Buba na Nina aima du na nyanyaki idapase kuti gu pambori nga ga Katoriko. Ono ho i awiriki gupai ni rogo Baibiri yo nga rimo Mbori nga Yekova, i dunduko ue ada ni zaaza aDezire Yekova. Buba ambu seka akpia Yesu. Kuba gure, ko amangisunge na gu gako abirĩ-sunge re tipa ka sa gaani vurukporo si du ni bambata Bambu Kindo rogo gu rago nga San Juan del Monte, du rogo gu bagbata nga Manila, du Philippines yo.

Tifuo i vungu re rogo 1952, avungure atona ka yugopai fere tipa Yekova kina wai i ayuguhe fu aunvurami biama gbiati adawire biata. Wa mi aasona, buba angarasi re tipa mi naageda kapita sa rogo Baibiri yo rogo aˈuru dunduko, na ko awiriki badungu gaani awaraga na mi. Ti kura aregbo, avungure anaayamba agu ababiapai ninaata ata gbiati agu aboro narukuba be-basunge i ye ka sungo kpurani yo. Si asa gaani aborokporo i du na bakere ngbarago na si kidu ni pa ngarasaro ka gia agu apangbanga agi awirina re apekehe furani, nga gu nafõ rani tipa ani moi iriso Yekova ni nyanyakipa pai rogo gaani raka yo.

Mi awiriki badungu apai ti gu kpiapai nga ga avungure, nga aguyo nadu ni ruruyo fu Yekova. Tingbafuo nina kpi, Buba gbiati re atona sunge abazakigene kina sa rogo 1971. Ono tie, rogo 1973 ho mi adu ni na garã re nga 20, buba akpi. Pa zanga mi avungure dunduko ue asa re mi nibi tire nga mi nisare. Ono gu “nyanyaki” maabangirise du rogo Baibiri yo aundo re tipa mi nye na ruru bipai tipa tire kuba kadu na bakere gberãrago, na ki nye mbembedi na Yekova. (Eb. 6:19) Fuoho aaturongo tifuo buba kpi te, mi ki tona mangasunge kparakpara abazakigene rogo gu kisanga nga ga Coron, du rogo gu papara gbata nga Palawan.

Garã re adu nga 21 ho mi ada ni Coron yo. Mbiko gupai nga mi aima digo ni raki vuru bagbata, kina ngbare nazere ka bi gupai nga rogo gi kisanga re, we karaba aadunga yo na ime kporo na kina bete atarambiri nadu yo gbiati amotoro. Wa vura duhe nga bete awirina adu kina yo, bazakigene aadunga yo ka  ani aakura na ni te na mi anaakura gene tungusapai yo ti kura aregbo nisare. Rogo bambata diwi, mi aima zanga gimi aborokporo gbiati abakureami nikerehe. Mi anaangana akerekuru kuari yo yuru na kini kpari. Mi aaida ka mbu gimi sunge na ki karagatire ku kporo yo.

Ti agu aregbo re, mi anaape agu apai dunduko mi anaaberãha fuko na wai mi abi tire. Mi natingida agu aberãpai atingida nga gu nafu ngarasaro fere rogo Baibiri yo na rogo gaani awaraga. Atambuahe 19:14 ni naaye dedede kurire yo. Mi abi gupai nga Yekova nika ngia ‘gimi Mbia na gimi Batumorii’ ka si du nga mi nikaa berãkurii agu apai nasa ngbarago tiko, wa kurii pa gako mangaapai gbiati asino ko. Gu kekepai nadu rogo Ngbaõbambu Sinziri riihe angia “You Are Never Alone” a aundo re ni bakerehe gbe. Mi agedihe bara dunguhe. Ho mi aanidu ni nisare, mi anaabi tire nga Yekova kina patire, na gure nangia gu wene aregbo mi anaakparakpee, kini wisigipai, na kini berẽkuriipai.

Tifuo da mi Coron yo, fuoho aaturongo te mi ki da ni bakumba. Wa duhe nga kina re nadu yo ni gu yangara bakumba, mi atona kaa nungusa Gu Sukuru Nga ga Siokrasia na aposo dunduko, nungusa Gu Dunguratise Nga ga Sunge Tungusapai, nungusa Wisigo Buku Nga ga Dungurati, gbiati Wisigo Ngbaõbambu Sinziri. Mi anaamanga gumbapai a na aposo dunduko. Gu rengo duho nga—regbo aadunga bere tipa mi nye kaa berã gupai nga mi nisare te!

