1-2. (a) Ginihe nga ingapai, na waigu rengbe ani ka diabe gu vura ani asoho kutini? (Oni bi “Sakarogopai Yo” a.) (b) Ginipai ani nika sakapai tipaha rogo gi kekeapai re gbiati gu kura kekeapai du rogo gi Ngbaõbambu Sinziri re? (Oni bi gu kekeapai a nga, “Fu gu Boro Nageda gi Kekeapai re” rogo gi Ngbaõbambu Sinziri re.)

 YA MO mo na nyemu ka ino bakio wai Yekova Mbori nakpinyemuro? Mo rengbe ka gbia karagapai ni wirika mo pai tipa gupai ko namangihe ka batasa ro be ingapai na kpio. Ingapai a nga kere vurarani, nga gu ka ani adianga behe ngba gaani ome ya. Ani dunduko namanga ingapai na aˈuru dunduko, na ani nakpi mbiko ani nga aboro ingapai. (Rom. 5:12) Wa vura duhe wo, wene pangbanga kinaho. Na ga Yekova undo, ani ima rengba ka diabe ingapai. Ono Yekova ima kido rani nga, ko nika batasa rani be ingapai na kpio!

² Tipa agarã wa 6,000, Yekova ima undo aboro tipa i irisiko wa vura duhe nga i nga aboro ingapai. Tipagine? Bambiko ko ima kpinyemu rani. Yekova aima kpinyemu aboro kinaho ko akusiyo ni. Mbiko gako bakere nyemuse tipa rani, ko ima manga badungu apai ka undo yo ho i amanga ingapai ni. Mbori ima ino gupai nga ingapai nandu sa kpio, na ko aidanga ani kpi te. Ko naida ani raki nyeanye kindi. (Rom. 6:23) Gure nga gupai ko aidaha tipa ro. Rogo gi kekeapai re, ani nika sakapai tipa asanahe biata: (1) Waigu Yekova afu maabangirise fu aboro  ingapai? (2) Ginipai gu kpakpa aboro nadu ti agu aregbo i aake Baibiri ti ni amangihe tipa ka sa ngbarago ti Yekova? (3) Ginipai Yesu amangihe ka batasa aboro be ingapai na kpio?

WAIGU YEKOVA AFU MAABANGIRISE FU ABORO INGAPAI?

3. Ginipai nasa aAdamu na Eva i ingipai?

³ Ho Yekova akusi bambata kumba ni na dee, ko aida i du na ngbarago. Ko afu bawene kporo fuyo, gu gamahe nga ga rogatise, na bawene sunge. Si aaida i hiisi kpotosende dunduko na awiriyo, na ki saha ni paradizo wakina ati Edene. Ko afu taata ndiko fuyo gbua sa. Na ki fu zahe fuyo nga, ka i sia ka basasangba gu gako ndiko re, i nika kpi akpi. Ani ima ino gupai namangi. Gbegberẽ maraika nga guko naakpingo nyemu aboro watadu Mbori ya, aˈasadi aAdamu na Eva tipa i basasangba Mbori. Adamu na Eva amangi gupai gu gbegberẽ maraika nga Satana re aaidaha. I aakidongo kuti gu Bayo nayugu bakere nyemuse fuyo te, kuba gure, i abasasangba ko. A wa ani nainihe, gupai Yekova apehe re aima manga. Mbiko gayo basasangba, aAdamu na Eva arungo rogo gayo raka yo naabaha dunduko. I atona ka gbinza na ni yangaraha i ki kpiki.​—Bam. P. 1:28, 29; 2:8, 9, 16-18; 3:1-6, 17-19, 24; 5:5.

