1-2. Tipagine Yekova akusi rani ti ni na gupai nga ani du na ngbarago ho ani agamahe ni fu aboro?

 HO YEKOVA akusi aboro ni, ko ambakadi yo na gu tandu nga ga gbia bakere ngbarago ho i agamahe ni kisusi ho i agbia he ni. (Amo. 20:35) Ya mo gere nayugo gupai nga ani agbianga ngbarago ho boro afu gamahe ni furani te? Wo duhe te. Ani dunduko nidu adu na ngbarago ho ani ninaagbia gamahe ni. Wa vura duhe wo, ani nadu na bakere ngbarago ho ani agamahe ni fu kura aboro. Si ni wenepai nga Yekova akusi rani ngba gi gene re. Tipagine?

² Mbiko gupai nga Yekova akusi rani ngba gi gene re, ani ima rengba ka kiiso gaani ngbarago. Ani ima rengba ka kiiso gaani ngbarago ni ngera ani tipa kura amomu ka undo ngbaha. Si ni bawenepai tie nga Yekova akusi rani ngba gi gene re.​—Tam. 139:14.

3. Tipagine rengbe yo ka pe gupai ti ni tipa Yekova nga ko nga ‘Mbori ngbarago’?

³ Mbiko gupai nga Baibiri nape gupai furani nga agu aboro nafuhe fu kura aboro nga aboro ngbarago, si taata ani rugutirani na ndu gupai du Yekova ti ni nga ‘Mbori ngbarago.’ (1 Tim. 1:11) Ko nga gu bambata boro nafuhe fu aboro na boro ho nafuhe ni bakerehe kisusi Yekova te. Wakina gupai gu mokedi nangia Pauro apehe, ‘ani ni ungarani, ki nita ata, ki du kina ho rogo ko yo’ mbiko ko. (Amo. 17:28) Ni rengo, “wene gamahe dunduko, na ziazia ũgamahe dunduko” naye be Yekova.​—Yak. 1:17.

4. Ginipai nika undo rani ani gbia bakere ngbarago?

⁴ Si nawiraha wa ani dunduko ima kpinyemu ka gbia gu bakere ngbarago naye ti fuhe. Ani rengbe ka mangaha wo ni wirika ani gu sino nga ga gamahe duti Yekova. (Ef. 5:1) Wa ani nikaa wisigo gipai re, ani bingo gupai rengbe ani ka mangaha ka ani abihe wa aboro na tambuahe tipa agu apai ani amangaha fuyo te. Agi atingidapai re nika undo rani ani banda gu gaani ngbarago ani agbiaha ti gamahe na zavura ki kiisi he.

 ONI DU NI AGAMUHE WA YEKOVA

5. Gini aũborose Yekova afuhe furani?

⁵ Gini bete agene duho Yekova ayugo gu sino ngbaha nga ga gamahe? Ani bingo bete akpiapai. Yekova nafu aũborose furani. Dedede, ani ima rengba ka zanga du na bawene kiki geno ahe berani, ono tambuahe fu Yekova mbiko dungu rani kinaho duadu na agu ahe berani ani aidaha. Ni kpiapai, ko nasa gupai nga ani du na riahe, roko, gbiati gu ba ka ani aaraka rogoho. (Tam. 4:8; Mt. 6:31-33; 1 Tim. 6:6-8) Ya mo Yekova nafu agi aũborose du ani na zingo ho re furani mbiko si kuriko ni tindiro ko mangihe wo? Wa gu sa te! Tipagine tie Yekova amanga agi apai re ti ni furani?

