1. Gini sarangbanga Yesu nika mangaha barambeda?

 ANI naraka tigu regbo bakere dungu aˈariapai nika manga! Barambeda, Yesu nika sapangbanga agu aboro dunduko naraka auru kpotosende. Yesu asakipai tipa gupai nikaa ndu kuti gu sapangbanga re fu gako abawiriki ni peko sangbaanebi tipa agu apai i ka ‘ina pa gako ye ti ni,’ pa du ko ti ni, “na pa digida rago.” (Mt. 24:3) Gi sangbanebi re gu du ni kekehe rogo Matayo kapita 24 na 25 na ngbatunga gu pangbanga re gu du a rogo Marako kapita 13 na Ruka kapita 21.

2. Ginipai ani nika sakapai tipaha rogo gi kekeapai re na wai si nika undo rani?

² Yesu amangisunge na asanza biata tipa si undo rani ani mbakadi tirani na si wakina azahe furani. Gere nga agu asanza nga ga akandoro na ameme, gu ngasu adee naadu na tatamana na aguyo nangia airamungo, gbiati ataranda. Agi asanza re dunduko naundo rani tipa ani ini gupai nga Yesu nika sapangbanga aboro riimburu gupai i amangaha. Rogo gi kekeapai re, ani nika sakapai tipa agu apangbanga re na ki bi gupai rengbe ani ka wirikaha behe. Gu bambata sanza ani nika sakapai tipaha nga ga akandoro na ameme.

AKANDORO NA AMEME

3. Gini regbo Yesu nika sapangbanga aboro ti ni?

³ Rogo gu sanza yo nga ga akandoro na ameme, Yesu ape gupai nga ko nika sapangbanga aboro nibipa wai i amangipai kuti wene pangbanga na kini undo mbedimbedi awirinako. (Mt. 25:31-46) Ti regbo “bakere gberãngbi,” ko nika diaberã singia i nga akandoro watadu ameme mbata fu Aramegido. (Mt.  24:21) Kina wai babanda akandoro nakparaka akandoro ti ameme, kina wo a Yesu nika kparaka agu aboro ninaaundo mbedimbedi awirinako na aguyo naundongo yo ya.

4. Ringbisihe kuti Yesaya 11:3, 4, tipagine rengbe ani ka du na gu kido ti ni nga Yesu nika sara ngbanga aboro ni ruruhe? (Oni bi gu sura duti kpotoho a.)

⁴ Baibiri nape gupai nga wa Yesu nika sarangbanga kuba Yekova ko nika sarangbanga aboro ni ruruhe. (Oni gedi Yesaya 11:3, 4.) Ko nagbeberã ko kuti gupai i amangaha, gupai i aberãha, na gupai i apehe​—kodihe na wai i amangapai na awirinako mbedimbedi aKristano. (Mt. 12:36, 37; 25:40) Yesu nika ino agu aboro naundo mbembedi awirinako na gayo sunge. a Gu nyanyaki gene boro narengbe ka undo awirina Kristo ngbaha nga tungusapai. Agu aboro nafu gi undo re, i nika sarangbanga yo nga i ni “ruru yo” na i nika du na gu maabangirise nga ga “nyenye unga” auru kpotosende. (Mt. 25:46; Yugo. 7:16, 17) Gere nga bakere mosoro fu agu aboro nabanda gayo padu niruruse! Ni nye yo ni ruruyo ti regbo bakere gberãngbi na tingbafuoho, si nika sa gupai nga rimoyo du ni bandabandaha “rogo kitabu unga.”​—Yugo. 20:15.

