1-3. (a) Wai du aKristano ayugu na ni nga i na nyemu ka ye tipa adunguratise? (Oni bi gu sura du ti tonatonaha.) (b) Gini apai ani ka sakapai tipaha rogo gi kekeapai re?

HO GARÃ Corinna adu ni nga 17, i azi nari na ki kedi ri ku rogo bataya nga ga sunge aboro Soviet Union anaakeda gayo zizi aboro kuho ni. Kusa, i azi Corinna na ki ga nari ku rogo gu ringara nga Siberia akutu amairo tuturũ ti gari ringara. I anaamanga ri wakina kanga, i anaamanga ri ti gu kura aregbo ngbaome ri ndu ka mangasunge rogo kere zere zegiyo zanga wene roko zere tiri. Wa apai avura ka gberã furi, aCorinna na tameri adiberã nga i nika yeaye tipa adunguratise.

² Ri aya, “Ani anaambu kpurani nyemu, na ki ndu ti gene gatara nga amairo 15 (Akirometere 25) tuturũ. Gatara anaaguari pangbanangbawiso ti saa ue, na ki ndu tipa asaa sita mbata fu ani zoro ka ndu ni ndue nga amairo sita (Akirometere 10) tipa kada ba dunguratise yo.” Ya mo undo ho i anaagbiaha ti gu nunguro re? Corinna aya: “Ani anaawirika Ngbaõbambu Sinziri na kini biki abia nga ga Kindo ba adunguratise yo. Si angia gupai naangarasa rani na kini nyakasi rani rogo toro yo.” Wa vura duhe nga i anaakaraga nga tiyo tipa  sunge fuo arame biata, gu boro naangerakurii sunge ainongo gupai nga Corinna na tamari pati sunge te.

³ Ga Yekova aboro aima digo nibi aregbo dunguratise na nyanyakipaha. Nibasa fuo i sigira gu dungurati nangia ga aKristano, apefuo Yesu atona ka “anye rogo . . . gayo ngbanya nyanyaki.” (Amo. 2:​42) Si nawira wakina gu gayo bangisa nyemupai re nasa ro mo nindu tipa adunguratise dedede. Wa vura duhe wo, aKristano dunduko nagbiatiyo na akpakarapai. Sunge zegino, padu boro na dungu apai tiní, mbugo be agu apai ani amangaha na auru dunduko nasaha ni mbumbupai furani tipa ani ye sa adunguratise. Ginihe rengbe ka fõngbaduraniyo tipa ani asadi ka diabe agi akpakarapai re na ki nye kuti gu sino nga ga ye sa adunguratise?⁠ ^[1] Wai du rengbe ani ka undo agu aboro ani ayugo Ziazia Kekeapai fuyo i bi ye tipa adunguratise na nyanyakipaha? Rogo gi kekeapai re, ani nika wisigopai tipa nduapai muambe nasarani ani dungurati tipa irisombori. Ani rengbe ka maa gu nduapai re ku rogo abadonaha biata nga: gu maapai duhe na ni kuriro, gu maapai duhe na ni kurii kura aboro, na gu ngbarago du Yekova na ni tipa ye ani sa adunguratise.⁠ ^[2]

4. Wai du pa dungura ani tirani sa aundo rani tipa ani wirikipai tipa Yekova?

⁴ Adunguratise nayugopai furani. Agu adunguratise nga ga dungurati naabaha naundo rani ani wirikipai tipa gaani Mbori nga Yekova. Ni kpiapai, tipa agarã wa ue kusayo, dungu adungurati naawisigo gu buku nga Draw Close to Jehovah ti regbo Gu Wisigo Ziazia Kekeapai Nga ga Dungurati. Ya mo pa wisigo agu asino Yekova re, gbiati wenewene akaragapai nga ga awirina aanyakasanga gamo nyemuse tipa gu Bamo du ngbangbaturũ yo te? Ani naakiiso gaani inohe tipa Fugo Mbori ni maa ani berãrani wenengai kuti agumbapai, mangimangi kpiapai, gbiati geda Ziazia Kekeapai. (Nem. 8:⁠8) Ni kpiapai, oni berẽnga kina pa gu vovo apai ani naakura baraha na aposo dunduko ho ani ambakada adunguratise ni na kini degeturani kuti kusa memeapai rogo Ziazia Kekeapai yo!