Gimi sunge Coron yo aima du na wene asangbanaha na kura gimi abawiriki Baibiri azi bapatiza niyangaraha. Ono akpakarapai aima du a. Ti kura aregbo, mi anaandu tona wiso da ku bebere uru tipa ka da rogo gu dagbarago mi aandu ka tungusapai rogoho, zanga mi ini wari mi nika ra ni ho mi nika da yo ni ya. Gu dagbarago nga ga tungusapai nga ga gu dungurati re aakoda kura dungu rukutu akisanga a. Mi anaandu dedede na kurungba rogo sungburasungbura baime tipa ka da rogoho, na zavura mi aainongo wai ka ta wagia te! Ti regbo agi akpakarapai re dunduko, Yekova aima banda re na ki ngerefuo re. Kusa, mi abi gupai nga Yekova aambakada re tipa gu kura bakere akpakarapai mi aandu ka gbia tire na ni rogo kura gimi sunge.

Rogo 1978, i akedi re kurogo gu ringara nga Papua New Guinea, du rogo gu papara Australia du ku nodiyo. Papua New Guinea na badungu agangara rogoho na bakioho ima mbeda kuti bakio gu ringara nga Sepania. Kina ngbare nazere ka bi gupai nga agu aboro naaraka yo dũ bangeyo nga amirioni biata nape afugo niima susa 800. Si ni gupai nafu ngbarago nga, badungu agu aboro nadu yo ape pa Melanesian Pidgin, nga gu fugo aboro naini gu rimoho nga Tok Pisin.

I akedi re tipa bete regbo ku rogo gu dungurati naape pa-Ngirisi, du rogo gaha bakere gbata i ayambaha nga Port Moresby. Sidu tie, mi aga ku rogo gu dungurati nangia ga Tok Pisin na mi ki tona ka wirika gu fugo re. Mi amangisunge na gupai mi aawirikaha rogo gimi riko gene tungusapai. Gipai re aundo re tipa mi wiriki gu fugo re ni kina wiri ipo. Vuru bete regbo yo, mi aima du na rengba ka manga gumbapai gbaiga rogo pa Tok Pisin. Kina ngbare nazere ka bi gupai nga mbata fu mi di garã sa ku Papua New Guinea yo, i asia re tipa mi du ni babi adungurati kaa biko agu adungurati naape gu fugo nga Tok Pisin rogo dungu agbata rogo gu dagbarago re.

Mbiko gupai nga adungurati aima turo ti akuraha, si aaida mi mangi dungu mbakadapai tipa dungu bakere adunguratise na ki ndu dungu anunguro. Ti tonatonaha, mi aabi tire nga mi nisare bambiko mi  adu rogo vovo ringara, aboro aape kura fugo kia na gayo asino mangapai kidu kia ti gu mi ainidi tire na ni. Mi aarengbanga ka ndu bangiri gene ka biko adungurati te mbiko abaagangara gbiati gbegberẽ agene. Sidu, si aidi mi naata na tiyara (avion) rogo aposo dunduko. Ti kura aregbo, kina re sa naani du vuru wiri tooni kpata tiyara yo. Agu anunguro re asa re mi ni bakibangire kina wai mi aabaka bangire ho mi anaandu ni na kurungba!

Kina bete aboro nadu na aterefuni beyo, sidu, mi aafura na adungurati kina vurube keka awaraga. Dedede, mi anaada mbata fu gimi awaraga da yo na si ki idi mi sana kina agu aboro du rogo gu dagbarago re tipa ka ino ada nangia aDezire Yekova yo. Agu regbo mi anaagbia awirina ti ni, i aanidu na bakere tambuahe na kidu na nyemuse na gipai re ki sare tipa mi tingidi ndu gupai mi aamanga ome ti ni tipa ka ye ka biyo. Mi aima bi ga Yekova songodahe ngba dungu agene na mi ki ima mbeda na ko gbe.

Ti regbo gimi bambata dunguratise rogo gu kisanga du rimoho nga Bougainville, kura arogotise sa aye fuore na mongo ti ngbayo ki sana re nga, “Ya mo mo natingidapa rani?” Mi atingidi gupai nga, mi atungusipai fu agi arogotise re ti gu bambata regbo mi ada Port Moresby yo. Mi aima tona wirika Baibiri na yo mbata fu mi fuyo fu kura wirina nadu rogo gu dagbarago re tipa ko tona wirikapai na yo. I ue dunduko aima zio bapatiza ti gu regbo re! Gere nangia maku sa dagba gu dungu amaku yo mi agbiaha vuru agu agarã yo biata mi adihe Papua New Guinea yo kuti gimi sunge.

