Gu mokedi nangia Pauro ake gupai fu agu aKristano naadu Tesaronike yo nga: “Ka ngia gu boro agia nga sangbarani ti gi keke waraga re ya, oni bí nga gu boro re.” (2 Tesa. 3:14) Mbata kusayo, ani ape gupai nga gipai re angia rugapai fu abaakumba. Mbata kusayo, abaakumba anirengbe ka manga gumbapai nga ga zahe fu dungurati ka si du nga boro anidu ho rogo gu dungurati re nanaandu kumbatayo kindi kaa basa gu rugute du rogo Fugo Mbori yo. Tingbafuo ho, si anaaidanga awirina naakoda tiyo kaa manga apai na ni te.

Ono tie, si naida aida na ariapai. Ono ani ima ye ka rugatirani na gupai awere nga, ga Pauro rugute aayugopa gu diaberã rengbe boro rongo dungurati ka diaha mbiko kura nduapai. Sidu, ndupai ho tipa abaakumba naamanga gumbapai nga ga zahe berewe te. Tipagine i namangi gi ariapai re ti ni? Ani bingo gupai Pauro aafura tipaha ho ko afu gu rugute re ni.

Pauro abi gupai nga kura aboro rogo dungurati ‘aata utukuru.’ Ko afu rugute fuyo riimburu Fugo Mbori ono i aima ká ka mangapai kuti ni. Ti gu kura regbo ko andu ka bi yo, ko afu gi zahe re fuyo: “Ka boro amanga nga sunge ya, ka ni ri nga he a ya.” Ono gu kura aboro aaká kindi ka manga sunge tipa si undo yo, si ki vura du vurũ nga i aduadu na rengba ka mangasunge. Na berewe, i anaarimiso ngbayo ku rogo agu apai yo nga ga kura aboro. Waigu si aaida aKristano naamangapai na agi aboro naamangapai utukuru re?​—2 Tesa. 3:6, 10-12.

Pauro ape gupai nga: “Oni bí nga gu boro re.” Gu pa-Giriki re nayugo gupai nga, oni du na bakere rubangirise na gu boro re. Pauro afu gi rugute re fu aboro dunduko rogo dungurati, angianga fu kina abaakumba sa ya. (2 Tesa. 1:1; 3:6) Sidu, ka ai Kristano bi gupai nga wirina gu duho nabasa sangba gu rugute du rogo Fugo Mbori yo, gu Kristano re ima rengba ka sia ka ‘kpara tini’ ti gu boro nata utukuru re.

Ya mo gere nayugo gupai nga si nikaa ida i naamangapai na gi boro re wakina gu boro i nakusi ni kusayo rogo dungurati? Oó, mbiko Pauro agbia gupai kuti ni nga: “Oni rúgu ni.” Sidu, aKristano ima rengba kaa koda tiyo kindi na gi boro re ba adunguratise yo na gene tungusapai yo, ono i ima rengba ka sia ka zanga kodatiyo na ni tipa agu apai du tipa gbia ngbarago. Tipagine? Pauro aya, “Zee mangi ni amanga.” Ho ani ambu kodatirani ni na wirinarani ngba gi gene re, zee ima rengba ka zio ni na gupai ni amangaha na ni ki mangi ariapai.​—2 Tesa. 3:14, 15.

Waigu rengbe aKristano areme ka mangapai kuti gi rugute re? Bambatapai nga, si naida ani inihe singia ga gu boro mangapai re nirengo ni utukuru he wa gu Pauro apehe. Ko aafuranga tipa agu aboro nga aguyo rengbe ka manga gupai sangbakpotoraniyo aidanga na ni ya ono nga gu du kina kuti gu bangua arengo nga ga Baibiri watadu andiko te. Na ko aafuranga tipa agu aboro du na agu apai i akpinyemuhe kia ti gaani te. Na ko aafuranga tipa agu aboro ba gberãrago tirani te. Ono Pauro aafura tipa agu aboro i nafu rugute fuyo rogo Fugo Mbori yo na i kini sia kindi ka basaha.

Areme, ka ani bi gu wirina nandu kindi kumbatayo kaa basa agu arugute du rogo Fugo Mbori yo, a ani nika manga diaberã ka zanga kodatirani na ni tipa agu asungo du tipa gbia ngbarago watadu ngi ambaro. Wa duhe nga gipai re nga ga boro diaberã, ani asadanga ka sakaha na agu aboro angianga gaani aborokporo ya te. Na ani nikaa kodatirani kindi na gu boro re ba adunguratise yo na ba tungusapai yo. Ho ni nika aria gani sino na gani mangaapai ni, ani ima rengba ka tona kodatirani na ni berewe tipa kuraapai.