4. Tipagine Yekova asoga ingapai ti ni na kini undo rani ani sovura kutini? (ARomo 8:20, 21)

⁴ Yekova amoi gi nyanyaki pangbanga re ku rogo Baibiri tipa ani rugutirani na nyanyakipa pai. Si naundo rani ani rugutirani na ndu gupai ko nasogo ingapai ti ni nikerehe. Ingapai nagbarasa gaani pagume na Yekova na si ki ye na kpio. (Yes. 59:2) Si du nga ndu gupai Satana asoga Yekova gbiati aboro ti ni. Gure du nga ndu gupai ko aˈasadi aAdamu na Eva i ingipai ti ni, na ko nandu kumbatayo kindi areme kaa asada aboro. Sidu, ho aAdamu na Eva aingipai ni, si nawiraha wa Satana aima berã gupai nga ko ima gbarasa ga Yekova ringbisapai tipa aboro. Ono ko aaruganga tiko na pa wai du Yekova na nyemuse te. Mbori aˈarianga gako ringbisapai tipa atita Adamu na Eva te. Yekova ima kpinyemu aboro, sidu, ko amangi mbakadapai nibasa tipa ka fu maabangirise fu aboro dunduko. (Oni gedi ARomo 8:20, 21.) Yekova aima ino gupai nga, aboro nika du kinaho nika sia ka kpinyemuko na ka giasangbako. Yekova asaha taata fuyo tipa i mbedi na ko na ki batasiyo be ingapai na kpio. Ginipai Yekova arengbe ka mangaha tipa ka sa agi apai re dunduko si mangi?

5. Gini regbo Yekova afu bambata kpia maabangirise fu aboro ingaapai? Oni sakingo rogoyo. (Bambata Pai 3:15)

⁵ Oni gedi Bambata Pai 3:15. Nibasa, Yekova ape gupai nga ko nika gbarasa Satana na ki fu maabangirise fu aboro dunduko. Mbori ape gupai nga ‘tita dee’ nika duho nika batasa aboro. Niyangaraha, gi tita dee re nika gbarasa Satana na ki di agu akpakarapai dunduko kusayo ko aye na ni ati Edene yo. (1 Yo. 3:8) Ono ni bambataha, Satana nika mbura gido gi tita dee re watadu ki imiko. Gupai re nika imisa Yekova nikerehe. Yekova aima du na nyemu ka rungo na ki mbu gi tita dee re ko rungo ka batasa aboro.

GUPAI KPAKPA ABORO AMANGIHE TI AGU AREGBO I AAKE BAIBIRI TI NI TIPA KA SA NGBARAGO TI YEKOVA

6. Ginipai Ebere, Noa, na kura ga Mbori ruru amoyambu amangihe tipa ka mbeda na Yekova?

⁶ Yeeye, Yekova ayugo gu gene ziazia aboro ingapai narengbe ka mbeda na ko ngbaha. Gu ue wiri Adamu na Eva nangia Ebere, nangia gu bambata boro nadu na idapase kuti Yekova tingbafuo gu samungu namangi ati Edene yo. Ebere afu motumo fu Yekova bambiko ko  aaida ka manga gupai nangba ti Ko na ka mbeda na ko. Ebere angia babanda akandoro, sidu, ko adi kura gako paranga akandoro, ki yere gorayo, na ki fu ra ni motumo fu Yekova. Waigu Yekova adu? “Bi Ebere na gako motumo angba angba bangiri Yekova.” (Bam. P. 4:4) Yekova adu na ngbarago na agu amotumo nangia ga kura aboro nakpinyemu ko na kini kido kutiko​—wa Noa. (Bam. P. 8:20, 21) Pa ida Yekova na agu amotumo re ayugu gupai nga aboro ingapai ima rengba ka ngba bangiriko na ki mbedi na ko. b

7. Ginipai ani awirikaha ti ga Abarayama du na nyemu ka fu wiriko ni motumo?

⁷ Abarayama adu na nyanyaki idapase kuti Yekova. Yekova asanako ko mangi kere kpakarakpakarapai. Ko ape gupai fu Abarayama nga ko fu wiriko nangia Yisaka ni motumo. Gipai re aima fuda Abarayama nikerehe tigaha. Ono ko aima giasangba Yekova. Ho Abarayama aaida ka imo wiriko ni, Mbori arugusi ko. Yekova aima ino gupai nga ka Abarayama imi wiriko nitiko, ko ima rengba ka du rogo kere imisiri. Wa si avura duwo, gu kpiapai re nayugo nyanyakipa rengo fu agu aboro dunduko du na idapase. Yekova aima du na nyemu ka fu bangisa wiriko ko aima kpinyemuko gbe ni motumo. Yekova aima kpinyemu aboro ni bakerehe.​—Bam. P. 22:1-18.

