1. Ginipai gu boro mangi saberã amangaha?

 HO ANI namangi irairapai ni, si ni nyanyakipa pai ani mangi saberã. Baibiri nape gupai nga, boro nasaberã ni ho ni natona soga gu gbegberẽpai ni ni amangihe, na ni ki mbu mangapai ngba gu gene re, na ni ki diberã ka zanga mangaha berewe.​—Mt. 3:8; Amo. 3:19; 2 Pet. 3:9.

2. Ginipai si aida ani dunduko wirikihe tipa saberã? (Yeremaya 8:9-11)

² Ai gu boro du ni unga ni si aida ni wirikipai tipa saberã. Tipagine? Bambiko ani dunduko naingapai na aˈuru dunduko. Wangia ani atita aAdamu na Eva, ani dunduko aima dia ingapai na kpio be yo. (Rom. 3:23; 5:12) Boro ho dagba rani yo zanga diaha te. Zavura agu aboro nadu na nyanyaki idapase, wa gu mokedi nangia Pauro, si aadunga fuko taata ka ká iraira nyemu apai te. (Rom. 7:21-24) Ya mo gipai re nayugo gupai nga ani du na gberãrago ti aregbo dunduko mbiko gaani ingaapai? Wo duhe te, Yekova nga Mbori inopai, na ko naida ani du na ngbarago. Ani bingo gu kpiapai nangia ga agu aYudo naadu ti regbo Nemaya. (Oni gedi Nemaya 8:9-11.) Yekova aaidanga gupai nga i du na bakere gberãrago ni kerehe tipa agu aingapai i amangihe kusayo te. Ko aaida i naairisoko na ngbarago. Yekova ima ino gupai nga saberã naye na ngbarago. Sidu, ko nayugopai furani tipaha. Ka ani saberã rani ti gaani aingapai, ani ima rengba kadu na gu kido nga gu Barani nga boro inapai nika mbupai ambu furani.

3. Ginipai ani nika sakapai tipaha rogo gi kekeapai re?

³ Rogo gi kekeapai re, ani nika wirikapai tipa saberã. Ani nika sakapai tipa apai biata. Ni bambataha, ani nika wirikapai tipa gupai Yekova ayuguhe fu aYisaraere tipa saberã. Fuo gure, ani nika wirika wai Yekova aundo aboro i saberã. Ni yangaraha, ani  nika bi gupai Yesu Kristo ayuguhe fu gako abawiriki tipa saberã.

GUPAI YEKOVA AYUGUHE FU AYISARAERE TIPA SABERÃ

4. Ginipai Yekova ayuguhe fu gu rikaaboro nangia aYisaraere tipa saberã?

⁴ Ho Yekova afu gako andiko ni fu aYisaraere, i akidohe tipa ka giasangbako. Ka i abanda gako andiko, ka ko aima banda yo na ki fu maku fuyo. Ko agumba gupai tipa gako andiko nga: “Bambiko gi rugute mi aruga roni na ni ni gi uru re, si ni kpakarakpakara ha fu roni ki susi te, turũ nga ha a te.” (Pa Rug. 30:11, 16) Ono ka i aagianga sangba gako andiko ya watadu ka i asia ka iriso kura ambori, ka ko abandanga yo berewe te na i aima rengba ka rungo. Ono gure aayugongo gupai nga Yekova aima mbuyo kindi te. I aima rengba ka ‘karaga tiyo fuo Yekova gayo Mbori, ki nigi fugoko.’ (Pa Rug. 30:1-3, 17-20) Ka pepai ngba kura gene, i aima rengba ka saberã yo. Ka i amangihe wo, ka Yekova aima rengba ka mbedisa yo na ko na ki fu maku fuyo berewe.

5. Waigu Yekova ayugo gupai nga ko aambunga gako aboro te? (2 Abakindo 17:13, 14)

⁵ Ga Yekova siasia aboro anaasamungu kuti ko dedede. I anaairiso akpiahe na kini mangi kura kere gbegberẽ apai. Ni sangbanaha, i aima gbiatiyo na rungo. Ono Yekova aandu kindi kumbatayo kaa undo gako aboro tipa i tona irisoko berewe. Ko anaakeda anebi ti aregbo dunduko i zungodi gako aboro i saberã yo na i karaga tiyo fuo ko.​—Oni gedi 2 Abakindo 17:13, 14.

6. Waigu Yekova amangisunge na gako anebi tipa ka yugopa ndu gupai duhe ti ni ni nyanyakipa pai tipa i saberã yo? (Oni bi sura a.)

