbaha fu Yekova? (Atambuahe 96:1-3)

⁸ Oni gedi Atambuahe 96:1-3. Ani rengbe ka fu taarimo fu Yekova na gupai ani apehe tipa ko. Agi averesi re nape gupai furani nga, ani “bi abia fu Yekova,” ani “sambua rimoko,” kini “yúgu pa gako bata,” na kini “táki pande pa gako taarimo dagba arikaaboro.” Agi agene re dunduko ani afu taarimo ngbaha fu gu Barani du ngbangbaturũ yo rogo gaani afugo yo. Gu ga Yekova amoyambu naadu mbata aima du na bakere nyemu ka pepa gu bawene asino du ti Yekova na gu wene apai dunduko ko amangihe fu aboro. (Dan. 3:16-18; Amo. 4:29) Waigu rengbe ani ka manga kina gu bangisapai re?

9-10. Ginipai mo nawirikihe ti ga Angelena kpiapai? (Oni bi sura a.)

⁹ Oni bingo gu kpiapai nga ga Angelena, a nga wirina ni dee naraka Amerika yo. Ri adu na wingbaduse na ki fura tipa Yekova ba gari sunge yo. Wa si adu nga ri atona mangasunge rogo gu ba re ni vovo ri, i ayambu ri tipa dunguratise na gu kura aboro nga aguyo a natona mangasunge ni vovo yo rogo gu ba re. Ti regbo gu dunguratise re, ai boro narengbe ka pepai tipa gani raka. Angelena amangi mbakadapai tipa ka yugo bete asura tipa ka sakapai tipa wai ri araka na ngbarago wa ngia ri boro sa dagba aDezire Yekova yo. Ono mbata fu ri fura, gu kura boro sunge sa ape gupai tipa tiko nga i asonosi ko ni boro sa dagba aDezire Yekova yo. Ko atona peka gbegberẽ apai tipa aDezire Yekova na agu apai i naidi kuti ni. Angelena ape gupai nga: “Mi adu na bakere gunde. Ono mi aaidanga aboro idi kuti agi aziree re tipa Yekova te. Sidu, mi adiberã ka pepa agu arengo du tipa ko.”

¹⁰ Ho gu kumba re anyasi fugo ni, Angelena amangi wiri guru kparakpee niipo kukiri. Na ri ki pe gupai fuko ngba wene gene nga: “Agu apai du tipa re kina sa na gu du tipa ro. I  asonosi re a ni boro sa dagba aDezire Yekova yo, na mi nandu kindi kumbatayo kaa du ni Dezire Yekova da ku areme.” Wa vura duhe nga apai aandunga wenengai te, Angelena anye zezeredi. Ri ayugu asura ri gbiati anakureari fu gari abadiasunge i nimangisunge na ngbarago fu Yekova na ki sakipai tipa gari aida rogo irisa yo. (1 Pet. 3:15) Sangbanaha angia gine? Ho Angelena anyasi fugo ni, gu kumba re aima du zezeredi. Na zavura ko apepa gu wene aregbo ko adu na ni ho ko adu ni tooni na kini kodi tiko na aDezire Yekova. Angelena ape gupai nga: “Yekova ima rẽ ani songodipai ku bara ko yo. Si nga pa irisa ka pe gu rengo du tipa ko.” Ani ima rengba a ka fu taarimo fu Yekova ho kura aboro ayugo zanga irisa ni fuko. Gere nga bakerepa momu.

11. Waigu ndikidi airisi Yekova adigi nimangipai kuti gu rugute du rogo Atambuahe 96:8?

¹¹ Oni gedi Atambuahe 96:8. Ani ima rengba ka mangasunge na gaani aũborose ka fu taarimo fu Yekova. Ndikidi airisi Yekova aima digo nifu taarimo fu Yekova ngba gi gene re. (Snz. 3:9) Ni kpiapai, aYisaraere afu agamahe tipa i me yekaru na kini bandaha. (2 Aba. 12:4, 5; 1 Peka 29:3-9) Gu kura ga Yesu abawiriki asongodi ko gbiati gako amokedi na “gayo ũkumuko.” (Rk. 8:1-3) Na Baibiri nape gupai nga, ho kura aKristano aambu ni mbiko zingo riahe, agu awirinayo naaraka rogo kura aba akedi marã fuyo. (Amo. 11:27-29) Ani ima rengba ka fu taarimo fu Yekova areme a na gu gaani agamahe naye ngbadurani yo.

