1. Ngbutuko mbata fu Yesu kpi, ginipai ko apehe fu gu bamangi gbegberẽ apai naadu patiko? (Rk. 23:39-43)

 YESU na agu abamangi gbegberẽ apai naadu patiko ue aigirã na kini kpi yee. (Rk. 23:32, 33) Agu abamangi gbegberẽ apai ue re dunduko asawia Yesu, si tie ziazia nga, i angianga gako abawiriki te. (Mt. 27:44; Mk. 15:32) Ono gu ko sa dagbayo yo aˈaria gako berã. Ko aya: “Yesu, mo tíngidi pa re ho mo ka da ni ku rogo ga ngbi.” Yesu ki karagaha ki ya: ‘Ya mi foro ni rengo, areme, ani adú na mo Paradiso yo.’ (Oni gedi Ruka 23:39-43.) Si rengbe kadu nga gi bamangi gbegberẽ apai re aima gia gu pangbanga nga ‘gu ngbi nga ga ngbangbaturũ ima mbeda,’ ono ko aadanga ni ga Yesu bawiriki te. Na Yesu aapenga gupai nga gu kumba re nika du rogo gu Kindo nika du ngbangbaturũ yo te. (Mt. 4:17) Yesu aafura tipa gu paradizo du kumbatayo. Tipagine rengbe ani ka pehe ti ni wo?

2. Ginipai nayugo gupai nga si nawiraha wa gu bamangi gbegberẽ apai nasa gako berã re angia Yudo?

² Si nangera wa ka i ya gu bamangi gbegberẽ apai nasa berãko re angia Yudo. Gu bamangi gbegberẽ apai re ape gupai fu gu kura ko nga: ‘Mo agunde nga be Mbori te wa i ambusi ro wa kina ko?’ (Rk. 23:40) AYudo anaairiso bangisa Mbori sa, ono aGindiria aidi kuti dungu ambori. (Gate 20:2, 3; 1 Kor. 8:5, 6) Wa ka si adu nga agu amangi gbegberẽ apai re angia aGindiria, gu sanahe ka i asanaha nga, “Ya mo mo agundenga be ambori te?” Kurigure, i aakedanga Yesu ko tungusipai fu agu aboro naangianga aYudo ya te, ono i akedi ko fuo “gu ingiingi akandoro nga ngbatunga aYisaraere.” (Mt. 15:24) Na Mbori aima yugoho fu aYisaraere nga ko nika zingisa aboro azingisa be kpio. Si nangera wa, gu bamangi gbegberẽ apai nasa berãko re aainongo pai tipa gipai re te, na afugoko nayugo gupai nga ko aaberã gupai nga Yekova nika zingisa Yesu ko zogorago rogo ga Mbori Kindo. Na gu kumba re adu na gu kido nga Mbori nika zingisako azingisa a. Sidu, si nangera wa gu bamangi gbegberẽ apai re angia Yudo.

3. Ginipai si awiraha wa si aima ye kurii gu bamangi gbegberẽ apai yo nasa berãko ho Yesu afura ni tipa Paradizo? Oni sakingo rogoyo. (Bambata Pai 2:15)

 ³ Ka si du nga gu bamangi gbegberẽ apai nasa gako berã re angia Yudo, ko aima inopai tigaha tipa Adamu na Eva na gu Paradizo i amoi yo ku rogoho. Sidu, gu bamangi gbegberẽ apai re aima ida kuti gupai nga gu Paradizo Yesu afura tipaha re nika ngia bawene ati auru kpotosende ane.​—Oni gedi Bambata Pai 2:15.

