1-2. Ginipai nasa ga Mbori amoyambu i du na ngbarago? (Yakoba 1:22-25)

 YEKOVA na bangisa Wiriko naida ani du na ngbarago. Gu bake papara Atambuahe nake Atambuahe 119:2 aya: “Aboro maku nga agu yo naka kuti gako adezirepai, ninagbata ko na kpotoyo yo dũ.” Yesu akidohe nga: ‘Aboro maku nga agu yo ti gure, nagia ga Mbori pai, ki nika kuti ni!’​—Rk. 11:28.

² Ga Yekova amoyambu nga aboro ngbarago. Tipagine? Ani na dungu nduapai, ono gu nyakipaha anyaka gbe nga ani nageda Fugo Mbori dedede na kini mangi ome ka manga gupai ani awirikaha.​—Oni gedi Yakoba 1:22-25.

3. Waigu ani agbia undo ho ani amanga gupai ni ani agedaha rogo Fugo Mbori yo?

³ Dungu agene duho ani agbia undo ngbaha ho ani ada ni ni “amangipai.” Ndupai sa nga ani ima ino gupai nga gere nga gu nyanyakipai ka sa ngbarago ti Yekova. Ni kpiapai, ho ani amanga gupai ni ani awirikaha rogo Fugo Mbori yo, ani nasa ngbarago ti Yekova na si nasarani a ani du na ngbarago. (Batu. 12:13) Na berewe a, ho ani amangapai kuti agu arugute du rogo Fugo Mbori yo gako toro adu kugii pa kehe, ani nambakada gaani pagume dagbarani na gaani aborokporo, na agu awirinarani aidipase du rogo dungurati. Si nawiraha nga gipai re aima manga foro rogo gamo raka yo. Kurigure, ani agbianga tirani na gu dungu akpakarapai gu kura aboro agbiatiyo na ni nga aguyo amanganga pai kuti ga Yekova arugute ya te. Si wa kina gupai Bakindo Davide apehe. Tingbafuo ko fura tipa rugute, ndiko, na agu asapangbanga nga ga Yekova rogo gako bia yo, ko adigisihe na agu afugo nga: “Bakere mosoro du tipa ka kuti ni.”​—Tam. 19:7-11.

4. Tipagine adu nga ha ti ni taata tipa ka manga gupai ani agedaha rogo Fugo Mbori yo ya?

⁴ Ka pe guhe nga rengo, si naadunga taata tipa ka geda Fugo Mbori na kaa manga gupai ani agedaha rogo yo te. Wa vura  duhe nga ani na dungu apai rogo gaani raka yo, si naida ani sia gu regbo ani nikaa geda Fugo Mbori na kini wisigihe tipa wa ka ani rengbe ka giatirani na gupai Yekova aida ani mangihe. Sidu, ani fugüngo bete agu aberãpai rengbe ka undo rani ani naageda Fugo Mbori dedede. Na ani nika sakapai a tipa gupai rengbe ka undo rani tipa ani berẽ tipa gupai ani agedaha, na ki bi agu agene rengbe ani ka mangapai ngbaha kutini rogo gaani raka yo.

ONI KPARA REGBO TIPA KAA GEDA FUGO MBORI

5. Gini bete apai nasarani ka ani du nga na bakere regbo berani ya?

⁵ Ga Yekova aboro na dungu apai i amangaha. Ani nadia bakere regbo tipa ka ngerafuo gaani asunge nga ga toro. Ni kpiapai, dungu rani namangasunge tipa ka ngerafuo tirani na gaani aborokporo. (1 Tim. 5:8) Dungu aKristano nangerafuo agu agume yo du na kaza watadu aguyo gbinza. Na ani dunduko si aida ani ngerefuo kpotorani a, na gipai re nadia bakere regbo. Na kupati agi asunge du berani re, ani a na asunge berani ka mangaha rogo dungurati. Gu nyanyakipa sunge du berani nga gu si aida ami mangihe nga tungusa wene pangbanga. Na agi asunge dunduko du kuriro re, waigu rengbe mo ka gbia regbo tipa kaa geda Baibiri dedede, kini berẽkuriihe na kini mangi gupai si apehe?