5. Wai du adunguratise aundo ro mo mangi gupai mo nawirikihe rogo Ziazia Kekeapai na ka mbakada gu gene mo tungusapai ngbaha?

⁵ Adunguratise nayugopai furani tipa ka mangapai kuti gu bangua arengo nga ga Ziazia Kekeapai rogo gaani raka yo. (1 Tesa. 4:​9, 10) Ni kpiapai, i namanga wisigo Ngbaõbambu Sinziri kina kuti gu zingo du ga Mbori aboro na ni. Ya mo wisigo Ngbaõbambu Sinziri afõnga kpotoroyo tipa mo wisigi gamo asasa, mo mbupai fu kuaro Kristano, watadu mo mbakadi gamo gene kparakpee te? Gu dunguratise namanga bebere poso nayugopai furani tipa sunge tungusapai. Ani nawirika wai ka tungusapai na wai ka yugo gu bangua arengo nga ga Ziazia Kekeapai wenengai.​—⁠Mt. 28:​19, 20.

6. Wai du adunguratise aundo rani na kini ngarasi rani tipa ani du nyanyaki?

⁶ Adunguratise nangarasa rani. Gi zegino re rengbe ka rungburasi berãrani, kpotoraniyo, na ki rungburasi rani rogo toro yo. Ono tipa adunguratise tigaha, si nangarasa rani na kini nyakasi rani. (Oni gedi Amokedi 15:​30-​32.) Dungu gaani adunguratise ani asakapai rogoho tipa digisidigisi sangbaanebi nga ga Ziazia Kekeapai. Ni sangbanaha, ani nanyakasa gu kido du ani na ni nga ga Yekova akidohe tipa kumbatayo nika digiso tihe adigiso. Rengo ngaha nga, anga kina agu aboro namanga gumbapai mbatayo nangarasa rani sa te. Agu awirina nafu akaragapai na kini bibia kina boro kpotoyo yo nangarasa rani angarasa a. (1 Kor. 14:26) Na ho ani fura ni na awirinarani mbata fu dunguratise na fuo dunguratise, ani nadu na ngbarago mbiko ani na agu aboro naberãpa rani aberã.​—⁠1 Kor. 16:​17, 18.

7. Tipagine duhe ti ni ni nyanyakipa pai kadu pati adunguratise?

⁷ Adunguratise nasarani ani gbia gu undo nga ga ziazia toro. Yesu Kristo aya:  “Gu ni du na tu gia ha ti ni, ni gí gu pai Toro nagumba fu akanisa.” (Yugo. 2:⁠7) Nirengo, Yesu nangbembatayo fu gu dungurati nga ga aKristano vurube ziazia toro. Ani naida na ziazia toro tipa si undo rani wa ka ani sovura kuti aˈasada, si ngarasi rani na ki mbakadi rani tipa tungusapai, na si undo rani tipa ani mangi wene adiaberã. Ya mo si aidanga ani mangi ome nyanyaki ka zanga kpa ti adunguratise wa ka ani gbia gu ziazia toro re te?

8. Ho awirinarani abi rani ni pati adunguratise na kini degetuyo sa gaani akaragapai, na abia, wai du gipai re aundo yo? (Oni bi gu sanduki nga “Dedede, Ko Naguari ka ga Ko Kidu Wenengai.”)

⁸ Adunguratise nafu momu furani ani yuguhe fu awirinarani nga ani na kpinyemu yo. Oni berẽnga dudunguro tipa agu akpakarapai kura awirina agbiatiyo na ni rogo gaoni dungurati. Si airiwongo ka bi gupai gu mokedi nangia Pauro akehe te nga: “Ani bérẽ pa akuarani”! Pauro asakipai tipa berãpa akurani nga “ka ani hé nga dungura tirani na akuarani” ya. (Eb. 10:​24, 25) Padu ani pati dunguratise nayugo gupai nga ani nafu gaani regbo fu akuarani airisimbori, na kini berẽpa yo. Kurigure, gaani akaragapai gbiati abia ti regbo dunguratise nangarasa akuarani aDezire Yekova.​—⁠Koro. 3:​16.

