“Oni Ídi fu Zadapase si Mangi Gaha Ziazia Sunge”
“Oni ídi fu zadapase si mangi gaha ziazia sunge, ya oni du ziazia na baroni, ka zingo he amanga nga roni ya.”—YAK. 1:4.
ABIA: 24, 7
1, 2. (a) Ginipai rengbe ani ka wirikaha ti gu hipai nangia ga Gidiona na gako akumba naadu 300? (Oni bi gu sura du ti tonatonaha.) (b) Ringbisihe kuti Ruka 21:19, tipagine du hipai ti ni ni nyanyakipa pai?
GU VURA re aima du ni iigirã ha. Agu abanzengere nangia ga gu Basapungbanga nangia Gidiona ado fuo avurayo nangia ga aMidiano abanzengere na abakureayo rogo yuru re pitipiti tipa amairo 20 (Akirometere 32)! Ziazia Kekeapai nape gupai namangi fuo gure nga: “Gidona ki ye ku Yaradene yo, ki si ku mbiti yo, ko na agu aboro 300 naadu na ko, wa i avura du rurungbura” vurũ. Wa si avura duwo, Gidiona na gako akumba aadianga be vura te, mbiko bange avurayo anye kindi nga 15,000. Fuo aYisaraere rungo be aMidiano tipa dungu agarã, i aima inoho nga gere nga gu regbo si aaida i gbarasihe berewe te. Sidu, tipa ka nyasariipa avurayo, “i ado fuo yo kindi” na ki zi Midiana.—Abasa. 7:22; 8:4, 10, 28.
2 Ani a naso gu vura naima nyaka. Avurarani nakoda Satana, gako zegino, gbiati gaani azangarengba. Agurani kinaho niima so gi vura re tipa abawe agarã, na mbiko ga Yekova undo, ani ima du na diabese. Ono ti gu kura aregbo, ani ima rengba ka mbu be sovura kuti avurarani gbiati pido digido gi zegino re si da. Nirengo, ani ata dunga na ndikidi diabese te. Yesu afu zahe nga agurani Ruka 21:19.) Ginihe nga hipai? Ginihe nika undo rani ani hipai? Ginipai rengbe ani ka wirikaha be agu aboro naima hipai? Na wai rengbe ani ka ida “fu zadapase [hipai] si mangi gaha ziazia sunge”?—Yak. 1:4.
naraka rogo gi yangara arame re nga ani nika gbiatirani na kere aˈasada gbiati gbegberẽ arungosiro, ono ko ape gupai a nga padu ani na diabese naruriipa gaani hipai. (Oni gediGINIHE NGA HIPAI?
3. Ginihe nga hipai?
3 Rogo Ziazia Kekeapai, anga hipai nga kina kungbo hi aˈasada watadu arungosiro te. Hipai nakoda berãrani na ngbaduraniyo, watadu gu gene ani amangapai ngbaha kuti gu fudifudiapai namanga rani. Gu boro nahipai ni na wingbaduse, ru nyanyaki fu pai, gbiati zerangbaduse. Waraga sa naya hipai nga gu “sino naundo rani ani hipai na kidu na nyanyaki maabangirise. Si nga gu sino nasa boro niru ngba nduni ho wege ayani kutini. Si nga gu sino rengbe ka aria kereapai ku rogo diabese mbiko si nangera kugii gu rungo re ki bi wenepai.”
4. Tipagine rengbe ani ka ya ti ni hipai naye be nyemuse?
4 Gu hipai nga ga aKristano naye be nyemuse. (Oni gedi 1 AKorindo 13:4, 7.) Kpinyemu Yekova nafõngbaduraniyo tipa ani hi agu apai dunduko nandu na gupai ko akpinyemuhe. (Rk. 22:41, 42) Kpinyemu awirinarani nasarani ani hi gayo azangarengba. (1 Pet. 4:8) Kpinyemu gaani badiarogatise nasarani ani hi agu apai ‘nafúda’ rani nga gu agu arogotise du na ngbarago agbiatiyo na ni na si kini undo yo i nyakasi gayo ramukporo.—1 Kor. 7:28.
