1. Wai du rengbe ani ka giasangba Mbori gbiati gu nga ga abazogo?

FUGO MBORI naya furani wẽ ani gisangba abazogo, wa vura duhe wo, si nayugopai a furani nga si naida ani gisangba Mbori kisusi ga aboro. (Amo. 5:​29; Tito 3:⁠1) Ya mo agi apai re natagbagatihe? Wagusa te! Gu bangua rengo du tipa giasangba yo naundo rani ani rugutirani nayo na kini degeturani kuti gayo azinahe. Yesu afugu pai tipa gi bangua rengo re ho ko ayani wẽ: “Agu ahe nga ga Kaisara tie, oni nifú kina ha fu Kaisara; agu ahe nga ga Mbori oni nifú kina ha fu Mbori.”⁠ ^[1] (Mt. 22:21) Wai du rengbe ani ka pekafuo gi ga Yesu rugapai re? Ani nara ni gorani fu gu pagbia nga ga agu abazogo ani araka tiibeyo ni giasangba gayo andiko, irisa abanyaki, na kini fu kufuta. (Rom. 13:⁠7) Ono tie, ka agbia-ngbi pe gupai furani nga ani basasangba Mbori, ani nakaha aka ngba wene gene.

2. Wai du rengbe ani ka yugoho nga ani angbenga na boro nibipa birĩ zogarago te?

² Ani nafu guhe nga ga Mbori fuko ni zanga rimiso tirani ku rogo agu apai nga ga birĩ zogarago. (Yes. 2:⁠4) Rogo gi gene re, ani asogote nga gu zogarago nga ga aboro Yekova nambugene fuhe si nimangisunge te; ani asongodanga agu apai nga ga birĩ zogarago watadu ka songoda agu apai nabipa ringara a te. (Rom. 13:​1, 2) Ani angarasanga  aboro birĩ zogarago, ka ba waraga fuyo, watadu i ba waraga furani tipa agu amakatabu nga ga zogarago te, watadu ka aria zogarago a te.

3. Tipagine si aida ani zanga rimiso tirani ti ni ku rogo birĩ zogarago?

³ Ziazia Kekeapai nafu dungu nduapai Mbori aidanga ti ni ani rimisi tirani ku rogo birĩ zogarago ya. Ni kpiapai, ani napekafuo agu ayugopai na kpiapai nga ga Wiriko nga Yesu Kristo, ni zanga du ani ni “aboro zegino” na kini ne agu apai nga ga birĩ zogorago gbiati avura. (Yo. 6:​15; 17:16) Si naida ani zanga rimiso tirani ku rogoho tipa wa ka ani du ni ruru azogo nga ga ga Mbori Kindo yo. Ka si adunga wo ya, ani ru wai kadu na gigiri sangbakpotoseyo baraho ani atungusa wene pangbanga ni nga, kina ga Mbori Kindo sa rengbe ka nyasariipa agu akpakarapai nga ga aboro? Kurigure, ani wa gu aziree apambori nakparaka gayo aboro ni rimiso yo tiyo ku rogo birĩ zogarago te, ndikidi irisombori nabanda gaani kodatise nga ga awirina du rogo zegino dunduko ni undo rani ani zanga rimiso tirani ku rogo agu apai nga ga birĩ zogarago.​—⁠1 Pet. 2:​17.

4. (a) Wai du ini ani he nga si nika daada ni kpakarapai tipa boro zanga rimiso tiní ku rogo birĩ zogarago? (b) Tipagine si aida ani mbakaditirani ti ni awere tipa ka zanga rimiso tirani ku rogo birĩ zogarago kumbatayo?

