GU KEKEAPAI DU TIPA WISIGOHO 6
BIA 18 Tambuahe Tipa ga Yesu Tumorii
Ani na Bakere Tambuahe Nga Yekova Nambupai Furani ti Gaani Aingapai
“Mbori akpi nyemu aboro akpi zegino dũ, wa ko afu bangisa Wiriko.”—YO. 3:16.
GU MEMEAPAI DU ROGO GI KEKEAPAI RE
Ani naida ka kiiso gaani tambuahe fu Yekova tipa wai ko ambupai furani. Tipa ka manga gupai re, ani nika wirika gupai Yekova amangihe tipa ka mbupai furani ti gaani aingapai.
1-2. Ngba gini gene du gupai du tipa aboro wakina ga gu paranga i nifura tipa ko rogo bambata genewaraga?
MO BERẼNGA pa paranga du avunguko nga airakumuko. Ono rogo kura uru sa, avunguko kini kpi. Ko ima du na bakere gberãrago. Wa vura duhe wo, kura gbegberẽ apangbanga kinaho nasungudo gu paranga re. Ko ye ka ino gupai nga, avunguko aima mangasunge na bakere marã kisusi guru naadu beyo na i ki mbu bakere bape kuriko. Sidu, marã ho i nambu ru fuko te. Kuba gure, si naida ko tumo gu bape dunduko avunguko adihe na agu aboro re naida ko fuhe niipo. Gene beko wa ka ko karaga gu bape re dunduko te.
2 Ngba kura gene, gupai du tipa rani wakina gupai du tipa gi paranga re. Agu atitarani ani aenge tiyo nga aAdamu na Eva angia rengberengbe aboro na i araki rogo bawene paradizo. (Bam. P. 1:27; 2:7-9) I adu na gu momu nga ga raka bawene raka nyeanye kindi. Ono tie, apai aˈariatihe dunduko, aAdamu na Eva amangi ingapai. I azanga gu kpuyo nangia Paradizo re na gu momu nga ga raka nyeanye kindi. Ginihe i ambuhe fu awiriyo? Baibiri nape gupai furani nga: “Gbegberẽpai akuru ku zegino mbiko boro sa [Adamu], kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.” (Rom. 5:12) Ani adi ingapai ti Adamu si ki sa gupai nga ani naakpi. Gi ingapai ani adihe re wakina bakere bape nga gu ka boro dagbarani atumongo ho ya.—Tam. 49:8.
3. Tipagine rengbe yo ka ringbisa gaani aingapai ti ni kuti “bape”?
3 Yesu aringbisi ingapai kuti “bape.” (Mt. 6:12; Rk. 11:4) Ho ani aingapai ni, si wa ka i ya ani nadia bape be Yekova. Yekova ima rengba ka ida ani gasi gu bape nga ga ingapai re. Ka ani atumo nga gi bape re ya, i rengbe ka diaha sa kusayo rirani kinaho ani nika kpi ni.—Rom. 6:7, 23.
4. (a) Zanga na undo, ginipai ka mangi tipa aboro ingapai dunduko? (Atambuahe 49:7-9) (b) Gu fugo nga “ ingapai” narukuba gine rogo Baibiri yo? (Oni bi gu sanduki nga “Ingapai.”)
4 Ani arengbanga nitirani ka karaga agu ahe dunduko aAdamu na Eva aingisihe te. (Oni gedi Atambuahe 49:7-9.) Zanga na undo, ani aarengbanga kadu na maabangirise tipa ka raka nyeanye kindi kumbatayo watadu tipa zingabekpio kumbatayo te. Nirengo, ka gaani kpio du wakina ga anya, ka ani adunga na maabangirise tipa ka raka berewe te.—Batu. 3:19; 2 Pet. 2:12.
5. Waigu gu Barani nga boro nyemuse naundo tipa ka tumo tipa gaani ingapai? (Oni bi gu sura kpotoho.)
5 Ho ani aberã ni tipa gu paranga i nipepa ko ti tonatona gi kekeapai re, waigu rengbe ko kadu ka kumukokumuko kumba sa idi ka tumo gako abape re dunduko? Nirengo, gu paranga kumba re ima rengba kadu na bakere ngbarago na ki di gu gamahe re esuesu. Wakina gure a, gu Barani nga boro nyemuse nga Yekova ima fu gu gamahe furani nga gu natumo gu bape nga ga ingapai ani adihe ti Adamu re. Yesu asaki rogo yo ngba gi gene re nga: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yo. 3:16) Kurigure, gi gamahe re ima sa gupai nga ani du na wene pagume na Yekova.