6. Waigu rengbe mo ka sa geda Baibiri si du ni bambatapai rogo gamo raka yo? (Oni bi sura a.)

⁶ Geda Baibiri nga agu ‘apai ngba’ watadu gupai nyakipaha kisusi fu aKristano, sidu, si naida ani saha si du ni bambatapai rogo gaani raka yo. (Frp. 1:10) Nibipa gu boro du na maku watadu ngbarago, bambata papara atambuahe nape gupai nga: “Gani ngbarago du rogo gu rugute nga ga Yekova, ni namakia pa gako rugute uru na yuru.” (Tam. 1:1, 2) Si tie ziazia nga, si naida ani di regbo adia kaa geda Baibiri. Gini regbo du ni wenehe tipa geda Baibiri? Ani dunduko ni basasa ima rengba ka sia gu regbo ani abihe nga si ni wenehe furani. Ono gupai nyakipaha nga si naida ani sia gu regbo nika undo rani ani naageda Baibiri dedede. Wirina du rimoko nga Victor ape gupai  nga: “Mi naida kaa geda Baibiri wiso. Wa vura duhe nga, anga mi ni gu boro ni naazinga wiso te, gure nga gu regbo du kina bete apai gbua rengbe ka gbeberã re. Gu regbo re, pai ho nafuda berã re te, na mi ima rengba ka gbeberã re wenengai kuti gupai mi agedaha.” Si ima rengba kadu nga kina gi bangisapai re du a tipa ro. Mo sananga tiro nga, ‘Gini regbo nga wene regbo fere tipa ka geda Baibiri?’

MO BERẼKURII GUPAI MO AGEDAHA

7-8. Ginipai rengbe ka ká na ani ti gbia undo wenengai ti gupai ani agedaha? Oni funga kpiapai.

⁷ Ka si du nga mo sia regbo tipa kaa geda Baibiri, gu kura pai kinaho si aida mo du na rubangirise tipaha. Ya mo mo agedinga pai na fuo regbo ngbutuko ka mo atingidanga gupai mo ni gedihe ya? Ani dunduko gupai re aima manga rani. Gipai re ima rengba ka mangaha a ho ani ageda Baibiri ni. Ni kpiapai, ani ima rengba ka diaberã nga ani naida ka geda bete akapita nga ga Baibiri rogo uru sa. Gure nga wenepai. Si naida ani mangi asasa na ki mangi ome tipa ka kakutini. (1 Kor. 9:26) Ono tie, gu kura pai kinaho si aida ani mangihe susi gu nga ka geda Baibiri ka ani aida ka gbia undo ti ni.

⁸ Oni berẽnga kurii gi ringbisapai re: Kurukuru ahe naida na ime tipa ka raka. Ono ka mai na ni bakerehe vuru wiri umba regbo yo, sende ima rengba kadu dunduko nga kina ime. Ho mai ana ni ni bakerehe, si arengbanga ka rimo ti sende na kurukuru ahe ki gbia undo ti ni te. Si ni wenehe ho mai ana ni yee na ki rimi ti sende na si ki undo kurukuru ahe tipa si sono. Wakina gure a, si aidanga ani geda Baibiri ni kina boro wiri ipo na ka ani adu nga na regbo tipa ka berãkurii gupai ani agedaha ya te.​—Yak. 1:24.

9. Ginipai si aida ani mangihe ka ani bihe nga ani sonosi gu sino nga ga geda Baibiri ni kina boro ipo?

⁹ Ya mo mo abingo gupai nga ti gu kura aregbo mo nageda Baibiri ni kina boro ipo? Ginipai si aida mo mangihe? Mo zogosi tiro kaa gedaha zezeredi tipa gupai nga kadu na rengba ka berãkurii gupai mo agedaha. Si aidanga gipai re du ni kpakarakpakaraha te. Mo ima rengba ka diaberã ka dia bakere regbo ho  mo amanga wisigopai ni tipa gupai nga ka berãkurii pai. Watadu mo ima rengba ka sia ka geda kina wiri bete averesi na ki di regbo tipa ka berãkurii gupai mo nagedihe. Victor i nifura tipa ko kusayo ape gupai nga: “Mi naageda Baibiri ni wiri guruhe, kura regbo kapita sa. Bambiko wa mi naagedapai kina boro wiso, mi na rengba ka berãkurii gupai re rogo gu uru re naabaha.” Mo ima rengba ka sia bakio wai mo aida ka gedapai, ono gupai nyakipaha gbe nga si naida mo gedihe yee tipa wa ka mo du na rengba ka berẽkurii gupai mo agedaha.​—Tam. 119:97; oni bi gu sanduki nga “ Agu Asanahe Rengbe mo ka Berãkuriihe.”