4. Ginipai agu afugo Yesu ko apehe fu gu kura bamangi gbegberẽ apai sa narengbe ka sarani ani berẽkuriihe?

⁴ Si naida agu afugo Yesu ko apehe fu gu bamangi gbegberẽ apai re sa rani ani berẽ tipa wai raka nika du Paradizo yo. Nirengo, ani ima rengba ka wirikapai tipa Paradizo ti gu zogarago nangia ga Bakindo Soromo nga gu naadu na zereda. Baibiri nape gupai nga Yesu pako nakii ti ga Soromo. Ani ima rengba kadu na gu kido nga Yesu na agu aboro ko nika zogarago na yo nika mangapai tipa ka sa kpotosende si du ni paradizo. (Mt. 12:42) Si tie ziazia nga, si naida “gu kura akandoro” ini gupai aino si aida i mangihe tipa ka rẽ ka raka rogo Paradizo.​—Yo. 10:16.

5. Mo nabihe nga raka nika du wai Paradizo yo?

⁵ Ginipai naye ku berãro yo ho mo aberã ni tipa raka rogo Paradizo? Isoke mo naberãpa bawene ati wa gu naadu ati Edene yo. (Bam. P. 2:7-9) Mo ima rengba ka tingidapa gu sangbanebi Mika akehe tipa ga Mbori aboro nga, “aboro ni ba sa sa asúnga kina tii gayo bakakue na tii gayo vurumo a.” (Mika 4:3, 4) Mo ima rengba ka tingidapa agu averesi a rogo Baibiri yo nga gu nape gupai nga riahe adu kpaima. (Tam. 72:16; Yes. 65:21, 22) Mo ima rengba kaa bi tiro nga mo rogo bawene ati sungu pati mbisa na bawene ariahe riihe. Mo ima rengba ka berãpa wene wege nika du ni gigirihe na fuoho kidu ni wenehe be angua na ambumbudo. Na si nawiraha wa, mo ima rengba kaa bi tiro na gamo aborokporo gbiati abakureamo, kodihe na agu aboro i nika zingisa yo be kpio oni nasungu wa sa na kini gbia ngbarago na kini momu. Anga agi apai re nga kungbo musumo te. Zanga kapa, ani ima rengba kadu na gu kido nga agi apai re nika manga amanga auru kpotosende. Rogo Paradizo, ani nikaa manga gu sunge amanga nga gu ani kaa gbia ngbarago ti ni.

6. Ginipai ani nikaa mangaha Paradizo yo? (Oni bi sura.)

⁶ Yekova akusi rani ani gbia ngbarago ti gaani sunge. (Batu. 2:24.) Ani nika manga dungu asunge gbe ti regbo ga Kristo Zogarago Tipa Agarã Kutu. Agu aboro nika bata rogo bakere gberãngbi kodihe na agu amirioni aboro i nika zingisayo be kpio, nika ida na aroko, riahe, na gu ba i nika raka rogoyo. Tipa ka fu agi ahe re fuyo, ani nika manga dungu asunge nga gu ani nika gbia ngbarago ti ni! Wakina gupai i apehe fu Adamu na Eva nga i ni ngerefuo kpotosende, ani nika du na ngbarago tipa ka sa gi kpotosende re si da ni Paradizo. Oni berẽnga pa wai ani nika gbia ngbarago ti yugopai fu agu  amirioni aboro i nika zingisayo nga aguyo naini pai gbua tooni tipa Yekova na gako ringbisapai na ka undo gu ruru aboro naraki mbata fu Yesu tipa i wiriki gu dungu apai namangi tingbafuo kpio yo.

7. Ginipai rengbe ani kadu na kido tipaha, na tipagine?

⁷ Ani ima rengba kadu na gu kido nga ho ani nika du ni Paradizo yo, ani nika raka rogo zereda na kidu na agu ahe dunduko ani aidaha berani na apai nika du ni mbakadimbakadihe wenengai. Tipagine? Bambiko Yekova ima yugo kpia wai furani raka nika du tii gako zogarago. Gu pangbanga du tipa gu zogarago nga ga Bakindo Soromo nga gu kpiapai re.

8. Waigu agu afugo du rogo Atambuahe 37:10, 11, 29 adigisitihe tingbafuo Bakindo Davide kehe? (Oni bi “Asanahe be Agedihe” du kina rogo gi magazini re.)