12. Waigu rengbe gaani agamahe ka ye na taarimo fu Yekova? (Oni bi sura a.)

¹² Ani bingo kpiapai sa nga gu nayugopa wai gaani agamahe aye na taarimo fu Yekova. Rogo 2020, bakere ugure adu Zimbabwe yo nga gu nadi gbanga regbo. Bange aboro niima susa mirioni sa nadu rogo kerepai tipa ka kpi mbiko riahe aadunga beyo te, kodihe na wirina du rimori nga Prisca. Wa vura duhe nga gupai re aima kpakara, Prisca aandu kindi kumbatayo kaa mangasunge tungusapai na aRago Biata dunduko na Rago Bisue, zavura ti regbo sopabino. Gari amurakporo aasawia ri tipa pa ndu ri gene tungusapai kuba manga ri sunge rogo gari ati, i aape gupai nga, “Mo nika kpi akpi be gomoro.” Prisca aima du na gu kido nga Yekova nika ngera angera fuo ri, sidu, ri anaakaragapai nga, “Ka Yekova mbunga gako amoyambu te.” Fuoho aaimanga te ri ki gbia undo ti gu sunge fu undo namanga rogo gaani riigbu. Prisca aima gbia  riahe gbiati gu kura ahe ri aaidaha vurube agu agamahe ani ni basasa afuhe. Ngba ga Prisca amurakporo aima zera na i ki pe gupai furi nga, “Mbori ninaaundo ro ti aregbo dunduko, sidu, ani naida ka wirika dungu apai tipa ko.” Dungu gari amurakporo atona nduge tipa agu adunguratise nga ga dungurati.

13. Waigu rengbe gaani mangaapai ka ye na taarimo fu Yekova? (Atambuahe 96:9)

¹³ Oni gedi Atambuahe 96:9. Ani rengbe ka fu taarimo fu Yekova rogo gaani mangaapai yo. Si aaida aboromotumo naambida ime na kidu ni gigiri yo ho i anaamangasunge ni fu Yekova yekaru yo. (Gate 40:30-32) Si naida ani du ni gigiri rani a, angianga kina ti kpotorani sa ya, ono si naida ani ne ai gupai a Yekova asogaha. (Tam. 24:3, 4; 1 Pet. 1:15, 16) Ziazia Kekeapai nape gupai nga, si naida ani mbu ‘gu kuru borose’ na ani ki ukadi tirani na ‘vovo borose.’ Gere nayugo gupai nga si naida ani mangi ai gupai rengbe ani ka mangaha tipa ka ne iraira aberã na mangaapai nga gu rengbe ka ba gberãrago ti Yekova. Kuba gure, si naida ani wiriki wai ka berã na kini mangipai ngba gu gene nayugo gupai nga ani na wirika Yekova gbiati gako wene asino. (Koro. 3:9, 10) Na ga Yekova undo, zavura agu aboro nanaamanga kere gbegberẽ apai ima rengba ka manga ariapai na ki ukadi vovo borose.