⁶ Ho ga Yekova aboro anaabasa sangbako ni, ko anaakeda gako anebi dedede i ndu ka zayo tipa gupai na ni rengbe ka manga ka i aamanganga ariapai ya na kini ruguyo. Ni kpiapai, Mbori ape gupai rogo Yeremaya yo nga: “Mo káraga tiro, Yisaraere nga boro tikusayo . . . Mi angéra nga kuti ro na zinga te, bambiko mi du na inapai . . . mi azínga nga nye anye kindi te. Mo ídi pa ga irairapai, ya mo asa mungu kuti Yekova.” (Yere. 3:12, 13) Yekova aya fu Yoere  ko pe gupai fu aboro nga: “Oni karaga tironi kono du mi ni na kpotoroni yo dunduko.” (Yoe. 2:12, 13) Ko asa Yesaya ko pe gupai nga: “Ki girisi tironi; oni mói gu gbigbitapai nga ga gaoni mangapai ku sa yo ti bangire; oni mbú manga gbigbitapai.” (Yes. 1:16-19) Na vurube Yezekere, Yekova asanahe nga: “Rago nangba tire mbiko kpio gbegberẽ boro? . . . Gu ngba nga ni sa tini ti gani gbegberẽpai ki nye ni ungani, te? Bambiko rago angba nga ti re mbiko kpio boro te, . . . si du oni sá tironi, ki nye ni ungaroni.” (Yeze. 18:23, 32) Yekova na bakere ngbarago ka bi gupai nga aboro nasaberã yo ti gayo aingapai, mbiko ko naida i raki​—nyeanye kindi! Ono Yekova atonanga ka undo aboro kinaho i namangi saberã ni te. Ani bingo gu kura akpiapai nga ga gipai re.

7. Ginipai Yekova ayuguhe fu gako aboro ni mangako sunge na gu pangbanga nga ga gu nebi nangia Osea gbiati diako?

⁷ Oni bingo wai Yekova ayugupai fu gako aboro ni mangako sunge na gu ndikidi kpiapai nangia ga Gomere, nangia dia gu nebi nangia Osea. Tingbafuo ri mangi bäri, ri ambu Osea tipa kura akumba. Ginipai Yekova amangihe? Yekova ini apai tipa boro dunduko ape gupai fu Osea nga: ‘Mo ndú berewe, mo kpí nyemu gu de gu kura kumba nakpi nyemu ri nga debari a; wa Yekova nakpi nyemu awiri aYisaraere, ka i vura sa tiyo fu kura ambori.’ (Osea 3:1; Snz. 16:2) Oni ini gupai nga dia Osea aamanga kere ingapai kindi. Ono Yekova ape gupai fu Osea nga ko mbupai furi na ki di ri ni diako berewe. a Na gi kpiapai re, Yekova aaida ka yugopai fu gako aboro tipa wai ko aabi yo. Wa vura duhe nga i aamanga kere gbegberẽ apai kindi, ko akpinyemu yo kindi. Ko aakeda gako anebi kindi tipa i undo yo i saberã yo na ki mangi ariapai rogo gayo raka. Gi kpiapai re nayugo gupai furani nga Yekova ima ino agu apai dunduko du tipa boro, na ko naˈasada ka undo gu boro namanga kere aingapai kindi tipa ni saberã. (Snz. 17:3) Ani bingo wai Yekova amangi gipai re.

WAI YEKOVA AˈASADA KA UNDO ABORO I SABERÃ

8. Ginipai Yekova amangihe fu Kaina tipa ko sa gako berã? (Bambata Pai 4:3-7) (Oni bi sura a.)

⁸ Kaina nangia bambata wiri Adamu na Eva. Wakina kura awiri aAdamu na Eva dunduko, Kaina adi nyemu manga gupai du ni irairaha be avunguko. Kurii gure, Baibiri nape gupai tipa ko nga: “Gako mangaapai nangia gbegberẽapai.” (1 Yo. 3:12) Isoke, si du nga ndu gupai bibi “Kaina na gako motumo angba nga” bangiri Yekova ti ni ho ko afu he ni ya. Kuba gupai nga ko aria gako mangapai, “Kaina ki zingi azinga gbe, kpakpuko ki du na ngbandua.” Ginipai Yekova amangihe fuo gure? Ko afura na Kaina. (Oni gedi Bambata Pai 4:3-7.) Oni ini gupai nga Yekova afura ngba wene gene na Kaina na ki pe gupai fuko nga ko nika fu maku afu fuko ka ko mangi gupai du ni wenehe. Yekova afu zahe fu Kaina a nga gako zinga ima rengba ka sa ko ko mangi gbegberẽpai. Si nipa gberãrago nga Kaina aima ká ka giapai. Ko aambunga Yekova ko undo ko tipa ko saberã te. Mbiko gupai nga Kaina aadeganga tuko fu Mbori te, ya mo Yekova adiberã nga ko aˈasadanga berewe ka undo ai boro ni mangi saberã te? Ko aamanganga ha wo te.

