1-2. (a) Gini akapa rengbe ga Yekova amoyambu kadu na ni? (b) Ginipai ani nika wisigopai tipaha rogo gi kekeapai re?

 ANI dunduko singia paranga aboro watadu sosono aboro ni duadu na akapa a ti kura aregbo. Ni kpiapai, boro ima rengba ka bakabangirini singia Yekova naberãpa ni aberã. Mbiko gupai re, ni ima rengba kadu na kapa singia si naida ni zi bapatiza. Oni berẽnga pa gu kura kpiapai nga ga kura wirina, ho ko adu ni ni paranga, ko asia ka maa ga Yekova sunge ni bambatapai rogo gako raka kuba gupai nga ka sia ka manga bakere marã. Wa du ko awere ni sosono boro na kidu na bete wiri marã beko tipa ka ngerafuo agu azingo nga ga gako aborokporo, ko ima rengba ka bakabangiriko singia ko amangi wene siapai ho ko adu ni ni paranga ko. Watadu si rengbe kadu nga sosono wirina gu duho ni dee adu nga na bakere ome tiri ya. Rago ima rengba kaa gberã tiri bambiko ri na rengba ka manga gupai ri anaamangaha amanga mbata te. Ya mo mo asananga tiro na ngbatunga asanahe wa: ‘Ya mo Yekova nabi gupai mi amangaha abi nzunzu? Ya mo si arẽarẽ mi mbu pa kura apai ka mangasunge fu Yekova? Ya mo mi kindi na sunge tire fu Yekova?’

² Ka ani amanganga asadatise ka gbia akaragapai kuti asanahe wa gere ya, si ima rengba ka zeresa gaani idapase kuti Yekova na zavura ani ki mbu irisoko. Rogo gi kekeapai re, ani nika bi wai rengbe Baibiri ka undo rani ka ani aberã gupai nga (1) Yekova akpingo nyemurani te, (2) agu adiaberã ani amangihe kusayo aadunga ni wenehe te, watadu (3) sunge tirani awere fu Yekova te.

WAI KA DIABE GAMO AKAPA

3. Gini gene duho sa rengbe ani ka diabe gaani kapa ngbaha?

³ Gene sa dagba agu akuraha yo rengbe ani ka diabe gaani akapa  ngbaha nga ni geda ani Fugo Mbori tipa ka gbia akaragapai kuti gaani asanahe. Ka ani mangihe wo, gaani idapase kuti Yekova na gaani pagume na ko nika du ni nyanyakihe na ani nika du na rengba ka “rú nyanyaki rogo idapase.”​—1 Kor. 16:13.

4. Waigu ani ‘aˈasada apai dunduko’? (1 ATesaroniko 5:21)

⁴ Oni gedi 1 ATesaroniko 5:21. Si naida ani ini gupai nga Baibiri nazungodi rani ani “ásadi apai dunduko.” Waigu rengbe ani ka manga gipai re? Ho du ani ni na kapa tipa pai, si naida ani bi gupai Baibiri apehe tipaha. Ni kpiapai, mo berẽnga pa gu paranga boro nabaka bangirini singia Yekova naberãpa ni aberã nzunzu. Ya mo si naida ni idi kuti gupai gbua nga gu berãpai re ni ruruhe? Oó, si naida ni “ásadi apai dunduko” ni wisigo ni Baibiri ka bi ga Yekova aberãpai tipa ni.

5. Waigu rengbe ani ka gbia ga Yekova akaragapai kuti gaani asanahe?

⁵ Ho ani ageda Baibiri ni, si nadu wa ka i ya Yekova nafura furani. Ono si naida ani mangi ome amanga tipa ka gbia gako aberãpai kuti gaani asanahe. Si naida ani gbataha na ki wisigipai tipa agu averesi rengbe ka undo rani ka karagapai kuti gaani sanahe. Tipa ka manga gupai re, si naida ani mangi wetekapai rogo gaani awaraga. (Snz. 2:3-6) Si naida ani kpari fu Yekova na ki sanako tipa ko undo rani ani gbia karagapai kuti gaani sanahe. Fuoho, ani rengbe ka ngera tipa gu bangua arugute na agu aberãpai rengbe ka undo rani rogo gupai du ani rogoho re. Si ni wenepai a ka geda agu apangbanga nga ga Baibiri du tipa gu ga Mbori ruru amoyambu nadu na aberãpai gbiati abipai wakina gaani.

