Ya mo si ni kpakarakpakaraha foro tipa mo naawisigo Baibiri rogo aposo yo dunduko? Ya mo mo naabihe ti kura aregbo nga mo agbianga ngbarago ti wisigo Baibiri te? Si nawiraha wa ani dunduko nidu adu wo ti kura aregbo. Ono mo berẽnga pa agu apai ani ni naamangaha ti aregbo dunduko, wa gu nga mbida ime. Si naida aida na regbo gbiati ome tipa ka mbida ime, ono ani nidu wenengai tifuo ani mbidi he! Wisigo Baibiri ima rengba a ka sarani ani du wenengai. (Ef. 5:26) Ani bingo agu aberãpai rengbe ka undo:

• Mo sia regbo. Ani ima ino gupai nga wisigo Baibiri nisase du dagba “agu apai du na nyanyakipa ha” si aidanga aKristano naabihe na paha taata ya. (Frp. 1:10, NW) Tipa ka undo ro ka bangiro go nga ti regbo gamo wisigopai ya, mo ke uru na saa ti kpewaraga na ki moihe rogo gu ba rengbehe arengba kadu taata foro tipa mo bihe. Mo moi guhe rogo gamo terefuni nga gu nika tingida ro na pa gamo wisigopai mbata fu regboho da.

• Mo berẽpa gupai nika undo ro mo gbeberã ro sa gamo wisigopai. Waigu mo nakpinyemu kaa manga gamo wisigopai? Ni kpiapai, ya mo si taata foro mo moiberãro kuti pai ho mo awisigopai ni tipa saa sa? Watadu ya mo mo naakpinyemu kaa wisigopai tipa bete regbo ono kini mangihe dedede? Mo ima ino gupai nika du ni wenehe foro. Sidu, mo mangi mbakadapai tipa gamo regbo wisigopai na gipai re berãro yo. Ka si du nga mo na kina nyomoro ho regbo wisigopai nada ni, tipagine ka mo aadianga regbo ti ni ka wisigopai tipa aminiti bawe ya? Ka mo vura wisigopai tipa kina aminiti bawe, mo ima rengba ka wirika dungu apai. Na isoke tifuo aminiti bawe, mo ima rengba ka gbia bakere ngbarago ti ni mo ki idi ka ndu kumbatayo kindi ka wisigoho tipa wiri gbanga regbo.​—Frp. 2:13.

• Mo diberã tipa gupai mo nika wisigopai tipaha mbata fu regbo. Ka si du nga mo ima sungo tipa ka wisigopai na mo kini bakabangiro tipa gupai si aida mo wisigihe, gu re nga mo ‘abanda nga gamo saa tipa manga apai’ te. (Ef. 5:16) Mo asadi ka ke bete agu apai sande mo aida ka manga wisigopai tipaha. Ti ai gu regbo sanahe aye ku berãyo, mo kehe ku sande. Na ti digido gamo wisigopai dunduko, mo ima rengba ka ke kura aberãpai kusande nga gu mo akpinyemu ka wisigopai tipa ha.

• Mo mangi aˈariapai ho si narẽarẽ ni. Mo asadi ka manga ariapai ti gamo regbo, wa ngbatunga gu nga gu bagizo regbo mo adiaha tipa ka wisigopai watadu gu rii-apai mo asiaha. Gupai nyakipaha gbe nga, mo namanga wisigopai na aposo dunduko. Tipa ka sa gipai re si mangi, ka rengba du, mo ima rengba ka manga ariapai ti gu uru na gu regbo mo amanga wisigopai ti ni, gu bagizo regbo mo adiaha kuti wisigopai, watadu agu rii-apai mo awisigoho.

Ka ani awisigopai na aposo dunduko, wene apai nika manga amanga furani. Ani nika mbeda gbe na Yekova, ani nika wirika wai ka mangapai ni tatamana, na ani nika gbia ngarasaro.​—Yos. 1:8.