1. Gini bete agamahe duho Yesu nafuhe furani?

 BORO ho naundo aboro kisusi wai Yesu aundo aboro te. Ho ko adu ni auru kpotosende, ko amangisunge na gu ome nadu beko tipa ka manga iiriwoapai ka undo kura aboro. (Rk. 9:12-17) Ko afu bakere gamahe kisusi nga unga ko tipa rani. (Yo. 15:13) Natona kina ti gu regbo i azingisi Yesu, ko nandu kumbatayo kaa undo rani. Ko ima kpara fu Yekova tipa ko fu gako ziazia toro furani si yugupai na ki fu wasa furani kina wai ko akidohe tipaha. (Yo. 14:16, 17; 16:13) Na vurube gaani adunguratise, Yesu nandu kumbatayo kindi kaa fu guhe furani ani aida na ni tipa wa ka ani du na rengba ka yugopai fu aboro rogo zegino dunduko tipa Baibiri na ki sa aboro ni abawiriki.​—Mt. 28:18-20.

2. Ada du dagba agu “agamahe rogo aboro” yo i nafura tipa yo rogo AEfeso 4:7, 8?

² Gu kura gamahe kinaho Yesu niima fuhe furani. Gu mokedi nangia Pauro ake gupai nga, tingbafuo Yesu ga ku ngbangbaturũ yo, ‘ko afu agamahe rogo aboro yo.’ (Oni gedi AEfeso 4:7, 8.) Pauro asaki gupai nga, Yesu fu agi akumba re furani tipa i undo dungurati ngba dungu agene. (Ef. 1:22, 23; 4:11-13) Areme, agi ‘agamahe rogo aboro’ yo re nakoda amoundo abaakumba, abaakumba rogo dungurati, gbiati ababi adungurati. a Rengo ngaha nga agi akumba re nga kpakpa aboro, sidu, i namanga aingahe amanga. (Yak. 3:2) Ono gaani Gbia nga Yesu Kristo namangasunge na agi akumba re tipa ka undo rani, i nga agamahe beko furani.

3. Oni funga kpiapai tipa ka yugo wai rengbe ani dunduko ka songoda agu asunge agi “agamahe rogo aboro” yo re amangaha.

 ³ Yesu fu gu nyanyakipa sunge fu agi akumba re nga ga nyakasa dungurati. (Ef. 4:12) Ono ani dunduko ima rengba ka undo yo wa i amanga gi nyanyakipa sunge re. Tipa ka yugoho na kpiapai: Ani rengbe ka ringbisaha kuti me Bambu Kindo. Kura aboro name he. Agu akurayo nasongodaha nifu yo riahe, ũnduge, gbiati kura asunge. Wakina gure a, ani dunduko ima rengba ka songoda gu ome amoundo abaakumba, abaakumba, na ababi adungurati amangaha rogo gu gene ani afura na kini mangipai ngbaha. Ani sakingo pai tipa wai ani agbia undo ti gayo nyanyaki sunge na wai rengbe ani ka yugoho fuyo gbiati Yesu nga gu boro fuyo furani nga, ani na tambuahe tipa yo.

AMOUNDO ABAAKUMBA NAFU “UNDAHE”

4. Gini bete agene amoundo abaakumba aundo kura aboro ngbaha rogo bambata sakama agarã?

⁴ Rogo bambata sakama agarã, i asia kura agu awirina nga akumba ni amoundo abaakumba. (1 Tim. 3:8) Si nawiraha wa i du nangia agu aboro ‘naaundo sunge’ Pauro akepai tipa yo. (1 Kor. 12:28) Sidu, si nawiraha wa amoundo abaakumba amangisunge nyanyaki tipa ka sa abaakumba i gbeberã yo sa yugopai gbiati ngerafuo akandoro. Ni kpiapai, amoundo abaakumba aima rengba ka undo na ngeesa Baibiri na ki ngbeke agu ahe si aaidaha tipa ka saha ni badunguhe.