GINIHE NIKA UNDO RANI ANI HIPAI?
5. Tipagine du Yekova ti ni ni gu boro rẽ tipa ka undo rani ani hipai?
5 Mo ngere ku be Yekova ko fu ome foro. Yekova nga “gu Mbori nga ga [hipai] ko na wasa.” (Rom. 15:5) Anga ko rugu tiko sa na kina agu akpakarapai ani agbiatirani na ni te ono gu gene du apai rogoho rogo gaani dagbarago, gaani abipai, zavura wai ani aasona a. Ko nga gu boro rẽ tipa ka undo rani ani hipai. Ziazia Kekeapai naya: “Ko nadigisa gu nyemuahe nga ga agu yo nagunde ti ko; ko nagia gayo kpe ku ari a, ki nibatasi yo.” (Tam. 145:19) Ono wai tie, Mbori nika karaga gaani kparakpee tipa ome ka hipai?
6. A wa Yekova nakidohe rogo Ziazia Kekeapai, wai du rengbe ko ka ‘mbakada gene kura be’ asada furani?
6 Oni gedi 1 AKorindo 10:13. Ho ani asana Yekova ni tipa ko undo rani ani sovura kuti aasada, ko “ambakada gene kura be he” ambakada furani. Ya mo Yekova rengbe ka mangapai tipa ka kusa rani rogo asada kusayo? Isoke, ko ima rengba. Ono tie, dedede ko naambakada gene kura behe ambakada wa ka ani “rengbe ka hi he.” Nirengo, Yekova nanyakasa rani tipa ani rengbe kadu “na gbanga hipai ni ngbarago.” (Koro. 1:11) Na wa duhe nga Yekova ima ino wai du ani, gaani berãpai, na gaani abipai wenengai, ko arengbanga ka mbupai si mangi ki da ti gu bangiriba ani arengbanga ka nye niruru rani berewe ya te.
7. Oni yugungo kpiapai tipa ndu gupai ani aida na riahe ti ni nga ga toro tipa ka hipai.
7 Mo rigi gamo idapase na gu riahe nga ga toro. Tipa ka dakpa gu bakere bagbanga gangara nga Mount Everest, si naida boro ri riahe wenengai kisusi gu ni naarihe mbata. Ka ni amanganga ha wo ya, ni arengbanga ka hipai ki da ri gu bagangara re yo te. Teketeke a, tipa ani hipai ki da ti gaani asasa nga ga aKristano, ani duwa ka ani ri gu riahe nga ga toro wenengai ti aregbo dũ. Si naida ani zatirani aza ti kura apai tipa ka dia regbo ka gedapai, ka wisigoho, na kini ndu tipa adunguratise. Agi apai re nariga gaani idapase na ‘gu riahe nyeanye sa nyenye unga.’—Yo. 6:27.
8, 9. (a) Ringbisihe kuti Eyobo 2:4, 5, pa gbiatirani na aˈasada nakoda gine? (b) Ho mo agbia tiro ni na aˈasada, gini aboro si aida mo berẽpa yo riro yo?
Eyo. 2:4, 5) Ringbisihe kuti ga Satana berãpai, boro ho namangasunge fu Yekova mbiko nyemuse te. Ya mo Satana aˈaria tiko ti gi gako bipai re? Wagu sa te! Fuo dungu kama agarã kusa ti gu regbo i ado ko ngbangbaturũ yo, i aayamba Satana kindi nga “bakitingbanga awirinarani . . . nga gu ko nakiti ngbanga awirinarani barangba gaani Mbori na uru na yuru.” (Yugo. 12:10) Bangiri Satana aagonga ti gupai nabipa kakuti ruru mangapai te. Ko na nyemu ka bi rani ani mbu tirani fu aˈasada na ki zanga songoda ga Mbori bakere pagbia.
