1. Waigu si aida ani naabi gu momu nga ga manga kparakpee fu Yekova?

 BAMANGI ngbangbaturũ na kpotosende ima fu bawene gamahe furani. Ko nambu gene furani tipa ani naamanga kparakpee fuko. Oni berẽnga kurii gipai re: Ani rengbe ka kusuko kpotoraniyo fu Yekova ti ai regbo na rogo ai fugo, zanga manga mbakadapai amanga mbata. Ani ima rengba ka manga kparakpee fuko ho du ani ni bambungua yo watadu ho du ani ni bambukiso yo kidu na gu kido nga gu Barani nga boro nyemuse nika degatuko adega furani. Ani na bakere tambuahe tipa gi gamahe re.

2. Waigu Bakindo Davide ayugu gupai nga ko aabi gu momu nga ga kparakpee na nyanyakipaha?

² Bakindo Davide aima bi gu momu nga ga kparakpee na nyanyakipaha. Ko abi bia fu Yekova ki ya: “Mo ídi he gi kpetambuahe dú wa wene fuõngua bara bangiro.” (Tam. 141:1, 2) Ti rago Davide, i anaambakada gu fuõngua na rubangirise, aboromotumo anaamangasunge na ni ti regbo ndikidi irisombori. (Gate 30:34, 35) Davide aaida ka berã wenengai tipa gupai ko nika pehe ho ko nikaa manga kparakpee ni fu Yekova, kina wai agu aboro nanaambakada fuõngua anaambakadaha na bakere rubangirise, gure nga kina gu nyemupai du ani na ni a. Ani naida gaani akparakpee ngba ti Yekova.

3. Gini sino si aida ani yuguhe ho ani afura ni na Yekova rogo kparakpee yo, na tipagine?

³ Ho ani amanga kparakpee ni fu Yekova, si aidanga ani naadogoda bangisapai sa te. Kuba gure, si naida ani naayugo dudunguro irisa ho ani amanga kparakpee ni. Oni berẽnga pa gu wene yuguyuguapai Yesaya, Yezekere, Daniere, gbiati Yoane abihe. Gu yuguyuguapai re ni bakiakia, ono pai kinaho du tipaha kina sa. Si dunduko nafura tipa Yekova nga ko nga bakerepa Bakindo. Yesaya “abi Gbia ko sungu auru mbatabakindo, ku ari  ni tumbatumba ko.” (Yes. 6:1-3) Yezekere abi Yekova ko nasungu rii gako ngbangida vura, “imaima imarago ki du kirikiri pati ko, . . . wa kpia wangu.” (Yeze. 1:26-28) Daniere abi “gu ko nga Bakuru Ko” na vuvuru remu tiko na raurau mirawe kini ye yo du Gako mbatabakindo ni. (Dan. 7:9, 10) Na Yoane abi Yekova ko nasungu rii mbatabakindo nga gu naadu na he kirikiri pati ni wakina bawene kengerekengere wangu du wakina gu mbia nga zumeradi. (Yugo. 4:2-4) Ho ani aberã ni kurii ga Yekova bawene taarimo nga gu ka i aringbisangaha na gu kuraha ya, si natingida rani na gu bawene momu duho nga ga fura na ko rogo kparakpee yo na pa wai nyakipa mangaha wo rogo irisa yo. Ono wai du si aida ani naamanga kparakpee?

4. Ginipai ani awirikaha tipa kparakpee ti gupai Yesu apehe ti tonatona gu kpia kparakpee du rogo Matayo 6:9, 10?

⁴ Oni gedi Matayo 6:9, 10. Ti regbo gu ga Yesu Yugopai Naadu Rii Bagangara yo, ko ayugupai fu gako abawiriki tipa wai ka kpara ngba gu gene nafu ngbarago fu Mbori. Fuo pe Yesu gupai nga “oni kpári wa gere tie,” Yesu afura tipa agu apai du na nyanyakipaha kisusi mbata ho ko amangi kparakpee ni, ko amangi kparakpee tipa pa ziasi rimo Yekova; tipa ye ga Mbori Kindo, nga gu nika gbarasa agu aboro dunduko nasoga Mbori; gbiati agu amaku du kumbatayo nga gu du paha berã Ko yo tipa kpotosende na tipa ngbatunga aboro dunduko. Ho ani arimiso ngbatunga agu apai re ni ku rogo gaani akparakpee yo, ani nayugo gupai nga gupai Mbori akpinyemuhe ima du na nyanyakipaha furani.

