Agu awirina nadu Betere yo amangisunge tipa he naima susa garã sa tipa ka me gu ba radio nangia WBBR rogo gu ba nga Staten Island, New York City yo. Ni bambataha, i agirisi rago na ki dua bakere bambu fu abamangisunge na ki dua kura bambu tipa aũsunge. Ho gi sunge re anyasi ni, awirina atona ka dungura agu aũ-sunge si aaidaha tipa ka tona fura rogo radio. Ono tie, badungu akpakarapai adu kinaho si aaida i mangipai kuti ni.

Si aima kpakara nikerehe ka maa gu ngua radio nasa gupai nga aboro ni gipai rogo radio. Si aaida i moi gu ngua radio bagizoho adu nga ametere 91 (basonaha ki ngia 300) re bangbanda angua ue nga gu bagizoho adu nga ametere 61 (basonaha ki ngia 200). I aadunga na diabese ti gu bambata regbo i aˈasadihe te. Ni yangadaha, I adu na diabese mbiko i akido kuti ga Yekova undo. Gu bakere bayugupai nga Calvin namangi gu sunge re aya: “Ka ani adu na diabese ti gu bambata regbo ani aasadi ka maa gu ngua radio re ti ni kuari yo, ka rukö aima zio rani!” Awirina afu tambuahe fu kina Yekova tipa gu diabese i adu na ni, ono kura kpakarapai adu kinaho berewe.

Gupai nga ga fugo rogo radio adu ni vovopai, na si aadunga ni taatapai ka ngbeka agu ahe si aaidaha te. Ono tie, awirina abi agu aũsunge i aima mangasunge na ni nadu kina mbembedi nga gu boro amehe. Kuba gupai nga i ngbe makorofoni, i amangisunge na gu nadu rogo terefuni. Rogo kura yuru sa rogo Wegebe, awirina adiberã ka asada gi taata ũsunge re dunduko. Si aaida mbakadapai duho tipa i gumbaha rogo radio, sidu, awirina abi agu abia nga ga Kindo. Boro sa dagba agi awirina re nga, Ernest Lowe nasakapai tipa wai gu pangbanga re amangi ni  gu uru re. Ko aya ho i aabi bia ni, Rutherford b i aayambako nga Basapungba, ayambuyo nga gu ko nagi fugoyo na bia rogo gako radio Brooklyn yo, nga gu baturõho adu nga akirometere 25 (amairo 15).

Wiriba Rutherford aya, “Oni mbu bibia na fugoroni kuari. Si wa ka aboro aataka kina ngbayo!” Wiri zee aima zio agu awirina re na i ki mbu bibia rogo radio nibasa, na i aima ino gupai nga radio namangasunge amanga wenengai na i aima du regerege ka tona fugo rogoho.

Rogo Wegebe 24, 1924, ti bambata gu regbo i afura rogo radio, Wiriba Rutherford ape gupai nga i nikaa mangasunge na gu ba radio re tipa ka manga gu sunge Kristo nga Bakindo nafuhe fuyo tipa i mangihe. Ko ape gupai nga, ndu gupai i ambakadi gu ba radio re ti ni nga “ka undo aboro dunduko i rugutiyo na Ziazia Kekeapai na i rugutiyo na pa nyakapa gu regbo ani araka ti ni.”

Gu bambata fugo rogo radio re aima du ni bawenehe. I amangisunge na gi ba radio re tipa agarã 33 tipa kaa manga gu mbakadapai rogoho nga ga ga Yekova aboro.

Rogo Bamburu 1924, aBawiriki Ziazia Kekeapai adunguratiyo tipa bakere dunguratise ku Columbus yo, Ohio yo. ABawiriki Ziazia Kekeapai aye rogo arago dunduko, na i aagia agumbapai rogo pa-Arabi, pa-Ngirisi, Faransée, pa-Germani, pa-Giriki, pa aboro Hungary, pa-Tiriani, pa aboro Lithuania, pa aboro Poland, pa aboro Russia, pa aboro Scandinavia, na pa aboro Ukraine. Aboro aima rengba ka degatuyo kuti bete agumbapai rogo radio, na awirina asana agu aboro ninaakeka apangbanga nadu kina rogo gu dagbarago re tipa i naakeka agu ambakadapai nadu tipa bakere dungurati rogo aˈuru nibasasa.

Rago Biama, rogo Bamburu 24, awirina bangeyo aima susa 5,000 andu ka tungusapai rogo gu gbata bakere dunguratise aamanga rogoho re. I akparaka abuku naima mbeda kuti 30,000 na i atona wirika Baibiri na akutu aboro. Ngbaõbambu Sinziri apepa gi uru re nga si angia “bawene papara bakere dunguratise.”

