GU KEKEAPAI DU TIPA WISIGOHO 5
BIA 108 Ga Mbori Bakere Nyemuse
Wai Ani Agbia Undo ti ga Yekova Nyemuse
“Kristo Yesu aye ku zegino ka batasa aboro ingapai.”—1 TIM. 1:15.
GU MEMEAPAI DU ROGO GI KEKEAPAI RE
Wai ani agbia undo ti motumo na gu gene rengbe ani ka yugo gaani tambuahe fu Yekova ngbaha.
1. Ginipai rengbe ani ka mangaha ka sa ngbarago ti Yekova?
MO BERẼNGA gupai nga mo nafu kparakpara gamahe fu gu boro mo akpinyemuni nga gu du ni bawenehe na kidu na bakere sunge ti ni. Mo ima rengba kadu na gberãrago ka gu boro re moi gu gamahe re ku rogo sanduki gbua na bangirini ki go ti ni koyo! Ono tie, mo ima rengba kadu na bakere ngbarago ka gu boro re mangisunge na gu gamahe re na ki fu tambuahe foro tipaha. Waigu du gi kpiapai re na ngbanya dagbaha na gu ga Yekova gamahe nga ga motumo? Yekova aima fu wiriko tipa ko kpi tipa rani. Sidu, Yekova na bakere ngbarago ho ani ayugo tambuahe ni tipa gu bawene gamahe re na gako nyemuse, nga gu nafõngbadu ko yo tipa ko fu motumo!—Yo. 3:16; Rom. 5:7, 8.
2. Ginipai ani nika sakapai tipaha rogo gi kekeapai re?
2 Wa agarã nikaa susa, ani ima rengba ka tona zanga du na tambuahe tipa motumo. Ono ka ani zanga du na tambuahe tipa motumo, si ima rengba kadu wa ka i ya ani namaa gu bawene gamahe Yekova afuhe furani re ku rogo gu ba ka ani abingo ho rogoho ya watadu ka ani aberãnga paha ku rogoho ya. Tipa ka gupai re mangingo ya, si naida ani naazambuasi gaani tambuahe dedede tipa gupai Mbori na Kristo namangihe furani. Gi kekeapai re ima rengba ka undo rani ani mangi gupai re. Ani nika sakapai tipa wai ani agbia undo ti motumo awere na wai rengbe ani ka gbia undo ti ni kumbatayo. Ani nika sakapai a tipa gupai rengbe ani ka mangaha ka yugo gaani tambuahe tipa ga Yekova nyemuse, gbe ti regbo agu aposo du mbata fu uru Tingida Pakpio Yesu na gu ngbefuoho.
WAI ANI AGBIA UNDO AWERE
3. Gini gene sa duho ani agbia undo ngbaha ti motumo tumorii awere?
3 Ani nagbia undo agbia awere ti ga Kristo motumo tumorii. Ni kpiapai, riimburu motumo, Yekova nambupai furani ti gaani aingapai. I aziongo ko azio tipa ko mbupai furani te. Ono ko du naidaha wo. Bake papara Atambuahe ayugu gako tambuahe tipa ga Yekova mbupai. Ko aya: “Ako Gbia, bambiko mo du ni wene ro, ki du zaza tipa vu aboro.”—Tam. 86:5; 103:3, 10-13.
4. Ada Yekova afu motumo tipa yo? (Ruka 5:32; 1 Timoteo 1:15)
4 Agu rani kinaho rengbe kaa bihe nga ani arẽnga na ga Yekova mbupai te. Rengo ngaha nga, boro ho dagbarani rẽ tipa ga Yekova mbupai te. Gu mokedi nangia Pauro aima rugatiko na gupai nga ko “arengba nga na gu rimo nga mokedi” te bambiko ko “aima rungosi ga Mbori kanisa.” Ono wa si avura duwo, ko agbia kurapai kutini nga: “Be gu undahe nga ga Mbori mi du wa du mi.” (1 Kor. 15:9, 10) Yekova nambupai furani ho ani asa berãrani ni ti gaani aingapai. Tipagine? Angianga mbiko gupai nga ani rẽ na ni ya, ono mbiko gako nyemuse. Sidu, ka mo du na gberãrago bambiko mo naberã gupai nga mo arẽnga na ga Yekova mbupai te, mo tingidi gupai nga ko aafunga motumo tipa rengberengbe aboro te, ko afu motumo tipa kpakpa aboro nga aguyo du na gberãrago tipa gayo aingapai na kini aˈasadi ka manga ariapai.—Oni gedi Ruka 5:32; 1 Timoteo 1:15.
