1. Ginipai Yekova akpinyemuhe si mangi areme?

 AREME, gupai Mbori akpinyemuhe nga i tungusi wene pangbanga nga ga Kindo rogo zegino dunduko. (Mk. 13:10; 1 Tim. 2:3, 4) Ga Yekova sunge du, na si na nyanyakipaha gbe, si du ko nasia Wiriko ti ni ko nungusihe. Ani ima rengba kadu na gu kido nga bambiko wa du Yesu du nanungusa rani, sunge tungusapai nika digiso tihe kina wai Yekova aidaha mbata fu digido zegino ye.—Mt. 24:14.

2. Gini apai ani nika sakapai tipaha rogo gi kekeapai re?

² Rogo gi kekeapai re, ani nika bi wai Yesu amangasunge na ‘ruru kangara moyambu’ i naafu arugapai rogo Fugo Mbori yo na kini mbakadi apefuoko i niimangi gu bakere sunge nga ga tungusapai nga gu naamanganga mbata rogo gu pangbanga yo nga ga aboro ya. (Mt. 24:45) Ani nika bi gupai a ani nibasasa narengbe ka mangaha tipa ka songoda Yesu gbiati kangara moyambu.

3. Gini pagbia du i afuhe fu Yesu?

³ Yesu du nangera kurii sunge tungusapai. Waigu rengbe ani ka ino gupai nga rengo du nga gupai re? Ngbutuko mbata fu Yesu ga ku ngbangbaturũ yo, ko andu fuo bete apefuoko kurii bagangara Gariraya yo. Ko aya fuyo we: “I asia pa ahe fere dunduko ku ngbangbaturũ yo na ku sende no.” Oni bingo gupai ko agumbaha fuo gure: “Oni ndú tie, ki sa arikaaboro dunduko ni abawiriki.” (Mt. 28:18, 19) Sidu, dagba agu ahe i afuhe fu Yesu, i ima fu gu pagbia fuko nga ga ngbembatayo rogo sunge tungusapai.

4. Tipagine rengbe ani kadu ti ni na gu kido nga, Yesu nangera kindi kurii sunge tungusapai?

 ⁴ Yesu agumba gupai nga i nika mangasunge tungusapai na sunge sa aboro ni abawiriki fu “arikaaboro dunduko” na ko nika du na apefuoko “ti arago dũ, ki da ti digida zegino.” (Mt. 28:20) Agu afugo re nayugo gupai ayugo ziazia nga, Yesu nikaa ngera kurii sunge tungusapai si naandu kindi kumbatayo dati gi gaani regbo re.

5. Waigu ani aundo ka digiso gu sangbanebi du rogo Atambuahe 110:3?

⁵ Yesu aabakanga bangiriko nga abamangisunge nika du ni beteyo ti digido gi sino raka re te. Ko aima ino gupai nga agu afugo du rogo gu sangbanebi nga ga bake papara Atambuahe nika digiso tihe adigiso nga gu naya: “Gamo aboro afú tiyo foro zaza rago ngbe mo ku mbata yo fu gamo rimbasa aborosovura.” (Tam. 110:3) Ka mo amangasunge tungusapai, gure nga mo nasongoda Yesu na ruru kangara moyambu na mo naundo ka digiso gu sangbanebi re. Sunge tigaha nandu kina kumbatayo, ono akpakarapai kinaho.

6. Gini kpakarapai sa abatungusipa Kindo agbiatiyo na ni areme?

⁶ Kpakarapai sa abatungusipa Kindo agbiatiyo na ni nga sogote. Abasamungu kuti ndikidi pambori, abarumbatayo rogo pambori, na aboro birĩ-zogarago ima peka dungu aziree fu aboro tipa gaani sunge. Ka si du nga gi ziree apangbanga re ingisi agumerani, agu aboro ani naini yo, agu aboro ani amangasunge na yo, i ima rengba ka sosoda rani ani mbu iriso Yekova na ki mbu sunge tungusapai. Rogo kura aringara, asogorani naserekpo rani, kini zubo rani watadu kini zi awirinarani na zavura kini kedi yo ku bambukiso yo. Ngbarani azeranga ka bi gupai nga aboro namanga rani ngba gi gene re te. Yesu agumba gupai nga: “Rika aboro asóga roni asoga dunduko tipa rimore.” (Mt. 24:9) Gu rengo du ho nga, pa gbia ani tirani na ngbatunga gu sogote re nga gopai nayugo gupai nga Yekova ima ida na ani. (Mt. 5:11, 12) Bakitingbanga du du kugii gi sogote re. Ono Yesu du na bakere ome kisusi Satana! Mbiko ga Yesu songodahe, wene pangbanga nagbia aboro na angbatunga yo dũ.