9. Waigu Yekova aundo Davide ko saberã ko?

⁹ Yekova aima kpinyemu Bakindo Davide ni bakerehe. Zavura ko aya tipa ko wẽ ko “du kpotoko yo wa gu mi akpi nyemu he.” (Amo. 13:22) Ono Davide amangi kere aingapai, kodihe  na bäri gbiati imo boro. Ringbisihe kuti agu aNdiko nangia ga Moize, si aaida i imi Davide aimo. (Pa Mot. 20:10; Geda 35:31) Ono Yekova aaida ka undo Davide ko saberã ko. b Ko akedi gako nebi nangia Natana fuo bakindo Davide, wa si avura du vurũ nga ko aayugongo pa saberã kindi te. Natana amangisunge na kpiapai tipa si undo Davide ko rugutiko na gupai nga ko ima manga kere aingapai. Davide aye ka bi gupai nga ko ima imisa Yekova ni kerehe na ko ki saberã ko. (2 Sam. 12:1-14) Ko ake atambuahe nga gu nayugo pa gu gberãrago ko adu na ni tipa gupai ko amangihe re. (Tam. 51) Badungu agu aboro niima manga ingapai nagbia wasa ho i ageda gi atambuahe re ni na ki mangi saberã. Ani na bakere tambuahe nga Yekova aundo Davide ko mangi saberã.

10. Waigu pa ino mo gupai nga Yekova na bakere zerangbaduse na ani na kini mbupai furani asa ro mo du?

¹⁰ Yekova ima soga ngbatunga aingapai dunduko. (Tam. 5:4, 5) Ono Yekova ima kpinyemu rani, na ho ani amanga ingapai ni, ko naida ka undo rani. Ko naˈasada ti aregbo dunduko ka undo rani na zavura agu aboro mangi kere ingapai tipa i saberã yo ki mbedi na ko. Si ni bakere pa wasa ka ino gupai nga Yekova naida ka mbupai furani! Ho ani aberã ni kuriipa ga Yekova zerangbaduse gbiati mbupai, ani nadiaberã ka nye ni rururani fuko na ani ki ipi ka manga saberã ho ani namangi ingapai ni. Ani nika wirikapai awere tipa gupai Yesu ayuguhe fu gako abawiriki tipa saberã.

GUPAI APEKEFUO YESU AWIRIKIHE TIPA SABERÃ

11-12. Gini kpiapai Yesu amangisunge na ni tipa ka yugo gupai nga Yekova na bakere nyemu ka mbupai furani? (Oni bi gu sura du ti kpotoho.)

¹¹ Rogo bambata sa kama agarã Fuo Batikayo Kristo, regbo aima da tipa Masiya ye. Wa gu i apehe rogo gu kekeapai naadu mbata fu gere, Yekova amangisunge na Yoane gbiati Yesu Kristo i yugupai fu aboro tipa wai duhe na nyanyakipaha tipa ka saberã.​—Mt. 3:1, 2; 4:17.

¹² Ho Yesu adu ni auru kpotosende, ko ayugupai fu aboro tipa wai du Bako na bakere nyemu ka mbupai furani ho ani amanga ingapai  ni. Gene sa ko amangi gipai re ngbaha nga ni gumba ko wene pangbanga tipa bagude na wiriko. Gu paranga re adiberã ka guari kporo ki ndu ku rogo kura ba na kini mangi kere gbegberẽ apai. Ono tifuo bete regbo, “ko amakia pa tiko” na ki karagatiko ku kporo yo. Ginipai bako amangihe? Yesu ape gupai nga, ho gu gude re adu ni “tuturũ, bako ki bi ko, nungako ki nimangi ko, ko ki oro, ki ti ku goko yo, ki dungo ko gbe.” Gu paranga re aabingo ho nga bako nika mbupai fuko te. Sidu, ko asanahe singia ko rengbe ka mangasunge ni moyambu fu bako. Ono bako aima du na bakere nyemu ka mbupai fuko. Ko aya tipa ko “gi wire re” na ko ki di ko. Ba gu paranga re aya: “Ko adu ni ngbuongbuo ko, mi ki bi ko berewe.” (Rk. 15:11-32) Ho Yesu araki ni ngbangbaturũ yo, ko aima bi wai bara dunguhe Bako adu na nunga na ki ipi tipa ka mbupai fu agu aboro nasa gayo berã. Gi pangbanga nga gu Yesu apehe furani re nipa wasa nzunzu na si kini yugu wai du gu Barani nga Yekova na inapai!