Mbata fu mi guari Coron yo rogo 1978, mi aini bawene wirina ni dee rimori angia Adel nga guri nadu na gu toro tiri nga ga futise. Ri aamangasunge anazakigene na kini sonosi awiiri ue nga Samuel na Shirley. Ti kina gu bangisa regbo re ri aangerafuo sosono nari. Rogo Merekoko 1981, mi akaraga tire ku Philippines yo tipa ka manga rogotise na Adel. Tifuo gaani rogatise, ani amangisunge abazakigene kina sa na kini ngerefuo gaani aborokporo kina sa.

Wa mi avura du na aborokporo bere, rogo 1983, i amoi re ni kparakpara bazakigene na ki kedi re ku rogo gu kisanga du rimoho nga Linapacan, rogo kura gbata sa Palawan yo. Mi aga na gimi aborokporo dunduko ku rogo gi kisanga naadunga na aDezire Yekova rogoho re ya. Na Adel akpi tifuo garã sa kusa. Wa si avura du wo, ani akakuti sunge tungusapai kindi zaaza, na gipai re aundo rani tipa ani hi gaani gberãrago. Ani atona wirika Baibiri na badungu aboro nga agu yo naaida ka tona nduge tipa adunguratise si aaida ani dua wiriumba Bambu Kindo. Sidu, ani adua gu kuraha sa nitirani. Tifuo agarã fuo ani da Linapacan yo, ani adu na ngbarago ka bi aboro bangeyo adu nga 110 pati Tingida Pakpio Yesu, nga aguyo dunguyo azi bapatiza kusa.

Rogo 1986, i akedi re na sunge ku rogo gu kisanga nga ga Culion, nga gu ba dungu aboro adu na ngbataka rogoho. Tifuo gure, i amoi Adel a ni kparakpara nazakigene. Ti tonatonaha, ani aagunde agunde ka tungusapai fu agu aboro nadu na ngbataka tiyo. Ono agu abatungusipai nadu rogo gu dagbarago re akido rani nga, i aima gbia husa na ani aarengbanga ka dia gu kaza re be agu aboro nadu na ni tiyo te. Kura agi aborokaza re aamanga dunguratise kua kura wirina ni dee. Fuo bete regbo, ani adu na ngbarago ka tungusapai fu agi aboro re, na si adu ni bawenepai ka fura nayo tipa gu gaani maabangirise  du rogo Baibiri yo mbiko i aabihe nga Mbori ima ká yo gbiati kura aboro. Si adu ni pa ngbarago ka bi agu aboro naawoka nikerehe re i nidu na bakere ngbarago ka wirika gupai nga rogo kura uru sa, i nika du adu na kpotoyo ni rengberengbe he.—Rk. 5:12, 13.

Waigu ani aundo awirani tipa i iniditiyo na raka Culion yo? Sidu, Adel gbiati re ayambu paranga adegude ue Coron yo i ye ani nimangisunge na yo tipa wa ka awirani du na rengba kaa gbia ngbarago ti kura na yo gene tungusapai yo. Samuel, Shirley, gbiati agi adegude ue re agbia ngbarago ti undo kura aboro tipa i wiriki rengo, kini wirikipai na dungu agude wa Adel gbiati re aawirikapai na avungu agu agude re. Ti kura regbo sa, ani aawirikapai na ariikporo 11. Fuo bete regbo, ani atona wirika Baibiri na badungu aboro nga aguyo naamanga sonakumbatayo si ki da ti gupai nga ani du na rengba ka zaka vovo dungurati!

Ti tonatonaha, kina re nangia gu bangisa bakumba nadu rogo gu dagbarago re. Sidu, rii-basunge asana re nga, si naida mi naanungusa adunguratise fu agu abatungusipai muambe nadu Culion yo na aposo dunduko na kini mangi kina gu bangisapai re fu agu abatungusipai ribua nadu rogo gu gbaria nga Marily, nga gu ba si adia boro na asaa biata bangiri ime rogo kurungba tipa ni da yo. Tifuo adunguratise yo, ani naandu dagba abaagangara na gimi aborokporo tipa badungu asaa ka wirika Baibiri na aboro rogo gu gbaria nga Halsey.

Niyangaraha, badungu aboro agi rengo Marily yo gbiati Halsey yo si ki da ti gupai nga ani me Bambu Kindo rogo agu agbaria ue re dunduko. Wakina gu nadu rogo gu kisanga nga Linapacan, awirina gbiati abawiriki Ziazia Kekeapai asongodi gu sunge re na agu ahe nadu beyo na ki mangi badungu asunge. Gu Bambu Kindo nadu Marily yo aima rengba ka dia bange aboro nga 200 na si aima du taata tipa i kiisihe. Sidu, ani aima du na rengba ka manga bakere adunguratise yo.