5. Gini bete asunge amoundo abaakumba aundo areme na ni?

⁵ Mo berẽnga pa kura nyanyakipa asunge amoundo abaakumba amangaha rogo gamo dungurati. (1 Pet. 4:10) I ima rengba ka sia yo tipa i naangerafuo gu marã nga ga dungurati watadu adagbarago nga ga tungusapai, ka sanahe tipa awaraga na ki kparakaha fu abatungusipai, ka mangasunge na aũtumba woro fugose na avidio, kaa fu ba fu aboro watadu ka undo nangerafuo Bambu Kindo. Agi asunge re dunduko na nyanyakipaha tipa gupai nga dungurati naamangasunge wenengai. (1 Kor. 14:40) Kurigure, kura amoundo abaakumba a namanga agumbapai ti regbo gu Dunguratise Nga ga Gaani Raka na Sunge gbiati manga agumbapai gbaiga. I ima rengba ka sia moundo abaakumba a ni undo ka songoda gu boro nangerakurii gu badona nga ga tungusapai. Na ti kura aregbo, bakumba ima rengba ka sana moundo abaakumba tipa i ndu na ni ka ngarasa wirina.

6. Gini bete andu apai duho du ani ti ni na bakere tambuahe tipa gu gaani moundo abaakumba namangasunge nyanyaki?

⁶ Waigu gu sunge amoundo abaakumba amangaha aundo dungurati? Wirina du rimori nga Beberly, b du Bolivia yo ape gupai nga, “Tambuahe fu amoundo abaakumba, mi nagbia ngbarago agbia ti adunguratise. Mi ima rengba ka bibia, ka fu akaragapai, ka degature kuti agumbapai, ka wirikapai rogo avidio na ti asura mbiko gu sunge i naamangaha. I naundo ka sa gupai nga agu aboro du pati dunguratise du ni bandabanda yo na i naundo agu aboro adunga na rengba ka ye tipa adunguratise ya tipa i bihe kina rogo akpuyo. Tifuo nyasa adunguratise, i nangbembatayo rogo giriso rago, undo na ngerafuo marã, na ka bihe nga ani ima gbia agu awaraga ani aidaha. Mi na bakere tambuahe fuyo!” Leslie, nga guri naraka Colombia yo na kumbari namangasunge ni bakumba ape gupai nga: “Kumbami ni naaida na gu undo nga ga moundo abaakumba. Zanga na gayo undo, ka ko naamangasunge ni kerehe, sidu, mi na bakere tambuahe tipa wai du yo zaaza na kidu na nyemu ka undo.” Ani dunduko du na bakere tambuahe tipa gupai amoundo abaakumba amangaha.​—1 Tim. 3:13.

7. Waigu rengbe ani ka yugo gaani tambuahe tipa amoundo abaakumba? (Oni bi sura a.)

⁷ Wa vura duhe nga ani ima rengba kadu na tambuahe tipa amoundo abaakumba, Baibiri  nangarasa rani nga: ‘Ani du na tambuahe.’ (Koro. 3:15) Krzysztof nga bakumba Finland yo, ninaayugo gako tambuahe ngba gi gene re, “Mi naakeda karte watadu mi naakepai na ki moi veresi ku rogoho na ki pe gupai gu moundo abaakumba re apehe watadu amangihe nangarasi re watadu ndu gupai du mi ti ni na tambuahe tipa gu sunge ni amangaha.” Pascal na Jael, nga aguyo du New Caledonia yo, ni naamanga kparakpee dedede tipa amoundo abaakumba. Pascal ape gupai nga, “Barambeda, mi aima digo ni kparikpee ni bakerehe tipa amoundo abaakumba, ni tambua Yekova tipa yo na kini sanako tipa ko du na yo na ki undo yo.” Yekova nadegatuko adega kuti ngbatunga agu akpee re, na ni sangbanaha, dungurati naabaha nagbia undo.​—2 Kor. 1:11.