5. Ya mo ani ima rẽ Yekova mbupai furani? Oni sakingo rogoyo.
5 Boro ho dagbarani si aida ni naaberã gupai nga si naida Yekova mbupai funi mbiko gupai gbua nga ni ima irisoko tipa dungu agarã te. Rengo du ngaha nga, Yekova natingidapa agu apai atingida dunduko ani namangihe fuko. (Eb. 6:10) Ko afu motumo furani gbua, angianga ka tumo tipa gu weneapai ani namangihe fuko ya. Sidu, si ima rengba kadu ni irairaha ka berã gupai nga, ani ima rẽ tipa ga Yekova mbupai mbiko gupai nga ani ima manga dungu weneapai fuko. Sidu, ka ani idi kuti gupai re, gure nayugoho nga ani naberã gupai nga ani aidanga na motumo te.—Oni ringbisinga ha na AGaratio 2:21.
6. Tipagine Pauro amangisunge nyanyaki ti ni fu Yekova?
6 Pauro aini gupai nga, pai ho ka ko arengbe ka mangaha fu Yekova nga gu ka Yekova ambupai fuko ti ni te. Ono tie, tipagine ko amangisunge nyanyaki ti ni fu Yekova? Ko amangihe wo ka yugo gupai nga ko adu na tambuahe fu Yekova tipa gu weneringise na inapai ko ayuguhe fuko. (Ef. 3:7) Wakina Pauro, ani nandu kumbatayo kaa iriso Yekova zaaza, angianga mbiko ani ima rẽ tipa ga Yekova inopai furani ya, ono mbiko gaani tambuahe tipaha.
7. Gini kura gene ani agbia undo ti motumo awere ngbaha? (ARomo 5:1; Yakoba 2:23)
7 Gu kura gene ani agbia undo ti motumo awere ngbaha nga ani ima rengba kadu na mbembedi pagume na Yekova. a A wa i nasakipai tipaha rogo gu kekeapai ye mbata fu gere, ani aadunga na wene pagume na Mbori ho i avungurani ni te. Ono mbiko motumo, ani ima rengba kadu na ‘zereda na Mbori’ na ki rengbe ka mbeda na ko.—Oni gedi ARomo 5:1; Yakoba 2:23.
8. Tipagine si aida ani du ti ni na tambuahe fu Yekova tipa gu momu nga ga kparakpee?
8 Kparakpee fu Yekova nga gu bawene kparakpara he ani narengbe ka mangaha mbiko gaani mbembedi pabakure na ko. Yekova agianga kina agu akparakpee sa ani amangaha ba adunguratise yo watadu na kura aboro te, ono ko nagia gu gaani akparakpee agia a ani amangaha nisarani. Ho ani amanga kparakpee ni, ani abakanga bangirani gbe te. Ono anga gipai re nga gu yangara undo du ti kparakpee te. Si ima rengba ka nyakasa gaani pabakure na Mbori. (Tam. 65:2; Yak. 4:8; 1 Yo. 5:14) Ho Yesu adu ni auru kpotosende, ko aakpara dedede bambiko ko aima ino gupai nga Yekova aadegatuko adega kuti gako akparakpee na si narengbe ka banda gako pagume na Bako si du ni nyanyakihe. (Rk. 5:16) Ani na bakere tambuahe nga, riimburu ga Yesu motumo, ani ima rengba kadu ni abakurea Yekova na zavura kini fura na Ko rogo kparakpee yo!
WAI RENGBE ANI KA GBIA UNDO KUMBATAYO
9. Waigu ruru airisimbori nika gbia undo ti motumo kumbatayo?
9 Waigu ruru airisi Yekova nika gbia undo ti motumo kumbatayo? Yekova nika fu nyenye unga fuyo. Badungu aboro naberã gupai nga ka gipai re mangingo te bambiko aboro aima digo nikpi tipa dungu akutu agarã. Ono ga Yekova bambata ringbisapai angia aboro raki nyeanye kindi. Ka Adamu ainganga pai ya, boro ho ka berẽ gupai nga ka boro rakinga nyeanye kindi ya te. Aboro dunduko ka raki nyeanye kindi. Na wa vura duhe nga, si ima kpakara ka berãpa raka nyeanye kindi awere, ani ima rengba ka ida kutini bambiko ani ima ino gupai nga Yekova atumo na guhe paha anyaki gbe—nga gu unga nga ga bangisa Wiriko ka sa gipai re taata.—Rom. 8:32.