5. Ya mo si rẽarẽ ani mangi kparakpee tipa agu apai nabi rani?

⁵ Rogo gu papara kparakpee ngbefuo gure, Yesu ayugu gupai nga si rẽarẽ ani mangi kparakpee tipa agu apai nabipa rani. Ani rengbe ka sana Yekova ko fu gaani riahe furani nga ga uru, ko mbupai furani ti gaani aingapai, ko banda rani be aˈasada na ki batasi rani be gbegberẽ ko. (Mt. 6:11-13) Ho ani asana Yekova ni tipa agi apai re, ani nayugo gupai fuko nga ani ima ino gupai nga ani naida na gako undo na ani naida ka fu ngbarago fuko.

6. Ya mo si naida ani naamanga kparakpee tipa kina agu apai sa du rogo ga Yesu kpia kparakpee yo? Oni sakingo rogo yo.

⁶ Yesu aaidanga gupai nga apefuoko naamangasunge na kina agu afugo du rogo gako kpia kparakpee kina wai duhe te. Rogo kura akparakpee yo nga gu Yesu amangihe,  ko aima fura tipa apai ni bakiakia, nga gu naadu na nyanyakipaha fuko ti gu regbo re. (Mt. 26:39, 42; Yo. 17:1-26) Wakina gure a, ani ima rengba ka manga kparakpee tipa ai gupai ani abakabangirani tipaha. Ani na kina diaberã berani ka mangaha, ani rengbe ka manga kparakpee tipa tatamana na rugatinapai. (Tam. 119:33, 34) Ho ani aida ni ka tona manga gu sunge du ni kpakarakpakaraha, ani rengbe ka manga kparakpee tipa dudunguro bipai gbiati rugatinapai. (Snz. 2:6) Avunguagude ima rengba ka manga kparakpee tipa awiriyo, agude ima rengba ka manga kparakpee tipa avunguyo, na ani dunduko rengbe ka manga kparakpee tipa gaani abawiriki Ziazia Kekeapai na tipa agu aboro ani atungusapai fuyo na si naida aida ani mangihe wo. Ono ho ani amanga kparakpee ni, si aidanga ani sana Yekova tipa kina undo sa te.

7. Tipagine si aida ani naatambua Yekova ti ni rogo kparakpee yo?

⁷ Si naida ani naatingida gupai nga kaa tambua Yekova rogo gaani akparakpee yo. Boro ho rẽ tipa i tambua ni kisusi gaani Mbori te. Ko ni ‘wene ko kidu zaza tipa vu aboro.’ Ko na ‘nunga aboro na inapai a, ko aipo nga na zinga te, ko na weneringirise kpaima na rengo.’ (Tam. 86:5, 15) Nirengo, ani ima du na wene ndupai berani ka tambua Yekova tipa gu boro du ko nga ni, na tipa agu apai ko amangaha.

8. Gini bete apai rengbe ani ka fu tambuahe tipaha fu Yekova? (Atambuahe 104:12-15, 24)

⁸ Kupati gu nga ka tambua Yekova rogo gaani akparakpee yo, si naida ani naafu tambuahe fu ko tipa gu bawene ahe ko afuhe furani. Ni kpiapai, ani rengbe ka fu tambuahe fuko tipa gu bawene arangi du ti ambumbudo, tipa gu dungu ngbatunga bawene ariahe du berani, na tipa gu ngbarago du ani na ni tipa du na mbembedi abakure berani. Gu Barani nga boro nyemuse nafu agi ahe re furani na kura adunguhe tipa ka sarani ani du na ngbarago. (Oni gedi Atambuahe 104:12-15, 24.) Gu nyakipaha kisusi nga ani nafu tambuahe fu Yekova tipa gu bakere riahe nga ga toro ko afuhe furani na tipa gu bawene maabangirise du ani na ni tipa kumbatayo.

9. Ginipai rengbe ka undo rani ani tingidi ka fu tambuahe fu Yekova? (1 ATesaroniko 5:17, 18)

⁹ Si ima rengba kadu taata gbe bangirani go tipa ka fu tambuahe fu Yekova tipa agu apai dunduko  ko amangaha furani. Ginipai rengbe ka undo ro mo naatingidaha? Mo rengbe ka keka pa agu apai ni bakiakia mo namangi kparakpee tipaha na kusa, mo ima rengba ka ngera rii agu apai mo akehe tipa ka bi wai Yekova nakaragapai kuti gamo akparakpee. Fuo gure, mo ki mangi kparakpee tipa ka fu tambuahe fuko tipa gako undo. (Oni gedi 1 ATesaroniko 5:17, 18.) Mo berẽnga kurii gipai re: Ani nadu na ngbarago na kini bihe nga i nakpinyemu rani akpi ho kura aboro afu tambuahe ni furani. Wakina gure a, ho ani atingida gupai ni nga ka fu tambuahe fu Yekova tipa karaga ko pai kuti gaani akparakpee, si nafu ngbarago fuko. (Koro. 3:15) Ono tie, gini kura nyanyakipa ndupai si aida ani fu tambuahe ti ni fu gaani Mbori?