8 Mo tingidi gupai du tipa ga Mbori bakere pagbia. Ho ga Yekova moyambu agbia tiní ni na asada, si nakoda dungu apai angianga kina gu rungo boro arungo ho sa ya. Ni bi gu gene ani amangapai ngbaha kuti gaani asada, ani nayugoho ayugo singia ani nabi Yekova nga ko nga Bakindo Zegino dunduko. Satana nga vura ga Yekova bakere pagbia, na nasoapai kuti Yekova na agi afugo du re nga: “Agu ahe dunduko du be boro ni afu kina ha tipa ungani. Ono awere ka mo taĩ bero ki zadi [meme Eyobo] na pasioko, ko agbérã ngbako yo foro kina ku bangiro.” (9 Sidu tie, ho mo asota ni na arungosiro, mo moi kpia gipai re ku berãro yo. Satana na apekefuo ko nga adaimona naru kubanisa, kini biro tipa gupai mo nika mangaha na kini ya mo adunga na diabese te. Kubani, Yekova na Wiriko, gu mbedimbedi aKristano zingi be kpio na akutu amaraika gu ru. I nangarasa ro, kidu na ngbarago tipa gamo hipai na aˈuru dunduko gbiati wai mo asongoda ga Yekova bakere pagbia. Mo rengbe ka gia fugo Yekova si niya: “Ako wire, mo dú ni iratatamana, ka fu ngbarago fu kpotore yo, ya mi karaga pai fu gu ni nasoa pai kuti re.”—Snz. 27:11.
10. Wai du rengbe mo ka wirika Yesu ni berã mo kurii pa gu mosoro nga ga hipai?
10 Mo berẽkurii gu mosoro nga ga hipai. Ani yanga mo nandu gbanga nunguro, mo ki bi tiro mo naru bebere gu gbanga gene du tii sende yo. Mo nangera kubani na kubani ki bi kina bitimo. Wa vura duhe wo, mo na kido nga ka mo aandu andu kindi dati digido gu gene re yo, mo ima rengba ka bi imarago. Teketeke a, kura aregbo kinaho rengbe mo ka bihe nga apai ima furii omero. Zavura kina Yesu, ko aima du na gu bipai re a. “Aboro ingapai” anaape gbegberẽ apai tipa ko, niba zee tiko, na i ki imiko ngba iigirã gene ti “wagiwagi ngua,” nirengo, gere angia kere regbo fuko wa bitimo auru kpotosende! Ono wa si avura duwo, Yesu ahi agi apai re dunduko “mbiko gu ngbarago nadu fu ko ku mbata yo.” (Eb. 12:2, 3) Ko aberẽkurii gako mosoro nga ga hipai, gbe pa ziasi ko rimo Mbori na pa dia ko gbarasarimo ti ga Yekova bakere pagbia kusayo. Gu kere asada Yesu agbiatiko na ni naadu wa bitimo re adu tipa bete regbo, ono gu imarago nga ga gako mosoro ngbangbaturũ yo nika nyeanye kindi. Areme, agu asada mo agbia tiro na ni ima rengba kadu ni iigirã ha, na ni kerehe gbe. Ono mo tingidi gupai nga agu agberãngbi mo agbia tiro na ni ngbagene nyenye unga gbua tipa bete aregbo.
“AGU YO NARU NYANYAKI DATI DIGIDA PAI”
11. Tipagine si aida ani wisigi gu kpiapai ti ni nga ga “agu yo naru nyanyaki dati digida pai”?
11 Si aidanga ani hipai nisarani te. Gu mokedi nangia Petero angarasi aKristano tipa i hi gu fudifudiapai Satana aye na ni kuriyo ki ya: “Oni ká fu ko ki ru nyanyaki rogo idapase yo, niini he ya ngbatunga agi ahipai re namanga awirinaroni du rogo zegino.” (1 Pet. 5:9) Gu kpiapai nga ga “agu yo naru nyanyaki dati digida pai” nayugopai furani tipa wai ka ru nyanyaki, na kini kido rani nga ani ima rengba kadu na diabese, na kini tingidi rani nga ani adia mosoro adia tipa gaani ruru mangapai. (Yak. 5:11) Ani wisigingo bete akpiapai. [1]
