1, 2. Gini kpakarapai Yepeta gbiati wiriko agbiatiyo na ni?

GU Bakabangirise ri adu na ni ima nyasa. Gi paranga degude re na bakere ngbarago ka bi bari wa ko ayego ba vura yo, ri nazubo ka fu sene fuko na bakere ngbarago tipa gu diabese ko adu na ni ba vura yo. Kuba gupai nga ko du na ngbarago ki tona ka bibia na kini dogbere na ri, ko siri gako roko vura na ki kpari ki ya: “Ako wire! Mo payasi pa re gbe mi ni fudifudi re be ro.” Tingbafuo gure ko ki pe gupai naˈaria gari raka nyeanye kindi, na ki gbarasipa gu maabangirise ri adu na ni nga ga gari raka. Ono tie, wa si avura duwo, ri aakapa nga te, ri afu wene karagapai, na ki ngarasi bari ko ndu kumbatayo ka manga gupai ko akidopa mangaha fu Mbori. Afugo ri nayugo gu bakere idapase ri adu na ni. Ri adu na kido nga guhe Yekova asanahe tipaha ni wenehe tipa ri. (Abasa. 11:​34-​37) Bari adu na bakere ngbarago mbiko ko ima ino gupai nga, padu wiriko na nyemu ka mangapai kuti gu diaberã ko adihe nasa ngbarago ti Yekova.

² Yepeta na wiriko aagunde ti Yekova na i adu na kido kuti gu  gene mangaapai nga ga Yekova, zavura ho si adu ni ni kpakarakpakaraha. I aima du na kido nga pa Mbori idi na yo nyakipaha ti agu apai i ambupaha.

3. Tipagine gu kpiapai nga ga Yepeta na wiriko narengbe ka undo rani ti ni areme?

³ Ani ima inoho nga si ni taatapai dedede ka nye ni ruru rani fu Yekova te. Gu rengo duho nga si naida ani “so vura zaza tipa gu idapase” du ani na ni. (Yuda 3) Tipa ka undo rani ani mangihe wo, ani wisigongo gu kpakaraapai Yepeta na wiriko agbiatiyo na ni. Wai du i anye ni ruruyo fu Yekova?

4, 5. (a) Gini zinahe Yekova afuhe fu aYisaraere ho i arimi ni ku rogo Ringara Mokido? (b) Ringbisihe kuti Atambuahe 106, ginipai namangi aYisaraere mbiko gayo basasangba?

⁴ Auru dunduko aYepeta na wiriko anaatingidapa gu gbegberẽ sangbanapai naye mbikopa zanga du ni ruruse fu Yekova. Agarã wa 3000 kusayo, i afu zinahe fu atitayo nga i runosi agu apagano naadu rogo Ringara Mokido. (Pa Rug. 7:​1-4) Pa zanga du aYisaraere na giasangba asayo i di gu ingapai nangia ga aKanano, na si ki sayo i zi ti gu gbina nga ga kungbo ambori, na i ki tona ka manga wasiwasi mangaapai.​—⁠Oni gedi Atambuahe 106:​34-​39.

⁵ Gu samungu re asa gupai nga ka Yekova bandanga yo berewe ya. (Abasa. 2:​1-3, 11-​15; Tam. 106:​40-​43) Nairiwo wai si adu ni kpakarapai fu agu aborokporo naagunde ti Mbori tipa i nye ni ruruyo fu Yekova rogo agu agarã re! Wa si avura duwo, Ziazia Kekeapai nayugo gupai nga ruru aboro adu kinaho wa Yepeta na wiriko, Erikana, Ana, na Samuere, nga agu aboro naima diaberã tipa Yekova idi na yo.​—⁠1 Sam. 1:​20-​28; 2:​26.

6. Gini ngbatunga apai nga ga zegino duho areme, na ginipai si aida ani mangihe?

⁶ Ani naraka rogo gu zegino aboro aberã na kini mangiapai kina wai si adu rogo gu ringara Kanana naadu mbata, i anaataasapa kodaba na zuu na kini nyakasipa nyemu aũzegino. Yekova ima fu azahe furani wakina gu ko afuhe fu aYisaraere tipa si banda rani ti ngbatunga agu apai re. Ya mo ani awirikapai ti gu aingahe nangia ga aYisaraere re? (1 Kor. 10:​6-​11) Si naida ani mangi ome tipa ka dia gu ngbatunga aberãpai kusayo duwa ga aboro Kanana rogo gaani raka yo. (Rom. 12:⁠2) Ya mo ani namanga ome tipa ka mangaha wo?