⁸ Ga Mbori toro adu kugii Bakindo Davide ko ke pa wai raka nika du ho gu bakindo du ni ruruko na ni boro tatamana nika sungo ni rii mbatabakindo. (Oni gedi Atambuahe 37:10, 11, 29.) Dedede, ani ninaageda Atambuahe 37:11 ho ani ninaafura ni na kura aboro tipa gu Paradizo nika ye kumbatayo. Gipai re nga kina rengo, bambiko Yesu aima fura tipa gi veresi re rogo gu gako Tungusapai Naadu Rii Bagangara yo, nga si nika digisotihe adigiso kumbatayo. (Mt. 5:5) Ono afugo Davide aayugo wai a raka nika du tii gu zogarago nga ga Bakindo Soromo. Ho Soromo aazoga aYisaraere ni, ga Mbori aboro agbia ngbarago ti kparakpara zereda na ahe kini zugo wenengai rogo gu ringara naadu “na mamuanya na nzeme anyege kpaima.” Mbori aya: “Ka oni apéka gimi rugaapai . . . , mi ki fu zereda ku rogo gaoni ringara, oni ki nira zezeredi, ka boro agúndesi nga roni ya.” (Pa Mot. 20:24; 26:3, 6) Gi kidohe re aima ringbisatihe ti regbo gu zogarago nangia ga Soromo. (1 Peka 22:9; 29:26-28) Na Yekova akidohe nga gu gbegberẽ aboro naairiso kura ambori “adú nga ho berewe te.” (Tam. 37:10) Sidu, agu afugo du rogo Atambuahe 37:10, 11, 29 aima digisotihe na si nika digisotihe adigiso a kumbatayo.

9. Ginipai nakindo gu rago nangia Seba apehe tipa gu zogarago nangia ga Bakindo Soromo?

⁹ Nakindo gu rago nangia Seba agi pa gu zereda  na zugo ahe naadu rogo ringara aYisaraere ho Soromo adu ni ni bakindo. Gi nakindo re andu gbanga nunguro ku Yerusarema yo tipa ka bi gipai re nitiri. (1 Aba. 10:1) Tingbafuo ri ta ka bi gu kindo nangia ga Soromo, ri aya: “I agumba nga ha fere dati bebere he te. . . . Betedi aboro nga avururo! Betedi aboro nga gamo amoyambu, nga agu yo ninaru ku bara bangiro dedede, ki nibi ga tatamana!” (1 Aba. 10:6-8) Ono agu apai naadu tii gu zogarago nangia ga Soromo angia kpia agu apai Yekova nika mangaha fu wiri aboro tii gu zogarago nga ga Wiriko nga, Yesu.

10. Ngba gini gene kiipa Yesu tiga Soromo?

¹⁰ Yesu kiipa ko ti Soromo rogo agene dunduko. Soromo angia kpakpa boro, namangi kere aingahe nga gu naye na kerepai kurii ga Mbori aboro. Ono tipa Yesu tigako, ko nga rengberengbe Bazogo, kaa manganga ingahe ya. (Rk. 1:32; Eb. 4:14, 15) Yesu anye ni ruruko fu Yekova zavura ho Satana aye na kere asada ni fu ko. Kristo ima yugoho nga ka ko mangingo ingapai watadu ka manga gupai nika imisa gako ruru azogo te. Si nipa mamu ko du ni gaani Bakindo.

11. Ada nika undo Yesu ti sunge zogarago?

¹¹ Yesu na agu aboro du bangeyo nga 144,000 ko nika zogarago na yo nika ngerafuo wiri aboro na ki digisi gu ga Yekova ringbisapai du tipa kpotosende. (Yugo. 14:1-3) I aima gbiatiyo na dungu akpakarapai ho i aaraka ni auru kpotosende ane, sidu, i nika rugatiyo aruga na agu apai agu aboro du auru kpotosende agbiatiyo na ni. Ginipai agu aboro Yesu nika zogarago na yo re nika mangaha?