⁴ Agu apai nga ga birĩ zogarago ima rengba kadu wenengai rogo gu ba ani araka rogoho, na ka si akanga na ndikidi irisombori ya. Ono wa vura duhe wo, wa gi ga Satana zegino re ambeda kuti digidoho, si naida ani du na maabangirise nga gupai nabipa zanga rimisotise ku rogo birĩ zogarago nika kio kina kumbatayo. Zegino ima hi be “aguaurundika” watadu azanga giatise na “airanyakari,” sidu, si nika kparaka aboro kina kumbatayo. (2 Tim. 3:​3, 4) Rogo gu kura aringara, awirinarani ima gbiatiyo na tunguotunguo akpakarapai nibipa zanga rimiso yo tiyo ku rogo agu apai nga ga birĩ zogarago mbiko wai apai aˈariatihe ni ipo rogo gayo ringara nibipa birĩ zogarago. Ya mo oni nabi ndu gupai si aida ani nyakasi gu gaani diaberã nga ga zanga rimisotise ku rogo birĩ zogarago ti ni? Kangia ani nika sungo daho ani nika gbiatirani ni na kpakarapai, ani ima rengba ka mbupa gaani idapase na ki rimisi tirani ku rogo birĩ zogarago. Sidu tie, wai du rengbe ani ka mbakadatirani tipa ka zanga rimiso tirani ku rogo zegino? Ani wisigingo bangua apai biama nika undo rani tipa ani du na diabese.

5. Ga Yekova bipai nga gine tipa ga aboro zogarago?

⁵ Gu bambata banguapai naundo rani ani zanga rimiso tirani ku rogo birĩ zogarago nga kadu na gu bipai du Yekova na ni tipa ga aboro zogarago. Wa vura duhe nga kura azogorago ima rengba kadu wa si ni ruruhe, anga ga Yekova ringbisapai nangia aboro zogo tiyo te. (Yere. 10:23) Ga aboro zogarago nakiisopa aringara, si kini ye na kparakaro ku dagba aboro. Zavura kina gu wene bazogo, ni arengbanga ka nyasariipa agu akpakarapai nga ga aboro dũ te. Kurigure, naatona rogo 1914, ga aboro zogarago adani vura kuti ga Mbori Kindo, nga gu nika sarangbanga ga aboro zogarago barambeda na ki gbarasihe.​—⁠Oni gedi Atambuahe 2:​2, 7-9.

6. Wai du si aida ani mangi fu agu aboro du na pagbia beyo rogo ga aboro zogarago?

⁶ Mbori mbugene fu gu zogarago nga ga aboro mbiko si naasada ka sa apai ni ruruhe tooni, rogo gu gene re, si naundo rani ani tungusi wene pangbanga nga ga Kindo. (Rom. 13:​3, 4) Mbori naruga rani a nga ani kpari tipa agu aboro du na pagbia beyo, gbe ho duhe ni nga gayo adiaberã ima rengba ka manga ariapai na gaani irisombori. (1 Tim. 2:​1, 2) Ani nazungodi agbia-ngbii tipa i mangiapai furani ngba wene gene a wa gu mokedi nangia Pauro amangihe. (Amo. 25:11) Wa vura duhe nga Ziazia Kekeapai nayugo gupai nga vura Mbori nga Satana na pagbia kurii birĩ zogarago, si apenga gupai nga ko na pagbia kurii agu abazogo re ni basasa dunduko te. (Rk. 4:​5, 6) Sidu tie, si naida ani bandatirani ti pe gupai nga Bakitingbanga  du namangapai na gi bazogo re. Kuba gure, ho ani amangapai ni na “abazogo, [gbiati] agu yo asia yo pai fu yo,” ka ani “gúmba nga gbegberẽpai tipa boro wa sa ya.”​—⁠Tito 3:​1, 2.

7. Gini berãpai si aida ani nehe?

⁷ Ani nagiasangba Mbori nizanga ngbe ani na gu boro naru tipa i bawaraga funi, gu badona nga ga birĩ zogarago, ka si vura du vurũ nga i nasongoda pai ku bara rani yo watadu i nasogote rani. Wai du rengbe gaani kparatise ti birĩ zogarago kadu ni asadiasadihe rogo gipai re? Ani yanga aboro zingi ki niidi ka ba gu bazogo namanga gbegberẽ apai kusayo, nga gu ni ga Mbori aboro naima rungo tiibe ni. Wa vura duhe nga ani akuranga ku bangirigene nayo wa sa te, ya mo ani rengbe ka kodatirani nayo ngbaduraniyo? (Ef. 2:⁠2) Si naida ani zanga rimiso tirani ku rogo birĩ zogarago angianga kina rogo afugo rani na mangaapai sa ya, ono kpotoraniyo a.

8. Ho du he ni furani ni kpakarapai ka zanga rimisotise ku rogo birĩ zogarago, wai du rengbe ani kadu na “tatamana” ono kidu ‘zezere’?