5. Ginipai ani awirikaha ti gu sanza nga ga akandoro na ameme, na ada nika gbia undo ti ni?

⁵ Mo nye niruru ro. Gu ga Yesu sanza du tipa akandoro na ameme nabipa agu aboro gbe du na maabangirise ka raka auru kpotosende ane. I nayugo gayo idapase ni undo yo awirina Kristo ti sunge tungusapai na kidu ni ruruyo kini pekefuo agu arugapai naye be ruru kangara moyambu nga aguyo Yesu nasia yo i nangbembatayo. (Mt. 24:45) Ono agu aboro nga aguyo du na gu maabangirise nga ga ga ku ngbangbaturũ yo, si naida aida i moiberãyo a tipa gu zahe nga ga akandoro na ameme. Tipagine? Bambiko Yesu namaa berãko amaa kuti gayo sino mangapai, gayo bipai, na afugoyo. Si naida aida i du adu ni ruruyo. Nirengo, Yesu aima fura tipa kura asanza ue a nga gu naadu na zahe rogoyo fu mbedimbedi aKristano. Ani a nabi agi asanza re rogo Matayo kapita 25. Ani sakingo pai awere tipa gu sanza du tipa gu ngasu adee naadu na tatamana na aguyo nangia airamungo.

GU NGASU ADEE NANGIA AIRATATAMANA NA AGUYO NANGIA AIRAMUNGO

6. Waigu gu ngasu adee naadu bisue ayuguhe nga i angia airatatamana? (Matayo 25:6-10)

⁶ Rogo gu sanza yo nga ga ngasu adee, Yesu afura tipa gu ngasu adee naadu bawe nandu ka gbia badidee. (Mt. 25:1-4) I dunduko naadu namaabangirise tipa ka gasa badidee kupati pumbo diadee yo. Yesu asakipai tipa aguyo bisue nga i angia “airatatamana” na agu akurayo bisue kingia “airamungo.” Gu ngasu adee nangia airatatamana ambakaditiyo na i aangera angera kindi. Na i adu regerege tipa ka sungudo badidee a wa gu si aaidaha, ka si avura du nga ko nika da yuru gi regbo yo. Sidu, i aye na nzeme na atara tipa fu imarago fuyo rogo bitimo. Sidu, i aye na kura nzeme a tipa gupai nga ka badidee aima koyo gbe i ki mangisunge na ni. I aima mbakadatiyo tipa gayo atara naki aki kindi. (Oni gedi Matayo 25:6-10.) Ho badidee ada ni, gu ngasu adee nangia airatatamana arimi na ko ku dimo yo ku ba pumbo diadee yo. Wakina gure a, gu mbedimbedi aKristano niima yugoho nga i nga regerege ni nye yo kaa ngera angera kindi na kidu ni ruruyo dati gu regbo Yesu nika ye ka sapangbanga aboro ti ni nika gbia gayo mosoro ni ga yo fuo badidee nga Yesu ku ngbangbaturũ yo kurogo gako  Kindo. b (Yugo. 7:1-3) Na ginipai tigaha du tipa gu ngasu adee du bisue nga airamungo?

7. Ginipai namangi tipa gu ngasu adee naadu bisue nangia airamungo, na tipagine?

⁷ Gu ngasu adee nangia airamungo re aadunga wa gu ngasu adee nangia airatatamana te, i aadunga regerege ti gu regbo badidee ada te. Nzeme aima mbeda ka nyasa rogo gayo atara na i adunga na gu kura nzeme te. Ho i aini gupai ni nga badidee ima mbeda ka da, i andu ka ngbe nzeme. I aadunga ho ti gu regbo badidee aye te. Ti gu regbo re, “agu yo ki rimi na ko naasunguda ko ku pati pumbo diade; i ki kisi ngbadimo.” (Mt. 25:10) Kusa ho gu mumungo ngasu adee re ayego ni na ki idi ka rimo, badidee ape gupai fuyo nga: “Mi aina nga roni te.” (Mt. 25:11, 12) Gu ngasu adee nangia airamungo re aambakada nga tiyo tipa ka sungudo badidee tipa gbanga regbo te. Ginipai mbedimbedi aKristano awirikaha?