7. Gini gopai ani abihe nayugo gupai nga Yugoti 14:6, 7 nadigiso tihe?

⁷ Gu kura kpakarapai ani agbiatirani na ni ho ani atungusapai ni nga, aboro nagumba dungu ngbatunga afugo ni bakiakia. Rogo gu yugoti Yesu ayuguhe fu gu mokedi nangia Yoane, ko ape gupai nga, ti gi gaani regbo re, wene pangbanga nika dia adia be gu kpakarapai re. (Oni gedi Yugoti 14:6, 7.) Rogo gini gene? Ani nafu momu fu dungu aboro wa rengbe omerani na ni tipa i gi gu pangbanga nga ga Kindo. Areme, aboro rogo zegino dunduko ima rengba ka geda agu awaraga du mburuhe rii Baibiri rogo gaani bangiriba nga ga Internet nga jw.org, bambiko si na apangbanga yo rogo afugo niima susa 1,000! Riigbu Bipasunge aidi i sa gu buku nga Mo Raki Nyeanye Kindi na Ngbarago! nga gu ũsunge ani amangasunge na ni awere ka sa aboro ni abawiriki, i ima saha kurogo afugoyo niima susa 700! I ima kusa agu arugapai du mburuhe rii Baibiri a rogo avidio yo na dede afugo fu airangbiängä na awaraga rogo gu kekeapai du tipa airavurari. Ani nabi gu sangbaanebi abi nga ga Baibiri si nidigisitihe. Aboro “na afugoyo dunduko nibakiakia dagba rikaaboro” yo nawirika ka gumba “nzunzu fugo” nga ga gu rengo nga ga Baibiri. (Zek. 8:23, NW; Zef. 3:9) Gipai re namanga tii gu rugapai nga ga Yesu Kristo.

8. Gini sangbanapai gaani sunge tungusapai naye na ni?

⁸ Areme, aboro bangeyo niima susa 8,000,000 rogo aringara nga 240 nga papara ga Yekova riigbu, na rogo agarã dunduko, aboro nga akutu bawe nazio bapatiza! Ono tie,  gupai nyakipaha kisusi nga pa bange aboro te, ono agu asino nga ga aKristano nga ga “vovo borose,” nga gu gi vovo abawiriki re nasonosihe. (Koro. 3:8-10) Badunguyo ima mbu wasiwasi mangaapai, zuu, soga kura aboro, gbiati gu sino nga ga du boro na rukö tipa gani ringara. Gu sangbanebi du ni kekehe rogo Yesaya 2:4 nadigiso tihe nga gu naya; i ‘awirikanga pa sovura berewe te.’ Bambiko ani namanga ome nyanyaki ka ukadi vovo borose, ani naundo ka gbe aboro kurogo ga Mbori riigbu na ani nayugo gupai nga ani napekafuo gaani babiapai nga Kristo Yesu. (Yo. 13:35; 1 Pet. 2:12) Tipagine gipai re amanga ti ni? Si namanga mbiko Yesu du nafu gu undo ani aidaha.

9. Ringbisihe kuti Matayo 24:45-47, ginipai Yesu ape gupai nga si nikaa manga ti gu regbo nga ga yangara arame?

⁹ Oni gedi Matayo 24:45-47. Yesu agumba gupai nga ti yangara arame, ko nika maa ‘ruru kangara moyambu’ nga guni nikaa fu arugapai rogo Fugo Mbori yo. Sidu, ani naberã gupai nga si naida gu moyambu re naamanga sunge amanga nyanyaki ti gi gaani regbo re. Gipai re aima yugo tihe ni rengo. Yesu ima mangasunge na umba badona nga ga mbedimbedi aKristano tipa i naafu gu “riahe . . . ti ragoho” nga ga toro fu ga Mbori aboro na agu aboro du na nyemu agu apai nga ga toro ti yo. Agi akumba re abingo ho nga i du du na pagbia kurii ga kura aboro idapase te. (2 Kor. 1:24) Kuba gure, i ima ino gupai nga Yesu Kristo du nga “bangbembatayo fu [gako] aboro ni gbia a.”—Yes. 55:4.