Yesu atungusi wene pangbanga tipa ga Yekova mbupai riimburu motumo tumori. (Yo. 3:16) Fuoho, ko ki fu ungako ni motumo (Oni bi genewaraga 5)
6. Gini afugo Baibiri namangisunge na ni ani nika sakapai tipaha rogo gi kekeapai re, na tipagine?
6 Ginipai si aida ani mangihe tipa ka gbia undo ti gi iiriwo gamahe nga gu saha furani taata tipa i mbupai ti gaani aingapai, watadu “abape” re? Karagapai kuti gi sanahe re gu du rogo agu afugo Baibiri i namangisunge na ni wa mbakada boro pai dagbani na kurani, dada ingapai, motumo, tumo boro, na pa yamba yo boro nga ruru boro. Rogo gi kekeapai re, ani nika sakapai tipa rogo agu apai re yo dunduko ni basasa. Wa ani nikaa berãkurii gupai Yekova namangihe tipa ka mbupai furani, ani nika du na bakere tambuahe fuko.
YEKOVA NAIDA ANI DU NA WENE PAGUME NA KO
7. (a) Gini kurapai aAdamu na Eva azangaha? (b) Wangia ani atita Adamu na Eva, ginipai ani aaidaha? (ARomo 5:10, 11)
7 Ho aAdamu na Eva aingipai ni, i aadunga na rengba berewe ka raka nyeanye kindi te. Ono i aima da a ni avura Bayo nga Yekova. Mbata fu aAdamu na Eva mangi ingapai, i angia papara ga Yekova aborokporo. (Rk. 3:38) Ono ho i abasasangba Yekova ni, ko aambunga yo i du ni papara gako aborokporo berewe te, gipai re amangi mbata fu i vungu awiriyo. (Bam. P. 3:23, 24; 4:1) Boro ho dagba awiriyo yo kodihe na ani kadu ni papara ga Yekova aborokporo te. Sidu, ani aaida na undo tipa kadu na wene pagume dagbarani na ko. (Oni gedi ARomo 5:10, 11.) Si aaida ani mbu du ni avura Mbori na ki da ni abakureako. Si nipa ngbarago nga, kina boro Yekova nitiko namangi diandue tipa ka sa gipai re si du taata. Ngba gini gene?
MBORI ASAHA TAATA FURANI TIPA ANI DA NI ABAKUREAKO
8. Ginihe nga dada ingapai?
8 Dada ingapai nga gu mbakadapai Yekova amoihe tipa ka karaga wene pa bakure dagbako na aboro ingapai. Ko amangi mbakadapai tipa ka gasa guhe aAdamu azangaha ni fuko guhe paha anyaki wakina gu i azangaha. Vovo Ndiko nafura tipa wai Yekova asaha taata tipa aboro nibasasa du na wene pagume na ko.—Rom. 3:25.
9. Ginipai Yekova amangihe tipa kaa mbupai fu aYisaraere ti gayo aingapai?
9 Tipa ka sa gupai nga aYisaraere du na wene pagume na Yekova, ko amoi mbakadapai nga gu nadu tipa wiri bete regbo tipa kaa mbupai fuyo ti gayo aingapai. Si aaida aYisaraere naamanga kparakpara pumbo tipa uru sa rogo agarã dunduko. I aayamba gu uru re nga Uru Dada Ingapai. Rogo gu uru re, gbiamotumo anaafu amotumo nga ga anya kuba aboro. Rengo ngaha nga, agu amotumo i aafuhe nga ga anya aarengbanga ka dia agu aingapai kusayo nangia ga aYisaraere te bambiko aboro nyakipa yo ti anya. Ono ho agu aYisaraere naanasa berãyo anaafu gu motumo ni Yekova aaidaha, ko aanidu na nyemu ka mbupai fuyo ti gayo aingapai. (Eb. 10:1-4) Agu amotumo i anaafuhe rogo Uru Dada Ingapai na ti kura aregbo, anaaundo aYisaraere i ini gupai nga i angia aboro ingapai na kurapai kinaho si aaidaha tipa ka dada gayo ingaapai dunduko.
10. Ginipai Yekova amangihe ka mbupai fu aboro ti gayo ingaapai?
10 Ginipai Yekova amangihe ka saha taata tipa i mbupai fu aboro ti gayo aingapai? Ko amangi mbakadapai tipa gu wiriko ko aima kpinyemu ko gbe “tumo ni tiko bara sa, ka dia gu ingaapai nga ga dungu aboro ku sa yo.” (Eb. 9:28) Yesu naye, “ka tumo dungu [aboro] ni ungako.” (Mt. 20:28) Ginihe nga motumo?