10. Oni funga kpiapai tipa wai rengbe oni ka mangapai kuti gupai oni awirikaha. (1 ATesaroniko 5:17, 18)

¹⁰ Ho mo ageda averesi ni, mo berẽpa wai rengbe mo ka mangapai kutini. Wa mo nika kaa geda papara Fugo Mbori, mo sananga tiro nga, ‘Waigu rengbe mi ka mangasunge na gipai re awere watadu barambeda kumbatayo?’ Tipa ka yugo gipai re na kpiapai, mo berẽnga gupai nga mo nageda 1 ATesaroniko 5:17, 18. (Oni gedihe.) Tingbafuo geda mo agu averesi du ue re, mo ima rengba ka ru na ki berẽ tipa bara wai mo naamanga kparakpee na pa wai mo naakusuko kpotoro yo. Na berewe a, mo ima rengba ka berã tipa agu apai du mo na ngbarago tipaha. Si ima rengba kadu nga mo diberã ka tambua Yekova tipa apai biata. Zavura ka mo vura dia kina wiri bete aminiti ka berãkurii agu apai mo nawirikihe rogo Baibiri yo, si nika undo ro mo gi rogo Fugo Mbori yo na ki mangi gupai si apehe. Mo berẽnga gupai nga aˈuru dunduko mo amanga gupai mo agedaha rogo Baibiri yo, vuru bete aregbo yo, mo nika da ni bawene moyambu nga ga Yekova. Ono ginipai rengbe mo ka mangaha ka si du nga dungu apai gu du kinaho si aida mo mangipai tipaha?

MO MOI AGU ASÁSÁ RENGBE MO KA DA TI NI

11. Tipagine rengbe mo ka bihe ti ni ti kura aregbo nga ome apai ima fu riro? Oni funga kpiapai.

¹¹ Ho mo ageda Baibiri ni, mo ima rengba kadu na gberãrago ti kura regbo bambiko gupai nga dungu apai duho si aida mo mangi ariapai ti ni. Ani ya nga rogo kura uru sa, gamo geda Baibiri na gu rugute rogoho nafu zahe tipa ngbe na kura aboro. (Yak. 2:1-8) Mo bi gupai nga si naida mo mangi ariapai tipa wai si aida mo namangapai na aboro, mo kini diberã ka manga agu aˈariapai re. Gere nga wenepai! Rogo gu kura girorago, mo kini gedi gu kura averesi nga gu nayugo gupai nga si ni nyanyakipa pai mo du na rubangirise tipa gupai mo apehe. (Yak. 3:1-12) Mo kini bi gupai nga ti kura aregbo mo naape agu apai nga gu adu nga ni wenehe ya, watadu gu naba gberãrago ti kura aboro. Sidu, mo kini diberã nga  mo nikaa pe agu apai nika ngarasa kura aboro ti gu regbo mo afura. Rogo kura girorago berewe, gamo geda Baibiri na agu azahe rogoyo du tipa zio bakure na zegino. (Yak. 4:4-12) Mo kini bi gupai nga si naida mo du na rubangirise tipa agu apai mo agedaha, kini bihe, na kini degeturo kutini. Rogo gu kura uru ngbefuo gure, mo ima rengba ka bihe nga si ima kpakara foro tipa mo mangi agi aˈariapai re.

12. Tipagine si aidanga rago gberẽ ti ni tiro ka si du nga gamo geda Baibiri nayugo gupai nga si naida mo mangi aˈariapai ya? (Oni bi rukutu kekeapai a.)

¹² Ka si du nga si naida mo mangi dungu aˈariapai, ka rago gberẽnga tiro ya. Rengo ngaha nga, pa bi mo gupai nga si naida mo mangi ariapai nayugo gupai nga mo na umbasitise na mo na ruru bipai. Ho du ani na umbasitise ni, ani nikaa geda Baibiri na kini gbata agu abangiriba rengbe ani ka manga aˈariapai rogoyo. a Mo tingidi gupai a nga, ukadi “gu vovo boro” nga gupai nikaa ndu andu kindi kumbatayo. (Koro. 3:10) Ginipai nika undo ro mo du kindi ni gu boro namanga gupai Fugo Mbori agumbaha?

