Wa ani nikaa mbakada tirani ka manga wisigopai, ani ima rengba ka sana tirani nga, ‘Ginipai mi aida ka wirikaha?’ Ono tie, si naida ani tingidi gupai nga, wa vura duhe nga ani ima rengba ka berã gupai nga ani nika wirika kura apai, gere ayugongo gupai nga vovo apai ho Yekova aida ani wirikihe te te. Waigu rengbe ani ka degaturani kuti gupai Yekova aˈasada ka yugoho furani?

Mo mangi kparakpee tipa tatamana. Mo sana Yekova ko undo ro mo rugutiro na gupai ko aida mo wirikihe awere. (Yak. 1:5) Mo ne gupai nga kaa kido kina kuti wai mo arugu tiro na pai mbata kusayo.​—Snz. 3:5, 6.

Mo mbu gu ome du ti Fugo Mbori si mangipai rogo gamo raka yo. “Gu pai nga ga Mbori du na unga.” (Eb. 4:12) Sidu, ai gu regbo ani ageda Baibiri, si ima rengba ka yugo vovo pai furani na ki undo rani ngba agene ni bakiakia rogo gaani raka yo. Ono gipai re rengbe ka manga kina gu ka ani ini gupai nga si naida ani wiriki gupai Mbori ayugoho furani.

Mo du na tambuahe tipa agu ahe dunduko Yekova amangasunge na ni tipa ka yugopai furani. Gako ariahe nga ga toro wakina “agu ariahe du na kina ku nzeme ti ni.” (Yes. 25:6) Ka mo ne nga geda agu apai nga gu mo aberãha nga mo agbianga ngbarago ti wisigoho ya te. Mo nika mbu Mbori ko undo ro mo da ni wene boro, na mo nika gbia bakere ngbarago ti wisigopai!