⁸ Gu ue bangua gene rengbe ka undo rani tipa ani zanga rimiso tirani ku rogo birĩ zogarago nga kadu na ‘tatamana wakina awo, ono ki zere wakina ambipo’ ho ani agbiatirani ni na akpakarapai. (Oni gedi Matayo 10:​16, 17.) Tatamana naundo rani tipa ani ini kerepai mbuhe kindi koyo, na ani nanye zezere ni zanga mbu ani he si sarani ani mbupa gaani idapase. Ani bingo bete akpakarapai na wai rengbe ani ka mangapai kutini.

9. Tipagine si aida ani du ti ni na rugatinapai ho ani afura ni na kura aboro?

⁹ Fugodagbase. Si naida ani du na rubangirise ho aboro afura ni tipa agu apai nga ga birĩ zogarago. Ni kpiapai, ho ani tungusa gu pangbanga nga ga Kindo ni, ani ne tambua gu kura badona nga ga birĩ zogarago, ka bisirapa gaha mangapai watadu bazogo. Mo asadi ka sigira mburu gamo afugo kuti gupai irakporo naidi kutini ni gbe mo berãni kuti agu apai namanga kuba fura tipa agu apai nga ga birĩ zogarago. Fuani, mo yuguhe rogo Ziazia Kekeapai yo wai ga Mbori zogarago nika nyasariipa gu kpakarapai re nyeanye kindi. Kangia ngbatunga apai kuru wa gu nabipa dia kumba kurani watadu dia dee kurani, watadu bagude vuse yo, mo songodipai kubara ga Mbori arugute yo na ki sakipai funi tipa wai ani apekafuo agu arugute re rogo gaani raka yo. Ti regbo sakapai, ka mo rimisingo tiro ku rogo agu apai nabipa zogarago ya. Anga gaani sunge du ngaha tipa ka diaberã tipa gu ngbatunga rugute si aida aboro mangipai kutini, i mbuhe, watadu i ariaha te, na ani azomianga kura aboro tipa i idi kuti gaani abipai a te.

10. Wai du rengbe ani ka zanga rimiso tirani ku rogo birĩ zogarago ho ani ageda apangbanga ni watadu ka bihe rogo terevizioni?

¹⁰ Aũgbandaka apangbanga. Agu apai aboro atakapandehe wa “pangbanga” si dedede naangbe na kina gu kura aboro. Aũgbandaka apangbanga nidu wa gu ũsunge nga ga birĩ zogarago. Rogo gu kura aringara irangbii angera kurii aũgbandaka apangbanga, agu apangbanga du rogoho rengbe ka ngbe na kina yo, ono wa vura duhe wo, ka si du nga aKristano naraka rogo agu aringara du na ranirii, si naida i banda tiyo ti ngbe na agu apai aba gbandaka pangbanga apehe. Mo sana tiro nga, ‘Ya mo rago naangba tire ka gia fugo gu boro nafura rogo radio mbiko mi ima ida kuti gu bipai du ni na ni tipa birĩ zogarago?’ Kangia wo duhe, si naida mo degeturo kuti gu pangbanga angbenga na kura aboro ya. Ka si vura du kina wai, si naida mo umbasi wai mo adegaturo kuti agu apangbanga nga ga birĩ zogarago na ki wisigi agu apai mo agiaha na “gu wene apai” mo agiaha du rogo Ziazia Kekeapai yo.​—⁠2 Tim. 1:​13.

11. Wai du rengbe agu ahe du berani ka saha taata furani ani rimisi tirani ku rogo birĩ zogarago?

¹¹ Nyemu aũzegino. Ka si du nga ani na bakere nyemu aũzegino, gure nga ani ima rengba ka mbu padu ani ni rururani ti gu regbo du ani  rogo asada. Ruth du Malawi yo aima bi dungu aDezire Yekova i nimangi gipai re ti gu regbo i arungosi yo rogo agu agarã naatona rogo 1970. Ri ape gupai nga: “I aaidanga ka mbu gu gayo fiõfiõ raka i aarakaha te. Ani azubo na aguyo ku rogo gu kura aringara ono kusa, i ki rimi birĩ zogarago na ki karagatiyo ku kporo yo mbiko i aaidanga ka raka gu gbegberẽ raka aboro arakaha bataya yo te.” Gu kparakparapai du dagba dungu ga Mbori aboro na agu aboro re nga, ga Mbori aboro ima nye ki zanga rimiso tiyo ku rogo birĩ zogarago si ki vura du vuru nga zingo marã namanga yo watadu i ki vura zanga agu ahe du beyo dunduko.​—⁠Eb. 10:⁠34.