Rogo 1993 ho awirani asono ni, Adel gbiati re atona gu sunge berewe nga ga biko adungurati rogo gu gbata nga Philippines. Fuoho rogo 2000, mi adu pati gu Sukuru Du Tipa Yugopai fu Amoyambu tipa wa ka i raba re tipa mi du ni gaha bayugupai. Mi aabingo tire nga mi re tipa ka du ni bayugupai te, ono Adel aangarasa re ti aregbo dunduko. Ri atingidi re na gupai nga Yekova nika fu gu ome afu fere mi aidaha tipa ka manga gi vovo sunge re. (Frp. 4:13) Adel aima ino  gupai nga gipai re nga rengo bambiko ri aamanga gari sunge amanga wenengai si ki vura du vurũ nga ri aawoka awoka.

Rogo 2006 ho mi ada ni ni bayugupai, i abi gu kaza ti Adel nga gu nagbarasa berã boro i ayambaha nga Parkinson. Gipai re aima zigbä rani! Ho mi afu gu berãpai ni fu Adel nga si naida ani mbu gaani sunge tipa wa ka mi ngerefuo ri, ri akaragapai nga, “Mo gbata nga gu munganga gbua rengbe ka undo ka husa gimi kaza, na mi ima inoho nga Yekova nika undo rani aundo tipa ani nindu na gaani sunge kumbatayo kindi.” Tipa agarã sita, Adel andu kumbatayo kindi kaa manga gari sunge fu Yekova zanga kpakanahe. Ho si ada ni nga gene berewe beri tipa ri naandu te, ri anaatungusapai kina rii gari ngbagida gbarĩgbarĩ aboro. Ho si adu ni ni mbumbuhe furi tipa ri naafura, ri anaakaragapai ba adunguratise yo nipe ri fugo sa watadu ue. Daho ri akpi ni rogo 2013, dungu awirina nga akumba na adee nakeda gayo afugo tambuahe fu Adel tipa gu bawene kpiapai nga ga hipai ri adu na ni. Mi aima dia agarã niima susa 30 na Adel, nga guri naadu niruru ri na ki du na bakere nyemuse tiri, sidu, ho ri akpi ni, mi aye adu berewe na bakere gberãrago na kini bi tire nisare berewe.

Adel aima digo ni idi mi ndu na gimi sunge kumbatayo, sidu, mi amangi kina gupai re. Mi anye kaa mangasunge nyanyaki, na gipai re aundo re tipa ka mi naabingo tire nisare ya. Natona rogo 2014 kuti 2017, i akedi re mi ndu kaa biko agu adungurati nape pa-Tagalog rogo agu aringara adunga awirina na ranirii ka iriso Yekova ya. Tifuo gure, mi andu ka biko agu adungurati nape pa-Tagalog rogo agu aringara nga Taiwan, Amerika, gbiati Kanada yo. Rogo 2019, mi anungusi Gu Sukuru Du Tipa Abatungusipa Kindo rogo agu ariko nga ga pa-Ngirisi India yo gbiati Thailand yo. Mi ima gbia bakere ngbarago rogo agi sunge re dunduko. Mi nidu na bakere ngbarago ho mi amangasunge ni fu Yekova ti aregbo dunduko.

Rogo gu vovo asunge dunduko mi naagbiaha, mi nidu mbembedi na agu awirina mi naagbiayo, na si naadunga taata tipa mi mbu yo te. Ti ngbatunga aregbo wa gure, mi ima wirika wai ka kido kuti Yekova. Mi ima bi gako songodahe, na gipai re ima undo re tipa mi du na nyemu ka ida kuti ai ariapai rogo raka yo. Awere, mi nga kparakpara bazakigene Philippines yo. Mi ima inido tire na gimi vovo dungurati nga gu niima da fere wa agu aborokporo nasongoda re asongoda na kini ngerefuo re. Mi a na ngbarago ka bi aSamuel na Shirley i niwiriki ga nayo idapase.—3 Yo. 4.

Rengo ngaha nga, mi ima gbia tire na dungu aasada rogo gimi raka yo, kodihe na bi bawene diare ri nirungo na ki kpi be kere kaza. Si aida aida a mi inidi tire na dungu apai. Ono wa vura duhe wo, mi ima bi gupai nga Yekova “aturã nga na ani wa sa te.” (Amo. 17:27) Be Yekova ‘agurongo’ ti songoda gako amoyambu gbiati nyakasa yo te, zavura rogo agu agbaria angenga aboro rogoho ya. (Yes. 59:1) Yekova nga gimi Mbia nga aima du na mi rogo gimi raka naabaha dunduko, na mi na bakere tambuahe fuko. Mi aadunga nisare te.