9, 10. (a) Oni sakingo wai afugo Yesu rogo Yoane 10:16 aundo rani ani rugutirani na ndu gupai nyakipa dungura ani tirani na akuarani. (b) Ka ani du pati adunguratise dedede, wai du rengbe ani ka undo gu boro gani aborokporo nasogo ni?

⁹ Adunguratise nakoda rani na akuarani aidipase. (Oni gedi Yoane 10:16.) Yesu aringbisi tiko kuti babanda akandoro, na apefuoko kuti rimbasa akandoro. Oni makianga gipai re: Ka akandoro ue du ri gangara yo, agura ue kidu ngboongboorago yo, guru kini ri nvuo rogo gu kura ba, ya mo ani rengbe ka ya tipa agi akandoro du bisue re ami nga rimbasa akandoro? Dedede, rimbasa akandoro nasungo kina sa vurube babandara. Wakina gure a, ani arengbanga ka pekafuo Babanda Akandoro te, ka si du nga ani kpara tirani. Si naida ani dungura tirani na gu kura akuarani aKristano ka ani aida kadu ni “rimbasa akandoro” tiibe “babanda akandoro” sa.

¹⁰ Ho du ani ni ni pati dunguratise, ani nafubee sa gu kodatise nga ga awirina. (Tam. 133:⁠1) Kura awirinarani aidipase kinaho avunguyo gbiati awirinayo naima sogayo. Ono wa vura duhe wo, Yesu akido yo nga ko nika fu agu agumeyo nga ga toro yo nikaa kpinyemuyo na kini ngerefuo yo. (Mk. 10:​29, 30) Ka oni aye tipa adunguratise dedede, oni ima rengba kadu ni aba, ana, akawiri, na adawiri fu agi awirinaroni re! Ya mo gipai re angarasanga rani tipa ani mangi ome kaa ye tipa adunguratise te?

11. Wai du paye ani sa adunguratise aundo rani ani fu guhe fu Yekova ko aida na ni?

¹¹ Paye ani sa adunguratise nafu guhe fu  Yekova ko aida na ni. Wangia Yekova Bakusirani, ko naida ani tambuako, ani taasirimoko, na kini irisiko. (Oni gedi Yugoti 7:​12.) Ho ani akpara ni, ho ani abibia ni, na kini fura tipa Yekova ti regbo adunguratise ni, ani nafu guhe fuko si aida ani fuhe fuko nga ka irisoko. Ani nabihe ni nyanyakipa momu tipa ka iriso gu Boro niima manga dungu apai furani.

12. Gini bipai du Yekova na ni ho ani agiasangba ni tipa ye sa adunguratise?

¹² Yekova naida ani gisangbako agia. Ko zinahe furani nga ka ani henga dungura tirani na akuarani ya, gbe rogo gi yangara arame re. Ho ani amangapai ni kuti agi arugute re na kpotoraniyo dunduko, Yekova na ngbarago. (1 Yo. 3:​22) Ko nabihe abi nga ani naida kadu pati dunguratise na kini bi gu ome ani amangaha tipa kadu yo.​—⁠Eb. 6:​10.

13, 14. Wai du rengbe ani ka mbeda na Yekova gbiati Yesu ti regbo adunguratise?

¹³ Paye ani sa adunguratise nayugo gupai fu Yekova nga ani naida ka mbeda na ko gbiati Wiriko. Ti regbo gaani adunguratise, gaani Bakerepa Bayugupai naruga rani vurube Fugoko nga Ziazia Kekeapai. (Yes. 30:​20, 21) Zavura kina gu vovo aboro naye tipa gaani adunguratise ima rengba ka ya: “Mbori du dagba roni yo nirengo.” (1 Kor. 14:​23-​25) Yekova nafu maku kurii adunguratise na gako ziazia toro na kini rugu agu ayugopai nga ga Ziazia Kekeapai namanga yo. Sidu, ti regbo gaani adunguratise, ani nadegaturani kuti fugo Yekova na kini bi wai ko angerafuo rani. Ni sangbana gupai re, ani nambeda koyo du ko ni.