6. Gini apai ani awirikaha rogo Matayo 6:25, 26?

⁶ Ka pepai ngba taata gene, Yekova nafu agu aũborose furani ani aidaha mbiko ko ima kpinyemu rani. Ani bingo agu afugo Yesu du rogo Matayo 6:​25, 26. (Oni gedihe.) Yesu amangisunge na agu akpiapai nga ga kusikusiahe. Yesu amangisunge na gu kpiapai nga ga azire na ki pe gupai nga: “Ami aru nga ahe te, ami ake nga ahe a te, ka ami aiga nga ahe ku rogo agbamu yo ya.” Ono tie, oni bingo gupai ko apehe fuo gure: “Baroni du ngbangbaturũ yo nariga ra.” Na Yesu ki sanahe nga: “Genoroni asusa nga genora te?” Ginipai ko aaida ka yugoho furani? Yekova nabi airisiko na nyanyakipa yo gbe kisusi anya. Ka si du nga Yekova nangera angera fuo gu zingo nga ga anya, ani ima rengba kadu na gu kido nga ko nika ngera angera fuo rani! Wakina gu baagude naberãpa gani aborokporo, Yekova nafu agu ahe fu gako aborokporo du yo na zingoho mbiko ko ima kpinyemu yo.​—Tam. 145:16; Mt. 6:32.

7. Gini kura gene sa rengbe ani ka wirika wai ngbaha Yekova agamahe fu kura aboro? (Oni bi sura a.)

⁷ Wakina Yekova, ani rengbe ka fu guhe fu kura aboro du yo na zingoho mbiko ani ima kpinyemu yo. Ni kpiapai, ya mo mo iningo pa gu wirina du na zingo riahe watadu roko? Yekova ima rengba ka mangasunge na mo mo undo ni. Aboro ini ga Yekova aboro gbe ti gupai nga i naundo akurayo niipo ho gberãngo amanga ni. Ni kpiapai, ti regbo gu ririkaza nangia Korona, awirina afu riahe, aroko, gbiati kura ahe fu agu aboro nadu na zingoho. Na dungu aboro aima fu gamahe ni bakerehe tipa gu sunge namanga rogo zegino dunduko. Si aundo awirina rogo zegino dunduko nga aguyo naadu rogo zingo mbiko gberãngo. Agu awirina re amangipai kuti agu afugo du rogo AEbere 13:16 nga gu naya: “Ka bangironi gó nga ti manga wene pai na fuka ahe ya; bambiko ngbatunga gi rũhe re, si ngba ti Mbori.”

8. Ngba gini agene ani agbia undo ti ga Yekova ome? (AFiripoio 2:13)

 ⁸ Yekova nafu ome. Yekova na ngbarago ka mangapai rogo rani yo watadu ka fu gu bakere ome du beko fu ruru airisiko. (Oni gedi AFiripoio 2:13.) Ya mo mo amangingo kparakpee tipa ome ka ká asada watadu ka hi kere rungosiro? Si rengbe kadu nga mo amangi kparakpee tipa ome ka manga agu apai mo aaida ka mangaha rogo gu uru re. Ho mo agbia karagapai ni kuti gamo kparakpee tipa ome, mo ima rengba dakuti gupai gu mokedi nangia Pauro akehe nga: “Mi rengbe na manga apai dunduko rogo gu ko nanyakasa re.”​—Frp. 4:13.

9. Gini agene duho rengbe ani ka wirika Yekova ngbaha ni manga ani sunge na gaani ome ka undo kura aboro? (Oni bi sura a.)

⁹ Ani na bakere ome berani wa Yekova te, na ka ani funga ome fu kura aboro wa gu ko amangaha te. Ono ani ima rengba ka wirika ko ni manga ani sunge na gaani ome ka undo kura aboro. Ni kpiapai, ani ima rengba ka undo sosono awirina watadu aguyo du na kaza ni ngera ani fuo kpuyo watadu ka ndu ka ngbehe fu yo. Ka si du nga agu apai du tipa rani nambu gene furani, ani ima rengba ka fu tirani ka undo na giriso Bambu Kindo na kini bandaha. Ka ani aamangasunge na gaani ome ngba agi agene re, si naundo agu aboro nairiso Yekova.

