1. (a) Gini maabangirise Yekova nafuhe furani? (b) Ginipai ‘pasúngudo Yekova’ ayugoho? (Oni bi “Sakarogopaiyo.”)

 YEKOVA ima fu bawene maabangirise fu agu aboro dunduko nakpinyemuko. Barambeda, ko nika digiso kaza, rungo, gbiati kpio. (Yugo. 21:3, 4) Ko nika undo “bayee aboro” nga agu yo nakido kutiko tipa i sa kpotosende ni paradizo. (Tam. 37:9-11) Na ko nika saha furani taata tipa ani du na wene pagume na ko nga gu nika du ni bawenehe kisusi gu ani agbia ngbarago ti ni awere. Nangba gu bawene maabangirise re! Ono gini nduapai du berani tipa ka ida kuti gupai nga ga Mbori akidohe nika manga amanga? Yekova ninaamanga agu apai ti aregbo dũ ko aya ko nika mangaha. Rogo gi gene re, ani na wene ndupai ka ‘súngudo Yekova.’ * (Tam. 27:14) Ani namanga gipai re ni sungudo ani gaani Mbori rogo zerangbaduse yo na ngbarago tipa ko digisi gako akidohe.​—Yes. 55:10, 11.

2. Ginipai Yekova naima mangaha?

² Yekova ima yugo gupai nga ko nabanda gako akidohe abanda. Oni bingo kura kpiapai sa. Yekova nakidohe rogo gu buku nga Yugoti nga, ti gi gaani regbo re, ko nika dungura aboro kina sa, dagba rika aboro dunduko, na angbatunga yo, na aboro, na angbatunga afugo na ko nika kodayo tipa ziazia irisombori. Gi kparakpara badona aboro re du i ayambayo areme nga, “bakere rimbasa aboro.” (Yugo. 7:9, 10) Wa vura duhe nga gi badona aboro re na ngbatunga aboro dunduko akumba, adee, gbiati agude rogo zegino dunduko, i nga agu aborokporo du kina sa na zereda. (Tam. 133:1; Yo. 10:16) Agu aboro nga bakere rimbasa natungusapai a zaaza. I ti aregbo dunduko regerege ka pepa gayo maabangirise tipa wene zegino kumbatayo  fu agu aboro rengbe ka degatuyo. (Mt. 28:19, 20; Yugo. 14:6, 7; 22:17) Ka si ngia mo nga papara gi bakere rimbasa aboro re, zanga kapa, gu maabangirise du mo na ni tipa gu weneapai nika ye kumbatayo ima du na nyanyakipaha gbe foro.

3. Ga Satana sasa nga gine?

³ Bakitingbanga aidanga oni du na maabangirise tipa raka kumbatayo te. Gako sasa nga ko naida ko saroni oni idi kuti gupai nga Yekova aberãnga paroni te na Ko abandanga gako akidohe te. Ka Satana gberesipa gaani maabangirise, ani ima rengba ka zanga du na wingbaduse, na zavura ani ima rengba kambu iriso Yekova. A wa ani nika bihe, Bakitingbanga aima asada ka gberesapa ga Eyobo maabangirise na ki sako ko mbu iriso Yekova.

4. Ginipai ani nika sakapai tipaha rogo gi kekeapai re? (Eyobo 1:9-12)

⁴ Rogo gi kekeapai re, ani nika sakapai tipa agu abirĩ Satana amangisunge na ni tipa ka manga Eyobo ngbaome ko gberesipa gako padu niruruse. (Oni gedi Eyobo 1:9-12.) Ani nika sakapai a tipa gupai rengbe ani ka wirikaha ti ga Eyobo kpiapai na ndu gupai si aida ani naatingida gupai ti ni nga Mbori nakpinyemurani akpi na ko nika digiso Gako akidohe adigiso.

5-6. Ginipai namangi Eyobo vuru wiri guru regbo yo?

⁵ Ga Eyobo raka aima du ni bawenehe gbe. Ko adu na wene mbembedi pabakure na Yekova. Ko adu na bakere aborokporo nadu na ngbarago, na ko kidu ni boro kumuko gbe. (Eyo. 1:1-5) Ono rogo uru yo gbua sa, Eyobo aima zanga bakere gako ahe dunduko. Ni bambataha, ko azanga gako anya dunduko. (Eyo. 1:13-17) Na fuo gure, awiriko akpiki dunduko. Oni berẽnga kuriipa gu gberãngo re tooni awere. Avunguagude nidu na bakere gberãrago ho wiriyo sa akpi ni. Oni berẽnga pa gu iriwopai nati ti aEyobo na diako, na gu gberãrago, gbiati rungo i adu rogoho ho i aini gupai ni nga awiriyo dunduko bawe ima kpi. Zanga kapa, Eyobo asiri gako roko nipa rungo kini kpari na ki ti kusande!​—Eyo. 1:18-20.

⁶ Fuo gure, Satana aye na kere iigirã kaza kuti Eyobo nga gu naima du ni pa zee. (Eyo. 2:6-8; 7:5) Mbata fu gure, aboro aima du na bakere irisa tipa Eyobo. Aboro anaaye fuoko tipa arugute. (Eyo. 31:18) Awere, i aane ko ane. Awirinako, mbembedi abakureako, na zavura agu aboro naaraka kpuko nangia gako amoyambu aima ká ko!​—Eyo. 19:13, 14, 16.

7. (a) Ginipai Eyobo aidi kutini nga si nangia ndu gupai naaye na rungo fuko, ono ginipai ko aká ka mangaha? (b) Waigu rengbe Kristano ka gbia tini na agu aasada du wakina gu du rogo gu sura du tipa gi gene waraga re?

⁷ Satana aaida gupai nga Eyobo idi kuti gupai nga ko aarungo mbiko Yekova aidanga na gako pai te. Ni kpiapai, Satana amangisunge na bayuge tipa ka gberesa gu bambu awiri Eyobo adu rogoho bawe naagbia ngbarago ti ri riahe kina sa. (Eyo. 1:18, 19) Ko amangisunge na we a tipa si zorõ ngbangbaturũ yo ka gberesa angianga kina ga Eyobo anya sa ya ono gako amoyambu a nga aguyo naangera fuo ra. (Eyo. 1:16) Bambiko gupai nga wege gbiati we aye ngbangbaturũ yo, Eyobo aberẽ gupai nga si aye be Yekova. Ni sangbana gipai re, Eyobo aidi kuti gupai nga, ko ima ba gberãrago tigaha rogo kura gene yo ti Yekova. Wa si avura du wo, Eyobo aima ká ka gberã ngbako yo fu gu Bako du ngbangbaturũ yo. Eyobo aima ino gupai nga tipa dungu agarã, ko aima digo nigbia dungu wene ahe be Yekova. Sidu, ko aberẽ gupai nga, ka si du nga ko adu na ngbarago tipa weneapai, si naida aida a ko di gu gbegberẽhe re kugume. Sidu, ko aya: “I tambua rimo Yekova.” (Eyo. 1:20, 21; 2:10) Wa si avura dunga  Eyobo azanga gako marã, awiriko gbiati gako kumuko, ko anye ni ruruko fu Yekova. Ono tifuo gure, Satana aˈasadi kurapai berewe kia.

8. Gini birĩ Satana amangisunge na ni berewe kuti Eyobo?

⁸ Fuo gure, Satana amangisunge na aboro biata namangi tiyo nga i angia abakurea Eyobo tipa ka sako ko naabi tiko nga sunge tiko te. Agi akumba re ape gupai nga Eyobo narungo mbiko ko amangi dungu gbegberẽ apai. (Eyo. 22:5-9) I aˈasadi a ka sa Eyobo ko idi kuti gupai nga ka si vura du nga gbegberẽ boro nangia ko te, ai gu ome ko arengbe ka mangaha ka sa ngbarago ti Mbori, sunge aadunga ti ni kandara tooni te. (Eyo. 4:18; 22:2, 3; 25:4) I aˈasadi ka sa Eyobo ko berẽ gupai nga Mbori akpingo nyemuko te, na Mbori aberãnga pako te, na zavura sunge ti iriso Mbori te. Gayo afugo asa Eyobo ko naabi tiko nga maabangirise ho berewe tipa apai ngba fuko te.

9. Ginipai naundo Eyobo ko du na wingbaduse na kidu nyanyaki?

⁹ Oni berẽnga pa gipai re. Eyobo sungu kuke yo kidu rogo kere nyenye igirã. (Eyo. 2:8) Abakureako nandu kindi kumbatayo kaa pe gupai nga wene boro nga ko te na pai ho ko amangihe du na nyanyakipaha te. Gako asada du kuriko wakina rõrõi ambia, gu imisiri du ko na ni kpotokoyo tipa pakpio awiriko ima du ni bakerehe gbe. Ti bambataha, Eyobo ongo aonga kii. (Eyo. 2:13–3:1) Ono ka agu akumba namanga tiyo nga i nga abakurea Eyobo re berẽ gupai nga pa onga Eyobo nayugo gupai nga ko nika mbu Yekova ambu, i nga ingahe. Ti kura regbo sa​—Eyobo tumba riko na ki ngere ku bangiri ziree abakureako yo ki ya: “Daho mi ka kpi ni mi ambu nga pa gi du ni [ruruse] te!” (Eyo. 27:5) Ginipai naundo Eyobo ko du na wingbaduse na kidu nyanyaki wa ko avura kaa gbiatiko na arungosiro vurũ? Zavura ho ko adu ni na bakere gberãrago, ko  aambunga du na maabangirise nga gako Mbori nyemuse nika undo ko aundo te. Ko aima ino gupai nga ka ko vura kpi, Yekova nika zingisako azingisa be kpio.​—Eyo. 14:13-15.

10. Ginipai gu pangbanga du tipa Eyobo ayugoho furani?

¹⁰ Gu pangbanga du tipa Eyobo nayugo gupai furani nga, Satana arengbanga ka manga rani ngbaome ani mbu Yekova te, na Yekova ima rugatiko na apai dunduko. Gu kpiapai nga ga Eyobo ima rengba a ka undo rani ani rugutirani wenengai na agu apai si akodaha. Ani makianga gu bete apai rengbe ani ka wirikaha be Eyobo.

11. Ka ani andu kindi kumbatayo kaa kido kuti Yekova, ginipai rengbe ani kadu na kido tipaha? (Yakoba 4:7)

¹¹ Eyobo aima yugo gupai nga ka ani aandu kindi kumbatayo kaa kido kuti Yekova, ani ima rengba ka hi ai asada na kidu na diabese ka ká fu Satana. Sangbanaha rengbe kadu nga gine? Ziazia Kekeapai nakido rani nga Bakitingbanga nika ora aora berani.​—Oni gedi Yakoba 4:7.

12. Waigu gu maabangirise du tipa zingabekpio anyakasi Eyobo?

¹² Si naida ani du na nyanyaki idapase tipa gu maabangirise du tipa zinga be kpio. A wa i agumbaha rogo gu kekeapai naye mbata fu gere, Satana namangasunge dedede na gunde be kpio tipa ka sarani ani mbu gaani pa du niruruse. Wa si adu tipa Eyobo, Satana agumba gupai nga Eyobo ima rengba ka manga ai pai zavura ki mbu iriso Yekova tipa ka batasa ungako. Satana angia ingahe. Zavura ho Eyobo aberẽ gupai ni nga ko nandu ka kpi, ko anye kindi niruru ko fu Yekova. Gu kido ko adu na ni kuti ga Yekova wenesino na gako nyanyaki maabangirise nga Yekova nika mangapai amanga niruru he aima undo ko ko hipai. Eyobo aima ida kuti gupai nga, ka Yekova aundongo ko awere mbuko kindi ni unga ko ya, Ko ima rengba ka zingisako be kpio kumbatayo. Gu maabangirise du tipa zinga be kpio angia ndikidipai fu Eyobo. Ka singia gu maabangirise re nga ndikidipai furani, gunde be kpio sanga rani ani mbu gaani pa du niruruse te.

13. Tipagine si aida ani moiberãrani ti ni wenengai sa agu abirĩ Satana amangisunge na ni kuti Eyobo?

¹³ Si naida ani moiberãrani wenengai sa agu abirĩ Satana amangisunge na ni tipa Eyobo bambiko ko namangasunge na kina ngbatunga abirĩ wa gure sa rani areme. Oni bingo gu ziree kitangbangase Satana apehe nga: ‘Agu ahe dunduko du be boro [angianga kina Eyobo sa ya] ni afu kina ha tipa ungani.’ (Eyo. 2:4, 5) Gure wa ka i ya Satana aya, ani akpingo nyemu Yekova Mbori nzunzu te, na ani ima rengba ka mbu Ko ka si du nga si naida ani batasi unga rani. Satana andu kumbatayo kindi ki ya, Mbori akpingo nyemurani te, na Ko abingo gu ome ani amangaha ka sa ngbarago ti Ko te. Bambiko ani ima ino gupai Satana aˈasada ka mangaha, sidu, ani aidanga kuti gako aziree te.

14. Ginipai aˈasada narengbe ka yugoho tipa rani? Oni funga kpiapai tipa gipai re.

¹⁴ Si naida ani naabi aˈasada ni momu tipa ka wirikapai tipa tirani. Agu aˈasada Eyobo agbiatiko na ni aundo ko ko ini gako arungbura na ki mangipai sani. Ni kpiapai, ko awiriki gupai nga, si aaida ko sonosi gu sino nga umbasitise ni bakerehe. (Eyo. 42:3) Ani ima rengba a ka wirikapai tipa tirani ni bakerehe ho du ani ni rogo asada. Wirina du rimoko nga Nikolay, * i aziko ku bambukiso yo si ki vura du vurũ nga ko aambu be kere kaza nga ga  kpotose aya: “Agu aregbo mi adihe ku bambukiso yo aundo re mi rugutire na pa agu asino si aida mi sonosihe.” Bara sa kindi ani aino pa agu arungbura du tirani, ani ima rengba ka manga ome tipa ka diabehe.

15. Da si aida ani degeturani funi, na tipagine?

¹⁵ Si naida ani degeturani fu Yekova angianga fu avurarani ya. Eyobo aima maaberãko wenengai ho Yekova afura ni na ko. Mbori asakipai na Eyobo ki ya: ‘Ya mo mo nabi gu ome du tire rogo gi kusikusiahe yo? Mi ima rugatire na agu apai dunduko mangi ro. Ya mo mo naberã gupai nga mi arengbanga ka ngerafuo ro te?’ Eyobo akaragapai rogo umbasitise yo na bakere tambuahe tipa ga Yekova wenesino. Ko aya, “Mi agi pa ro be kina gu giapai nga ga tue; ono awere bangire nabi ro.” (Eyo. 42:5) Si nawiraha wa Eyobo asungu kindi kuke yo, na gu kaza re ti kpotoko na kini rungo tipa awiriko ho ko ape agu afugo re ni. Wa si a vura du wo, Yekova aima yugo Gako nyemuse tipa Eyobo na ki kido ko na gupai nga ko ima ngba ti Ko.​—Eyo. 42:7, 8.

16. Ringbisihe kuti Yesaya 49:15, 16, ginipai si aida si du berãrani yo ho ani agbiatirani ni na aˈasada?

¹⁶ Areme a, aboro ima rengba ka senga rani na kini mangi rani si kidu wa ka i ya sunge tirani te. I ima rengba ka gbarasa pa wene rimorani wa du ani nibasasa watadu gaani riigbu “nigumba dungu [aziree] kuti” rimorani. (Mt. 5:11) Gupai ani awirikaha ti gu pangbanga du tipa Eyobo nga, Yekova ima du na kido nga ani nika nye anye niruru rani fuko ho ani agbiatirani ni na aˈasada. Yekova ima kpinyemu rani na ka ko mbunga agu aboro nakido kuti ko te. (Oni gedi Yesaya 49:15, 16.) Ka oni degenga  turoni kuti ai agu aziree avura Mbori agumbaha ya! James, nga wirina du Turkey yo gako aborokporo agbiatiyo na kere aˈasada aya: “Ani aini gupai nga degatue kuti agu aziree du tipa ga Mbori aboro aima rengba ka ba gberãrago tirani. Sidu, ani amoiberãrani gbe tipa gu maabangirise du tipa ga Mbori Kindo na ki nye zaaza ti ngba gaani sunge fu Yekova. Nisangbana gipai re, ani abanda gaani ngbarago.” Wakina Eyobo, ani nadegaturani fu Yekova! Agu aziree avurarani agumbaha agberesanga pa gaani maabangirise te.

17. Ginipai oni awirikaha ti gu kpiapai nga ga gu ruru akumba na adee i nafura tipa yo rogo AEbere kapita 11?

¹⁷ Eyobo nga moyambu sa dagba ga Yekova amoyambu yo nanye na wingbaduse na kidu nyanyaki ti regbo kere aˈasada. Rogo gu waraga gu mokedi nangia Pauro akehe fu aEbere, ko apepa kura dungu aboro yo ko aya tipa yo wẽ i nga “adezire . . . ni ngenge yo wa ndurõ.” (Eb. 12:1) I dunduko aima gbiatiyo na kere aˈasada, ono wa si avura du wo, i dunduko anye niruru yo fu Yekova rogo gayo raka yo naabaha. (Eb. 11:36-40) Ya mo i agbarasipa gayo hipai gbiati gayo kakaka asadatise agbarasa? Wagusa te! Wa si avura du nga rogo gayo raka yo i aabingo ga Mbori akidohe dunduko si nidigisitihe te, i aandu kindi kumbatayo kaa kido kuti Yekova. Na bambiko wa i adu na gu kido nga Yekova aima ida na yo, i aima du na gu kido nga i abi gako akidohe abi dunduko si nidigisitihe. (Eb. 11:4, 5) Gayo kpiapai ima rengba ka nyakasa gaani diaberã tipa ani naandu kindi kina kumbatayo kaa kido kuti Yekova.

18. Ginipai mo nadiberã ka mangaha? (AEbere 11:6)

¹⁸ Areme, ani naraka rogo gu zegino apai agberã rogoyo kina kumbatayo. (2 Tim. 3:13) Satana ata nyasanga asada ga Mbori aboro kindi te. Ka si vura du nga kina gini akpakarapai du furani kumbatayo, ani dinga berã adia ka mangasunge nyanyaki fu Yekova, ki du na gu kido nga, “ani moi bangirani koyo du unga Mbori ni.” (1 Tim. 4:10) Oni tingidipa gupai Mbori amangihe fu Eyobo nga gu nayugo gupai nga, Yekova “na bakere nunga ti ko, na bakere inapai.” (Yak. 5:11) Ani nyenga anye a niruru rani fu Yekova, kidu na gu kido nga ko nika fu mosoro fu “agu yo nagbata ko.”​—Oni gedi AEbere 11:6.