8-9. Ginipai rengbe mbedimbedi aKristano ka wirikaha ti gu sanza nga ga ngasu adee? (Oni bi sura a.)

⁸ Oni yuguhe nga oni ima mbakada tironi na kini ngere angera. Yesu aapenga gupai ane nga abadona nika duho ue nga ga mbedimbedi aKristano​—nga gu gu kura badona sa nika du ni mbakadimbakadi yo ka sungudo ko da ti digido gi sino raka re na aguyo nikaa mbakadanga tiyo ya te. Kuba gure, ko aasaka rogo gupai yo rengbe ka manga tipa mbedimbedi aKristano ka i anyenga ni ruruyo da ti digido gi zegino re ya. Ka i ambakada nga tiyo ya, i agbia nga gayo mosoro te. (Yo. 14:3, 4) Gipai re ima nyaka! Singia ani na gu maabangirise nga ga ga ku ngbangbaturũ yo watadu ka raka auru kpotosende ane, ani dunduko si aida ani moiberãrani kuti gu zahe du rogo gu sanza nga ga ngasu adee re. Ani dunduko si aida ani naangera angera kindi na ki mbakadi tirani kidu regerege ka hipai dati digido zegino.​—Mt. 24:13.

⁹ Tingbafuo Yesu gumba gu sanza nga ga ngasu adee ka nyakasa pa mbakadatise na kaa  ngera angera kindi, Yesu ape kura sanza berewe nga ga taranda. Gu sanza re nayugopa gupai nga ka ani du nga ni airanyomoro ya.

ATARANDA

10. Waigu agu amoyambu naadu ue ayuguhe nga i adu ni ruruyo? (Matayo 25:19-23)

¹⁰ Rogo gu sanza yo nga ga taranda, Yesu afura yo tipa agu amoyambu ue naadu ni ruruyo fu gayo bairasunge na gu ko naadunga ni ruruko ya. (Mt. 25:14-18) Agu amoyambu naadu ue re ayugu gayo padu ni ruruse ni manga yo sunge nyanyaki ka gbia kura marã kurii ga baira yo marã. Mbata fu baira yo mere ku gii ngbi yo, ko afu ataranda fuyo​—nangia bakere marã. Agu abamangisunge naadu ni ruruyo ue amangisunge nyanyaki na ki mangisunge na tatamana na gu marã re. Sangbanaha angia gine? Ho bairasunge akaraga tiko ni, i agbia marã wa bara ue kurii gu marã ko afuhe fuyo. Bairasunge atambua yo​—na i ki rimi ku ‘rogo ga bairayo ngbarago.’ (Oni gedi Matayo 25:19-23.) Ono ginipai naadu tipa gu biata moyambu? Ginipai ko amangihe na gu marã bairako afuru fuko?

11. Ginipai namangi tipa gu moyambu nangia “iranyomoro”?

¹¹ I afu taranda sa fu gu biata moyambu, ono ko angia “iranyomoro.” Bairako aaida ko mangisunge na gu taranda re na tatamana. Ono kuba gure, ko akpisidi ru kusende yo. Ho bairako ayego ni, gu moyambu re akaraga kina gu bangisa taranda i afu ru fuko re. Gu moyambu re adu nga na wene bipai te. Kuba gupai nga ko hõ mbupai be bairako tipa zanga mangasunge na gu marã i afu ru fuko, gi moyambu re aya tipa bairasunge wẽ, ko nga “nyanyaki boro.” Bairasunge aadunga na ngbarago na gi moyambu re te. Kurigure, i adi gu taranda re beko na i ki do ko kusayo kua bairako yo.​—Mt. 25:24, 26-30.