¹⁴ Yesu aya: “Ka aboro dungura tiyo ue na biata ni rimore, mi du kina yo dagba yo.” (Mt. 18:20) Sidu, afugo Yekova nafura tipa gaani adunguratise. Wangia Kristo rii dungurati, ko “naata dagba” gu dungurati nga ga ga Mbori aboro. (Yugo. 1:⁠20–​2:⁠1) Oni berẽnga kuriihe. AYekova na Yesu koditiyo tipa ka ngarasa rani ti regbo adunguratise. Oni nabihe nga gini bipai du Yekova na ni ho ko abi rani ni nga ani na nyemu ka mbeda na ko gbiati Wiriko?

15. Wai du pandu ani sa adunguratise ayugo gupai fu Yekova nga ani nagiasangba agia?

¹⁵ Paye ani sa adunguratise nayugo gupai nga ani nasongoda pa ga Yekova bakere pagbia. Wa vura duhe nga Yekova nazinahe furani ani ye sa adunguratise, ko aziongo rani ngbaome tipa ani mangihe te. (Yes. 43:23) Sidu tie, si naida ani yugu wai fu Yekova ani nakpinyemuko na ngbaduraniyo dunduko na wai ani asongodapa gako zogarago. (Rom. 6:​17) Ni kpiapai, ani ima rengba ka gbiatirani na gu bairasunge naida ani mangisunge dedede ki zanga ndu tipa adunguratise. Agbia-ngbii ima rengba ka gundesi rani nga i nika zio rani, watadu ka rungosi rani ka si du nga ani nadungura tirani tipa kaa irisombori. Watadu ani ima rengba ka rimiso tirani ku rogo zambuasitise kisusi pa adunguratise. Nibi agi apai re ni basasa, si naida ani mangi diaberã: Da si aida ani mangisunge funi? (Amo. 5:​29) Ho ani asia ka songoda ga Yekova bakere pagbia ni, ani nasa kpotokoyo si du na ngbarago.​—⁠Snz. 27:⁠11.

16, 17. (a) Wai du ini ani ahe nga adunguratise adu na nyanyakipaha fu agu aKristano naadu mbata? (b) Gini bipai naadu ti Wiriba George Gangas tipa agu adunguratise nga ga aKristano?

¹⁶ Agu aKristano naadu mbata aadunguranga tiyo tipa kina wiri guru regbo ti gu regbo nangia ga gu iiriwopai namangi ti regbo Pendekote rogo gu garã nangia 33 F.B.K te. “I ki nye anye rogo ga amokedi yugopai yo na gayo ngbanya nyanyaki nikuadi kpokuta nikpari kpe.” (Amo. 2:​42) Gu pa-Giriki sayo ho nga “i ki nye anye” nayugopa gupai nga i akpatagara kutini na kini mangihe na omeyo dunduko. Si aadunga taata fu agu aKristano re tipa i niye sa adunguratise tii gu zogarago  nangia ga aRomo na be gu rungosiro nangia ga ga aYudo abarumbatayo rogo pambori te. Wa si avura duwo, i kpatagara kutini.

¹⁷ Dungu ga Yekova moyambu ti gaani regbo nabi adunguratise na nyanyakipaha. George Gangas, namangisunge rogo Riigbu Bipasunge tipa agarã naima susa 22 aya: “Tipa re, dunguratise na awirina nga bakere regbo ngbarago na regbo ngarasaro. Mi naakpinyemu kada Bambu Kindo yo ni bambata boro na ki ngia yangara aboro tipa ka ga ka gene du. Mi nidu na bakere ngbarago kpotore yo tipa kaa fura na ga Mbori aboro. Ho du mi ni dagbayo, mi nadu wa mi kina kporo, rogo gu paradizo nga ga toro.” Ko agbia kurapai nga: “A wa kombasi (compass) naayugo bara nodiyo, kinawo du berãre gbiati gimi nyemupai nidu nga mi du pati adunguratise.”

18. Gini bipai du oni na ni tipa gaani adunguratise, na ginipai oni nadiberã tipa ka mangaha?

¹⁸ Ya mo kina gu bangisa bipai re du oni na ni tipa adunguratise ka iriso Yekova? Sidu tie, oni diberã tipa ka hipai na ka kpatagara kuti gu ome oni amangaha tipa kadu pati adunguratise dedede. Rogo gi gene re, oni nika yugo na ni nga oni ima ida kuti Bakindo Davide naya: “Ako Yekova, mi nakpi nyemu vuru ga bambu yo, na gu ba du ga taarimo rogo[ho].”​—⁠Tam. 26:⁠8.