14. Ginipai mo awirikaha ti ga Jack kpiapai? (Oni bi sura a.)

¹⁴ Oni bingo gu kpiapai nga ga Jack, ko angia boro zuu na ni kere kumba si ki sa gupai nga aboro ninaayamba ko nga Daimona. Mbiko ga Jack gbegberẽ mangaapai, i asaringbanga ko sa kpio. Ono wa Jack aasungudo gupai nga i imi ko, wirina nandu ku rogo gu bambukiso re asana ko tipa wirika Baibiri, na Jack atona ka wirika Baibiri. Wa si avura du vurũ nga Jack aima manga dungu kere gbegberẽ apai, ko aima manga ariapai na tifuo bete regbo, ko aima zio bapatiza ki da ni boro sa dagba aDezire Yekova yo. Jack aima manga bakere ariapai si ki sa gupai nga rogo gu uru si aaida i imi ko, gu kura ababanda bambukiso adu na aume bangiriyo yo wa i aafu yangara sene fuko. Kikiipa boro naamangasunge rogo gu bambukiso re aya: “Jack adu mbata ni kere gbegberẽ boro rogo gi bambukiso re. Ko awere nga bawene boro kisusi.” Rogo gu poso naadu tifuo i imi Jack, agu awirina nanaandu kaa manga dunguratise bambukiso yo na aposo  dunduko agbia ziziboro nga gu ni nadu pati dunguratise ti bambata regbo. Ginipai nafõngbadu ko yo ko du pati ni? Ngbako aima zera be wai Jack amangi ariapai rogo gako mangaapai yo na ko kini idi ka ino gupai si aaida ko mangihe tipa ka iriso Yekova. Si tie ziazia nga, gaani mangaapai ima rengba ka ye na taarimo fu gu Barani du ngbangbaturũ yo!—1 Pet. 2:12.

WAIGU YEKOVA NIKA TAASARIMOKO BARAMBEDA KUMBATAYO?

15. Waigu Yekova nika yugo gupai barambeda nga ko ima rẽ tipa aboro dunduko irisiko? (Atambuahe 96:10-13)

¹⁵ Oni gedi Atambuahe 96:​10-13. Gi yangara averesi nga ga Atambuahe 96 re nasakapai tipa Yekova nga ko nga ruru Basapungbanga na Bakindo. Waigu Yekova nika taasarimoko barambeda kumbatayo? Vurube gako sapangbanga. Barambeda, ko nika gbarasa Babera Duna Bakere Ome Ti Ni mbiko ziree pambori ima manga kere gbegberẽ apai na ki yugu kere aziree tipa ko. (Yugo. 17:5, 16; 19:1, 2) Ho Babera Duna Bakere Ome Ti Ni nikaa dunga ni berewe ya, gu kura aboro ima rengba ka diaberã ka tona iriso Yekova na ani. Ni yangaraha ti regbo Aramegido, Yekova nika gbarasa Satana na gako sino raka dunduko, na ki di agu aboro dunduko kusayo nasoga ko na kini gumba aziree tipa ko, ono ko nika batasa agu aboro dunduko kpinyemu ko na kini gisangbako na kini idi ka fu taarimo fuko. (Mk. 8:38; 2 Tesa. 1:6-10) Tingbafuo yangara asada nga gu ga Kristo Zogarago Tipa Agarã Kutu nika ye tingbafuo ho, Yekova nika yugoho ayugo fu aboro dunduko nga ko ima rẽ tipa aboro dunduko irisiko. (Yugo. 20:7-10) Ti gu regbo re, “kpotosende ahí na ina pa gu taarimo nga ga Yekova, wa aime nahisa gango baime.”—Abak. 2:14.

16. Ginipai mo nadiberã ka mangaha? (Oni bi sura a.)

¹⁶ Nairiwo wai si nika du ni bakerepa ngbarago ho aboro dunduko nikaa sambuo Yekova ni mbiko ko ima rẽ na ni! Ono da kuho gu regbo re nika da ni, ani ima rengba ka manga gaani paparaha nifu ani taarimo fu Mbori ti ai gu regbo ani agbia momu. Tipa ka undo rani ani moiberãrani kuti gi nyanyakipa pai re, Riigbu Bipasunge ima sia Atambuahe 96:8 ni gu veresi nga ga gu garã nga 2025: “Oni fú taarimo fu Yekova a wa rengbe he na rimoko.”