13-14. Ginipai gu mokedi nangia Petero awirikihe tipa mbupai, na ginipai ko ayuguhe fu kura aboro tipaha? (Oni bi sura a.)

¹³ Gu mokedi nangia Petero awiriki nyanyakipa apai be Yesu nibipa wai Yekova ambupai fu agu aboro nasaberã yo. Petero amangi dungu aingahe, na Yesu aima du na bakere nyemu ka mbupai fuko. Ni kpiapai, tifuo Petero oro rimo gako Gbia bara biata, ko adu na bakere gberãrago tipa gupai ko amangihe re. (Mt. 26:34, 35, 69-75) Ono ho Yesu azingi ni be kpio, ko agbia Petero ho ko adu ni nisako tipa ka fura na ko. (Rk. 24:33, 34; 1 Kor. 15:3-5) Yesu aima ino gupai nga Petero aima sa gako berã na ko kini idi ka kido Petero na gupai nga ko ima mbupai fuko.

¹⁴ Petero aima rugatiko na pa wai duhe tipa ka saberã na i ki mbupai fu boro. Sidu, ko ayugu gupai fu kura aboro nga gu ko awirikihe. Tifuo bete aregbo fuo gu pumbo nangia ga Pendekote, Petero asaki gupai fu gu badungu  aYudo naadu ho nga i aimi Masiya. Wa si avura du wo, ko angarasi yo ni nyemuse nga: “Oni zúngadi tironi bambiko gere ki sa tironi berewe, i gbandaka gaoni ingaapai, zereda ye yo du Gbia ni.” (Amo. 3:14, 15, 17, 19) Petero ayugu gupai nga boro ingapai namanga saberã ni mbu ni gani ingapai. Gipai re nayugo gupai nga ni nambu gani iraira aberã, ki mbu manga gupai du ni gbegberẽhe, na ki tona manga gupai nafu ngbarago fu Mbori. Gu mokedi re ayugu gupai fuyo a nga Yekova nika mbupai fuyo. Si ki du wa ka i ya ko di agu aSingapai re kusayo dunduko, na si aamanganga te. Na fuo dungu agarã kusa, Petero akido aKristano na gupai nga: “Gbia . . . du na gbanga hipai fu roni, ko akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (2 Pet. 3:9) Ho ani asaberã rani ni ti gaani aingapai, ka si vura du vurũ nga si ni kere ingaapai, si ni pa wasa ka ino gupai nga Yekova nambupai furani ti ni dunduko!

15-16. (a) Waigu gu mokedi nangia Pauro awirikipai tipa mbupai? (1 Timoteo 1:12-15) (b) Ginipai ani nika sakapai tipaha rogo gu kekeapai ngbefuo gere?

¹⁵ Pauro nangia boro Taruseu aima manga dungu gbegberẽ apai. Ko anaarungosi apefuo Kristo. Si nawiraha wa dungu aKristano naberẽ gupai nga ko asanga berãko rogo gako raka yo te. Ono Yesu aima ino gupai nga Pauro ima rengba ka manga ariapai na ki saberã ko. Ko gbiati Bako aima bi wene asino ku rogo Pauro yo. Yesu aya: “Mi kpara ko, ko ndu na rimore ku barangba aGendiria na abakindo.” (Amo. 9:15) Zavura Yesu amangisunge na iiriwoapai tipa ka sa Pauro ko saberã ko. (Amo. 7:58–8:3; 9:1-9, 17-20) Pauro asaberã ko na ki da ni Kristano. Yesu afu sunge fuko ko mangihe ni mokedi. Pauro anaape pa wai dedede ko anidu na bakere tambuahe nga Yekova na Yesu ayugu weneringise na inapai fuko. (Oni gedi 1 Timoteo 1:12-15.) Pauro aya: “Ga Mbori weneringise nangbe foro mbata yo sa saberã.”​—Rom. 2:4.

¹⁶ Ti kura regbo sa, Pauro agi gupai nga gu dungurati naadu Korinda yo ambu kumba nga gu ko naamanga wasiwasi kodaba ko nye rogo dungurati. Ginipai Pauro apehe fuyo i mangihe? Ti gupai Pauro apehe, ani nika wirika wai Yekova ayugo nyemuse ho ko afu rugute ni fu gu gako amoyambu na kini yugu inapai fuyo ho i asaberã yo ni. Na ani nika wirika wai rengbe ani ka wirika ko. Rogo gu kekeapai ngbefuo gere, ani nika sakapai tipa ginipai namangi rogo gu dungurati naadu Korinda yo.