7. (a) Ginipai ga Yepeta aboro amangiko na ni? (b) Gako mangapai adu wai kutini?

⁷ Ti rago Yepeta, ga aYisaraere basasangba asayo i da ni akanga fu aFereseto gbiati aAmono. (Abasa. 10:​7, 8) Ono tie, ga Yepeta akpakarapai ayengo kina be gu rikaaboro nangia avurako sa te ono si aye a be awirinako gbiati agu abarumbatayo nangia ga aYisaraere yo. Kpihe gbiati sogote afõngbadu awirinako yo i do ko kusayo, na ki ka na gako rengo nga ga dia aũkumbo wa ko angia bambata gude. (Abasa. 11:​1-3) Yepeta aima ká ka mbu gi gayo gbegberẽ mangapai re si fu rii gako bipai. Kuba gupai nga imisiri ngbaduse sako ko zanga degatuko sa gu zungadihe nangia ga abaakumba tipa undo, ko aye ki undo yo. (Abasa. 11:​4-​11) Ginihe si awira wa si nafõngbadu Yepeta yo ko mangipai wa gu boro naima nyaka rogo toro yo?

8, 9. (a) Gini bangua arengo naadu rogo ga Moize aNdiko yo si awira wa si naundo ga Yepeta? (b) Ginipai paha anyaki gbe fu Yepeta?

⁸ Anga Yepeta angia kina nyanyaki basovura sa te, ko angia gu boro naima ino wai Mbori anaamangapai na Gako aboro. Pa ino Yepeta wai Yekova anaamangapai na aYisaraere asako ko ini gupai du ni ruruhe gbiati gu du ni irairaha  bangiri Yekova. (Abasa. 11:​12-​27) Gu ga Mbori bangua arengo naadu rogo ga Moize aNdiko yo aima mbakada ga Yepeta berãpai gbiati ngbaduko yo. Ko aima ino gupai nga Yekova aidanga na kpipai te; kuba gure, Mbori aaida na gupai nga gako aboro kpinyemu akurayo. Gu ndiko re ape gupai a nga si aidanga boro zanga undo kurani te, zavura gu boro ‘nasoga’ ni a te.​—⁠Oni gedi Gate 23:5; Pa Amotumo 19:​17, 18.

⁹ Si nawira wa gu kpiapai nangia ga ruru boro wa Yosefa nainipai fu awirinako wa i avura “nisogo ko asoga,” aima du na maapai kurii ga Yepeta mangapai. (Bam. P. 37:4; 45:​4, 5) Berãkurii ngbatunga akpiapai wa gure aima rengba ka undo Yepeta ko sia gu gene mangapai naangba angba ti Yekova. Zanga kapa, gu mangaapai nga ga awirinako aima imisa ko gbe, ono ko aidanga ka mbu mangasunge fu Yekova na fu gako aboro te. (Abasa. 11:⁠9) Pa so Yepeta vura tipa ka songodapai kubara Yekova yo adu ni nyanyakipa pai fuko kisusi agu akpakarapai ko adu na ni. Ko aima diaberã tipa ka nye niruru ko fu Yekova, na sangbanaha adu ni wenehe fuko na fu kura aboro.​—⁠Eb. 11:​32, 33.

10. Wai du rengbe ani ka mbu ga Mbori arugute si undo rani ani mangi wa aKristano areme?

¹⁰ Ya mo ani ambu ga Yepeta kpiapai si undo rani? Si rengbe kadu nga ani aima du na gberãrago watadu kuarani Kristano aima manga furani gbegberẽ. Kangia wo duhe, si aidanga ani mbu ngbatunga agu akpakarapai re si ka na ani ti ye kuba adunguratise yo watadu ka mangasunge fu Yekova na kini mangipai rogo dungurati na omerani dunduko te. Ni wirika ani gu kpiapai nangia ga Yepeta, ani mbu agu arugute nga ga Mbori si undo rani ani dibe gu gbegberẽ apai ani agbiatirani na ni na kini ndu kumbatayo na manga weneapai.​—⁠Rom. 12:​20, 21; Koro. 3:​13.