ABAAKUMBA “NAMANGA NYANYAKI SUNGE DAGBA RONI YO”

8. Tipagine Pauro arengbe ka ke gupai ti ni nga agu abaakumba naadu rogo bambata kama agarã “amangasunge nyanyaki”? (1 ATesaroniko 5:12, 13)

⁸ Agu abaakumba nadu rogo bambata sa kama agarã aamangasunge nyanyaki tipa dungurati. (Oni gedi 1 ATesaroniko 5:12, 13; 1 Tim. 5:17) I aangbembatayo rogo nungusa adunguratise na kini mangi adiaberã fu dungurati. I afu agu arugute a nga ga nyemuse fu awirinayo tipa wa ka i nye nyanyaki rogo idapase yo. (1 Tesa. 2:11, 12; 2 Tim. 4:2) Rengo ngaha nga, agi akumba re aima mangasunge a nyanyaki tipa ka ngerafuo gayo aborokporo, na ka banda gayo idapase, na gayo pagume na Yekova nyanyaki.​—1 Tim. 3:2, 4; Tito 1:6-9.

9. Gini bete asunge abaakumba amangaha areme?

⁹ Abaakumba namanga badungu asunge areme. I nga abatungusipai. (2 Tim. 4:5) I namanga wene kpiapai ni tungusa yo pai zaaza, kini mangi mbakadapai nga ga tungusapai rogo gaani dagbarago, na kini raba rani tipa ani tungusipai na kini yugupai wenengai. I namangasunge a ni agu abasapungbanga du na inapai adu nga na kparakaro ya. Ho boro amanga kere ingapai ni rogo dungurati, abaakumba namanga ome nyanyaki ka undo ni ni mbakadi gani pagume berewe na Yekova. Ti kina gu bangisa regbo re, i na rubangirise ka banda dungurati ni gigirihe. (1 Kor. 5:12, 13; Gara. 6:1) Bambatapai nga, abaakumba nga ababanda akandoro. (1 Pet. 5:1-3) I namanga wene agumbapai rogo Baibiri yo, kini asadi nyanyaki ka ino aboro dunduko rogo dungurati, na kini ndu kaa ngarasa aboro. Kura abaakumba naundo na Sunge Dudua ABambu Kindo na kini ngerefuoho, manga mbakadapai tipa bakere adunguratise, na rogo gu Rondo Du Tipa Sakapai na Amunganga na agu aRondo Du Tipa Biko Aborokaza, gbiati gu kura asunge. Abaakumba namangasunge nyanyaki tipa rani!

10. Gini bete nduapai duho du ani ti ni na tambuahe fu gaani abaakumba namangasunge nyanyaki?

¹⁰ Yekova aima kidohe nga ababanda akandoro nika ngera wenengai fuo rani na ka ani ‘agunde nga berewe ya, ka ani ayungura nga ya.’ (Yere. 23:4) Gere nga kina boro gupai wirina du Finland yo du rimori nga Johanna abihe ti gu regbo nari ati na kere kaza. Ri ape gupai nga: “Wa si avura du ni kpakarakpakaraha fere tipa mi fura tipa gimi bipai na kura aboro, bakumba nga guko mi ainongo ko wenengai ya adu na zerangbaduse na mi, ki mangi kparakpee na mi, na ki kido re na pa ga Yekova nyemuse. Mi atingidanga gupai nzunzu ko apehe te, ono mi natingida pa wai atingida mi abi tire ni bandabanda re. Mi ima ida kuti gupai nga Yekova akedi ko tipa ko ye ka undo re kina boro ti wene regbo.” Waigu abaakumba rogo gamo dungurati aundo ro?

