MANZIGO angia nyanyakipa papara gu sino ngbatunga nangia ga aYisaraere. Baibiri ima pe gupai bara dunguhe nga, aboro aata agu ahe i ata manzigo na ni na kini bi abia. Bakere papara Baibiri nga abia. Ni kpiapai, Atambuahe, Ga Soromo Bia, gbiati Abia Kpenunga, i akehe tipa i naabihe ni bia. Gu kura buku du tipa wai raka adu ti agu aregbo i aake Baibiri ti ni ape gupai nga “Baibiri nayugoho ayugo ziazia nga aYisaraere aamangasunge na manzigo rogo gu dungu apai i aamangaha rogo gayo raka yo.”

Aboro aamangasunge na manzigo rogo raka yo na aˈuru dũ. AYisaraere anaataka woro ahe na kini bi abia tipa ka yugopa wai i anidu. (Yes. 30:29) Adee anaata gaza, kini bi abia na ngbarago, na kini dogbere ti regbo apumbo wa ho i anaamaa vovo bakindo ni, ho abanzengere anidu ni na diabese ba vura yo, na ti regbo agu apumbo nangia ga irisombori. (Abasa. 11:34; 1 Sam. 18:6, 7; 1 Aba. 1:39, 40) AYisaraere anaabi abia a tipa ka yugopa gayo gberãrago ho boro anikpi ni. (2 Peka 35:25) Gu buku nga McClintock na Strong’s Cyclopedia ape gupai nga, si tie ziazia nga, “aYisaraere aima kpinyemu manzigo ni bakerehe gbe.”

Manzigo kua abakindo yo. Agu abakindo naadu Yisaraere yo anaagbia bakere ngbarago ti manzigo. Bakindo Saura aye na Davide kua bakindo yo tipa ko naata kundi fuko. (1 Sam. 16:18, 23) Kusa, ho Davide ada ni ni bakindo, ko akusi dungu agu ahe i naataka bia na ni, na ki ke dungu wene abia, na ki mbakadi agu ataki woro ahe naataka woro abia rogo ga Yekova yekaru. (2 Peka 7:6; Amosa 6:5) Bakindo Soromo adu na agu ata manzigo beko nangia akumba na adee kua bakindo yo.​—Batu. 2:8.

Manzigo tipa irisombori. Gu nyakipaha anyaka gbe nga, aYisaraere amangisunge na manzigo tipa ka iriso Yekova. Akumba 4,000 naataka manzigo yekaru yo Yerusarema yo. (1 Peka 23:5) I aata abia na gu sirigi napaa apaa, na akindondo, na anzenze. (2 Peka 5:12) Ono anga gi wene abata bia re nga gu yangara aboro naairiso Yekova na manzigo te. Badungu aYisaraere nanaabi abia wa i anaandu ku Yerusarema yo ka manga apumbo yo. I aayamba agi abia re nga Abia Dakpa Kuari yo. (Tam. 120-134) Na ringbisihe kuti gu kekeapai nga ga aYudo, aYisaraere du nabi bete agu abia nga ga Atambuahe a ti regbo gu riahe nangia ga Pumbo Susiri.

Manzigo kindi na nyanyakipaha fu ga Mbori aboro. (Yak. 5:13) Ani nabi abia fu Yekova tipa ka sambuo ko. (Ef. 5:19) Manzigo nakoda rani na akuarani aKristano. (Koro. 3:16) Na si nanyakasa rani ho ani ahi akpakarapai ni. (Amo. 16:25) Manzigo nga bawene gene ani ayugo gaani idapase na gaani nyemuse ngbaha fu Yekova.