11, 12. Gini kidohe Yepeta amangihe, na si aakoda ginihe?

¹¹ Yepeta aima inoho nga ko aaida aida na ga Mbori undo tipa ka kusa aYisaraere be aAmono. Ko akido Yekova nga ka ko undoko ko du na diabese, ko nika fu “zozo motumo” fu Yekova, nga gu bambata boro nika ye kpuko yo ho ko nika karagatiko ni ba vura yo. (Abasa. 11:​30, 31) Gu motumo re aakoda ginihe?

¹² Pa fu aboro ni zozo motumo nga gbegberẽpai bangiri Yekova. Rogo gi gene re, si ziazia nga Yepeta aberãnga ka fu boro ni motumo te. (Pa Rug. 18:​9, 10) Rogo ga Moize aNdiko yo, i naafu zozo motumo gbe fu kina Yekova sa, a wa gopai ayugoho, si adu nga Yepeta nika fu gu boro re ni mangisunge fu Mbori. Gi kido re aayugo gupai nga gu boro re nika mangasunge nyeanye kindi banye yo. Yekova aima ida na ga Yepeta kido na ki fu maku fuko ko du na bakere diabese rogo vurayo na ko ki zogo avurako. (Abasa. 11:​32, 33) Ono da du kangia gu boro ka ko afu ni ni “zozo motumo” fu Mbori re?

13, 14. Ginipai agu afugo Yepeta du rogo Abasapungbanga 11:35 ayugoho tipa gako idapase?

¹³ Oni tingidinga pa gu pangbanga ani ni fura tipaha ti tonatona gi kekeapai re. Ho Yepeta ayego ni ba vura yo, gu boro naoro ka dusio ko angia gu bangisa wiriko ko aakpinyemuri gbe! Ane du asada ayeni fuko. Ya mo ko aringbisa fugoko na ki fu wiriko tipa ri mangisunge banye nyeanye kindi rogo gari raka yo?

¹⁴ Berewe a, si nawira wa gu bangua arengo du rogo Fugo Mbori yo naundo Yepeta ko mangi ruru diaberã. Si rengbe kadu nga ko atingidipa agu afugo du rogo Gate 23:​19, nga gu naaruga ga Mbori aboro i du na  nyemu ka fu gayo wene ahe fu Yekova. Ndiko ape gupai a nga ka kumba zungahe, ni duwa ka ni mangihe. Si aya: “Ho kumba ka nikido he [ni] fu Yekova, . . . ni anisa nga gani pai wa sa te; ni animangi he kina kuti gupai naakuru ngbani yo dunduko.” (Geda 30:⁠2) A wa si adu tipa Ana, nga gu boro naraki ti regbo Yepeta, si aaida ko mangipai kuti gako zungahe, na ki ini wai surungbaha nika du fuko gbiati wiriko kumbatayo. Kura gude aadunga beko te; gu bangisa wiriko re nangia gako maabangirise, na ni gu boro ka ndu na rimoko kumbatayo na ki di kumboko Yisaraere yo. (Abasa. 11:34) Ono wa si avura duwo, Abasapungbanga 11:35 nadigiso afugo Yepeta ko niya: “Mi ape pai fu Yekova, ka mi sa nga sangbare te.” Wa vura duhe nga ko aima tumo ni bakerehe tipa padu ko ni ruruko, Yekova aima ida na ko. Ya mo ka mo arengbe ka manga kina gu bangisa diaberã re?

15. Gini mozunga dungu rani amangihe, na wai rengbe ani kadu niruru rani?

¹⁵ Ho ani akpara gaani raka ni fu Yekova, ani azungahe nga ani nika manga gupai ko akpinyemuhe na nyemuhe. Ani aima inoho nga, si aida aida ani mbupa kura gaani apai tipa ka digiso gu kidohe re. Ono tie, gaani giasangba nadu ni asadiasadihe ho i asana rani ni ani mangi agu apai ani aidanga na ni ya. Ho ani ambupa kura gaani apai ni na ki mangisunge fu Mbori zavura gupai angbanga tirani ya vurũ, gure nga ani niruru rani fuko. Agu amaku ani ka gbiaha kii kisusi agu apai ani ambupaha, ka si vura du nga si adu ni kpakarapai furani vurũ. (Mara. 3:​10) Ono ginipai naadu tipa wiri Yepeta tigari?

