Ndupai ho tipa ani berẽ gupai nga mbiko agu abawiriki naadu 70 adunga na Yesu pati Ga Gbia Riahe te, gure nga i aanyenga na ko te watadu i aima mbuko te. Gupai Yesu aaidaha gbua nga kadu na gako amokedi ti gu regbo re.

Aguyo naadu 12 na aguyo naadu 70 adu dunduko nga ga Yesu abawiriki. Gu bambata aboro Yesu asia yo dagba gako abawiriki yo angia akumba 12, nga aguyo ko ayambu yo nga amokedi. (Rk. 6:12-16) Ko adu Gariraya yo ho ko ayambu “agu yo nanidu bawe na ue” ni na ‘ki kedi yo i ndu ka tungusa pa ga Mbori ngbi, na ka husa agu yo du na kaza.’ (Rk. 9:1-6) Kusa, ho Yesu andu ni ku Yuda yo, ko “ki sia akura yo 70, ki kedi yo ni ba ue ue.” (Rk. 9:51; 10:1) Sidu, Yesu adu na abawiriki rogo aba ni bakiakia nga aguyo naatungusapai tipa ko.

Si nawiraha wa agu aYudo naada ni ga Yesu abawiriki anaamanga Pumbo Susiri amanga kina sa na gayo aborokporo. (Gate 12:6-11, 17-20) Ngbutuko mbata fu Yesu kpi, ko gbiati gako abawiriki andu ku Yerusarema yo. Ono ko aasananga gu gako abawiriki dunduko naadu Yuda yo, Gariraya yo, na Pera yo tipa i ye i mangi Pumbo Susiri kina sa te. Si tie ziazia nga, Yesu aaida kadu na kina amokedi ti gi regbo re. Ko ape gupai fuyo nga: “Mi akpi nyemu ka ri pumbo susiri na oni ni bakere nyemu he mbata mi nikahi pai.”​—Rk. 22:15.

Wene ndupai adu kina beko ko amangihe ti ni wo. Si adu nga Yesu nika kpi ngbutuko ni “gu Wiri kandoro nga ga Mbori ru, nadia gu ingapai nga ga zegino ku sa yo.” (Yo. 1:29) Na si adu nga ko nika kpi Yerusarema yo, nga gu ba i aima digo ni fu amotumo rogoho fu Mbori. Pumbo Susiri nga ga wiri kandoro aatingida aYisaraere na gupai nga Yekova aima batasa yo ki kusiyo Ezipeta yo. Ono mbiko ga Yesu motumo tumorii, si adu nga ko nika manga bakere apai kisusi gure. Ko nika batasa aboro dunduko be ingapai na kpio! (1 Kor. 5:7, 8) Si adu nga mbiko ga Yesu motumo, agu amokedi naadu bawe na ue re nika da ni papara mburu gu dungurati nga ga aKristano. (Ef. 2:20-22) Gu kurapai berewe nga, gu ziazia gbata nga Yerusarema adu “na mburuhe bawe na ue” nga gu nadu “na rimo bawe na ue nga ga agu amokedi bawe na ue nga ga Wiri Kandoro yo.” (Yugo. 21:10-14) Sidu, gu ruru amokedi re adu na nyanyakipa papara pai beyo rogo ga Mbori ringbisapai yo. Sidu tie, ani ima rengba ka rugatirani na ndu gupai Yesu aaida gupai ti ni nga ka manga yangara Pumbo Susiri na yo na tipa gupai nangbefuo ho nibasa nga​—Ga Gbia Riahe.

Agu abawiriki naadu 70 gbiati agu akurayo aadunga pati gu riahe re na Yesu te. Wa vura duhe wo, si adu nga agu abawiriki dunduko nayugu pa gayo du ni ruruse nika gbia undo agbia ti gupai Yesu asigiraha​—du nga, Ga Gbia Riahe. Si adu nga, agu abawiriki re dunduko nga aguyo naye kada ni mbedimbedi aKristano kusa nika rimo ku rogo vovo mokido nga ga Kindo, nga gu Yesu apepa ha fu amokedi rogo gu yuru re.​—Rk. 22:29, 30.