10. Ginipai mbedimbedi aKristano na kura akandoro angera kumbatayo tipaha?
10 Wa vura duhe nga nyenye unga nga gupai ani nika gbia undo ti ni kumbatayo, Yekova naida ani berẽ aberã tipaha awere. Mbedimbedi aKristano nangera tipa bawene raka ngbangbaturũ yo wa i nikaa zogarago ku auru kpotosende na Kristo. (Yugo. 20:6) Kura akandoro nangera kumbatayo tipa ka raka rogo paradizo auru kpotosende, nga gu ba aboro nika igirãnga ni, ka rungo, watadu kadu na gberãrago ya. (Yugo. 21:3, 4) Ya mo mo nga boro sa dagba kura akandoro du na maabangirise ka raka nyeanye kindi auru kpotosende? Pa gi mosoro re aumbanga ti gu nga ga raka ngbangbaturũ yo te! Yekova akusi aboro tipa i raki auru kpotosende, sidu, raka nyeanye kindi auru kpotosende nika sarani ani raki na bakere ngbarago.
11-12. Gini bete amaku rengbe ani ka maa bangirani kumbatayo tipaha? (Oni bi asura a.)
11 Mo berẽnga pa wai raka nika du foro rogo Paradizo auru kpotosende. Mo abakanga bangiro tipa kaza watadu kpio te. (Yes. 25:8; 33:24) Yekova nika fu gu wene ahe dunduko foro mo aidaha. Ginipai mo aida ka wirikapai tipaha? Ya mo mo naida ka wirikapai tipa anya? Ya mo mo naida ka wirika wai ka ta woro manzigo? Ya mo mo nakpinyemu ka wirikapai tipa wai ka ke asura? Paradizo yo, ani nika ida aida na agu aboro ini wai ka ke asura na ka dudua abambu. Na si nika ida aida a aboro ruku ariahe na kini pasihe, kini mbakadi aũsunge, na i kini ruku ambumbudo kini ngerefuoho. (Yes. 35:1; 65:21) Ho mo nikaa raka ni nyeanye kindi, mo nika du adu na regbo bero ka manga agi apai re dunduko na dungu agu akuraha!
12 Nairiwo gu pa ngbarago nika ngiaha re ka dia agu aboro kugume i nika zingisayo be kpio! (Amo. 24:15) Mo berẽnga pa wai a mo nika gbia ngbarago ti wirikapai tipa Yekova ni wirika mo pai tipa gu badungu ahe ko akusihe. (Tam. 104:24; Yes. 11:9) Na gu ngba angba kisusi nga, mo amanganga ingapai te, sidu, mo nika du na rengba ka iriso Yekova na ka mo asananga ko tipa mbupai ya! Ya mo mo naida ka mbu pa agi amaku du kumbatayo re ka “ngi tipa rago ngbutuko rogo gu ngbarago nga ga ingaapai”? (Eb. 11:25) Wagusa te! He ho rogo gi zegino re awere ngba kisusi gu bawene raka ani nika gbiaha kumbatayo te. Mo tingidi gupai nga pa Paradizo auru kpotosende anyenga kindi ni gupai ani nikaa maa bangirani tipaha te. Niyangaraha, si nika ngia gu ba ani nikaa raka rogoho na aˈuru dunduko. Na gipai re nika manga bambiko Yekova aima kpinyemu rani na ki fu Wiriko ko kpi tipa rani!
Gini amaku mo angera tipaha kumbatayo rogo Paradizo? (Oni bi genewaraga 11-12)
MO YUGU GUPAI NGA MO NA TAMBUAHE TIPA GA YEKOVA NYEMUSE
13. Waigu rengbe ani ka yugo gaani tambuahe tipa ga Yekova nyemuse? (2 AKorindo 6:1)
13 Waigu rengbe ani ka yugo gaani tambuahe fu Yekova tipa wa fuko motumo furani? Ni maa ani irisoko ni bambatapai rogo gaani raka yo. (Mt. 6:33) Gu kurapai berewe nga, Yesu akpi tipa gupai nga “agu yo du ni ungayo ka i du nga ni ungayo fu tiyo ya, ono fu gu ko nakpi tipa yo ki zingi berewe.” (2 Kor. 5:15) Yekova aima du na bakere weneringise koyo du ani ni na kini mbupai furani. Ni manga ani gupai rengbe omerani na ni ka irisoko, ani nayugoho nga ani ima rugatirani na bakio gupai ko namangihe furani na ani nirengo na tambuahe tipaha.—Oni gedi 2 AKorindo 6:1.
14. Waigu rengbe ani kadu na idapase kuti ga Yekova rugapai?
14 Ani ima rengba a ka yugo gaani tambuahe tipa ga Yekova nyemuse ni kido ani kutiko na kini pekefuo gako rugapai. Ngba gini gene? Ho si aida ani amangi diaberã ni, wa gu nga bakio wai ani aida ka wirikapai watadu gu ngbatunga sunge marã ani aida ka mangaha, si naida ani gbe berãrani sa gupai Yekova aida ani mangihe. (1 Kor. 10:31; 2 Kor. 5:7) Ho ani amanga adiaberã ni riimburu gaani idapase kuti Yekova, gaani idapase kutiko na gaani pagume na ko nadu nyanyaki. Na gu gaani maabangirise nga ga raka nyeanye kindi nada ni ndikidipai furani.—Rom. 5:3-5; Yak. 2:21, 22.