12. Ada du gu ruru amoyambu du ue re aru kubayo areme?

¹² Gu ruru amoyambu du ue re narukuba ruru mbedimbedi aKristano. Bairayo nga Yesu nayamba yo i ‘rimi ku rogo ga bairayo ngbarago.’ I nagbia gu gayo mosoro nga ga ngbangbaturũ ti regbo bambata zinga bekpio. (Mt. 25:21, 23; Yugo. 20:5b) Na kupati  gure, gu kpiapai nga ga iranyomoro moyambu nafu zahe fu mbedimbedi aKristano. Ngba gini gene?

13-14. Ginipai mbedimbedi aKristano awirikaha ti gu sanza nga ga taranda? (Oni bi sura a.)

¹³ Oni du ni agu aboro namangasunge nyanyaki. Rogo gu sanza yo nga ga taranda na gu sanza nga ga ngasu adee, Yesu aapenga gupai nga mbedimbedi aKristano nika du ni airanyomoro te. Ono kuba gure, ko aasakapai tipa gupai rengbe ka manga ka si du nga i berewe zaaza te. Ka si mangi wo, i gbianga ‘yambahe si ki da ti rengo te,’ na i idinga ha fuyo i rimi kurogo gu Kindo a nga ga ngbangbaturũ te.​—2 Pet. 1:10.

¹⁴ Gu ga Yesu asanza du tipa ngasu adee na taranda nayugoho gbaiga nga mbedimbedi aKristano dunduko si aida i mbakaditiyo kini ngere angera na kidu ni agu aboro namangasunge nyanyaki. Ya mo Yesu ape gu kura pai nga gu du ni zahe fu mbedimbedi aKristano? Ii ko aima pehe! Ani nabi gi zahe re rogo gupai yo ko apehe du ni kekehe rogo Matayo 24:40, 41 nga gu nafura tipa yangara sapangbanga nga ga mbedimbedi aKristano.

DA DU I NIKA ‘DIA NI’?

15-16. Waigu Matayo 24:40, 41 aundo mbedimbedi aKristano tipa i nangera angera kindi?

¹⁵ Mbata fu Yesu pe agu asanza du biata re, ko asakipai tipa gu yangara sapangbanga nika du tipa gu mbedimbedi aKristano i nika idanga na gayo pai ya. Ko afura tipa akumba ue naamangasunge ati yo na adee ue naasa ahe. Rogo agi akpipai re dunduko, agi akumba na adee re dunduko si angera wa i aamanga bangisa sunge, ono Yesu aya “i ki di gu ni, ki he gu ni.” (Oni gedi Matayo 24:40, 41.) Tingbafuo gure, ko ape gupai fu apefuoko nga: “Oni ngére tie, bambiko oni aina nga ni gu uru gaoni Gbia ka ye te.” (Mt. 24:42) Yesu apepai wakina gure ho ko ape gu sanza ni nga ga ngasu adee. (Mt. 25:13) Ya mo agi afugo re na ngbanya dagbaha? Si nangera wa wo duhe. Kina gu ndikidi mbedimbedi aKristano nga aguyo du ni ruruyo Yesu ‘nika dia yo,’ kurogo gako Kindo nga ga ngbangbaturũ.​—Yo. 14:3.

¹⁶ Oni nangera angera kindi. Gu mbedimbedi aKristano nikaa nyenga kaa ngera angera kindi rogo toro yo ya, i adianga yo ku ngbangbaturũ yo na “siasia aboro” te. (Mt. 24:31) Gipai re nabi ga Mbori aboro abi dunduko zanga bipa gu maabangirise du yo na ni, si naida i naabi afugo Yesu ni zahe ki nye kaa ngera angera kindi na ki nye ni ruruyo.