GA YESU MOTUMO NGA GUHE SI AAIDAHA
11. (a) Tipagine si aaida i fu motumo tumorii ti ni? (b) Da sa narengbe ka fu motumo?
11 Ringbisihe kuti Baibiri, Yekova adiberã nga si aaida i fu motumo tipa wa ka i mbupai furani ti gaani aingapai na tipa ani du ni abakureako berewe. a Gini motumo du si aaida i tumoho tipa aboro gbia guhe berewe Adamu aingisihe? Oni tingidi gupai nga, aAdamu na Eva azanga gayo rengberengbe raka na ka i adunga na rengba berewe ka raka nyeanye kindi ya. Sidu, si aaida na motumo nga gu narengbe ka tumo guhe paha agberẽ. (1 Tim. 2:6) Si aaida kina gu boro naima nyaka ni kumba fuhe nga gu ni (1) nadu ni rengberengbe ni; (2) naima rengba ka raka nyeanye kindi auru kpotosende; na (3) nadu na nyemu ka mbupa ai pai, na ki tumo ni ungani tipa rani. Kina agi apai re sa narengbe ka sa gupai nga ga gu boro re raka karaga guhe paha agberẽ.
12. Tipagine Yesu adu ti ni na rengba ka fu gu motumo si aaidaha?
12 Ani bingo andu apai biata Yesu adu ti ni na rengba ka fu gu motumo re. (1) Ko adu ni rengberengbe ko—‘ko amanga nga [ingapai] te.’ (1 Pet. 2:22) (2) Mbiko gupai re, ko aima du na gu rengba nga ga raka nyeanye kindi auru kpotosende. (3) Ko aima du na nyemu ka kpi na ki fu ungako tipa rani. (Eb. 10:9, 10) Yesu angia rengberengbe boro kina wai Adamu adu ti gu regbo ko aamanganga ingapai ya. (1 Kor. 15:45) Sidu, mbiko gupai nga Yesu akpi tipa rani, ko adu na rengba ka tumo kina boro guhe paha agberẽ be Adamu. (Rom. 5:19) Sidu, Yesu ada ni “yangara Adamu.” Ndupai ho berewe tipa kura rengberengbe boro ye ka tumo guhe paha agberẽ be Adamu te. Yesu akpi “kina bara sa kindi.”—Eb. 7:27; 10:12.
13. Gini kparakparapai du dagba gu mbakadapai nga ga dada ingapai na motumo?
13 Sidu, gini kparakparapai du dagba gu mbakadapai nga ga dada ingapai na motumo? Gu mbakadapai nga dada ingapai nga gu diandue Mbori amangaha tipa ka karaga wene pagume berewe dagba ko na aboro. Motumo nga guhe i atumoho tipa ka sa dada ingapai si du taata fu aboro ingapai. Gihe i atumoho re narukuba nyanyakipa kure Yesu nga gu nauka tipa rani.—Ef. 1:7; Eb. 9:14.
YEKOVA AKUSI RANI TII INGAPAI NA KPIO NA KI YAMBU RANI NGA RURU ABORO
14. Ginipai ani nika sakapai tipaha awere, na tipagine?
14 Waigu ani agbia undo ti gupai Yekova amangihe furani? Tipa ka karagapai kuti gu sanahe re, ani nika sakapai tipa rogo agu afugo yo ue Baibiri namangisunge na ni tipa si undo rani ani bi wai ani agbia undo ti ga Yekova mbupai. Ani wisigingo apai ue nga gu nika undo rani ani rugutirani na pa gu undo ani agbiaha ti ga Yekova mbupai.
15-16. (a) Ginihe i nakusi rani behe mbiko motumo tumorii? (b) Waigu du gipai re na maapai kurirani?
15 Baibiri nape gupai nga mbiko i aima fu motumo tipa rani, i ima kusa rani kusayo tii ingapai. Gu mokedi nangia Petero apehe ngba gi gene re: “Oni ini he ya i atumo nga roni ni agu ahe nikagberã, wa feda na dahabu, be gu kungba apai oni agi ngba abaroni te. Ono i atumo roni ni gu kikipa kure nga ga Kristo, wa gu wiri kandoro zerenge kpotoru azerenga, adu nga wiri he ti ru ya.”—1 Pet. 1:18, 19.