15. Waigu rengbe ani ka yugo gaani tambuahe ti regbo Tingida Pakpio Yesu?
15 Kura gene kinaho kindi rengbe ani ka yugo gaani tambuahe ngbaha tipa ga Yekova nyemuse. Ni manga ani ai gupai rengbe ani ka mangaha rogo agu aposo du mbata fu Tingida Pakpio Yesu na agu ngbefuoho ka yugoho fu Yekova nga ani na tambuahe tipa motumo. Kupati mbakadatirani kadu pati Tingida Pakpio Yesu, ani ima rengba ka yamba kura aboro i ye kadu pati ni. (1 Tim. 2:4) Mo sakipai tipa gupai nika manga pati Tingida Pakpio Yesu fu agu aboro mo nayambuyo. Si adu ni wenepai foro mo yugu agu avidio fuyo du rogo jw.org nga Tipagine Yesu Akpi Ti Ni? na Tingida Pakpio Yesu. Si naida abaakumba yambu agu aboro niima zera rogo toroyo. Mo berẽnga pa gu ngbarago rengbe kadu ngbangbaturũ yo na auru kpotosende ka si dunga ga Yekova ingiingi kandoro karaga tini ku dagba gako aboro! (Rk. 15:4-7) Ti regbo Tingida Pakpio Yesu, ani moingo ho amaa ni gaani sasa ka fu sene angianga sa fu kina akuarani ya ono gbe fu agu aboro du ni vovo yo watadu agu aboro naadunga pati ni ya tipa gbanga regbo. Ani naida ka sayo i bi tiyo nga i ima dia yo kugume!—Rom. 12:13.
16. Tipagine si aida ani kiisi gaani sunge tungusapai ti ni ti regbo Tingida Pakpio Yesu?
16 Ya mo mo rengbe ka kiiso gamo sunge fu Yekova rogo agu aposo du mbata fu Tingida Pakpio Yesu watadu tifuoho? Gere nga wene gene ka yugo gupai ngbaha nga mo na bakere tambuahe tipa gupai Yekova na Yesu namangihe foro. Kina wai ani nikaa ndu gene tungusapai yo, kinawo a ani nika bi wai Yekova aundo rani na gaani kido kutiko nika nyaka gbe. (1 Kor. 3:9) Berewe a, si nika ida mo naamanga gu Geda Ziazia Kekeapai Kini Tingidi Pakpio Yesu du rogo Wisigo Ziazia Kekeapai Na Aˈuru Dunduko watadu gu kekeapai du dagba gbakigbaki agene du rogo gaani waraga adunguratise. Zavura mo ima rengba ka sia agu apangbanga nga ga Baibiri re ni gupai mo nika manga wisigopai tipaha.
17. Ginipai nasa ngbarago ti Yekova? (Oni bi gu sanduki nga “ Agu Agene Ani Ayugo Gaani Tambuahe Ngbaha Tipa ga Yekova Nyemuse.”)
17 Rengo ngaha nga, agu apai du tipa ro arengbanga ka mbu ro mo mangipai kuti agu aberãpai dunduko i nafura tipaha rogo gi kekeapai re te. Yekova aringbisanga gupai mo amangaha kuti gupai kura aboro amangaha te. Ko na tambuahe tipa gu nyemuse du mo na ni tipa ko. Ko na ngbarago ho ko abi wai ni du mo na tambuahe tipa gu gako nyanyakipa gamahe nga motumo.—1 Sam. 16:7; Mk. 12:41-44.
18. Tipagine du ani na tambuahe ti ni fu Yekova Mbori na Yesu Kristo?
18 Motumo nasaha taata furani tipa i rengbe ka mbupai furani ti gaani aingapai, ani ki rengbe kadu ni abakurea Yekova, na kidu na maabangirise ka raka nyeanye kindi. Ani yugungo gaani tambuahe ayugo fu Yekova tipa gako nyemuse nga gu nafõngbadu ko yo tipa ko fu agi amaku re furani. (1 Yo. 4:19) Ani yugungo gaani tambuahe ayugo a fu Yesu nga guko nakpinyemu rani ni bakerehe na ki fu ungako tipa rani!—Yo. 15:13.
BIA 154 Nyenye Nyemuse
a Yekova aima mbupai fu agu aboro naairisoko mbata fu Yesu fu motumo. Yekova arengbe ka manga gipai re mbiko gupai nga ko aima du na gu kido nga Wiriko nika nyeanye niruru ko dati kpio. Tipa Yekova, si adu fuko wa ka i ya i aima fu motumo gbanga regbo kusayo mbata fu Yesu kpi niruru ko.—Rom. 3:25.