12. Ginipai ani awirikaha ti gu kpiapai nangia ga agu akeruba naadu Edene yo?
12 Agu amaraika nga akeruba. Gu kpiapai nga ga wai amaraika akuru ayugu tiyo fu aboro rengbe ka yugopai furani tipa hipai zavura ho fuyo nyanyakipa sunge ni furani. Yekova Mbori “ki moi akeruba ati Edene yo ku uroyo, na basape wa mirã we si nisaki tihe asaka rogo arago dunduko kirikiri, ka banda gene ngua unga.” [2] (Bam. P. 3:24) Nirengo, i akusanga agu amaraika re tipa ngbatunga gi sunge re te! Gu kurapai berewe nga, ingapai na samungu aangianga ga Yekova bambata ringbisapai tipa aboro te. Ono wa si avura duwo, ba ho ani agedapai rogoho nga agu amaraika nga akeruba du na payo kuari akpakanahe nga gu sunge re arẽnga nayo te te. Nyemu gu sunge re aagbandaka nga tiyo i ki mbuhe te. Kuba gure, i akakuti gu sunge i afuhe fuyo na ki hipai daho gayo sunge anyasi ni, si nawira wa ti regbo gu Ime Akangbii namangi agarã wa 1,600 kusa!
13. Wai du Eyobo arengbe arengba ka hi gako aˈasada?
13 Gu iriiri bakumba nangia Eyobo. Ka si du nga mo ni fudifudi ro be gu gbegberẽ fugo bakureamo watadu boro dagba gamo aborokporo nagumbaha foro, kere kaza namanga ro, watadu mo narungo tipa kpio gamo boro, mo ima rengba ka gbia wasa ti gu kpiapai nga ga Eyobo. (Eyo. 1:18, 19; 2:7, 9; 19:1-3) Wa si avura du nga ko ainonga wari tarã gako akpakarapai ayeni te, ko aambunga tiko aˈasada di beko te. Tipagine si aadunga ti ni wo ya? Tipa pai sa nga, ‘ko agunde ti Mbori.’ (Eyo. 1:1) Eyobo adiberã ka sa ngbarago ti Yekova ti regbo wenepai na gbegberẽpai. Mbiko ga Mbori undo, Eyobo aberãkurii gu weneapai Yekova amangihe vurube gako ziazia toro. Eyobo adu na bakere kido nga Mbori nika nyasariipa gako aˈasada ho wene regbo kada ni beko. (Eyo. 42:1, 2) Na gipai re nzunzu nga gu gupai namangi. Yekova adi ga Eyobo gberãngbi kusayo na “ki fu ahe fu Eyobo ni bakere he wa bara ue susi gu naadu be ko mbata.” Eyobo araki “ki du ni gbinza ko, gako arame ki nyasi nzunzu.”—Eyo. 42:10, 17.
14. Ringbisihe kuti 2 AKorindo 1:6, wai du ga Pauro hipai aundo kura aboro?
14 Gu mokedi nangia Pauro. Ya mo mo nagbia tiro na kere asogote, na arungosi zavura be ndikidi irisombori? Ya mo bakumba nga mo rogo dungurati watadu gu babiapai ninaata ata du na dungu atindiro bero? Mo 2 Kor. 11:23-29) Ono wa si avura duwo, ko aka ka mbupa tiko fuhe, na gako kpiapai nanyakasa kura aboro. (Oni gedi 2 AKorindo 1:6.) Ho mo ahi fudifudiapai ni, mo tingidi gupai nga si nawira wa gamo kpiapai nika nyakasa kura aboro anyakasa i hipai.
berẽkurii gu kpiapai nangia ga Pauro. Ko agbiatiko na dungu “agu apai du zegi yo” be agu aboro naarungosi ko ni bakiakia, na ko anaabaka bangiriko dedede tipa adungurati. (YA MO HIPAI ‘AMANGA GAHA ZIAZIA SUNGE’?
15, 16. (a) Gini “ziazia sunge” hipai amangaha? (b) Oni funga gu kpiapai nayugo wai rengbe ani ka ‘ida fu zadapase [hipai] si mangi gaha ziazia sunge.’