11. Waigu rengbe ani ka yugo tambuahe fu abaakumba? (Oni bi sura a.)

¹¹ Yekova naida ani fu tambuahe fu abaakumba kina boro ngbaduraniyo “mbiko gayo sunge.” (1 Tesa. 5:12, 13) Henrietta nga gu ri naraka Finland yo ape gupai nga: “Abaakumba naundo kura aboro na nyemuhe, ono gipai re ayugongo  gupai nga i na bakere regbo beyo na ome watadu i agbianga tiyo tigayo na akpakarapai rogo gayo raka yo ya te. Ti kura aregbo mi naaya fuyo: ‘mo nzunzu nga wene bakumba. Mi naida mo inihe wo.’” Wirina Türkiye c yo du rimori nga Sera ape gupai nga: “Abaakumba naida na ngarasaro tipa wa ka i du na rengba kaa manga gayo sunge kindi. Sidu, ani ima rengba ka kepai fuyo ti wiri karte, ka yamba yo tipa riahe, na ka ndu na yo gene tungusapai yo.” Ya mo bakumba ho du mo na bakere tambuahe funi tipa gu nyanyaki sunge ni amangaha rogo dungurati? Mo yuguhe funi nga mo na bakere tambuahe tipa gupai ni amangaha.​—1 Kor. 16:18.

ABABI ADUNGURATI TIPA NGARASARO

12. Gini mbakadapai nanyakasi adungurati rogo bambata kama agarã? (1 ATesaroniko 2:7, 8)

¹² Yesu afu kura sunge a fu kura akumba tipa i undo dungurati ngba kura gene. Ko amangisunge na abaakumba Yerusarema yo tipa i kedi aPauro, Barunaba, na gu kura ababiapai ni naata ata. (Amo. 11:22) Tipagine? Tipa kina gu bangisa ndupai i asia amoundo abaakumba ti ni na abaakumba nga: ka nyakasa adungurati. (Amo. 15:40, 41) Agi akumba re nambupa kura gayo apai tipa ka manga gi sunge re, ti kura aregbo, i namaa raka yo ngbapai tipa ka yugopai na ka ngarasa kura aboro.​—Oni gedi 1 ATesaroniko 2:7, 8.

13. Gini bete asunge du be ababi adungurati?

¹³ Ababi adungurati ni naata dedede. Aguyo ni naandu tipa dungu akirometere tipa ka bi adungurati. Rogo aposo ni basasa, babi adungurati ni naamanga agumbapai, na kini nungusi gu dunguratise nga ga abazakigene, gu dunguratise nga ga abaakumba, na agu adunguratise du tipa sunge tungusapai. Ko nambakada agumbapai, na kini mbakadipai tipa bakere adunguratise. Ko  nayugopai ti regbo agu asukuru nga ga abazakigene, kini mangi mbakadapai tipa kparakpara dunguratise na abazakigene rogo badona nga ga adungurati, kurii agi apai re, si naida aida a ko mangi kura nyanyakipa apai​—ti kura aregbo, agu apai si aida i mangihe niipo.

14. Gini bete andu apai duho du ani ti ni na tambuahe fu gaani ababi adungurati nga agu yo namangasunge nyanyaki?

¹⁴ Waigu adungurati agbia undo ti gu wene sunge ababi adungurati amangaha? Wirina sa Türkiye yo ape gupai nibipa wai babi adungurati abiko adungurati nga: “Ai gu regbo i aye ka bi gaani dungurati, si nafõngbadureyo mi di bakere regbo ka undo awirinami. Mi aima gbia badungu ababi adungurati; ono mi abingo gu ni si awiraha wa ni aidanga ka fura na mi watadu adunga na regbo beni ka fura na mi ya te.” Johanna i nifura tipa ri kusayo andu gene tungusapai yo na babi adungurati, ono ka i abingo boro kandara sa kporo ya. Ri nape gupai kindi nga, “Bangire agonga ti gu uru re te. Awirinina ue aga ku rogo kura ba, na mi aazingo tipa yo ni kerehe. Babi adungurati angarasi re na ki undo re nga awere, si ima rengba kadu nga ani na rengba ka raka mbembedi na gaani aborokporo watadu abakurearani te, ono rogo vovo zegino, ani nika du na gu momu berani nga ga raka kina sa nyeanye kindi.” Badungu rani niima du na tambuahe tipa gaani babi adungurati na gu gene i naundo rani ngbaha.​—Amo. 20:37–21:1.

