1. Tipagine duhe ti ni ni kpakarakpakaraha ka ino gupai boro aida ka pehe ho ni aya ni wẽ ni ima mbupai foro?

 “MI IMA MBUPAI FORO.” Gi fugo re ima rengba kadu ni bakere pa wasa ka mo ini gupai nga mo ape gupai watadu amangi gupai nga gu naba gberãrago ti boro! Ono rogo gu fugo yo nga “Mi ima mbupai foro” nzunzu nga gine? Si ima rengba kadu nga gu boro re naya oni kindi nga wene abakure. Watadu gu boro re naya ni aidanga ka fura tipa gupai re berewe te, ono gaoni pabakure adunga berewe wa gu si adu mbata te. Aboro nidu na aberãpai ni bakiakia ho i naaya ni wẽ i ima mbupai foro.

 2. Waigu i nafura tipa ga Yekova mbupai rogo Ziazia Kekeapai yo? (Oni bi rukutu kekeapai a.)

² Gu gene Yekova ambupai furani ngbaha nga kpakpa aboro kia ti gu gene ani ambupai ngbaha fu akuarani. Boro ho rengbe ka mbupai furani wa gu Yekova ambupai furani te. Bake papara Atambuahe ape gupai tipa Yekova nga: ‘Pa vuboro ti ingapai du be ro, ya i nigunde ti ro.’ a (Tam. 130:4) Nirengo, ga Yekova mbupai nga ndikidi ‘pa vuboro ti ingapai.’ Ko du nga gu boro nayugo gupai furani ndikidi mbupai ayugoho. Rogo gu kura averesi nga gu du rogo Kuru Ndiko, abake Baibiri afura tipa gu gene Yekova ambupai ngbaha ni manga yo sunge na gu fugo ka i amanganga sunge na ni tipa gu gene wiri aboro ambupai ngbaha ya.

 3. Waigu du ga Yekova mbupai kia ti gaani? (Yesaya 55:6, 7)

³ Ho Yekova ambupai ni fu boro, i nagbataka ga gu boro re  ingapai kusayo. Ani ima rengba kadu kindi na mbembedi pagume na Yekova. Ani na bakere tambuahe nga Yekova nambupai furani dunduko berewe na berewe.—Oni gedi Yesaya 55:​6, 7.

 4. Waigu Yekova aundo rani ani rugutirani na guhe nga ndikidi mbupai?

⁴ Ka si du nga ga Yekova mbupai kia ti gaani, waigu tie rengbe ani nga kpakpa aboro ka rugatirani na guhe nga ndikidi mbupai? Yekova namangasunge na bawene akpiapai tipa ka undo rani ani rugutirani na pa wai ko ambupai furani. Rogo gi kekeapai re, ani nika wisigo bete agu akpiapai re. Si nika yugo gupai furani nga ho ani amanga saberã ni, Yekova nadia gaani ingapai kusayo na ki mburani ani du ni mbembedi abakureako berewe. Wa ani nikaa sakapai tipa agi akpiapai re, ani nika nyakasa gaani nyemuse gbiati tambuahe tipa Barani nga wenesino boro na ni boro weneringise, nga guko nayugo gako mbupai ngba dungu agene.

YEKOVA NADIA GAANI AINGAPAI KUSAYO

 5. Ginipai namanga ho Yekova ambupai ni furani ti gaani aingapai?

⁵ Rogo Baibiri yo, i naaringbisa aingapai dedede kuti rõrõi tindiro. Bakindo Davide apepa gako aingapai ngba gi gene re: “Gimi irairapai fu ri re; wa rõrõi tindiro si rõi susi omere.” (Tam. 38:4) Ono Yekova navu kina agu aingapai nga ga agu aboro sa gayo berã. (Tam. 25:18; 32:5) Gu pa-Ebere i asaha nga ‘vu boro,’ rogo yo nga “ka tumba” watadu “ka dia he kusayo.” Sidu, ho Yekova ambupai ni ti gaani aingapai, ko nadia gu rõrõi tindiro re kusayo. Si nadu wa ka i ya rõrõihe du pago rani na i kini tumbaha kusayo.