15 Ga Mbori toro adu kugii Yakoba ko ya: “Zadapase [hipai] si mangi gaha ziazia sunge.” Gini “ziazia sunge” si aida hipai mangihe? Si naundo rani tipa ani ‘du ziazia [ni rengberengbe rani], ka zingo he amanganga rani ya.’ (Yak. 1:4) Asada dedede nayugo bara gaani arungbura, nga gu sino si aida ani kpuruwaha. Ono tie, ka ani hi agu asada re, agu asino rani nga ga aKristano nadu ni rengberengbehe. Ni kpiapai, ani rengbe kada na bakere zerangbaduse, tambuahe, gbiati nunga.
Ho ani ahi asada ni, agu asino rani nga ga aKristano nada ni rengberengbehe (Oni bi genewaraga 15, 16)
16 Bambiko wa duhe nga hipai namanga gu nyanyakipa sunge nga ka me rani ani da ni aKristano, ka mo kuonga gu bangua arengo nga ga Ziazia Kekeapai tipa ka nyasariipa gamo asada ya. Ni kpiapai, na ka si du nga mo nasota na gbegberẽ aberã? Kuba gupai nga ka mbu tiro fu asada, mo kpari fu Mbori tipa ka dia gu gbegberẽ berã re kusayo. Gure nika saro mo nyakasi gamo zatise. Ya mo gamo aborokporo nasoga ro tipa gamo idapase? Kuba gupai nga mo mbupa tiro fu gu sosodapai re, mo diberã tipa kakuti gamo irisombori na ngbaduroyo dunduko. Ni sangbana gipai re, mo nika nyakasa gamo kido kuti Yekova. Mo tingidi gupai nga: Ka ani aida Mbori idi na ani, ani duwa ka ani hipai.—Rom. 5:3-5; Yak. 1:12.
17, 18. (a) Oni funga kpiapai tipa hipai dati digidoho? (b) Wa ani ambeda kuti digido gi zegino re, gini kido si aida ani du na ni?
17 Ani duwa ka ani hipai, angianga tipa bete regbo ya, ono dati digidoho. Ani yugungo ho na kpiapai: Ani ya bakere kurungba ti ku ime yo. Tipa ka bata, agu aboro du vuruhe yo duwa ka i guzo ime ku pangba di yo. Ka ome boro bati mbembedi ku pangba di yo, kerepai namanga ni kina wai ka si nimangi gu boro omeni ni bati bebere ime yo. Teketeke a, ani di nga berã adia tipa ka hipai daho ani kada ni rogo vovo zegino. Gaani raka naruriipa gaani hipai. Ani na gu bipai gu mokedi nangia Pauro adu na ni naya bara ue wẽ: “Ani arungbura nga te.”—2 Kor. 4:1, 16.
18 Ani na kido nga Yekova nika undo rani aundo ani hipai dati digidoho. Ani ima ida kuti gupai Pauro apehe rogo ARomo 8:37-39 nga: “Ani nadia adia be agi apai dũ re susi mbiko gu ko nakpi nyemu rani. Mi ini aina ni rengo ya kpio, na unga, na amaraika, na angbi, na agu apai du awere, na agu apai nikaye, na atandu, na ari yo, na dudungura rago, na kura ũzegino, ka si kpara nga rani ti ga Mbori nyemuse du rogo Kristo Yesu yo nga gaani Gbia te.” Nirengo, aregbo kinaho rengbe ani ka mbu. Ono ani hinga pai ahi dati digidoho, wa ka i pepai tipa rani wa gu naadu tipa Gidiona na gako akumba nga: “I ado fuo yo kindi.”—Abasa. 8:4.
^ [1] (genewaraga 11) Ka oni wisigi gu pangbanga du tipa ga Mbori aboro ti gi gaani regbo re, si ima rengba ka nyakasa roni a. Ni kpiapai, gu buku nga Yearbook nga ga 1992, 1999, na 2008 na atingidapai rogoho tipa agu awirina du Ethiopia yo, Malawi yo, na Russia yo nga gu nanyakasa gaani idapase.
^ [2] (genewaraga 12) Ziazia Kekeapai afuranga tipa gu bange akeruba i afu gi sunge re fuyo te.