16. Wai du wiri Yepeta amangipai kuti ga bari zungahe? (Oni bi gu sura du ti tonatonaha.)

¹⁶ Si aadunga taata fu wiri Yepeta ri idi na surungba ga bari mozunga te. Gu zungahe re adu kia ti gu nangia ga Ana nga gu boro naafu wiiri nangia Samuere ko mangisunge banye yo ni boro Nazara. (1 Sam. 1:​11) Boro Nazara adu na kina gene beni tipa ka manga rogatise na ki batika agude. Ono si adu nga wiri Yepeta nika ngia “zozo motumo”; ri  adianga kumba na ki batika agude te. (Abasa. 11:​37-​40) Nidu ri ni wiri gu gbia na ni gu bangbembatayo fu aYisaraere naadu na diabese, i aima rengba ka furi fu wene kumba rogo gu ringara re. Ono tie, si adu nga ri nika da ni gu moyambu du na pari kusende namangasunge banye yo. Ga gi paranga degude re karagapai angia gine? Ri ayuguhe nga ri amoi ga Yekova sunge mbatayo na ki ya: “Buba, mo ape pai fu Yekova; mo mangi he fere a wa kina gu pai nakuru ngbaro yo.” (Abasa. 11:36) Ri ambupa gu gari nyemupai nga ga dia kumba na batika agude tipa ka sa ndikidi irisombori si ndu kumbatayo. Wai du rengbe ani ka wirika gi gari kpiapai re?

17. (a) Wai du rengbe ani ka wirika gu idapase nga ga Yepeta na wiriko? (b) Wai du agu afugo du rogo AEbere 6:​10-​12 angarasa roni oni mbupa kura gaoni apai?

¹⁷ Akutu paranga aboro nga akumba na adegude na nyemu ka mbupa rogatise watadu ka vunga agude tipa wiri bete regbo tipa wa ka i mangisunge fu Yekova wenengai. Sosono aboro a nafu gu gayo regbo ka i naadiaha na awiriyo gbiati atitayo tipa ka songoda sunge dudua abambu nga ga Kindo, ka ndu tipa Gu Sukuru Du Tipa Abatungusipa Kindo, na ka mangasunge Kindo rogo agu aba angenga abatungusipai rogoho ya. Agu akurayo nambupa gu kura apai ka i nimangihe tipa ka mangasunge tungusapai ti regbo gu tua nga ga Tingida Pakpio Yesu. Ngbatunga agu asunge i amangaha na kpotoyo yo dunduko re nafu ngbarago fu Yekova, na bangiriko agonga ti gayo sunge gbiati gu nyemuse i ayugoho te. (Oni gedi AEbere 6:​10-​12.) Ya mo si rengbe kadu foro taata tipa mo mbupa kura gamo apai ka mangasunge fu Yekova na kpotoroyo dunduko?

18, 19. Ginipai wiriki ani he ti gu pangbanga nga ga Ziazia Kekeapai du tipa Yepeta na wiriko, na wai du rengbe ani ka wirika yo?

¹⁸ Wa vura duhe nga ga Yepeta raka aima hi be akpakarapai, ko ambu ga Yekova berãpai si ngbe fuko kumbatayo rogo gako diaberã yo. Ko aka gu mangaapai nga ga agu aboro naadu patiko ka si moingo pai riko ya. Wa aboro avura ka mangako gbegberẽ, si arungburasingo padu ko niruru ko fu Mbori te. Pa ida ko na wiriko ka mbupa kura gayo apai aye na dungu amaku fuyo, mbiko Yekova amangisunge nayo dunduko ue tipa ndikidi irisombori ndu kumbatayo. Ti gu regbo kura aboro ambu mangapai kuti ga Mbori arugute, aYepeta na wiriko azi tiyo kutini.

¹⁹ Ziazia Kekeapai nazungodi rani nga ani “du ni awiriki agu yo du ni adikumbo akidohe mbiko idapase na hipai.” (Eb. 6:​12) Ani du nga adu wa aYepeta na wiriko ni raka ani ringbisihe na gu bangua arengo du ni yuguyuguhe rogo gayo raka yo nga: Padu boro ni ruru ni nasa mbori ko idi na ni.