 6. Baturõ wai du Yekova aba gaani aingapai kusayo?

⁶ Baibiri mangisunge na gu kura kpiapai tipa ka yugo gupai nga Yekova nadia gaani aingapai ki baha tuturũ kusayo tirani. Atambuahe 103:12 nape gupai furani nga: ‘Wa turũ ku uroyo na dioyo, wo ko naturũsa gaani tiandika ti rani a.’ Uroyo ima turo ni kerehe ti ku dioyo. Agi aba du ue re, ka si gbianga tihe te. Gipai re nayugo gupai nga, Yekova nadia gaani aingapai ki baha tuturũ gbe kusayo tirani. Gipai re nafu gu kido furani nga Yekova nambupai furani ti gaani aingapai dunduko!

 7. Waigu Baibiri asakapai tipa gupai Yekova amangaha na gaani aingapai? (Mika 7:18, 19)

⁷ Wa vura duhe nga Yekova nadia gaani aingapai ki baha tuturũ kusayo tirani, ya mo ko naka kutini kindi? Oó. Bakindo Izikiya ake gupai tipa Yekova nga: “Mo ba gimi ingaapai dunduko ku giiro yo.” (Yes. 38:9, 17) Gipai re nayugo gupai nga Yekova naba agu aingapai kusayo nga ga agu aboro sa gayo berã na ko abingo ho berewe te. I ima rengba ka mangasunge a na gi fugo re ngba gi gene re: “Mo sa [gimi aingapai] si ki du wa ka i ya si aamanganga te.” Baibiri nanyakasa kina ngbatunga gipai re rogo kura kpiapai, nga gu du ni kekehe rogo Mika 7:​18, 19. (Oni gedihe.) Agu averesi re nape gupai nga Yekova naba gaani aingapai ku dudunguro baime yo. Ti agu aregbo naadu mbata kusayo, i anaabingo guhe berewe i anaaba ha ku rogo dudunguro baime te.

 8. Da ku awere, ginipai ani nawirikihe?

⁸ Baibiri nayugo gupai ziazia nga, ho Yekova ambupai ni furani, ko nadia gaani ingapai kusayo dunduko ka si aidanga berewe ani du na gberãrago tipaha ya. Nirengo, wakina gupai Davide apehe, ‘aboro maku nga agu yo vu yo yo ti gayo ingaapai, nga agu yo dadi yo gayo gbegberẽ apai; boro maku nga gu boro Gbia ageda nga gani gbegberẽpai kuti ni ya.’ (Rom. 4:7, 8) Gure nga ndikidi mbupai!

 YEKOVA NAGBATAKA GAANI INGAPAI KUSAYO

 9. Waigu Baibiri aundo rani ani bi gupai nga Yekova nambupai furani dunduko ti gaani aingapai?

⁹ Vurube motumo tumorii, Yekova na rengba ka gbataka gu ingaapai kusayo nga ga gu boro sa gani berã. Ani bingo wai Baibiri asakapai tipa gupai Yekova amanga ha. Rogo Baibiri yo, ani nageda gupai nga Yekova na zunda gaani aingapai kusayo na ki girisi rani. Gipai re nasa gupai nga boro ingapai du ni gigiri ni. (Tam. 51:7; Yes. 4:4; Yere. 33:8) Yekova nitiko nasakapai tipa wai gipai re amanga nga: “Ka gaoni ingapai vura du ni zamba ha vurũ, si adú adu kpau wa morogumba; ka si vura zama ititi, si adú adu wa zau remu.” (Yes. 1:18) Si ima kpakara ni kerehe ka zunda zamba he kusayo ti pisi roko. Ono wa vura duhe wo, Yekova amangisunge na gi kpiapai re tipa ka kido rani na gupai nga i ima rengba ka zunda gaani aingapai kusayo si kidu ni bagigirihe ka aboro abingo ho berewe ya.

10. Waigu Baibiri asakapai tipa gu bakere gene Yekova ambupai furani ngbaha?

¹⁰ Wa gu i apehe rogo gu kekeapai nasusi, i ringbisi ingapai a kuti bape. (Mt. 6:12; Rk. 11:4) Ai gu regbo ani amanga ingapai kuti Yekova, si nadu wa ka i ya ani nadia bakere bape beko. Gako bakere marã nadu kurirani! Ono ho Yekova ambupai ni furani, si nadu wa ka i ya ko ima mbupa gako bape furani. Ko asananga rani berewe tipa gu ingapai ko naima mbupai ti ni te. Kina wai boro nidu na ngbarago ho i ambupa bape ni fu ni, ani nadu a na ngbarago ho Yekova ambupai ni furani!