17. Tipagine si aidanga rago gberẽ tirani ti ni ka Yekova sia aboro ni mbedimbedi aKristano ti gaani regbo re ya?

¹⁷ Ani ima ino Yekova wenengai na ani nakido nga gupai ko amangaha ni ruruhe. Ani abakanga bangirani ka Yekova sia ka mbeda boro ni mbedimbedi Kristano ti gi gaani regbo re te. c Ani natingida gupai Yesu apehe tipa agu abamangisunge naye saa bisue nyemu rogo gako kpiapai du tipa ati bakakue. (Mt. 20:1-16) Agu aboro i ayambu yo tipa i ye ka mangasunge ati bakakue yo nyemu agbia kina gu bangisa marã agu aboro natona mangasunge wiso agbiaha. Wakina gure a, zanga bipa gu regbo i asia mbedimbedi aKristano ti ni, i nika gbia gayo mosoro nga ga ga ku ngbangbaturũ yo ka i nye ni ruruyo.

ONI MANGIPAI KUTI AZAHE

18-19. Gini apai ani nawirikihe rogo agi asanza re?

¹⁸ Ginipai ani nawirikihe? Tipa agu aboro du na maabangirise tipa ka raka nyeanye kindi auru kpotosende ane, gu sanza du tipa akandoro na ameme nayugo gupai nga si naida i nye ni ruruyo fu Yekova​—awere na ti regbo gu bakere gberãngbi nika ye kumbatayo. Kumbatayo,  Yesu nika sapangbanga ruru aboro nga i ima re tipa ka gbia “nyenye unga.”​—Mt. 25:46.

¹⁹ Ani fugupai a tipa asanza ue du na azahe rogoyo fu mbembedi aKristano. Rogo ga Yesu sanza nga ga gu ngasu adee naadu na tatamana na aguyo ni airamungo, aguyo bisue angia airatatamana. I aima mbakada tiyo na kini ngere angera kindi, na kidu regerege tipa ka sungudo badidee dakuti gu regbo ko aye ti ni. Ono tie, gu ngasu adee nangia airamungo re aambakada nga tiyo te. Sidu, badidee aaidanga ha fuyo i rimi ku ba pumbo diadee yo te. Si naida ani mbakadi tirani a ka sungudo Yesu ka si vura dia gbanga regbo wai vurũ da ti gu regbo ko nika digiso gi sino raka re ti ni. Na berewe a, rogo gu ga Yesu sanza naadu tipa ataranda, gu ruru amoyambu naadu ue angia wene amangisunge. I amangisunge nyanyaki fu baira yo na ko ki idi na yo. Ono tie, gu moyambu nangia iranyomoro, baira ko aidanga na ko te. Ginipai ani awirikaha? Si naida ani naamanga ga Yekova sunge amanga kindi dakuti gi digido zegino re. Niyangaraha, ani sakipai tipa wai si aida mbedimbedi aKristano nye kaa ngera angera kindi tipa gupai nga Yesu nika ‘dia yo’ kurogo gayo mosoro nga ga ngbangbaturũ. I nangera kumbatayo na nyemuhe i ‘dungura yo’ ku ngbangbaturũ yo fuo Yesu. Tingbafuo gu vura nga Aramegido, i nika dia yo ku ngbangbaturũ ni adia wiri Kandoro.​—2 Tesa. 2:1; Yugo. 19:9.

20. Ginipai Yekova nika mangaha fu agu aboro nadegatuyo kuti gako azahe?

²⁰ Wa vura duhe nga regbo sapangbanga nambeda ni kina boro ipo, ndupai ho si aida ani gunde ti ni te. Ka ani nye ni ruru rani, gu Barani du ngbangbaturũ yo nika fu “gu bakere tandu susi” furani tipa “ka bata . . . ki ru barangba Wiri boro.” (2 Kor. 4:7; Rk. 21:36) Singia ani na gu maabangirise nga ga ga ku ngbangbaturũ yo watadu ka raka auru kpotosende ane, ani nika sa ngbarago ti Barani ka ani mangipai kuti agu azahe du rogo agu asanza yo Yesu apehe. Bambiko wadu Yekova na weneringise, rimo rani nika du “rogo kitabu unga yo.”​—Dan. 12:1; Yugo. 3:5.