10. Ringbisihe kuti 1 Petero 2:21, tipagine si aida ani naafu tambuahe ti ni fu Yekova tipa keda ko Yesu ku auru kpotosende no?

¹⁰ Oni gedi 1 Petero 2:21. Si naida ani naafu tambuahe fu Yekova tipa keda ko gu Wiriko ko nakpinyemuko ko yugupai furani. Na ani nawirika badungu apai tipa Yekova na tipa wai ka fu ngbarago fuko ni wirika ani pai tipa ga Yesu raka. Ka ani du na idapase kuti ga Kristo motumo, ani rengbe kadu na mbembedi pabakure na Yekova Mbori na kidu zezeredi na Ko.—Rom. 5:1.

11. Tipagine ani amanga kparakpee ti ni ti rimo Yesu?

¹¹ Ani nafu tambuahe fu Yekova nga ani ima rengba ka manga kparakpee fu ko vurube Wiriko. Yekova namangasunge na Yesu tipa ka fu agu ahe furani ani nasanahe tipaha. Yekova nadega tuko na kini karagapai kuti agu akparakpee i amangaha ti rimo Yesu. Yesu aya: “Gu he oni ka nikpari pa ha ni rimore, mi animangi gu amanga re, Buba du ni taasitaasi ko rogo Wiriko yo.”—Yo. 14:13, 14.

12. Gini kura ndupai duho si aida ani fu tambuahe ti ni fu Yekova tipa Wiriko?

¹² Yekova nambupai furani ti gaani aingapai mbiko ga Yesu motumo tumorii. Ziazia Kekeapai nafura tipa Yesu nga ko nga gaani ‘gbiamotumo nga gu ko sungu pati kumbabe mbatabakindo nga ga Bahe du rogo angbangbaturũ yo.’ (Eb. 8:1) Yesu nga gaani ‘azarõ watadu mounda yo du Mbori ni nga Ba.’ (1 Yo. 2:1) Ani na bakere tambuahe nga Yekova ima fu Gbiamotumo furani nga guko naruga tiko na gaani azangarengba na kini ‘kpari tipa rani’! (Rom. 8:34; Eb. 4:15) Ani nga kpakpa aboro, sidu, na zanga ga Yesu motumo, ani arengbanga ka fura fu Yekova rogo kparakpee yo te. Ka ani funga tambuahe wai si aidaha nzunzu fu Yekova tipa gu nyanyakipa gamahe ko nafuhe furani, nga gu gamahe nga ga gu Wiriko ko nakpinyemuko te!

13. Rogo gu yuru naadu mbata fu kpi Yesu, wai du ko ayuguhe nga ko ima kpinyemu gako abawiriki?

¹³ Rogo gu yuru naadu mbata fu Yesu kpi, ko amangi kparakpee tipa gbanga regbo tipa gako abawiriki, kini sana Bako ko ‘ka kuti yo be gbegberẽ ko.’ (Yo. 17:15) Gupai re ayugupa bakio wai Yesu akpinyemu yo! Wa ko avura inoho nga ko nika rungo barambeda ni bakerehe, ko aabaka bangiriko kindi tipa gako amokedi.

14. Waigu rengbe ani ka yugoho nga ani ima kpinyemu awirinarani?

¹⁴ Ani nawirika Yesu ni zanga berã kina pa agu apai sa ani aidaha. Kuba gure, si naida ani naamanga kparakpee dedede tipa awirinarani. Ho ani amangaha ni wo, ani nairisa gu ga Yesu zinahe du tipa kpinyemu akuarani na ani nayugo bakio wai fu Yekova ani nakpinyemu akuarani aidipase. (Yo. 13:34) Pa manga ani kparakpee tipa awirinarani nga gberesa regbo te. Fugo Mbori nape gupai furani nga “gu  nyanyaki kpe nga ga ruru boro du na bakere tandu.”—Yak. 5:16.

15. Tipagine agu akuarani ani airiso Mbori na yo aida na gaani akparakpee ti ni?

¹⁵ Agu akuarani ani airiso Mbori na yo naida aida na gaani akparakpee bambiko i nagbia tiyo na dungu akpakarapai. Ani rengbe ka sana Yekova ko undo yo i hi akaza, agberãngo, avura, arungosiro watadu kura akpakarapai. Ani ima rengba ka manga kparakpee a tipa agu awirinarani namangasunge nyanyaki tipa ka undo agu aboro du na zingo. Mo nitiro ima rengba ka ino bete agu aboro nagbiatiyo na akpakarapai wa gure. Si angba gbe ka mo aayamba arimoyo rogo gamo akparakpee yo. Ani nayugo ndikidi nyemuse nga ga awirina nisana ani Yekova ko undo yo i hi pai.