11. Ginipai si ayugoho ho Baibiri ape gupai ni nga i nagbandaka gaani aingapai? (Amokedi 3:19)

¹¹ Anga gupai Yekova amangaha gbua nga ka mbupa gu bape du kurirani watadu gaani aingapai te; ko nagbandakaha kusayo. (Oni gedi Amokedi 3:19.) Tipa ka yugoho na kpiapai, mo berẽnga gupai nga boro gbahe bangiri gu marã yo mo adi ru be ni ni bape. Ono tie, aboro dunduko ima rengba ka bi agu anamba du tii gu gbagbahe yo re. Ono ka gbandaka he kusayo kia tigaha. Tipa ka yugoho na kpiapai, gu ngbatunga ime kepai aboro anaamangasunge na ni bakuru kusayo, i aima rengba ka gbandaka ha taata na ime. Boro aima rengba ka dia fiõfiõ roko na ki gbandaka kekepai kusayo. Sidu, ho i ‘anagbataka’ bape ni, si anago kusayo dunduko. Aboro aarengbanga ka bi gupai i akehe mbata te. Si anidu wa ka i ya gu bape re aadunga ho berewe te. Si ni bakere pa ngbarago furani ka ino gupai nga, anga gupai Yekova amangaha sa nga ka mbupai ti gaani aingapai te, ono ko nagbandaka ha kusayo dunduko!—Tam. 51:9.

12. Ginipai ani awirikaha ti gu kpiapai nga ga nanaga dubo?

¹² Gu kura gene kinaho berewe Yekova asakapa wai ko agbandaka gaani aingapai kusayo dunduko ngbaha. Ko aya: ‘Mi gbandaka ga samungu wa nanaga dubo, na gamo ingapai wa kina nduro.’ (Yes. 44:22) Ho Yekova ambupai ni furani, si nadu wa ka i ya ko namangasunge na nanaga dubo tipa ka õka gaani aingapai tipa gupai nga si go kusayo dunduko.

13. Waigu du ani ho Yekova ambupai ni furani ti gaani aingapai?

¹³ Ginipai gipai re ayugoho furani? Ho Yekova ambupai ni furani ti gaani aingapai, si aidanga ani naandu kumbatayo kindi kaa du na gberãrago tipa gaani ingapai rogo gaani raka yo dunduko te. I nambupai ti gaani aingapai dunduko vurube gu motumo Yesu afuhe. Ho Yekova ambupai ni ti ingapai, si nadu wa ka i ya ani aamanganga gu ingapai re te. Ho ani asaberã ni ti gaani aingapai, wo du Yekova ambupai furani.

 YEKOVA NADIA RANI NI MBEMBEDI ABAKUREAKO BEREWE

14. Tipagine si aida ani du ti ni na gu kido nga Yekova nika mbupai ambu furani dunduko? (Oni bi asura.)

¹⁴ Ho Yekova ambupai ni furani, ani ima rengba kadu na gu kido nga ko nga bakurearani berewe. Si naundo rani ka ome bakere gberãrago funga rirani ya. Si aidanga ani du na gunde nga Yekova kindi na zinga na ani te na ko nangera tipa gene ka fu mbusa furani ya te. Yekova amanganga pai wa gure te. Tipagine si aida ani du ti ni na kido kuti Yekova ho ko ape gupai ni nga ko ima mbupai furani? Yekova ape gupai fu gu nebi nangia Yeremaya nga: ‘Mi avú yo ti gayo irairaapai, ka mi atíngida nga pa gayo ingapai berewe ya.’ (Yere. 31:34) Gu mokedi nangia Pauro adi apai rogo agu afugo re ho ko aya ni wẽ: ‘Ka mi atíngida nga pa gayo ingaapai berewe ya.’ (Eb. 8:12) Ono rogo gupai re yo nzunzu nga gine?