10. Gini waraga dagba agu awaraga yo i niyuguhe rogo sura yo re naundo ro mo tona ka ndu ngba gu gene nandu sa nyenye unga?

¹⁰ Naatona rogo 1919, ruru kangara moyambu aima kusa badungu awaraga nga gu niima fu momu fu badungu aboro i wiriki rengo rogo Fugo Mbori yo. Rogo 1921, kangara moyambu akusi gu buku nga, The Harp of God tipa  si undo vovo aboro i wiriki bangua ayugopai nga ga Baibiri. Wa regbo aˈariatihe, i aima kusa kura awaraga berewe. Gini buku naundo ro mo ye ka ino na ki kpinyemu gu Barani du ngbangbaturũ yo? Ya mo si nga “Let God Be True,” The Truth That Leads to Eternal Life, You Can Live Forever in Paradise on Earth, Gu Inohe Nandu sa Nyenye Unga, Gini Apai Nzunzu Ziazia Kekeapai Ayugoho?, Gini Apai Rengbe Baibiri ka Yugoho Furani?, watadu gaani vovo buku nga, Mo Raki Nyeanye Kindi na Ngbarago! du naundo ro? I akusi agi awaraga re dunduko tipa si undo rani ani sa aboro ni abawiriki. Na si nangia agu awaraga ani aaidaha ho i akusihe ni.

11. Tipagine duhe ti ni ni nyanyakipa pai nga ani dunduko wirikipai ni bakerehe tipa Yekova na Baibiri?

¹¹ Anga vovo aboro sa nga gu yangara aboro naida dudunguro inohe tipa Yekova na Baibiri te. Ani dunduko naidaha aida. Gu mokedi nangia Pauro akepai nga: “Nyanyaki riahe du tipa sosono aboro.” Pauro agbia kurapai kuti ni nga, pa manga agu apai ani awirikaha rogo Baibiri yo ima rengba ka undo rani ani ‘wisigi pa wenepai na gbegberẽpai.’ (Eb. 5:14) Si ima rengba kadu ni bakpakarakpakaraha gbe ka mangapai kuti ga Yekova arugute awere, bambiko badungu aboro namanga kere wasiwasi apai. Ono Yesu nika sa gupai nga ani wiriki agu apai si aidaha tipa ka banda gaani idapase si du ni nyanyakihe. Ani nagbia gi rugapai re rogo Fugo Mbori yo gako toro adu kugii pa kehe nga Baibiri. Ruru kangara moyambu nambakada agi ariahe nga ga toro re na kini kparakaha tiibe gu rugapai nga ga Yesu.

12. Wakina Yesu, waigu ani ayugo irisa tipa rimo Mbori?

¹² Wakina Yesu, ani nayugo gu irisa tipa rimo Mbori nga gu rẽ tipaha. (Yo. 17:6, 26) Ni kpiapai, rogo 1931, ani adi gu rimo kurirani du rogo Ziazia Kekeapai yo nga aDezire Yekova. Ni manga ani he wo, ani ayugupa wai nyaki rimo Mbori furani na ani kini idi i ini rani ti rimo gu Barani du ngbangbaturũ yo. (Yes. 43:10-12) Na natona rogo Tanvuo rogo gu garã re, rimo Mbori atona kaa kura ti kpoto agu  amagazini i atona kaa kusaha. Kurigure, i ima karaga rimo Mbori kurogo ndikidi abaha rogo gu Baibiri nga New World Translation of the Holy Scriptures. Gipai re ima du kia ti gu badungu apambori naya si nga ga aKristano nga gu niima kusa rimo Mbori kusayo rogo badungu sasa afugo nga ga Ziazia Kekeapai!