Rago Bisue rogo Bamburu 25, ti regbo gumbapai sa dagba ga Wiriba Rutherford agumbapai yo, ko agedi waraga na wingbaduse nga gu naabisirapa abarumbatayo rogo pambori. Ko ape gupai nga aboro-birĩ-zogarago, aboro pambori, gbiati agu aboro nangbembatayo rogo sunge bagaahe naká na aboro tipa ka i wirikinga agu arengo du tipa ga Mbori Kindo ya nga gu Mbori nika mangasunge na ni tipa  ka fu maku fu aboro. Ko ape gupai berewe a nga agi aboro re nga aira ingahe bambiko i nasongoda gu kodatise nga ga aringara kini pe gupai nga si nga gu gene Mbori azoga kpotosende ngbaha. Si aaida aBawiriki Ziazia Kekeapai du na wingbaduse tipa ka tungusapa gi pangbanga re fu aboro.

Kusa, kekeapai rogo Ngbaõbambu Sinziri ape gupai nga gu bakere dunguratise namangi Columbus yo re anyakasi gu idapase nangia ga gi badona awirina nadu zaaza re. Si afu wingbaduse fuyo tipa i tungusipai asogote ki vura du vurũ. Leo Claus, nga guko nadu kina pati gu bakere dunguratise re natingida gupai nga: “Tifuo bakere dunguratise, ani adu na ngbarago tipa ka tungusa gu pangbanga re rogo gaani dagbarago.”

Rogo Tanvuo, aBawiriki Ziazia Kekeapai atona ka kparaka amirioni atrakte nga gu nadu na gu pangbanga rogoyo Wiriba Rutherford agedihe tipa ka bisirapa abarumbatayo rogo pambori. Rogo tooni gbata du Oklahoma yo, Amerika yo, Frank Johnson anyasi kparaka atrakte na si aaida ko sungudi tipa aminiti 20 tipa awirina ye ka gbiako. Si aadunga ni pa bandahe fuko tipa ko sungu rogo gu ba i aima rengba ka biko rogo taata te bambiko agu akumba nadu rogo gu gbata re adu na zinga na gu sunge tungusapai ko aamangaha na i aagbata ko agbata. Wiriba Johnson adiberã tipa ka gbu rogo gu kanisa nadu ho mbembedi. Aboro aadunga kanisa yo te, sidu, ko ambu atrakte rii agu aBaibiri i naatungusapai na ni kanisa yo, na rii abasungo dunduko. Ko amangi gipai re ni kina boro wiri ipo. Sidu, wa regbo adu kindi beko ko amangi kina gu bangisapai re rogo akanisa ue.

Frank akaraga tiko ku rogo gu ba si aaida ko gbia awirina rogoho. Ko agbu gii babaga ime we kini bi agu aboro naagbata ko. Agu akumba re aye ku rogo gu ba re, ono i aabingo ko te. Tingbafuo agi akumba re ndu ni basa, gu kura awirina naamanga dezirepai kina mbembedi ho aye ka dia ko na i dunduko ki gasi ko.

Wirina sa dagba agu awirina re ape gupai nga, “Wa ani naakura kusayo rogo gu dagbarago re, ani nisusi pati agu akanisa biata re, bange aboro nidu wa 50 niru barangba agu akanisa re nibasasa. Gu kura aboro ninaageda agu atrakte re, na agu akurayo ki zadihe beyo kini yuguhe fu pasita. Sidu, ani niguari yo kina boro ti wene regbo tipa ka ne akpakarapai! Na ani natambua Yekova gaani Mbori tipa undoko rani ani ini gupai si aida ani mangihe tipa wa ka ani tungusipai ka i aziongo rani ya.”

ABawiriki Ziazia Kekeapai rogo kura aringara a atungusipai na wingbaduse. France nodiyo, Józef Krett atungusipai fu agu abamangisunge ninaageteka adahabu naye Poland yo. Si aaida ko mangi gu gumbapai riihe adu nga “Regbo Zingisa Kangba Aboro be Kpio Ima Mbeda ka Da.” Ho awirina aafu awaraga yambahe ni fu aboro rogo gu gbata re, bavugahe rogo gu dagbarago re afu zahe fu gako aboro kanisa tipa ka i ndunga ya. Gako zahe akusi kura sangbanapai kia. Aboro bangeyo aima susa 5,000 naye kupati gu gumbapai re kodihe na gu bavugahe re a! Wiriba Krett asana gu bavugahe re tipa ko ye ka songodapai ku bara gako aida yo, ono ko aima ká. Tingbafuo Wiriba Krett mangi gako gumbapai, ko akparaka agu awaraga dunduko nadu beko fu aboro bambiko i aaida aida nzunzu ka inopai tipa Fugo Mbori.​—Amosa 8:11.