10. Waigu rengbe ani ka nyakasa kura aboro na gupai ani apehe?

¹⁰ Ka bangironi go nga ti gupai nga oni ima rengba a ka nyakasa kura aboro na afugo roni ya. Ya mo mo rengbe ka berãpa agu aboro nga aguyo rengbe ka gbia ngarasaro ka mo pe gupai fuyo nga mo na tambuahe tipa agu apai i amangaha? Ya mo mo iningo gu boro naida na wasa? Ka si du nga mo ima inopa boro, mo pehe fu gu boro re nga mo naberãpa ni aberã. Mo ima rengba ka ndu ka bi ni, ka yamba ni rogo terefuni, watadu isoke ka keda waraga, email, watadu kekeapai fu ni. Ka mo dunga na bakere bakabangirise tipa gupai mo nika pehe ya. Wiri bete afugo nga gu naye kina boro ngbaduro yo ima rengba ka du nzunzu nga gupai wirinamo aidaha tipa ka nye ni ruru ni tipa kura uru watadu kadu na wene bipai.​—Snz. 12:25; Ef. 4:29.

11. Waigu Yekova amangasunge na gako tatamana?

¹¹ Yekova nafu tatamana. Gu bawiriki nangia Yakoba aya: “Ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko, azinga nga fu boro ya.” (Yak. 1:5) Gipai re nayugo gupai nga Yekova akánga na gako tatamana kina tipa tiko te. Ko nagamaha agama kpaima fu kura aboro. Yakoba ape gupai berewe a nga ho Yekova afu tatamana ni, ko namangaha wo ka ko “azinga nga fu boro ya,” watadu “zanga bi kina gu gbegberẽpai du ti boro.” Ko aidanga gupai nga ani du na gberãrago ho ani asanako ni tipa gako ngbembatayo te. Nirengo, ko nazungodi rani nga ani gbataha.​—Snz. 2:1-6.

12. Gini amomu du berani tipa ka pe gupai fu kura aboro ani nainihe?

 ¹² Na ginipai tigaha du tipa rani? Ya mo ani rengbe ka wirika Yekova ni gama ani gaani tatamana? (Tam. 32:8) Ga Yekova aboro na dungu amomu beyo ka pe gupai i nawirikihe. Ni kpiapai, ani ni naaraba vovo aboro araba ti kura aregbo gene tungusapai yo. Abaakumba ninaaundo amoundo abaakumba ni zerangbaduse gbiati agu awirina nga akumba niima zio bapatiza tipa i wiriki wai ka manga agu asunge i afuhe fuyo rogo dungurati. Na agu aboro du na bakere inohe rogo sunge meka arago gbiati bandaha naundo agu aboro adunga na bakere inohe ya tipa i mangisunge mekaarago nga ga siokrasia.

13. Waigu rengbe ani ka wirika gu gene Yekova agama tatamana ngbaha?

¹³ Oni asadi ka wirika Yekova ho oni araba aboro ni. Yekova na bakere ngbarago ka gama gako tatamana. Ani a naida ka pe gupai ani nainihe fu agu aboro nawirikapai kindi. Ani ambunga yugopai fu kura aboro mbiko gunde nga gu boro ani araba ni re nika dia gu sunge du berani te. Ani amanganga pai kuti gu bipai a nga: ‘Boro ho naraba re te! Ni wirikihe ni ti ni’ te. Boro ho dagba ga Yekova aboro yo si aida ni berẽpai wa gu re te. Kuba gure, ani na ngbarago ka pe agu apai dunduko ani nainihe na ki mangi agu apai dunduko rengbe ani ka mangaha tipa ka raba kura aboro. (1 Tesa. 2:8) Ani naida gupai nga i “rengbe na yugo pai fu akura yo a.” (2 Tim. 2:1, 2) Ka ani dunduko aagama gaani tatamana, ani gbiati agu aboro ani agamaha fuyo nika du ni airatatamana gbe na ani dunduko kidu na bakere ngbarago.