15. (a) Ringbisihe kuti 3 Yoane 5-8, waigu rengbe ani ka yugo gaani tambuahe fu ababi adungurati? (Oni bi sura a.) (b) Tipagine si aida ani yugu tambuahe ti ni fu adia agu awirina namangasunge nyanyaki rogo dungurati re, na waigu rengbe ani ka mangaha? (Oni bi gu sanduki nga “ Oni Tingidipa Adiayo.”)

¹⁵ Gu mokedi nangia Yoane angarasi Gayo tipa ko di agu awirina kugume naye kaa biyo na ki “niunda yo na gayo nduge ku mbata yo ku sangba sino Mbori yo.” (Oni gedi 3 Yoane 5-8.) Gene sa rengbe ani ka mangaha ngbaha nga ni yamba ani babi adungurati tipa riahe. Kura gene nga ni  songoda ani gu mbakadapai nga ga tungusapai ti gu regbo ko aye ka bi gaani dungurati. Leslie, i ni fura tipa ri kusayo ayugu gari tambuahe ngba kura agene a. Ri aya, “Mi naamanga kparakpee Yekova fu guhe fuyo i aida na ni. Mi na kumbami ni naake awaraga fuyo kini pe pa wai pa yeyo naundo rani.” Mo tingidi gupai nga ababi adungurati na kina akpakarapai tiyo na omeyo nabata abata a wakina rani. Ti kura aregbo, i naambu ambu be kaza, bakabangirise, na zavura gberãrago. Isoke, gamo wene afugo watadu tooni gamahe ima rengba kadu nga karagapai kuti ga babi adungurati kparakpee tipa undo!​—Snz. 12:25.

ANI NAIDA NA AGU AKUMBA NGA “AGAMAHE ROGO ABORO YO”

16. Ringbisihe kuti Asanza 3:27, gini asanahe rengbe agu awirina nga akumba ka sana tiyo na ni?

¹⁶ Rogo zegino dunduko, ani naida na badungu agu awirina nga akumba tipa i mangisunge ni “agamahe rogo aboro yo.” Ka si du nga mo nga gu wirina nga kumba niima zio bapatiza, ya mo mo na rengba ka undo ngba gi gene re? (Oni gedi Asanza 3:27.) Ya mo mo na nyemu ka re tipa ka mangasunge ni moundo abaakumba? Ka si du nga mo aima da ni moundo abaakumba, ya mo mo na nyemu ka manga ome nyanyaki ka da ti gu sasa nga ga mangasunge ni bakumba tipa ka undo awirinamo? d Ya mo mo na rengba ka manga ariapai rogo gamo raka yo tipa wa ka mo du na rengba ka ndu tipa Gu Sukuru Du Tipa Abatungusipa Kindo? Gu sukuru re nika raba ro na ki undoro tipa Yesu mangisunge na mo ni bakerehe. Ka mo bi tiro nga mo arẽnga te, mo kpari fu Yekova. Mo sana ko tipa ko undoro na gako ziazia toro mo du na rengba ka manga gu sunge ko nafuhe foro.​—Rk. 11:13; Amo. 20:28.

17. Ginipai ‘agamahe rogo aboro’ yo ayugoho furani tipa gaani Bakindo nga Kristo Yesu?

¹⁷ Gu nyanyaki sunge nga ga agu aboro Yesu nasia yo ni “agamahe rogo aboro yo” nga gopai nayugo gupai nga, ko nangbembatayo furani rogo gi yangara areme re. (Mt. 28:20) Ani na bakere tambuahe nga ani na gu Bakindo nga boro nyemuse na weneringise nga guko ini agu ahe ani aida na ni, na ko fu awirina furani tipa i naaundo rani. Sidu, mo gbata amomu tipa ka yugo gamo tambuahe fu agi akumba namangasunge nyanyaki re. Na ka bangiro gonga ka tambua Yekova ya bambiko ko du ninaafu “wene gamahe dunduko, na ziazia ũgamahe.”​—Yak. 1:17.