Claude Brown andu ku Afirika yo, ku rogo gu gbata du awere nga Ghana ka tungusa wene pangbanga yo. Agu agumbapai ko amangihe yo gbiati agu awaraga ko akparaka ha aundo ka gbaraga rengo niipo rogo gu gbata re. John Blankson, nga gu ko naawirikapai kada ni wene bainipai tipa baga adawa, adu pati gumbapai sa dagba agu agumbapai Wiriba Brown aamangaha. Ko aini gupai ni wiri ipo nga ko ima gbia rengo. John aya: “Rengo asa re mi  du na ngbarago, na mi kini fura tipaha fu dungu aboro rogo gaani sukuru nga ga wirikapai tipa baga adawa.”

John aima wirika gupai nga Baibiri ayugongo gupai nga Mbori nga Tirinita te. Sidu, rogo kura uru sa, ko andu ku kanisa yo tipa ka sana bavugahe tipa gupai re. Gu bavugahe re ado ko kusayo ki tangba ko nga: “Kristano nga mo te; mo nga ga Bakitingbanga boro. Mo guari kusayo ane!”

Ho John ada ni kporo yo, ko ake waraga fu gu bavugahe re ki sanako tipa i gbia tiyo rogo gu ba du gbaiga tipa i sakipai tipa Tirinita. Gu bavugahe re aya fu John ko ndu ku rogo gu makatabu nga ga gu bayugupai kii pako gbe rogo gu sukuru re nga gu ba gu bayugupai re asanako rogoho singia ko aima kepai nzunzu fu gu bavugahe re.

John akaragapai ki ya: “Ii, bayugupai mi aima kehe.”

Gu bayugupai re afu zinahe fu John tipa ko ke waraga ka hõmbupai be gu bavugahe re. John akepai nga:

“Gimi bayugupai sana re nga mi ke waraga nga ga hõmbupai foro, na mi ima mbakada tire ka ke waraga nga ga hõmbupai foro, kina gu sa ka mo idihe nga gamo ayugopai nga ziree ayugopai.”

Kina iriwopai nati ti gu bayugupai re na ko ki sanahe nga, “Blankson, gure nga gupai mo aida ka kehe?”

“Ii bayugupai. Gure nga gupai rengbe mi ka kehe.”

“Ani ka do ro kusayo sukuru yo. Mo arengbanga ka nye rogo gi sukuru re te ka si du nga mo nikaa ndu kindi kumbatayo kaa fura wa gure fu gu bavugahe nga ga gu kanisa airangbii asongodaha te.”

“Ono bayugupai, . . . ho mo naayugopai ni furani na ho pai nidu ni ani naaruganga tirani na ni ya, ya mo ani ninaasana nga ro na asanahe te?”

“Ii, i naambu gene ambu furoni oni sanahe.”

“Sidu, bayugupai, gure du nga gupai namangi. Gi kumba re aayugopai furani rogo Baibiri yo na mi asanako na sanahe. Ka si du nga ko aadunga na rengba ka karagapai kuti gu sanahe re te, tipagine si aida mi ke waraga ti ni fuko nga ga hõmbupai?”

I aadonga Blankson sukuru yo te. Na ko aakedanga waraga hõmbupai a te.

Ngbaõbambu Sinziri afura tipa agu asunge namangi rogo gu garã re ki ya: “Ani ima rengba nzunzu ka pe kina gupai Davide apehe nga: ‘Mo aukadi re na ngarã tipa so vura.’ (Atambuahe 18:39) Gu garã re ima du nipa ngarasaro, bambiko ani ima bi wai Yekova naundo rani ti ngba gako sunge. Gako ruru amoyambu aima digo ni tungusi wene pangbanga na ngbarago.”

Kusa rogo gu garã re, awirina amangi mbakadapai tipa ka kusa gu kura ba radio berewe. I ame gu kura ba radio re Chicago yo, Amerika yo. I aayamba gi vovo ba re nga WORD, du rogoyo nga fugo bambiko i arengbe ka tungusa Fugo Mbori rogo radio. Ti gi regbo re, i amangisunge na nyanyakipa aũsunge nga gu narengbe ka sa aboro i naagia gu pangbanga nga ga Kindo tuturũ, zavura ku Canada nodiyo.

Rogo gu garã nangia 1925 Yekova aundo awirina i rugutiyo na gu wene vovo apai nadu tipa Yugoti kapita 12. Gu kura aboro ambu iriso Yekova. Ono badungu kura aboro adu na ngbarago ka rugatiyo wenengai na rogo gupai yo namangi ngbangbaturũ yo na wai gipai re arengbe kadu na sangbanaha kurii ga Mbori aboro auru kpotosende.