12, 13. (a) Ginipai Yekova aberãha tipa ga aboro zogarago? (b) Wai du rengbe ani ka ino si nga ani tona kada na bakere rukö tipa gaani ringara?

¹² Rukö. Dungu aboro naata ngbaduyo tipa rangi kpotoyo, tunga yo, asino yo, gayo gbata, watadu gayo ringara. Ono tie, ani ima inoho nga du na rukö tipa ngbatunga rani, sinorani, watadu gaani ringara na kpakarapai dagbaha na ga Yekova bipai tipa ga aboro zogarago na gu bipai du ko na ni tipa aboro. Kina rengo du ngaha nga, Mbori aidanga ani mbupa agu asino nga ga ngbatungarani te. Nirengo, padu asino aboro ni bakiakia nayugo gu iiriwo gene Mbori ambakadi aboro ngbaha. Ono wa vura duhe wo, si naida ani tingidi gupai nga, ani dunduko kina sa bangiri Mbori.​—⁠Rom. 10:⁠12.

¹³ Ka ani du na rukö tipa gu ba i avungurani rogoho, gure nga ani nakiisopa ringara, na gure nga gu bambata diandue nandu na ani sa mbupa gaani idapase. AKristano ima rengba kada ni airarukö, mbiko rogo gu dungurati naadu rogo bambata sa kama agarã kparakaro aima du dagba aKristano mbiko ngbatunga yo. (Amo. 6:⁠1) Wai du rengbe ani ka ino singia rukö ima tona ka sona kpotoraniyo? Ani yanga wirina rogo gu kura ringara fu berãpai foro tipa pai. Ya mo mo rengbe ka kaha, na ki berẽpai ti gu regbo re nibasa nga, ‘Ani naamangapai ane wenengai’? Kuba gure, ani dunduko si aida ani mangipai kuti gu rugute naya: “Gu ni bérẽ pa kura ni rogo umbasi gani berã ya ni ngba susi ni.”​—⁠Frp. 2:⁠3.

14. Wai du rengbe kparakpee ka undo rani, na gini kpiapai nga ga Ziazia Kekeapai nayugo gipai re?

¹⁴ Gu biata bangua gene rengbe ka undo rani ani zanga rimiso tirani ku rogo birĩ zogarago nga gbia ome be Yekova. Oni kpari tipa ziazia toro, nga gu rengbe ka fu zerangbaduse gbiati zatise nga agu asino si aida oni du na ni tipa ka mangapai na gu zogarago du ni gbegberẽhe watadu ni irairaha. Oni ima rengba ka sana Yekova ko fu tatamana furoni tipa ka ino wai rengbe oni ka mangapai kuti gupai rengbe ka sa roni oni rimisi tironi ku rogo birĩ zogarago. (Yak. 1:⁠5) Kangia mo ni zizi ro watadu mo nagbia mbusa mbiko gamo diaberã tipa ka irisombori, mo kpari tipa ome tipa ka songoda gamo idapase na tipa mo hi gu kpakarapai rengbe ka kura.​—⁠Oni gedi Amokedi 4:​27-​31.

15. Wai du rengbe Ziazia Kekeapai ka undo rani ani zanga rimiso tirani ku rogo birĩ zogarago? (Oni bi gu sanduki nga “Fugo Mbori Nanyakasi Gayo Ida.”)

¹⁵ Yekova rengbe arengba ka nyakasa ro vuru be Fugoko. Mo berẽkurii agu averesi nika undoro mo zanga rimiso tiro ku rogo birĩ zogarago ti regbo asada. Mo asadi ka zioho ku berãro yo awere, mbiko si nika undoro ti gu regbo Ziazia Kekeapai nikaa dunga bero ya. Fugo Mbori ima rengba ka nyakasa gu kido du mo na ni kuti agu amaku nga ga Kindo. Gi maabangirise re na nyanyakipaha ka si du nga ani naida ka hi arungosiro. (Rom. 8:​25) Mo siaka agu apaparaha nafura tipa agu amaku mo aida ka gbiaha, na mo kini bi tiro wa mo Paradizo yo nagbia ngbarago be agu amaku re.