12. Gini sunge Yekova nika fuhe fu agu aboro du bangeyo nga 144,000?

¹² Yesu na agu aboro ko nika zogarago na yo na bakere sunge beyo i nika mangaha susi gu Soromo amangihe. Bakindo Soromo aangerafuo amirioni aboro rogo bangisa ringara sa. Ono tie, agu aboro nika zogarago rogo ga Mbori Kindo nika undo ka ngerafuo agu abirioni aboro naraka rogo zegino dunduko. Nairiwo gu pa mamu Yekova nafuhe fu agu aboro du bangeyo nga 144,000 re!

13. Gini kparakpara sunge agu aboro Yesu nika zogarago na yo nika mangaha?

¹³ Wakina Yesu, agu aboro du bangeyo nga 144,000 re nika mangasunge ni abakindo na ni aboromotumo. (Yugo. 5:10) Ho si anaaida ni aYisaraere naagia sangba ga Moize aNdiko ni, aboromotumo anaaundo yo i du na wene kpotoyo na kidu mbembedi na Yekova. Gu Ndiko re angia “kirima gu wene apai nikaye,” si rẽarẽ tie ani dakuti gupai nga, agu aboro Yesu nika zogarago na yo nika undo ga Mbori aboro i du na wene kpotoyo na kidu mbembedi na Yekova. (Eb. 10:1) Ani ainongo wai agi abakindo na aboromotumo re nikaa fura na agu azogo nga ga Mbori Kindo ku auru kpotosende no te. Ka si vura du vurũ nga gini mbakadapai du Yekova nika mangaha, ani ima rengba kadu na gu kido nga, agu aboro nika du auru kpotosende nika gbia agu arugapai agbia i nikaa idaha.​—Yugo. 21:3, 4.

14. Gini pagume du dagba “kura akandoro” na “umba rika aboro”?

¹⁴ Yesu aya tipa agu aboro i nika zogarago na yo nga, i nga “umba rika aboro.” (Rk. 12:32) Ko afura a tipa ue badona, nga aguyo ko ayambu yo nga “kura akandoro.” Agi abadona ue re dunduko nga akandoro sa du ni kodikodi ra. (Yo. 10:16) Agi abadona re dunduko ue namangasunge kina sa areme, na i nikaa ndu kindi kumbatayo kaa mangasunge wa sa ho i nika sigira Paradizo ni auru kpotosende ane. Ti gu regbo re, gu “umba rika aboro” nika du ngbangbaturũ  yo na gu “kura akandoro” kidu na maabangirise ka gbia ngbarago ti raka nyeanye kindi auru kpotosende ane. Ono gu kura apai kinaho si aida gu “kura akandoro” mangihe awere tipa ka rẽ ka raka rogo Paradizo.

15. (a) Waigu “kura akandoro” amangasunge wa sa na awirina Kristo? (b) Waigu rengbe mo ka wirika gu kpiapai nga ga gu wirina du babaga adawa yo? (Oni bi sura.)

¹⁵ Gu bamangi gbegberẽ apai nasa berãko re akpi mbata fu ko gbia mamu tipa ka yugo na ni nga ko na bakere tambuahe tipa gupai Kristo amangihe fuko. Gu kparakparapai du dagba rani nga gu “kura akandoro” na gu bamangi gbegberẽ pai re nga, ani na bakere amamu berani awere ka yugo gaani bipai tipa Yesu. Ni kpiapai, ani nayugoho nga ani ima kpinyemu Yesu ngba gu gene ani amangapai na mbedimbedi awirinako ngbaha. Yesu ape gupai nga, ko nika sapangbanga akandoro ringbisihe kuti wai i amangapai na awirinako. (Mt. 25:31-40) Ani rengbe ka undo awirina Kristo ni tungusa ani pai zaaza na kini sa aboro ni abawiriki. (Mt. 28:18-20) Si nga ndu gupai ani aida ka mangasunge ti ni wenengai na agu abuku naundo rani ani girogo Baibiri yo wa gu nga, Mo Raki Nyeanye Kindi na Ngbarago! Ka si du nga mo awisigongo Baibiri awere na boro te, mo ima rengba ka maaha ni gamo sasa ka pepa wisigo Baibiri fu dungu aboro.