HO SI ANGERA NI WA ABORO NA TAMBUAHE TIPA GAANI UNDO TE

14. Ginipai dungu aboro ni naamangaha ho ani ninaafu he ni fuyo?

¹⁴ Ho ani afuhe ni watadu ka mangapai fu kura aboro, gbe fu awirinarani, dedede, i naafu tambuahe furani. I ima rengba ka keda waraga tambuahe furani watadu ka yugo gayo tambuahe ngba kura gene. (Koro. 3:15) Ho i afu tambuahe ni furani, ani nadu na bakere ngbarago nga ani ima mangapai fuyo.

15. Ginipai si aida ani tingidihe ho kura aboro afunga tambuahe ni furani ya?

¹⁵ Ono ti kura aregbo, aboro ima rengba ka zanga fu tambuahe furani tipa gupai ani namangihe fuyo. Ti kura aregbo, si ima rengba kaa ngera wa kura aboro aberãnga pa agu apai dunduko ani amangihe tipa ka undo yo te, watadu i aberãnga pa bakio gu regbo, na gu ome ani amangihe tipa ka mangapai fuyo te. Ka pai mangi wa gure, waigu rengbe ani ka ne gupai nga ka zanga gaani ngbarago watadu kadu na gberãrago? Oni tingidipa agu afugo du rogo gu gaani veresi du mburu gi kekeapai re riihe, Amokedi 20:35. Gu ngbarago ani agbiaha ti gamahe arunga riipa wai boro nika mangapai te. Ani ima rengba ka gbia ngbarago ti fu gamahe ka si vura kaa ngera vurũ wa aboro afunga tambuahe furani tipaha te. Ginipai rengbe ka undo rani? Ani bingo bete agene.

16. Ginipai si aida ani moiberãrani kuti ni ho ani agamahe ni?

¹⁶ Mo moiberãro kuti wirika Yekova. Ko nafu wene ahe fu aboro singia i na tambuahe watadu i na ni te. (Mt. 5:43-48) Yekova kidohe nga ka ani mangihe a wo ‘ki nifu he fu yo ni wasa,’ watadu kini gamuhe zanga berã gupai nga ani gbia ai kurahe kubaha, gaani “mosoro adu ni bakere he.” (Rk. 6:35) Sidu, ka mo dunga na gberãrago ka si du nga aboro afunga tambuahe foro ti aregbo dunduko ya te. Mo tingidi gupai nga, Yekova nikaa fu mosoro foro ti aregbo dunduko tipa gu wenepai mo amangaha ka undo kura aboro na bambiko mo “nagama he esuesu.”​—Snz. 19:17; 2 Kor. 9:7.

17. Gini nyanyakipa ndupai duho ani aida ka gamahe ti ni fu kura aboro? (Ruka 14:12-14)

 ¹⁷ Gu kurapai rengbe ani ka mangaha tipa ka wirika Yekova ho ani agamahe ni nga ka mangapai kuti gupai Yesu apehe rogo Ruka 14:​12-14. (Oni gedihe.) Ni rengo, gbegberẽpai nga ni ka yamba boro tipa riahe watadu ka yugo wenesino fu agu aboro rengbe ka manga bangisapai wakina gure furani te. Ono na ka ani ye ka bi gupai nga dedede, ani nafuhe fu kura aboro mbiko ani na maabangirise tipa ka gbia he kubaha beyo? Rogo gi bangiriba re, si adu ni wenepai ani mangipai kuti gupai Yesu apehe. Ani ima rengba kaa gamahe fu gu boro ani naima ino gupai nga rengba be ni ka fuhe furani kubaha te. Sidu, ani nika du na ngbarago mbiko ani nawirika Yekova. Gi bangisa bipai re nika undo rani a ani banda gaani ngbarago ho aboro afunga tambuahe ni furani ya.

