YA MO mo agbianga tiro na kpakarapai na ka boro adunga ho ka undo ro ya? Ani naraka rogo “gbegberẽ rago” nga gu rengbe ka sarani rago gberẽ tirani na ani kini bi tirani nisarani. (2 Tim. 3:1) Ono tie, si aidanga ani mangipai kuti agu akpakarapai ani agbia tirani na ni rogo raka yo nisarani te. Baibiri nape gupai nga, ndikidi abakure ima rengba ka undo ni bakerehe ho du ani ni rogo “gberãngbi” watadu ni fudifudi rani.—Snz. 17:17.

Gu mokedi nangia Pauro anaandu nunguro na bete abakureako ti ngba gako sunge ni mokedi na i aima undo ko rogo dungu agene yo. (Koro. 4:7-11) Ho Pauro adu ni bambukiso yo Roma yo, abakureako amangi agu asunge ko aarengbanga ka mangaha nitiko ya. Ni kpiapai, Epafuradita andu na agu ahe fu Pauro si aaidaha nga gu agu awirina nadu Firipoi yo akedihe. (Frp. 4:18) Tukiko anaaye na awaraga fu Pauro rogo adungurati ni bakiakia. (Koro. 4:7) Mbiko abakurea Pauro aundo ko, ko adu na rengba ka ngarasa adungurati zavura ho i azinahe ni fuko nga ka ko guari nga kporo ya na kusa ho ko adu ni bambukiso yo. Waigu rengbe mo kadu ni ndikidi bakure areme?

Awirina kinaho areme niima yugu gupai abakure narengbe ka mangaha tipa ka undo akurayo. Elisabet nga nazakigene Sepania yo asakipa wai wirina ni dee aundo ri ti kpakarakpakara aregbo. Ho i abi na Elisabet ni na kere kansa, gu wirina re anaakeda kekeapai nga ga ngarasaro du mburuhe rii agu averesi nga ga Baibiri furi. Elisabet aya, “Ho mi abi gari kekeapai ni, mi adu na ngbarago ka ino gupai nga boro kinaho naberãpa re aberã, na mi agbia ome ka manga gupai si aaida mi mangihe.”—Snz. 18:24.

Ani ima rengba ka nyakasa gaani pabakure na akuarani aidipase ni songoda ani yo rogo agu asunge nga ga dungurati. Ni kpiapai, mo ima rengba kafu tiro ka gasa sosono wirina na ũnduge ku ba adunguratise yo watadu gene tungusapai yo. Ka mo undo yo ngba agene wa gure, mo ima rengba ka ngarasayo na i ki ngarasi ro a. (Rom. 1:12) Ono tie, gene be kura aKristano tipa i guari kporo ka mera te. Waigu rengbe ani ka undo yo?

Gu kura awirinarani kinaho adunga gene beyo ka ndu tipa adunguratise ku Bambu Kindo yo ya, ni kpiapai, mbiko i nawoka nikerehe. Gure nga gu bangisapai nadu tipa wirina nga David, nadu na kansa tiko. Tipa adiwi niima susa sita, ko aagbia dawa tipa gako kansa. Tipa bagizo gu regbo David aagbia dawa vuruhe yo re, ko gbiati diako nga Lidia, aamanga adunguratise kina kporo yo.

Gini undo i agbiaha be abakureayo rogo dungurati? Tingbafuo adunguratise ni basasa, bete aboro Bambu Kindo yo animangi ome tipa ka fura na David gbiati Lidia rogo vidio yo. Kurigure, ho David na Lidia anifu akaragapai ni ba adunguratise yo, awirina  anikedi kekeapai fuyo tifuo dunguratise kini pe gupai fuyo nga i niima gbia ngbarago ti gayo akaragapai. Gipai re asa David na Lidia i du wai? David na Lidia aabingo tiyo gbe nisayo te.

Isoke, ani ima rengba ka manga mbakadaapai tipa ka kura gene tungusapai yo na gu wirina adunga na rengba ka guari kporo ya. Ani ima rengba ka manga bete ariapai rogo agu apai yo ani amangaha na aˈuru dunduko tipa ka mangasunge na yo. Ngba gi gene re, ani nayugoho fuyo nga bangirani agonga tiyo te. (Snz. 3:27) Isoke, ani ima rengba ka manga dezirepai na yo ni kekapai na yo watadu rogo aterefuni. Abaakumba ima rengba a ka manga mbakadapai tipa agu adunguratise nga ga tungusapai rogo vidio. ADavid na Lidia adu na tambuahe tipa gupai nga, gayo dungurati aima manga gi mbakadapai re. David nape gupai nga, “Pa du ani gbua na gaani badona nga ga tungusapai tipa wiri guru sakapai na kparakpee adu ni bakere pa ngarasaro furani.” Ti kura aregbo, mo ima rengba ka sana wirina nga kumba watadu dee nga gu ni arengbanga ka guari kporo ya ka inoho beni singia mo rengbe ka ye na bawiriki Ziazia Kekeapai ku kpuni yo tipa oni wirikipai yo na ni.

Ho ani adia regbo ni na agu awirinarani ka guaringa kporo ya, ani naye ka inoyo na gu wene asino du tiyo, na ani ki da ni mbembedi abakure. Ni kpiapai, ho ani amangasunge tungusapai ni na ngbatunga agu abatungusipai re si naida ani bi wai i amangasunge na Fugo Mbori rogo birĩ yo ka ziongbadu aboro yo, si nawiraha wa, ani ima rengba ka mbeda gbe na yo susi gu ni du mbata. Mo ima rengba ka manga vovo abakure ho mo aundo awirina ni i ndu tipa tungusapai na adunguratise.—2 Kor. 6:13.

Pauro agbia wasa ho ko adu ni na gu bakureako nga Tito. (2 Kor. 7:5-7) Si ni wenepai kaa pe afugo ngarasaro fu awirinarani. Ono gu kpiapai nga ga Tito nayugo gupai furani nga ani ima rengba ka fu ngarasaro fu awirinarani ho ani adia regbo ni wa sa na yo na ho ani amanga agu apai ni rengbe ka undo yo.—1 Yo. 3:18.

Agu wirinarani du Russia yo ima maa bawene kpiapai furani ni songoda yo akurayo. Oni bingo gu kpiapai nga ga Sergey na diako nga Tatyana. Tifuo abanzengere ta rogo gayo bambu, i adi yo tipa ka sasana yo bambu ngbanga yo. Tatyana i ambu ri mbata tipa ri ga ku kporo yo. Sergey aya: “Ho Tatyana ada ni kporo yo, kura wirina sa ni dee adu na wingbaduse aye ka bi ri. Nibasa, dungu awirina aye na ki undo rani ka giriso gaani bambu tifuo aborisi ta rogo gaani bambu.”

Sergey agbia kurapai kuti ni nga: “Mi aima digo ni kpinyemu Asanza 17:17, nga gu naya: ‘Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.’ Ti regbo gi rungosiro re, mi ima ida na undo be abakure ni bakerehe. Mi ima wirika gupai nga agu afugo du rogo Asanza 17:17 nga rengo. Yekova ima fu agu abakure fere nga aguyo naima du na wingbaduse na niima undo.” a

Ani naida na gu undo nga ga abakurearani awere ti regbo akpakarapai. Ani nika ida na ni ni bakerehe ti regbo bakere gberãngbi. Sidu, ani asadi ka manga ome awere ka du ni ndikidi abakure!—1 Pet. 4:7, 8.