15. Ngba gini gene Yekova atingidanga pa gaani aingapai ya?

¹⁵ Rogo Baibiri yo, gu fugo nga ‘tingida’ ayugongo gupai ti aregbo dunduko nga boro natingidapa pai watadu ka berãkuriipai te. Si ima rengbe ka yugo gupai nga boro namangapai. Gu bamangi gbegberẽ apai i aˈasi ko pati Yesu ape gupai fuko nga: “Yesu, mo tíngidi pa re ho mo ka da ni ku rogo ga ngbi.” (Rk. 23:42, 43) Anga gupai ko aasana Yesu gbua tipaha nga ko berẽpa ko te. Ga Yesu karagapai nayugo gupai nga ko nika mangapai amanga tipa ka zingisa gi bamangi gbegberẽ apai re. Sidu, ho Yekova ape gupai ni nga ko atingidanga pa gaani aingapai berewe te, gupai ko aida ka pehe nga ko amanganga rani na pai berewe te. Ko afunga mbusa furani kumbatayo tipa agu aingapai ko naima mbupai ti ni te.

16. Waigu Baibiri asakapai tipa gu ranirii naye mbiko ndikidi mbupai?

¹⁶ Baibiri namangasunge na gu kura kpiapai tipa ka undo rani ani rugutirani na pa gu ranirii naye ti ndikidi mbupai. Mbiko gupai nga ani nga kpakpa aboro, ani nga ‘akanga ingapai.’ Ono ani na bakere tambuahe tipa ga Yekova mbupai, ani wakina agu akanga ‘i  nakusi yo be ingapai.’ (Rom. 6:17, 18; Yugo. 1:5) Ho ani aino gupai ni nga Yekova ima mbupai furani, ani ima rengba kadu na ngbarago wakina gu kanga i nakusi ni tii sunge kanga.

17. Waigu mbupai aye na husa? (Yesaya 53:5)

¹⁷ Oni gedi Yesaya 53:5. Baibiri nape gupai nga, mbiko ani nga aboro ingapai, ani wakina agu aboro du na kere kaza. Mbiko gu motumo tumorii Yekova afuhe vurube Wiriko, Yekova ima husa rani. (1 Pet. 2:24) Ho ani amanga ingapai ni, ani nagbarasa gaani pagume na Yekova. Ono mbiko motumo tumorii, ko ima rengba ka mbupai furani na ani ima rengba kadu na mbembedi pagume berewe na ko. Kina wai gu boro i nahusi ni be kere kaza narengbe kadu na bakere ngbarago, ani na bakere ngbarago a ho ani adu ni berewe na pagume na Yekova na ko ki idi na gaani pai berewe.

WAI DU GA YEKOVA MBUPAI NA MAAPAI KURII GAANI RAKA

18. Gini apai ani nawirikihe ti wisigo ani agu akpiapai ni bakiakia du rogo Baibiri yo nibipa ga Yekova mbupai? (Oni bi gu sanduki a nga, “Wai Yekova Ambupai Furani.”)

¹⁸ Gini apai ani nawirikihe niwisigo ani agu akpiapai du rogo Baibiri yo tipa ga Yekova mbupai? Ho Yekova ambupai ni furani ti gaani aingapai, si nadu wa ka i ya ani aamanganga ingapai te na ani ima rengba kadu na gu kido nga ko afunga mbusa furani kumbatayo te. Gipai re nambu gene furani ani du na wene pagume na gu Barani du ngbangbaturũ yo. Ono tie, ani ima ino gupai nga ndikidi mbupai be Yekova nga gu gamahe ko afuhe furani mbiko ko ima kpinyemu rani na ko nga boro gamahe, angianga mbiko ani ima rẽ na gako mbupai ya.—Rom. 3:24.

19. (a) Ginihe si aida anidu na tambuahe tipaha? (ARomo 4:8) (b) Ginipai ani nika sakapai tipaha rogo gu kekeapai ngbefuo gere?

¹⁹ Oni gedi ARomo 4:8. Ani na bakere tambuahe nga Yekova nambupai furani! (Tam. 130:4) Ono ka ani aida Yekova mbupai furani, si naida ani mangi nyanyakipa pai. Oni bingo gupai Yesu apehe: “Ka oni avu nga aboro ti gayo ingaapai ya, Baroni avú nga roni ti gaoni ingaapai a te.” (Mt. 6:14, 15) Sidu, si naida ani wiriki Yekova na kini mbupai fu kura aboro. Ono wai du rengbe ani ka manga gipai re? Gu kekeapai ngbefuo gere nika yugo wai furani rengba ani ka manga gupai re.