Gu sunge ani amangaha fu Mbori na nyanyakipaha. Ono anga agu aboro dunduko ani atungusapai fuyo nabihe na kikiipaha te. Ka si vura du nga aboro na nyemu gu pangbanga nga ga Ziazia Kekeapai, dedede, i arengbanga ka ino ndu gupai si aida ti ni i wisigi Ziazia Kekeapai na ani te.

Gere nga gupai naadu tipa Gavin naatona ka ye tipa adunguratise; wa si avura duwo, ko aaidanga ka wirika Ziazia Kekeapai te. Ko aya: “Mi adu na kina bete inohe tipa Ziazia Kekeapai, na mi aadindiko adindiko tipa ka yugo gimi zanga inohe. Mi aagunde nga i nika nanga re, ka mi aidanga ka fu tire tipa paha ya.” Gamo bipai nga gine? Ya mo Gavin angia gu boro ka arianga berani ya? Oó! Mo bingo gu wene sangbanapai rengbe gu yugopai nga ga Ziazia Kekeapai kadu na ni kurii boro. Yekova aya fu agu aboro naadu mbata wẽ: “Gi[mi afugo] wa ndomo, wa moromoro mai ku ri wesewese nvuo.” (Pa Rug. 31:​19, 30; 32:⁠2) Gu mangapai nga ga ndomo nayugo gipai re wenengai wai rengbe ani ka undo ngbatunga aboro dunduko wenengai rogo gaani tungusapai yo.​—⁠1 Tim. 2:​3, 4.

Ndomo nidu gaha yee. Ndomo natona ka ti yeeye, ki tona ka satihe ni ime be gu uturo ime nakura ku wege yo. Afugo Yekova adu “wa ndomo” mbiko ko aafura wenengai, yee, na kini berẽpa ga gako aboro. Ani nawirika Yekova ho ani airisa gu bipai ni nga ga kura aboro. Ani nangarasa aboro tipa i berẽkurii pai ni tiyo na ki dakuti gayo digisopai. Ho ani amangapai ni wa gure, aboro ima rengba ka dia afugo rani kugume na gaani tungusapai kidu na wene sangbanaha.

Ndomo na zambuasi ahe. Gaani sunge tungusapai nazambuasi kura aboro ho ani aberãpa wai ni rengbe ani ka sonosa gayo nyemupai. Gavin ani nifura tipa ko mbata kusayo re, i aazomianga ko azomia tipa ko idi na wirika Ziazia Kekeapai te. Kuba gure, Chris nga gu wirina naatungusipai fuko, amangi apai ni bakiakia tipa ka ba nyemu wisigo Ziazia Kekeapai ti Gavin. Chris asakipai fu Gavin nga Ziazia Kekeapai na riipai behe, na ka ko ini gu riipai re, si nika undoko wenengai tipa ko rugutiko na agu adunguratise ko aye tipaha. Fuo gure, Chris ape gupai fuko nga gu sangbaanebi nga ga Ziazia Kekeapai du naasa ko ko idi kuti gupai nga Ziazia Kekeapai nga rengo. Gipai re asayo i tona ka sakapai ni dunguhe tipa digisidigisi sangbaanebi. Gi sakapai re aima zambuasi Gavin na niyangaraha ko ki idi ka wirika Ziazia Kekeapai.

Ndomo nafu unga fu ahe. Ugure anaamanga amanga rogo gu ringara nga ga aYisaraere, rago ki ni foi zanga mai tipa dungu adiwi. Zanga gu ime ndomo akusaha, rukuruku ahe arengbe ka kpi akpi. Gu ugure nga ga toro namanga amanga areme, a wa Yekova agumbaha. (Amosa 8:​11) Ko akidohe nga mbedimbedi aKristano adu “wa ndomo be Yekova” wa i nikaa atakapande gu pangbanga nga ga Kindo, nga gu abadiangbayo nga “kura akandoro” aundo yo ti ni. (Mika 5:7; Yo. 10:16) Ya mo ani nabi gu gaani wene pangbanga nga ga Kindo na nyanyakipaha wa gu gamahe Yekova nafuhe tipa ka batasa raka rani wa ndomo?

Ndomo nga maku be Yekova. (Pa Rug. 33:13) Gaani sunge tungusapai rengbe arengba kadu ni maku fu agu aboro na ida na ni. Gavin aima gbia agi amaku re. Vurube gako wisigo Ziazia Kekeapai, ko aima gbia akaragapai sa gako asanahe dunduko. Ko asono kumbatayo ni ipo na ki zi bapatiza na awere, ko na diako nga Joyce natungusa gu wene pangbanga nga ga Kindo ti aregbo dunduko.

Berãkuriipa ndomo rengbe ka ngarasa rani tipa ani bi sunge tungusapai na kikiipaha. Rogo gini gene? Togoro ndomo sa arengbanga ka manga bakerepai te, ono ka i dungura atogoro ndomo nga amirioni si rengbe ka zirĩ sa sende azirĩ sa. Wakina gure, gu ome ani amangaha ni basasa gene tungusapai yo, si arengbanga kadu wa bakerepai te. Ono tie, gu ome ga Yekova aboro amangaha dunduko nafubee sa manga dezirepai “fu arikaaboro dunduko.” (Mt. 24:14) Ya mo gaani tungusapai rengbe kadu ni pa maku be Yekova fu kura aboro? Wo duhe, mbiko gu pangbanga ani atungusaha wakina ndomo du yee, na zambuasi ahe, na kini fu unga!