8. Ginipai gu dungu amotumo i anaafuhe tii Ndiko aayugoho? (Pa Amotumo 4:27-29; 17:11)

⁸ Ho Yekova afu Ndiko ni fu aYisaraere, ko ape gupai fuyo nga, si naida i fu motumo tipa wa ka ko mbupai fuyo ti gayo aingapai. (Oni gedi Pa Amotumo 4:27-29; 17:11.) Ngbatunga agu amotumo re aayugopa bakere motumo nga gu nika batasa aboro dunduko be ingapai. Mbori ape gupai fu gako anebi nga, i kepai tipa gu tita dee i akidopa ko. I asaki gupai nga bangisa Wiri Mbori nika rungo na i ki imiko. Ko nika du wakina gu kandoro i anaafu ru ni motumo. (Yes. 53:1-12) Mo berẽnga kurii gipai re: Yekova afu bangisa wiriko ko aima kpinyemuko gbe tipa ka batasa aboro​—kodihe na mo​—be ingapai na kpio!

GINIPAI YESU AMANGIHE KA BATASA ABORO BE INGAPAI?

9. Ginipai Yoane Bafu Bapatiza apehe tipa Yesu? (AEbere 9:22; 10:1-4, 12)

⁹ Rogo bambata sa kama agarã Fuo Batikayo Kristo, gu ga Mbori moyambu nangia Yoane Bafu Bapatiza asakipai tipa Yesu boro Nazareta nga: “Oni bí, gu Wiri kandoro nga ga Mbori ru, nadia gu ingapai nga ga zegino ku sa yo!” (Yo. 1:29) Agi afugo re nayugo gupai nga Yesu du nangia gu kparakpara tita dee Mbori akidopa ko. Si adu nga Yesu nika fu ungako ni motumo. Niyangaraha, gu tita dee Yekova akidopa ko re ada ka batasa aboro​—nyeanye kindi be ingapai.​—Oni gedi AEbere 9:22; 10:1-4, 12.

10. Waigu Yesu ayugu gupai nga ko aye “ka yamba” aboro ingapai?

¹⁰ Yesu agbeberã ko gbe ka undo agu aboro naambu be ingapai na ko ki yambu yo i da ni apefuoko. Ko aima ino gupai nga, gu ndikidi ndupai nasa aboro i naarungo nga ingapai. Sidu, ko aundo agu aboro naarungo mbiko ingapai. Ni mangako sunge na kpiapai, ko asaki gupai nga: “Agu aboro nyaki anyaka i aida nga na munganga te, ono kina agu yo du na kaza.” Ko agbia kurapai kutini nga: “Mi aye nga ka yamba ruru aboro te, ono ingiingi yo.” (Mt. 9:12, 13) Na gure du nga gupai Yesu amangihe. Ho dee ambedi nduko ni na gari aume, ko afura furi zezeredi na ki mbupai furi ti gari aingapai. (Rk. 7:37-50) Yesu ayugu nyanyakipa  arengo fu dee boro Somorona wa si avura du vurũ nga ko aima ino gupai nga ri aaraka na gu kumba naangianga kumbari ya. (Yo. 4:7, 17-19, 25, 26) Aboro nakpi mbiko ingapai. Ono Mbori aima fu ome fu Yesu tipa ko zingisi akumba, adee, na agude nga aguyo naima kpiko.​—Mt. 11:5.

11. Tipagine aboro ingapai adu ti ni mbembedi na Yesu?

¹¹ Ani ima rengba ka rugatirani na ndu gupai agu aboro naamanga gbegberẽ apai aidi ti ni na Yesu. Ko aima rugatiko na pa wai i adu na ko ki mangipai na yo rogo weneringise yo. I aagundenga tipa ka fura na ko te. (Rk. 15:1, 2) Na Yesu atambuayo na ki fu mosoro fu ngbatunga agu aboro re tipa yugo yo idapase kutiko. (Rk. 19:1-10) Yesu adu na inopai wakina Bako. (Yo. 14:9) Ani nawirika gupai nga Yekova na inopai na ko nakpinyemu aboro ingapai na kini idi ka undoyo ti wai Yesu aafura na aboro na kini mangipai na yo. Yesu aundo aboro ingapai tipa i du na nyemu ka aria gayo gene mangapai na ki pekefuo ko.​—Rk. 5:27, 28.