16. Tipagine si aida ani naamanga kparakpee ti ni tipa agu aboro nangbembatayo dagba rani?

¹⁶ Agu aboro nangbembatayo rogo dungurati na bakere tambuahe nga ani napepa yo ape rogo gaani akparakpee, na agu akparakpee re naundo yo aundo. Gu mokedi nangia Pauro aima ino gupai nga si aaida kura aboro mangi kparakpee amanga tipa ko. Ko akepai nga: “Oni kpári tipa re a, ya i fu fugo fere mi za ngbare, mi yugu gu gbugbu pai nga ga wene pangbanga zukazuka.” (Ef. 6:19) Areme a, ani na badungu awirina namangasunge nyanyaki, nga aguyo nangbembatayo dagba rani. Ani nayugo nyemuse tipa yo ni sana ani Yekova ko fu maku kurii gayo sunge.

17-18. Ti gini aregbo rengbe yo ka ya furani ani ngbembatayo rogo kparakpee yo fu kura aboro, na ginipai si aida ani moihe ku berãrani yo?

¹⁷ Ti kura aregbo, i naaya furani ani ngbembatayo rogo kparakpee yo fu kura aboro. Ni kpiapai, gu wirina nga dee nga guri nanungusa wisigo Ziazia Kekeapai rengbe ka sana gu wirina i nikuru na ri tipa ri mangi kparakpee. Gu wirina nigasi ri tipa i mangi wisigo Ziazia Kekeapai re ima rengba ka zanga ino gu boro i awisigo Ziazia Kekeapai na ni re wenengai, sidu, ri rengbe ka ida gupai nga ka manga yangara kparakpee ti regbo gu wisigo Ziazia Kekeapai re. Rogo gu gene re, ri rengbe ka ino gupai wenengai ri nika pehe ho ri nika manga kparakpee ni tipa gu bawiriki Ziazia Kekeapai re.

¹⁸ I ima rengba ka sana gu wirina nga kumba tipa ko mangi kparakpee ti regbo gu dunguratise  du tipa sunge tungusapai watadu ti regbo gu dunguratise nga ga dungurati. Si naida agu awirina du na gu momu re beyo moi gupai ku berãyo yo du gu dunguratise re tipaha. Si aidanga kparakpee du tipa ka fu rugute fu dungurati watadu ka manga atingidapai te. Tipa badungu agu adunguratise nga ga dungurati, gu regbo i namoihe tipa bia na kparakpee nga aminiti bisue, sidu, gu wirina namanga kparakpee, si aidanga ko mangisunge na “badungu” afugo te, gbe ho dunguratise atona ni.—Mt. 6:7.

19. Ginipai nika undo rani ani du ni mbakadimbakadi rani tipa ga Yekova uru sapangbanga?

¹⁹ Si naida ani moi kparakpee ni gupai paha naima nyaka gbe rogo gaani raka yo wa ani ambeda na ga Yekova uru sapangbanga. Rogo gi bangiriba re, Yesu aya: “Oni ngére dedede, ki nikpari, ya oni di be pai ka bata be agi apai nikamanga dunduko re.” (Rk. 21:36) Ka ani amanga kparakpee dedede, gaani idapase nika nyaka na ani nika du ni mbakadimbakadi rani ho ga Mbori uru sapangbanga nika da ni.

20. Waigu rengbe gaani akparakpee kadu wakina wene guzuguzu fuõngua?

²⁰ Gini apai ani nasakipai tipaha? Ani nabi gu gaani momu nga ga kparakpee na nyanyakipaha gbe. Gu nyanyakipa apai si aida ani mangi kparakpee tipaha nga agu apai du na ngbanya dagbaha na ga Yekova ringbisapai. Ani nafu tambuahe a tipa wiri Mbori na gako zogarago nga ga Kindo na ani kini mangi kparakpee tipa agu akuarani ani airiso Mbori na yo. Na ani ima rengba ka manga kparakpee tipa gu gaani azingo nga ga borose gbiati agu nga ga toro. Ho ani aberã ni wenengai tipa agu apai ani nika pehe rogo gaani akparakpee yo, ani nayugoho nga ani nabi gi bawene momu re na nyanyakipaha. Gaani afugo nika du wakina wene guzuguzu fuõngua fu Yekova, si nika “ngba ti ko.”—Snz. 15:8.