16 Mbiko motumo tumori, i akusi rani be ingapai na kpio nga gu naye na bakere rungo. (Rom. 5:21) Ani na bakere tambuahe fu Yekova na Yesu bambiko i ima diapai rirani kusayo mbiko nyanyakipa kure Yesu.—1 Kor. 15:22.
17-18. (a) Rogo gupai yo nga du ni ruruse nga gine? (b) Waigu du gipai re na maapai kurirani?
17 Baibiri nape gupai nga i nayamba ga Yekova amoyambu nga ruru aboro. Gipai re nayugo gupai nga, ko aidanga ani tumo tipa agu aingapai ani amangaha te. Wa vura duhe nga ko namanga gipai re, ko nabanda gako arugute abanda du tipa ruru mangapai. Ko ayambanga rani nga ruru aboro mbiko gupai nga ani ima rẽ na ni te. Berewe a, Yekova aidanga na ingapai te. Ono Yekova na nyemu ka mbupai furani ti gaani aingapai mbiko ani nayugo idapase kuti gupai ko na Yesu namangihe nga ka fu motumo tipa rani.—Rom. 3:24; Gara. 2:16.
18 Ginipai gipai re ayugoho furani ni basasa? I ima sia bete gu kura aboro i nayambu yo nga ruru aboro i ndu ka zogarago na Yesu ngbangbaturũ yo na i ki da ni awiri Mbori. (Tito 3:7; 1 Yo. 3:1) I ima mbupai fuyo ti gayo aingapai. Si wa ka i ya i aamanganga gu ingaapai re te, na si kini sa gupai nga i rẽ kadu rogo gako Kindo. (Rom. 8:1, 2, 30) Gu kura aboro i nayambuyo nga ruru aboro nika raka nyeanye kindi auru kpotosende. Yekova ima mbupai fuyo ti gayo aingapai na i ki ima da ni abakureako. (Yak. 2:21-23) Gu bakere rimbasa aboro nika bata ti regbo Aramegido nika du na gu momu nga ga raka nyeanye kindi zanga kpio. (Yo. 11:26) I nika zingisa gu “ruru aboro” na “iraira yo” nga aguyo kpiki. (Amo. 24:15; Yo. 5:28, 29) Niyangaraha, gu ga Yekova amoyambu dunduko du auru kpotosende nagiasangbako nika du na “gu taarimo nga ga awiri Mbori.” (Rom. 8:21) Ani nangera kumbatayo tipa gu regbo ani nika du na gi pagume re na Barani nga Yekova!
19. Waigu gupai nadu tipa rani aˈariatihe mbiko gupai aYekova na Yesu namangihe furani? (Oni bi gu sanduki a nga “ Ga Yekova Mbupai.”)
19 Nirengo, gupai du tipa rani asa gupai nga ani du zanga maabangirise wakina gu paranga i nifura tipa ko kusayo nga gu ko nazanga agu ahe dunduko nadu beko na si ki idi ko tumo gu bakere bape ko aarengbanga ka tumoho ya. Ono Yekova aima undo rani. Agu apai du tipa rani ima ariatihe mbiko Yekova aima mbakada gene tipa i mbupai furani ti gaani aingapai na Yesu ki fu motumo tipa rani. Gaani idapase kuti Yesu Kristo nambu gene furani tipa ani mbakadipai dagbarani na Mbori watadu i kusi rani kusayo tii ingapai na kpio. Ho Yekova ambupai ni furani ti gaani aingapai, si nadu wa ka i ya ani aamanganga ha te. Wa vura duhe wo, gupai nyakipaha gbe furani nga, ani ima rengba awere kadu na wene pagume na gu Barani nga boro nyemuse du ngbangbaturũ yo nga Yekova.
20. Ginipai ani nika sakapai tipaha rogo gu kekeapai ngbefuo gere?
20 Ani nadu na bakere tambuahe fu Yekova na Yesu, ho ani aberã ni kurii agu apai dunduko i namangihe furani. (2 Kor. 5:15) Zanga na gayo undo, ka ani adunga na maabangirise te! Ono ginipai ga Yekova mbupai ayugoho furani ni basasa? Gure nga gupai ani nika sakapai tipaha rogo gu kekeapai ngbefuo gere.
BIA 10 Ani Fu Taarimo fu Yekova Gaani Mbori!
a Rogo gu kura afugo, gu fugo nga “motumo” i sa rogoyo nga si nayugo “pa guhe i atumoho tipa ka batasa unga boro na ni,” watadu “gu marã i atumoho.”