16, 17. Ginipai rengbe ani ka wirikaha be gu ga Mbori ruru amoyambu nazanga rimiso tiyo ku rogo birĩ zogarago? (Oni bi gu sura du ti tonatonaha.)

¹⁶ Ga Yekova ruru amoyambu nafu gu biama banguapai rengbe ka undo rani ani zanga rimiso  tirani ku rogo birĩ zogarago. Gayo kpiapai rengbe ka fu gu tatamana gbiati gu ome ani aidaha tipa ka hipai. Ni kpiapai, Sadaraka, Mesaka, na Abedenego aka ka iriso gu kpiahe naarukuba ga aBabera Ringara. (Oni gedi Daniere 3:​16-​18.) Gedapai tipa gayo diaberã ima fu wingbaduse areme fu aDezire Yekova tipa i ka iriso gu bendeere (beere) nga ga gu ringara i araka rogoho. Berewe a, Yesu aima kpara tiko kusayo ti gu birĩ zogarago nga ga zegino gbiati gaha tagbagaapai. Pa inoko wai gako kpiapai nika du na ome kurii kura aboro, ko aya fu gako abawiriki wẽ: “Oni wása awasa; mi di be zegino.”​—⁠Yo. 16:⁠33.

¹⁷ Dungu aDezire Yekova ti gi gaani regbo re naima kparatiyo ti birĩ zogarago kusayo. Aguyo ima mbu be aterẽ gbiati kisoyo ku bambukiso yo na ki kpidipa gayo idapase. Gayo kpiapai ima rengba ka undo ro kina wai si aundo Baris du Turkey yo naaya: “Wirina nangia Franz Reiter angia paranga i aimiko mbiko ko aka mangasunge asekere ti regbo Hitler. Gu waraga ko akehe fu navunguko rogo gu yuru naadu mbata fu ko kpi ayugu gu bakere idapase na kido ko adu na ni kuti Yekova, na mi naida ka pekafuo gako kpiapai ka mi gbia tire na ngbatunga asada wa gure.”⁠ ^[2]

18, 19. (a) Wai du rengbe agu aboro du rogo gamo dungurati ka fu undoro mo zanga rimiso tiro ku rogo birĩ zogarago? (b) Gamo diaberã nga gine?

¹⁸ Mo ima rengba ka gbia undo be awirina rogo gamo dungurati. Mo fura na abaakumba tipa ngbatunga gu asada mo agbia tiro na ni nga ga birĩ zogarago, na mo ki sanayo i undoro na agu arugute du mburuhe rii Ziazia Kekeapai. Gu kura awirina rogo dungurati ima rengba ka undoro ka si du nga i rugutiyo na pa gu kpakarapai mo agbia tiro na ni. Mo sanayo i kpari tipa ro. Kina rengo du ngaha nga, ka ani aida awirinarani undo rani na ki kpari tipa rani, si naida ani mangi kinawo fuyo a. (Mt. 7:​12) Gu kekeapai du rogo gu gaani bangiriba nga ga Internet nga jw.org nga “Jehovah’s Witnesses Imprisoned for Their Faith​—⁠By Location” tii gupai nga NEWSROOM > LEGAL DEVELOPMENTS ima rengba ka undoro mo ini gupai rengbe mo ka kpara tipaha. Si na rimo agu aDezire Yekova du bambukiso yo awere tipa gayo idapase. Mo rogodi arimo yo na ki kpari nga ngbatunga agu aboro re kakuti gayo ruru mangapai fu Mbori.​—⁠Ef. 6:​19, 20.

¹⁹ Wa gu zogarago nga ga aboro ambeda ka digo, si airiwongo tirani te ka si du nga ga aboro zogarago aidanga ka mbugene furani ani du niruru rani fu ga Yekova Kindo te. Rogo gi gene re, ani nyakasingo gaani diaberã anyakasa tipa ka zanga rimiso tirani ku rogo birĩ zogarago nga ga gi zegino re.