6. Waigu adunguratise aundo rani ani dibe gaani akapa?

⁶ Ho ani awisigo Baibiri ni pati gaani adunguratise, si a wa ka i ya Yekova nafura furani. Ka ani andu tipa adunguratise dedede, ani ima rengba ka giapai rogo gumbapai watadu boro ima rengba ka fu karagapai pati dunguratise nga kina boro gupai nzunzu ani aidaha tipa ka diabe gaani kapa. (Snz. 27:17) Ani sakingo pai awere tipa wai rengbe ani ka diabe kura gaani akapa.

HO DU MO NI NA KAPA SINGIA YEKOVA NABERÃPA RO ABERÃ

7. Gini sanahe rengbe boro ka sanaha?

⁷ Ya mo mo abakingo bangiro nga, ‘Ya mo Yekova inipai tipa re nzunzu?’ Ka si du nga mo nabi tiro nga nyakingo paro te, mo ima rengba ka berãha nga si ni kpakarakpakaraha foro tipa mo da ni bakurea Bakusiahe dunduko. Bakindo Davide aima rengba kadu na kina gu berãpai re a. Si aima iriwo tiko ka berã gupai nga Yekova naberãpa aboro aberã. Ko aya: “Ako Yekova, gini he nga boro mo nangera koyo du ni ni, na wiri boro, mo aberã pa ni?” (Tam. 144:3) Wari gu rengbe mo ka bi karagapai ni kuti gi sanahe re?

8. Ringbisihe kuti 1 Samuere 16:6, 7, 10-12, ginipai Yekova abihe rogo aboro yo?

⁸ Baibiri nayugo gupai furani nga, Yekova nabi agu aboro abi aboro abiyo wa nyakingo payo te. Ni kpiapai, Yekova akedi Samuere ko ndu kua Yisai yo tipa ka mbida boro sa dagba awiriko ni gu bakindo nika zoga aYisaraere kumbatayo. Yisai ayambu awiriko saba dagba aguyo nadu muambe i ndu tipa Samuere biyo ono ka ko akodanga Davide nangia kiaro ku dagbayo ya. b Ono wa si avura duwo, Yekova asia kina Davide. (Oni gedi 1 Samuere 16:6, 7, 10-12.) Yekova aima bi gu boro nzunzu nangia Davide, na ko aima ino gupai nga gi paranga kumba re aima kpinyemuko ni bakerehe.

9. Tipagine rengbe mo kadu na gu kido ti ni nga Yekova naberãpa ro aberã? (Oni bi sura a.)

 ⁹ Mo berẽnga pa wai Yekova naima yugoho nga ko ima inopai tipa ro. Ko nafu wene rugute foro tipa kina boro gupai namanga ro. (Tam. 32:8) Gere nayugo gupai nga ko ima ino kina boro guhe nzunzu mo aida na ni. (Tam. 139:1) Ho mo amangapai ni kuti ga Yekova arugute na ki bi wai ko aundo ro, mo nika du na gu kido nga Yekova naberãpa ro aberã. (1 Peka 28:9; Amo. 17:26, 27) Yekova nabi gu ome abi mo amangaha. Ko nabi gu wene asino abi a du tiro na ko na nyemu kadu ni bakureamo. (Yere. 17:10) Na ko nika du na bakere ngbarago ka mo aida a kadu ni Bakureako.​—1 Yo. 4:19.

HO DU MO NI NA KAPA SINGIA AGU ADIABERÃ MO AMANGIHE KUSAYO ADU NI WENEHE

10. Ho ani aberã ni kurii agu adiaberã ani amangihe kusayo, gini asanahe niima rengba ka kura?

¹⁰ Ti kura aregbo, kura aboro ima rengba ka berãkuriipa agu adiaberã i amangihe kusayo na ka i ainongo singia wene asiapai du i amangihe ya. Si rengbe kadu nga i ambu gayo wene sunge i aatumo yo tipaha wenengai watadu i adiberã ka zanga tona baga ahe tipa gupai nga i du na rengba ka iriso Yekova wenengai. Ono si ima rengba kadu nga gipai re amangi dungu agarã kusayo. I ima rengba ka berãpa kura aboro namangi kura asiapai kia ti gu i amangihe, na awere, si nangera wa agu aboro re na bakere marã beyo watadu i naraka fiõfiõ raka. Ni sangbana gipai re, i rengbe ka bakabangiriyo nga: ‘Ya mo si arẽarẽ mi mbu pa kura apai ka mangasunge fu Yekova? Watadu ya mo si asa re mi zanga gu kura amomu?’

