1. A wa duhe ni kekehe rogo Batungusipai 7:20, gini rengo Bakindo Soromo agumbapaha?

 BAKINDO Soromo ake gupai nga: “A nga ruru boro auru kpotosende no namanga wenepai, zanga manga ingaapai te.” (Batu. 7:20) Gipai re nga ndikidi rengo. Ani dunduko nga aboro ingaapai. (1 Yo. 1:8) Sidu, ani dunduko naida gupai nga Mbori naambupai ambu furani, na akuarani kini mbupai furani a.

2. Waigu du boro ho mbembedi bakureani ambupai ni funi?

² Zanga kapa, mo natingidapa gu regbo atingida mo aba gberãrago ti mbembedi bakureamo. Mo aaida ka mbakada gupai re, na ki mbakadi gamo pagume na ni, sidu, mo ahõmbupai kina boro ngbaduroyo. Wai du mo adu ho bakureamo ambupai ni foro? Mo adu na zereda berãse yo? Ii, na mo aima du na ngbarago a!

3. Gini apai ani nika sakapai tipaha rogo gi kekeapai re?

³ Ani naida Yekova du ni mbembedi Bakurearani kisusi gbe, ono ti kura aregbo, ani ima rengba ka pe agu apai watadu ka manga agu apai naba gberãrago tiko. Ono tie, tipagine rengbe ani kadu ti ni na gu kido nga Yekova na nyemu ka mbupai? Rogo gini gene du ga Yekova mbupai kia ti wai ani ambupai fu aboro? Na ni yangaraha, da rengbe Yekova ka mbupai funi?

4. Tipagine rengbe ani kadu ti ni na gu kido nga Yekova regerege ka mbupai?

⁴ Fugo Mbori nakido rani nga Yekova regerege ka mbupai. Ho Yekova ayugu tiko ni fu Moize rii Bagangara Sinai yo, Ko ape gupai vurube Maraika nga: ‘Yekova, Yekova, nga Mbori du adu na nunga aboro na undahe ti ko, du ni bayee ko tipa zinga, ki du na inapai kpaima na rengo, naka kuti inapai tipa  aboro ni dungu akutu yo, navu aboro ti irairapai na ti samungu na ti ingapai.’ (Gate 34:6, 7) Yekova nga wene sino Mbori kidu na inapai tiko, nga guko du ti aregbo dunduko regerege ka mbupai fu agu aboro ingapai saberã yo.​—Nem. 9:17; Tam. 86:15.

5. Ringbisihe kuti Atambuahe 103:13, 14, ginipai Yekova amangaha bambiko ko ima ino wai du aboro?

⁵ Wa du Yekova nga Bakusirani, ko ima ino apai dunduko tipa rani. Oni berