1. Ginihe nga “gu zereda nga ga Mbori,” na waigu ani agbia undo ti du na ni? (AFiripoio 4:6, 7)

 NGBATUNGA zereda kinaho nga gu gi zegino re ainongo pai tipaha ya. Si nga “gu zereda nga ga Mbori,” nga gu zereda naye ti du na kparakpara pagume na gu Barani du ngbangbaturũ yo. Ho du ani ni na gu zereda nga ga Mbori, ani nadu ni bandabanda rani. (Oni gedi AFiripoio 4:6, 7.) Ani nagbia ngbarago ti du na mbembedi pabakure na agu aboro nakpinyemuko. Na ani nagbia ngbarago ti du na mbembedi pagume na “Mbori zereda.” (1 Tesa. 5:23) Ho ani aino Barani ni, kini kido kutiko, na kini gisangbako, gu zereda nga ga Mbori ima rengba ka fu zereda ku kpotorani yo ho ani agbiatirani ni na akpakarapai.

2. Tipagine rengbe ani kadu na gu kido ti ni nga ani ima rengba kadu na gu zereda nga ga Mbori?

² Ya mo ani rengbe nzunzu ka gbia gu zereda nga ga Mbori ho ani agbiatirani ni na akpakarapai wa gu nga, ririakaza, agberãngo, gu vunduvunduapai nga ga birĩ-zogarago, watadu arungosiro? Ai kpakarapai dagba agi akpakarapai re yo ima rengba ka sa rani ani du na bakere gunde. Ono tie, Yesu arugu apefuoko nga: “Ka oni rúngo nga kpotoroni yo ya, ka oni gúnde nga a ya.” (Yo. 14:27) Si nipa ngbarago nga, awirina ima pekafuo gi ga Yesu rugute re. Na ga Yekova undo, i aima du na rengba kadu na zereda ho i agbiatiyo ni na kere aˈasada.

3. Waigu rengbe gu ririkaza namanga rogo ringara sa watadu gu namanga rogo zegino dunduko ka gberesapa gaani zereda?

³ Gu ririkaza namanga rogo ringara sa watadu gu namanga rogo zegino dunduko ima rengba ka manga bakere ariapai rogo gu raka yo nga ga aboro naabaha. Oni makianga gu maapai kurii  gu kaza nga Korona adu na ni kurii aboro. Rogo gu kura wisigopai sa, i atingidi gupai nga aboro bangeyo niima susa bebere gu bange aboro du rogo zegino dunduko aaranga yuru ti regbo gu ririkaza re te. Ti regbo gu ririkaza re, bakere aboro nadu na bakabangirise, gberãrago, aguyo kini mbiribuda nikerehe, aguyo kini di kere angua kutii kpotoyo yo, aguyo kini mangi gayo aborokporo gbegberẽ, na aguyo kini asadi ka imo tiyo. Ka si dunga ririkaza ti kurogo gu ba mo araka rogoyo, waigu rengbe mo ka zatiro ti bakabangirise na kini gbia ngbarago ti gu zereda nga ga Mbori?

4. Tipagine pa ino ani gu ga Yesu sangbanebi du tipa yangara arame afu zereda ti ni furani?

⁴ Yesu ape gupai nga ti yangara arame, ririakaza nika du, “rogo agu arago.” (Rk. 21:11) Waigu pa ino ani gipai re afu zereda furani? Ngbarani azeranga ka bi gu ririakaza namanga te. Ani ima ino gupai nga apai namanga kina wai Yesu apehe nga si nikaa manga. Sidu, ani na nduapai berani ka pekafuo gu ga Yesu rugapai ko afuhe fu agu aboro naraka ti yangara arame nga: “Oni bí he ka si fudi nga roni ya.”​—Mt. 24:6.

5. (a) Waigu agu afugo du rogo AFiripoio 4:8, 9, aundo rani ani diberã tipa gupai si aida ani mangi kparakpee tipaha ho ani agbiatirani ni na ririkaza? (b) Waigu kura wirina agbia undo ti dega ri turi kuti fugo dede Baibiri, na waigu rengbe gari kpiapai ka undo ro?

⁵ Ho ririkaza ati ni, si ima rengba ka sa rani ani naabaka bangirani ni bakerehe na kini gunde. Gere nga gupai namangi gu wirina du rimori nga Desi. b Tifuo tame bari, na wiri unvura bari, gbiati gari munganga kpiki dunduko be gu kaza nga Korona, ri atona ka bakabangiiri nga ri nika dia gu gbiro kaza re na ki fuhe fu gbinza nari. Mbiko gu ririkaza re, ri aabakabangiiri nga ri nika zanga gari sunge, sidu, ri aabakabangiiri tipa wai ri nika du na rengba kaa ngbe riahe na kini tumo marã bambu. Ri aabakabangiiri nikerehe tipa agi apai re si ki sa gupai nga ka ri naaranga yuru ya. Ono tie, Desi aima gbia gari zereda berewe. Wai? Gupai ri akpari tipa ha nga Yekova undo ri ri du na zereda na kini berẽ weneapai. (Oni gedi AFiripoio 4:8, 9.) Ri adegeturi fu Yekova ko ‘fura’ furi rogo dede fugo Baibiri. Ri aya, “Gu zezeredi afugo nga ga abagedihe aundo re ka mi dunga na bakabangirise ya na si atingidi re na pa ga Yekova inapai.”​—Tam. 94:19.

6. Waigu rengbe wisigopai nisase gbiati agu adunguratise nga ga dungurati ka undo ro?

⁶ Ti regbo ririkaza, ani ninaadunga na rengba ti aregbo dunduko tipa kaa manga agu apai dunduko ani anaamangaha mbata te, ono ka gure rugusinga ro ti gamo wisigopai nisase watadu nduge tipa adunguratise ya. Gu ndikidi akpiapai namangi amanga du rogo gaani awaraga na avidio nika tingida ro na gupai nga, awirinamo nabanda gayo padu niruruse abanda si ki vura du vurũ nga i nagbiatiyo na kina ngbatunga akpakarapai wa gure. (1 Pet. 5:9) Adunguratise nika undoro mo hiisi berãro na gu weneapai du  rogo Ziazia kekeapai. Si a nika fu agu amomu foro nga ga ngarasa kura aboro na i ki ngarasi ro. (Rom. 1:11, 12) Ho mo aberãpa wai ni Yekova asongodi airisiko ho i adu ni na kaza, gunde, watadu ho i adu ni nisayo, gamo idapase nika nyaka na mo nika du na gu kido nga ko nika songoda ro asongoda.

7. Ginipai rengbe mo ka wirikaha be gu mokedi nangia Yoane?

⁷ Mo mangi asadatise tipa kaa fura na awirinamo. Ti regbo ririkaza, si rengbe kadu nga aboro du na dagba ti akurayo zavura ho du ani ni vurũ na akuarani airisimbori. Ti ngbatunga regbo wa gure, mo rengbe kadu kina wai gu mokedi nangia Yoane adu. Ko aaida aida ka bi bakureako nangia Gayo. (3 Yo. 13, 14) Wa si avura duwo, Yoane aima ino gupai nga tipa bete aregbo ko adunga na rengba ka bi Gayo te. Sidu, Yoane amangi gupai ko arengbe ka mangaha nga; ka ke waraga fu Gayo. Sidu, ka si du nga dedede mo na rengba ka ndu fuo awirinamo ni tiro te, mo asadi ka yamba yo na terefuni, ka yamba yo rogo vidio, watadu ka keda kekeapai fuyo. Ho mo afura ni na akuaro aKristano, mo nika bi tiro nga mo nisa ro gbe te na mo nika du na bakere zereda. Mo fura na abaakumba ka si dunga mo na bakabangirise, na mo ki di gu ngarasaro kugume i nika fuhe.​—Yes. 32:1, 2.

8. Waigu rengbe gberãngo ka gbarasapa gaoni zereda?

⁸ Ka si dunga hihi ime aima manga rogo gu rago mo araka rogoyo, bazigizo, watadu we aima zo rago, mo ima rengba kaa bakabangiro nikerehe tipa gbanga regbo tifuo gu kpakaraapai re. Ka si dunga gamo boro kpi watadu pa gamo ahe gberẽ, mo ima rengba kadu na rungo, zanga maabangirise, watadu kadu na zinga. Gipai re ayugongo gupai nga mo naberã kina pa aũzegino watadu idapase tiro te te. Mo andu rogo kere aˈasada na kura aboro ima rengba ka berã gupai nga si naida mo mangipai ngba gbegberẽ gene. (Eyo. 1:11) Ono zavura na agu akpakarapai re dunduko, mo ima rengba ka gbia zereda. Rogo gini gene?

9. Ginipai Yesu apehe nga gu rengbe ka mbakada rani tipa agberãngo?

⁹ Oni tingidipa gupai Yesu agumbaha ni sangbanebi. Kura aboro naberã gupai nga ka gberãngo mangingo yo te. Ono ani ima ino gupai nga dungu agberãngo nikaa manga ti gi gaani regbo re, na ani ima rengba kaa gbiatirani na bete agi agberãngo re. Yesu ape gupai fu apefuoko nga, bakere ‘abazigizo’ na kura agberãngo nika manga amanga mbata fu digido rago da. (Rk. 21:11) Ko ape gupai berewe a ni sangbanebi nga “ingapai amaa pai amaa,” si du nga gupai namanga areme. Ni kpiapai, ani nabi gbegberẽ mangaapai, zuu, na gu zubohe nga ga abamoi. (Mt. 24:12) Yesu aapenga gupai nga agi agberãngo re nikaa manga kina agu aboro sa Yekova nambu yo te. Nirengo, badungu ga Yekova ruru amoyambu aima digo nigbiatiyo na agberãngo. (Yes. 57:1; 2 Kor. 11:25) Yekova arengbanga ka banda rani ngba iiriwo gene be agberãngo dunduko te, ono ko ima rengba ka fu ai guhe furani ani aidaha tipa ka nye na zereda.

10. Tipagine du pa mbakada ani tirani awere ti ni ni gupai nayugoho nga ani na idapase? (Asanza 22:3)

¹⁰ Ka si dunga ani ima mbakada tirani tipa ka mangapai kuti tunguotunguopai mbu regbo koyo, si nika du furani taata tipa ani nye zezeredi. Ono ya mo pa mbakadatise tipaha nayugo gupai nga ani na idapase kuti Yekova te? Wagusa te. Ni rengo, pa mbakada ani tirani tipa gberãngo nayugo gupai nga ani na idapase kuti gako tandu mangaapai tipa ka ngerafuo rani. Waigu duhe wo? Fugo Mbori naruga rani tipa ani mbakadi tirani tipa agu agberãngo rengbe ka manga. (Oni gedi Asanza 22:3.) Na vurube gu kekeapai nga ga amagazini, agu adunguratise nga ga dungurati, na agu atingidapai naye kina boro ti regboho, ga Mbori riigbu aima digo ningarasi rani bara dunguhe tipa ani mbakaditirani  tipa tunguotunguopai. c Ya mo ani na kido kuti Yekova? Kangia wo duhe, ani nika pekafuo gu rugapai re awere​—mbata fu gberãngo mangi.

11. Ginipai mo awirikaha ti ga Margaret kpiapai?

¹¹ Oni bingo gu kpiapai nga ga gu wirina du rimori nga Margaret. Airangbii ape gupai furi nga si naida ri guari kpuri bambiko we aazokoda rago rogo gari dagbarago. Bambiko gupai nga dungu aboro naasada ka ora ti bangisa regbo sa, badungu atarambiri adu gene na ka boro arengbanga ka ndu kumbatayo ya. Bakere bibiri ngime nadu wege yo, na Margaret aarengbanga ka kura vuru gari tarambiri yo te. Ono tie, ri abati mbiko ri aima mbakada tiri. Ri amoi kpia gbakigbaki rago ku rogo gari mangu nga gu narengbe ka undo ri ri ini gu rago aboro aaora ku rogoyo. Ri aima kama tarambiri mbata mbu regbo ko yo ngba gu gene re tipa ka ino wari rengbe ri ka ndu ni ti regbo tunguotunguopai. Mbiko gupai nga Margaret aima mbakada tiri, ri aima bata be gu we re.

12. Tipagine si aida ani pekefuo agu arugapai tini i afuhe furani tipa si banda rani?

¹² Tipa ka banda rani gbiati kura aboro, airangbii ima rengba ka pe gupai nga ka aboro naatanga ti gu kura aregbo ya, aboro ga kurogo kura aba, watadu aboro pekefuo kura arugapai. Gu kura aboro ima rengba ka zanga pekafuo agi arugapai re mbiko i aidanga ka mbu agu ahe du beyo sayo te. Waigu aKristano amangapai? Baibiri nagumba gupai furani nga: “Oni gí agu arugute nga ga aboro dunduko mbiko Gbia, ki nigi pa bakindo wa du ko ni bahe, na pa abazogo, nga agu yo ko nasia yo.” (1 Pet. 2:13, 14) Ga Mbori riigbu ima fu rugapai furani a tipa ka banda rani. I natingida rani dedede na gupai nga si naida ani fu agu anamba aterefuni du berani awere fu abaakumba tipa wa ka i rengbe ka yamba rani ti regbo tunguotunguopai ki bi rani. Ya mo mo ima mangaha wo? Ani ima rengba a ka gbia arugapai tipa gu ba rengbe ani ka ora ku rogoyo, wai ka gbia agu aundo nga ga riahe na wai rengbe ani ka undo kura aboro. Ka ani aamangangaha wo ya, ani ima rengba ka maa gaani raka na gu raka nga ga abaakumba rogo kerepai. Oni tingidi gupai nga, gi ruru akumba re nangera tipa mbisimorani. (Eb. 13:17) Margaret ape gupai nga, “Mi ima ida kuti gupai nga pekafuo gu rugapai nga ga abaakumba na ga riigbu nabatasi unga re.”

13. Ginipai fu ngbarago gbiati zereda fu gu dungu aKristano oro ki mbu akpuyo?

¹³ Dungu agu awirina si aidi i mbu akpuyo  mbiko agberãngo watadu vura watadu vunduvunduapai nga ga birĩ-zogarago ima manga bakere asadatise tipa ka inido tiyo na gi gayo vovo gene raka re, na i namanga bakereapai ti ngba gayo sunge fu Yekova. Wakina agu aKristano nadumbata nagbataka mbiko rungosiro, i nandu kindi kumbatayo kaa ‘tungusapai.’ (Amo. 8:4) Tungusapai naundo yo i moiberãyo gbe tipa Kindo kuba gupai nga kaa berã kina tipa agu akpakarapai re. Ni sangbana gipai re, i ima banda gayo ngbarago na zereda.

14. Waigu rungosiro narengbe ka gbarasapa gaani zereda?

¹⁴ Rungosiro ima rengba ka gbarasapa gu dungu apai ninaaye na zereda furani dedede. Ani nadu na ngbarago ho ani adungura tirani ni kina sa zanga gunde, kini tungusipai gbaiga, na kini mangi agu apai ani amangaha na auru dunduko zanga gunde nga i nika zio rani. Ka si dunga ani arengbanga ka manga agu apai re berewe te, ani ima rengba kadu na bakabangirise, kini gunde tipa gupai nika manga fuo gure. Anga gbegberẽpai ngaha kaa berã wa gure te. Ono tie, si naida ani du na rubangirise. Yesu ayugu gupai nga rungosiro ima rengba ka sa apefuoko i koto. (Yo. 16:1, 2) Sidu, waigu rengbe ani ka banda gaani zereda ho i arungosi rani ni?

15. Tipagine si aidanga ti ni ani gunde be arungosiro ya? (Yoane 15:20; 16:33)

¹⁵ Fugo Mbori nape gupai furani nga: ‘I arúngosi agu yo dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.’ (2 Tim. 3:12) Si aima kpakara fu gu wirina du rimoko nga Andrei ko idi kuti gupai nga ga Yekova amoyambu naabayo i nika rungosiyo ho i arugusi gaani sunge ni rogo gako gbata. Ko aberẽ gupai nga: ‘Badungu aDezire Yekova du ane. Waigu rengbe airangbii ka zio rani dunduko?’ Ono kuba gupai nga gi berã re fu zereda fu Andrei, si asako ko naabakabangiriko abaka kindi. Kura awirina akido kuti Yekova na i aaberãnga gupai nga ka i zingo yo te te. I aima ino gupai nga i ima rengba ka zio yo, ono i aabakanga bangiriyo ni bakerehe wa Andrei te. Sidu, ko adiberã kadu na gayo bipai, na ko akido kuti Yekova na ngbadukoyo dunduko. Ko agbia zereda niipo, na awere ko nagbia ngbarago agbia wa vura duhe nga badungu akpakarapai kindi ho. Kina gu bangisapai re rengbe kadu a tipa rani. Wa vura duhe nga, Yesu aima pe gupai furani nga ani nika gbiatirani agbia na arungosiro, ko aima kido rani a nga ani ima rengba ka nye ni rururani.​—Oni gedi Yoane 15:20; 16:33.

16. Gini arugapai si aida ani mangipai kutini ho du ani ni rogo rungosiro?

 ¹⁶ Ho i arugusa gaani sunge ni watadu ka rugusa dungu apai, ani ima rengba ka gbia arugapai be be-basunge na be abaakumba. I namanga agi apai re tipa si banda rani, na tipa ka sa gupai nga ani naagbia agu ariahe nga ga toro, na tipa ka undo rani ani naandu kindi kumbatayo kaa tungusapai a wa rengbe omerani na ni. Mo mangi asadatise wa rengbe ome ro na ni ka mangapai kuti gu rugapai mo agbiaha, ka si vura dunga mo aruganga tiro na ndu gupai dunduko i afuhe ti ni te. (Yak. 3:17) Berewe a, ka mo ya penga pa gu gbugbu apai du tipa awirinarani watadu agu apai nga ga dungurati fu agu aboro adunga na rengo tipa ka inoho ya.​—Batu. 3:7.

17. Wakina agu amokedi nadu rogo bambata sa kama agarã, ginipai ani nadiberã tipa ka mangaha?

¹⁷ Pai sa dagba gu bangua nduapai yo Satana asovura ti ni kuti ga Mbori aboro nga, i “naka kuti gu dezire pai nga ga Yesu.” (Yugo. 12:17) Ka mo mbunga Satana na gako zegino si gundesi ro ya. Sunge tungusapai na yugopai naye na ngbarago furani gbiati zereda asogote ki vura du vurũ. Rogo bambata sa kama agarã, ho agu airangbii nangia ga aYudo yo arũ ndiko ni nga ka amokedi tungusinga pai ya, gu ruru akumba re asia ka giasangba Mbori. I akpatagara kindi kuti sunge tungusapai na gu sunge re asayo i du na ngbarago. (Amo. 5:27-29, 41, 42) Rengo ngaha nga, ho i arugusa bete gaani asunge ni, si naida ani du na bakere rubangirise ho ani atungusapai ni. (Mt. 10:16) Ono ka ani mangi ome, ani nika du na gu zereda naye mbiko sa ngbarago ti Yekova na ti tungusa gu pangbanga nabatasa unga aboro.

18. Da rengbe ani ka gbia ndikidi zereda beni?

¹⁸ Oni du na gu kido nga zavura ti kpakarakpakara aregbo, ani ima rengba kadu na zereda. Ti ngbatunga aregbo wa gure, si naida ani tingidi gupai nga, gu zereda ani aidaha nga gu zereda nga ga Mbori, naida ka ya, gu zereda kina Yekova sa narengbe ka fuhe. Oni kido kutiko ho oni agbiatironi ni na ririkaza, gberãngo, watadu rungosiro. Oni nye mbembedi na gako riigbu. Oni naangera tipa gu bawene apai napido roni kumbatayo. Wa oni nikaa mangaha wo, ‘Mbori zereda nika du na oni.’ (Frp. 4:9) Rogo gu kekeapai naye fuo gere, ani nika sakapai tipa wai rengbe ani ka undo agu akuarani aKristano nagbiatiyo na agberãngbi tipa i du na gu zereda nga ga Mbori.