13. Ginipai nafu gu kido foro nga Yesu namangasunge na ‘ruru kangara moyambu’ areme? (Yo. 6:68)

¹³ Vurube ‘ruru kangara moyambu,’ Yesu ima mbakada bawene riigbu auru kpotosende nga gu nasonosa ziazia irisombori. Gamo bipai nga gine tipa gu riigbu re? Isoke mo rengbe kadu kina wai gu mokedi nangia Petero adu, nga guko naya fu Yesu: “Ani andú koyo du da ni? Wa du mo du agu apai be ro nga ga nyenye unga.” (Yo. 6:68) Wari ka ani nidu ni areme ka si nidu nga ani aayengo kurogo ga Yekova riigbu yo te? Vurube gi riigbu re du, Kristo abi gupai ni nga, ani ima du na agu ahe si aida si du berani tipa ani nye niruru rani fu Mbori. Ko naraba rani a tipa ani mangi gaani sunge tungusapai wenengai. Kurigure, ko naundo rani tipa ani ukadi, ‘vovo borose’ tipa wa ka ani sa ngbarago ti Yekova.—Ef. 4:24.

14. Waigu mo nagbia undo ti du mo ni papara ga Yekova riigbu ti regbo gu ririkaza nga Korona?

¹⁴ Yesu nafu agu arugapai nga ga tatamana ti gu regbo nga ga gberãngbi. Agu aundo ani nagbiaha ti agu arugapai re ima du ni yuguyuguhe wa gu ririkaza nga Korona re atona. Baraho dungu aboro rogo zegino aainongo gupai ni ka i mangihe ya, Yesu aima sa gupai nga ani gbia agu arugapai du ziazia tipa si banda rani. I angarasi rani ani naavo roko dada ngba ho du ani ni dagba aboro na kidu na dagba ti aboro. I angarasi abaakumba nga i du mbembedi na aboro rogo dungurati na kini fura na yo dedede, na kini ini pa agu apai si aidaha tipa i du  ni bandabanda yo, kpotoyo kidu wenengai na i kidu mbembedi na Yekova. (Yes. 32:1, 2) Ani agbia kura arugapai na angarasaro vurube gu tingidapai nga ga Riigbu Bipasunge.

15. Gini arugapai i afuhe tipa manga adunguratise gbiati mangasunge tungusapai ti regbo ririkaza, na sangbanaha nga gine?

¹⁵ Ti regbo gi ririkaza re, ani ima gbia arugapai tipa wai kaa manga gaani adunguratise nga ga dungurati na kaa mangasunge tungusapai. Ani atona niipo kaa manga agu adunguratise nga ga aKristano, na bakere adunguratise rogo Internet. Ani atona manga dezirepai a gbe ni keka awaraga na rogo terefuni. Yekova aima fu maku kurii gaani asadatise. Badungu abe-basunge ima tingidapa gu bakere sonakumbatayo nga ga abatungusipai namanga. Zavura badungu aboro weneapai niima manga fuyo ti gi regbo re.—Oni bi gu sanduki nga, “ Yekova Nafu Maku Kurii Gaani Sunge Tungusapai.”

16. Ginipai rengbe ani kadu na kido tipaha?

¹⁶ Kura aboro ima rengba ka berã gupai nga riigbu namaaberã yo ni bakerehe kisusi wai si aidaha tipa gi ririkaza re. Ono ti aregbo dunduko, si aima ye kadu ni yuguyuguhe nga agu arugapai ani agbiaha, ima du ni patatamana. (Mt. 11:19) Na wa ani nikaa berãkurii gu gene nga ga nyemuse Yesu angbe kumbatayo fu gako aboro ngbaha, ani nika du na gu kido nga, ka kina ginipai vura manga, Yekova gbiati Wiriko ko nakpinyemu ko gbe nika duadu na ani.—Oni gedi AEbere 13:5, 6.

17. Gamo bipai nga gine tipa mangasunge tii gu pagbia nga ga Yesu?

¹⁷ Ani na bakere ngbarago nga Yesu nga gaani Bangbembatayo! Ani rogo gu riigbu adunga ni kparakakparakaha mbiko asino ngbatunga, agu aringara aboro aye rogoho, na agu afugo i apehe ya. Ani nagbia bakere arugapai rogo Fugo Mbori yo, na ani nagbia agu arabahe dunduko si aidaha tipa ka mangasunge tungusapai. Ani dunduko ni basasa i ayugopai furani tipa wai ka ukadi vovo borose, na ani nawirika wai ka kpinyemu akuarani. Ani na nduapai dunduko berani tipa kadu na ngbarago tipa gaani bangbembatayo nga Yesu!