18. Ginipai si aidanga ani mangihe ya na tipagine?

¹⁸ Ka ani berẽnga gupai nga kura aboro nga azanga tambuahe ya. (1 Kor. 13:7) Ka si du nga kura aboro afunga tambuahe furani te, ani ima rengba ka sana tirani nga: ‘Ya mo i nzunzu nga agu aboro afunga tambuahe ya watadu bangiriyo go ago tipa ka fu tambuahe?’ Isoke, si ima rengba kadu nga kura nduapai kinaho i afunga tambuahe ti ni furani wa gu ani aaberãha ya. Gu kura aboro ima rengba kadu na bakere tambuahe ono si kidu ni kpakarakparaha fuyo tipa wai ka pehe. Zee ima rengba kaa zio yo tipa ka gbia undo ka si du gbe nga i du nanaaundo kura aboro mbata kusayo. Ono ka ani kpinyemu awirinarani nzunzu, ani aberãnga gbegberẽ pai tipa yo te na ani nikaa ndu kumbatayo kindi kaa fuhe na ngbarago.​—Ef. 4:2.

19-20. Tipagine du zerangbaduse ti ni na undo ho ani agamahe ni fu kura aboro? (Oni bi sura a.)

¹⁹ Mo du na zerangbaduse. Nibipa du ni aboro gamahe, gu tatamanatatamana bakindo nangia Soromo aya: “Mo fú bero afu fu aboro, bambiko si ayéga ayega berewe.” (Batu. 11:1) Agi afugo re nayugo gupai furani nga, ti kura aregbo, aboro ima rengba ka yugo gayo tambuahe furani tingbafuo gbanga regbo. Gere nga gupai namangi tipa kura wirina sa.

 ²⁰ Dungu agarã kusayo, dia babi adungurati ake waraga ngarasaro fu wirina nazi bapatiza ni vovo ri. Rogo gu waraga re, ri apepa wai duhe ni nyanyakipa pai tipa ka nye ni ruruse fu Yekova. Tifuo agarã wa muambe kusa, gu wirina i ake waraga fu ri re akaragapai rogo waraga nga: “Mo ainongo gipai re te, ono mi naida mo ini bakio wai nzunzu mo naundo re vuru agu agarã yo susi.” Ri andu kumbatayo ki pe gupai nga: “[Gupai mo akehe fere re] aima ngba, ono gu veresi naadu rogoho du nazi ngbadureyo, na bangire aagonga ti ni te.” a Tifuo gu wirina re sakipai tipa bete agu akpakarapai ri nagbia tiri na ni, ri aya: “Ti kura aregbo, mi naaida ka mbu apai dunduko na ki mbu du ni Dezire Yekova. Ono mi naatingida gu veresi mo akehe fere re ti aregbo dunduko na si ninaafu ome fere mi nye niruru re.” Ri agbia kurapai kuti ni nga: “Vuru agu agarã yo muambe re, pai ho undo re ni bakerehe wa gu waraga na veresi mo akehe fere re te.” Mo berẽnga pa wai dia babi adungurati adu ka gbia gi waraga re ti ngbafuo gbanga regbo! Ani ima rengba a ka gbia tambuahe tifuo gbanga regbo fuo manga ani wenepai fu boro.

21. Tipagine mo nadiberã ti ni kaa wirika gu sino Yekova nga ga gamahe?

²¹ Yekova akusi rani ani du na bakere ngbarago ho ani agamahe ni kisusi ho ani agbia he ni. Ani nadu na ngbarago ho du ani ni na rengba ka undo akuarani aidipase. Na ani nadu na ngbarago ho i afu tambuahe ni. Ono ka si vura du vurũ nga gu boro ani naundo ni gasi tambuahe watadu ni agasanga ha te, ani ima rengba kadu na ngbarago nga ani mangi gupai du ni ruruhe. Ka bangiro ya gonga ti gupai nga, ai guhe mo afuhe, “Yekova rengbe ka fu bakere he foro ki susi gure” ya. (2 Peka 25:9) Sidu, mo arengbanga ka fuhe ni bakerehe kisusi Yekova te! Na bakere ngbarago ho rengbe boro ka gbiaha kisusi gu nga Yekova fu mosoro fu ni te. Ani dinga berã adia tie kaa ndu kindi kumbatayo kaa wirika gu sino nga ga gamahe du ti gu Barani du ngbangbaturũ yo.