11. Tipagine bake papara Atambuahe 73 adu ti ni na gberãrago?

¹¹ Ka si du nga mo aima sana tiro na ngbatunga asanahe wa gure, mo berẽpa gupai Baibiri apehe tipa wai bake papara Atambuahe 73 abi tiko. Ko abi agu aboro naairisongo Yekova wa ka i ya kpotoyo adu wenengai, i ki ngia airakumuko,  na si kini ngere wa akpakarapai ho i aagbia tiyo na ni te. (Tam. 73:3-5, 12) Ho ko abi gupai ni nga si aangera wa raka yo adu ni bawenehe, si asako ko bihe nga sunge aadunga ti gu ome ko aamangaha ka iriso Yekova te. Ko adu ni ‘mbusimbusi ko na aˈuru pitipiti’ be gi gbegberẽ berã re. (Tam. 73:13, 14) Waigu ko amangipai kuti gi iraira bipai re?

12. Ringbisihe kuti Atambuahe 73:16-18, ginipai naundo gu bake papara Atambuahe re ko dibe gako iraira aberãpai?

¹² Oni gedi Atambuahe 73:16-18. Gu bake papara Atambuahe re andu ku rogo ga Yekova kparakpara ziazia ba. Yo du ko arengbe ka berã ni wenengai. Ko arugutiko na gupai nga, wa vura duhe nga kura aboro aaraka wene raka, i aadunga na maabangirise ka raka kumbatayo te. Sidu, ko aadunga berewe na gberãrago te na ko aima du na gu kido nga iriso Yekova nangia gu bawene diaberã ko amangihe. Ni sangbanaha, ko azambuasi gako diaberã tipa kaa ndu kumbatayo kindi kaa iriso Yekova.​—Tam. 73:23-28.

13. Ginipai rengbe mo ka mangaha ka si du nga mo nabira tiro tipa agu adiaberã mo amangihe mbata kusayo? (Oni bi sura a.)

¹³ Kina wai gu bake papara Atambuahe re amangihe, mo ima rengba a ka diabe gamo iraira aberãpai. Ngba gini gene? Mo tingidipa gu wene ahe du bero​—kodihe na ga Yekova amaku, na mo tingidi gupai nga Yekova aundongo agu aboro airisongo ko ya te. Tipa gu dungu aboro airisongo Yekova ya, du na wene raka nga gu yangara nyanyakipa pai du beyo bambiko i na maabangirise tipa kumbatayo te. Ono tipa ro tigamo, Yekova kidohe ka fu amaku foro ni bakerehe gbe kisusi gu rengbe mo ka berãpa ha. (Tam. 145:16) Mo berẽnga a kurii gipai re: Mo arengbanga ka ino wai ka gamo raka nidu areme ka si adu nga mo amangi kura  asiapai kia te. Ono pai sa rengbe mo kadu na kido tipaha nga: Ho mo amanga diaberã ni mbiko gamo nyemuse tipa Mbori na kura aboro, mo nika du ti aregbo dunduko na agu ahe bero rogo raka yo nika saro mo du na ngbarago.

HO DU MO NI NA KAPA SINGIA MO NA SUNGE TIRO FU YEKOVA

14. Ginipai du tipa kura aboro, na gini sanahe rengbe yo ka sana tiyo na ni?

¹⁴ Kura ga Yekova aboro arengbanga ka mangapai ni bakerehe wa gu i aidaha te bambiko gbinza, kaza kpotose, watadu i ni gbarĩgbarĩ yo. Sidu, i rengbe kaa bi tiyo nga i na nyanyakipa yo fu Yekova te. I ima rengba ka sanahe nga, ‘Ya mo mi kindi na sunge tire fu Yekova?’

