Ya mo mo naida ka wirika dungu apai ti gamo wisigopai nisase? Agi aberãpai re ima rengba ka undo ro tipa mo moiberã ro wenengai ho mo amanga wisigopai ni:

• Mo sia gu ba du ni wenehe. Mo asadi ka gbia gu ba du ni gigirihe na du na imarago rogoho tipa wa ka mo aagedapai wenengai. Mo ima rengba ka sungo rii gbanga basungo watadu pati mbisa, watadu mo ima rengba ka sia wene ba zagi a.

• Mo sia gu ba rengbe mo kadu ni saro rogoho. Yesu asia ka manga kparakpee “pamanangba wiso” “ngbakungba” yo. (Mk. 1:35) Ka si dunga gene ho tipa mo du nisa ro te, sidu, si naida gamo aborokporo watadu agu aboro mo araka na yo ini gu regbo mo andu ka manga gamo wisigopai ti ni na mo sana yo ka i yengo fuoro ti gu regbo re na dungu apai ya.

• Mo namaaberã ro wenengai. Mo ne agu apai rengbe ka gbe berã ro kusayo. Ka mo aamangasunge na gamo terefuni watadu taburet tipa ka manga wisigopai, mo moihe ti gu woroho si nikaa payanga ti ni ya watadu mo asadi ka mangasunge na gu nga ga giritue tipa ka ne agu apai rengbe ka gbe berã ro. Na ka si du nga mo tingidipa pai si aida mo mangihe ho mo amanga gamo wisigopai ni, mo kehe sande tipa ka bangiro gonga ya, na tifuo gure, mo kisusi kumbatayo na gamo wisigopai. Ka si du nga si ima kpakara foro ka maaberã ro fuo pai, mo di wiri guru ongoda ka ndu tooni watadu ka taya rogo ro yo.