13. Gini wene gene duho rengbe mo ka mangapai ngbaha kuti agu apai mo nawirikihe? (Oni bi sura a.)

¹³ Kuba gupai nga ka asada ka manga agu apai mo nawirikihe dunduko ti bangisa regbo sa, mo ima rengba ka asada ka manga gu sa watadu ue. (Snz. 11:2) Mo asadingo gipai re: Mo keke agu apai mo aida ka mangaha, na mo ki sia gu sa watadu ue nga gu si aida mo mangipai ti ni mbata na ki mbu gu kuraha re ka manga pai kuti ni kusa. Wari gu si aida mo tonaha ni?

14. Gini asásá rengbe mo ka tonaha na ni?

¹⁴ Mo ima rengba ka tonaha na gu sásá du  taata foro tipa ka mangaha. Watadu mo ima rengba ka sia gu bangiriba nga gu si aida mo mangi ariapai ti ni niipo. Tingbafuo mo diberã tipa gupai si aida mo mangihe, mo mangi wetekapai rogo gaani awaraga yo watadu mo ima rengba ka mangasunge na Watch Tower Publications Index watadu Research Guide for Jehovah’s Witnesses. Mo mangi kparakpee fu Yekova tipa gamo sásá na ki sanako tipa “ida pai na manga ha mbiko wene sangbako.” (Frp. 2:13) Na mo mangi gupai mo nawirikihe rogo mangimangipai yo. Ka mo mangi sonakumbatayo ti gamo bambata sásá, si nika sa ro mo du na nyemu ka mangapai tipa agu akuraha. Ho mo abihe ni nga mo adu na rengba ka manga ariapai watadu ka mbakada gamo asino nga ga aKristano, si nika ngarasaro mo namanga kura aˈariapai na si nawiraha wa si nika du foro taata tipa mo mangi kura aˈariapai.

ONI MBU FUGO MBORI ‘SI MANGI PAI ROGO RONI YO’

15. Waigu du ga Yekova aboro kia ti gu dungu aboro nageda Baibiri? (1 ATesaroniko 2:13)

¹⁵ Gu kura aboro ima geda Baibiri bara dunguhe. Ya mo i idi kuti gupai nzunzu Baibiri ayugoho? Ya mo i asadi ka raka kuti gupai Baibiri ayugoho na ki mangi agu aˈariapai si aidaha? Si nafu kina gberãrago nga, dedede karagapai ningia oó. Ono tie, gu bipai du ga Yekova aboro na ni tipa Baibiri kia! Wakina agu aKristano nadu rogo bambata sa kama agarã, ani naida na Baibiri nga “ga Mbori pai, a wo du he ni rengo.” Kurigure, ani namanga gupai rengbe omerani na ni ka mangapai kuti agu arugute nga ga Baibiri.​—Oni gedi 1 ATesaroniko 2:13.

16. Ginipai rengbe ka undo rani ani du ni amangipai kuti Fugo Mbori?

¹⁶ Dedede, si naadunga taata tipa kaa geda Fugo Mbori na kini mangipai kutini te. Ani ima rengba ka sota tipa ka gbia regbo tipa ka gedaha. Watadu ani ima rengba ka geda Baibiri niipo zanga ani berẽkurii gupai ani agedaha. Watadu iriworago ima rengba ka ti tirani tipa agu apai si aida ani mangi ariapai ti ni. Ka si vura du nga kina gini kpakarapai mo agbia tiro na ni vurũ, anga si nga gupai ka mo adianga behe ya te te. Mbiko gu undo nga ga Yekova, mo ima rengba ka diabehe. Ani dinga berã adia tipa ka dia gako undo kugume wenengai na ki zanga kadu ni agu aboro nagia pai ka ani amanganga ha ya, ono ani da ni amangipai kuti Fugo Mbori. Zanga kapa, kina wai ani nikaa ndu kumbatayo kaa geda Fugo Mbori na kini mangi gupai si apehe rogo gaani raka yo, kina wo ani nika du na ngbarago a.​—Yak. 1:25.