15. Ginipai bake papara Atambuahe 71 adu na kido tipaha?

¹⁵ Bake papara Atambuahe 71 adu na kina ngbatunga gu bipai re. Ko akpari nga: “Ka mo mbú nga re ho omere ka nyasa ni ya.” (Tam. 71:9, 18) Wa vura duhe wo, gu bake papara atambuahe re adu na gu kido nga ka ko airiso Mbori ni ruruko, Yekova nika ngbe fuko kumbatayo na ki songodiko. Bake papara Atambuahe awiriki gupai nga, Yekova na ngbarago na agu aboro namanga ome ka iriso Ko i ki vura du na azangarengba vurũ.​—Tam. 37:23-25.

16. Rogo gini agene du gbinza aboro na nyanyakipa yo fu Yekova? (Atambuahe 92:12-15)

¹⁶ Ka si ngia mo nga gbinza boro, mo niberẽpa wai Yekova abi ro. Ko ima rengba ka undo ro tipa mo irisiko niruru ro ka mo vura kaa gbiatiro na akpakarapai nga ga kpotose vurũ. (Oni gedi Atambuahe 92:12-15.) Kuba gupai nga kaa gbeberã ro kurii gupai ka mo adu nga na rengba ka mangaha ya, mo niberẽpa gupai rengbe mo ka mangaha. Ni kpiapai, mo ima rengba ka undo kura aboro na gamo kpiapai nga ga du ni ruruse na wai mo aberãpa kura aboro.  Mo ima rengba ka pepa wai fu kura aboro Yekova naundo ro vuru gu dungu agarã yo susi na agu akidohe nga ga Baibiri mo angera kumbatayo tipaha. Berewe a, ka bangiro go nga ti gupai nga gu kparakpee mo amangaha tipa kura aboro na bakere undo ti ni ya. (1 Pet. 3:12) Ka apai vura du kina wai tipa rani vurũ, ani dunduko du na kina he berani ka fuhe fu Yekova na fu kura aboro.

17. Tipagine si aidanga ani naaringbisa tirani ti ni na kura aboro ya?

¹⁷ Ka si du nga rago nagberã tiro mbiko gupai nga mo amanganga bakere apai ti ngba ga Yekova sunge te, mo du na gu kido nga, ko nabi ai gupai mo amangaha na nyanyakipaha gbe. Mo ima rengba ka asada ka ringbisa gupai mo amangaha na gu kura aboro narengbe ka mangaha. Ono ka mo mangingo gupai re ya! Tipagine? Bambiko Yekova amanganga ha wo te. (Gara. 6:4) Ni kpiapai, Maria afu wene nzeme fuõngua nadu na kiki genoho fu Yesu ni gamahe. (Yo. 12:3-5) Ono rungorungo dekurugbo aba rukutu marã sirigi ue nadu na pa ru kusende gbe. (Rk. 21:1-4) Ono tie, Yesu aaringbisanga agu agamahe ue nangia ga agu adee re na kuraha te, kuba gure, ko abi Maria gbiati rungorungo dekurugbo nga i ayugu idapase. Yesu awiriki Bako ngba rengberengbe gene. Sidu, mo ima rengba kadu na gu kido nga Yekova nabi agu apai abi dunduko mo amangaha bambiko mo na idapase kutiko na mo ima kpinyemu ko, ka mo vura kaa bihe vurũ nga gupai mo amangaha fuko na paha kusende.

18. Ginipai nika undo rani tipa ani dibe gaani akapa? (Oni bi gu sanduki nga “ Fugo Yekova Ima Rengba ka Undoro mo Dibe Akapa.”)

¹⁸ Ani dunduko nidu adu na kapa ti kura aregbo. Ono a wa ani nawirikihe, Baibiri ima rengba ka undo rani ani dibehe. Sidu, mo mangi ome nyanyaki ka gbia akaragapai kuti gamo asanahe, na fuoho, mo nika du na kido kuba gupai nga kaa bakabangiro. Yekova ima inopai tipa ro. Ko na ngbarago tipa agu asiapai mo namangihe ka maa ko ni bambata boro rogo gamo raka yo, na ko nika kakuti gako kidohe ka fu mosoro foro. Mo du na gu kido nga, Yekova ima kpinyemu gu gako amoyambu du ni ruruyo fuko na ko naberãpa yo aberã.