16. Ginipai rengbe ani ka mangaha tipa ka mbakada tirani awere tipa ka raka tii ga Mbori Kindo?

¹⁶ Si aidanga ani sungu mbata da ti kina gu regbo ani nikaa raka Paradizo yo ka da ni ngbatunga agu aboro nga aguyo Yekova aida yo yo te. Tona kina awere, ani ima rengba ka manga asadatise kadu ni rururani rogo gaani afugo yo na mangapai na kidu na ruru bipai tipa raka. Na ani ima rengba ka nye ni rururani fu Yekova, fu gaani badiarogatise, na fu awirinarani aKristano. Ka ani aagiasangba Yekova awere rogo gi gbegberẽ zegino re, si nika du furani taata ani gisangbako Paradizo yo. Ani ima rengba ka sonosa agu abirĩ-sunge na asino nga gu nayugo gupai nga ani nambakada tirani tipa ka raka yo. Oni bi gu kekeapai a nga, “Ya mo Oni Regerege Tipa Kadu ‘Ni Adikumbo Zegino’?” du kina rogo gi magazini re.

17. Ya mo si naida ani du na bakere gberãrago tipa agu aingapai ani amangihe kusayo? Oni sakingo rogoyo.

¹⁷ Si naida ani mangi bakere asadatise ka zanga du na bakere gberãrago tipa gu kere aingapai ani amangihe kusayo. Sidu tie, si aidanga  ani naabi motumo tumorii ni gu ndupai nika sa rani ani “ingi pai ni nyemu he” te. (Eb. 10:26-31) Ono ani ima rengba kadu na gu kido nga ka ani saberã rani nzunzu ti kere ingapai, na ki gbata gu undo Yekova afuhe vurube abaakumba, na ki aria gaani sino mangapai, ko nika mbupai ambu furani kpaima. (Yes. 55:7; Amo. 3:19) Oni tingidi agu afugo Yesu ko apehe fu aFarusi nga: “Mi aye nga ka yamba ruru aboro te, ono ingiingi yo.” (Mt. 9:13) Motumo tumorii na bakere ome ti ni ka dada gaani aingapai.

18. Ginipai mo aida ka fura tipaha na gu bamangi gbegberẽ apai nakpi pati Yesu?

¹⁸ Mo bingo tiro nga mo Paradizo yo na kini fura na gu bamangi gbegberẽ apai nafura na Yesu. Oni dunduko ue nika pepa wai du oni na tambuahe tipa ga Yesu motumo tumorii. Mo ima rengba ka sana ko ko penga pa wai foro apai aamanga rogo gu yangada asaa nangia ga ga Yesu raka auru kpotosende, na wai ko adu ho Yesu akaragapai ni fuko tipa gupai ko aaida ko mangihe fuko. Na ko ima rengba ka sana ro tipa wai raka adu rogo yangada arame nga ga gu sino raka nga ga Satana. Si adu ni pa mamu ka wisigo fugo Mbori na ngbatunga boro wa gu kumba re!​—Ef. 4:22-24.

19. Tipagine raka nikaa du nga ti ni ni kpakpasiraha Paradizo yo ya? (Oni bi gu sura duti kpotoho.)

¹⁹ Raka akpasiranga Paradizo yo te. Ani nika gbia badungu wene aboro na kini mangi wene asunge. Gu ngbaangba gbe nga, rogo auru dunduko, ani nika du na rengba ka ino gu Barani du ngbangbaturũ yo wenengai na kini gbia ngbarago ti agu ahe ko nika fuhe. Dungu apai ani ka wirikaha tipa ko, na dungu apai ani ka wirikaha ti gako kusikusiahe. Kina wai ani nikaa raka ni gbangaha, kinawo a gaani nyemuse nika kio tipa Mbori. Ani na bakere tambuahe fu Yekova na Yesu tipa ka fu gu kidohe furani nga ani ima rengba ka raka nyeanye kindi rogo Paradizo!