12. Ginipai Yesu ayuguhe tipa kpioko?

¹² Yesu aima ino gupai nadu fuko kumbatayo. Ko ape gupai bara dunguhe fu apefuoko nga, i nika fuko ku be aGendiria na i ki imiko ti ngbunduru-ngua. (Mt. 17:22; 20:18, 19) Ko aima ino gupai nga gako motumo nika dia ingapai kusayo rogo zegino wa gu Yoane atungusihe na wa gu anebi agumbaha. Yesu ape gupai a nga tifuo ko kpi, ko nika “gbe  aboro dunduko” ko yo du ko ni. (Yo. 12:32) Agu aboro du na idapase kuti Yesu nga aguyo naˈasadatiyo ka wirika ko nasa ngbarago ti Yekova. Niyangaraha, ka i amangihe wo ‘ka i aima kusayo be ingapai.’ (Rom. 6:14, 18, 22; Yo. 8:32) Sidu, Yesu adu na wingbaduse na ki du na nyemu ka kpi iigirã kpio tipa ka batasa rani.​—Yo. 10:17, 18.

13. Waigu Yesu akpi, na ginipai kpioko ayugoho furani tipa Yekova Mbori? (Oni bi sura a.)

¹³ Boro sa dagba mbembedi abakurea Yesu yo akusi ko. Tifuoho, avurako ki ziko, ki senge ko, na ki kitingbanga ko na agu apai ko aamanganga ha ya. I ape gupai nga Yesu rẽ na kina kpio, na i ki asi ko ti ngbunduru-ngua. Niyangaraha, abanzengere abanga Yesu kuti ngbunduru-ngua ka imo ko. Wa ko aahi gu kere igirã re niruru ko, kura boro kinaho si aimisi ni kisusi. Yekova Mbori du nadu. Yekova aima du na ome gbiati rengba ka rugusa gu rungosiro Wiriko aasusa rogoho, ono ko aamanganga ha wo te. Yekova aima kpinyemu wiriko ni bakerehe gbe, sidu tie, tipagine ko ambuko ti ni ko rungo na ki kpi? Bambiko Yekova ima kpinyemu rani. Yesu aya: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”​—Yo. 3:16.

14. Ginipai ga Yesu motumo ayugoho foro?

¹⁴ Ga Yesu motumo nga bakere gopai nayugo gupai nga Yekova ima kpinyemu atita aAdamu na Eva. Si nayugo bakio wai Yekova nakpinyemu ro. Ko afu gu bangisa wiriko ko aima kpinyemuko gbe na ki hi bakere imisiri tipa ka batasa ro. (1 Yo. 4:9, 10) Ii, ko naida ka undo rani nibasasa ani sovura kuti ingapai​—na ki dibehe!

15. Ginipai si aida ani mangihe tipa ka gbia undo ti gu ga Mbori gamahe nga ga gu motumo tumorii nga ga Yesu?

¹⁵ Ga Mbori gamahe nga motumo tumorii nga ga bangisa wiriko, nasaha taata i mbupai furani ti gaani aingapai. Ono tipa Mbori mbupai furani, si naida ani mangipai amanga. Ginipai si aida ani mangihe? Yoane Bafu Bapatiza gbiati Yesu Kristo nitiko afu karagapai nga: “Oni sá gaoni berã; bambiko gu ngbi nga ga ngbangbaturũ si nambeda.” (Mt. 3:1, 2; 4:17) Sidu, si naida ani saberã rani ti gaani aingapai ka ani aida ka mbeda na Yekova na ko vu rani ti gaani aingapai. Ono ginihe nga saberã, na waigu si aundo rani ani sa ngbarago ti Yekova si ki vura du vurũ nga ani nga aboro ingapai? Gu kekeapai ngbefuo gere nika karagapai kutini.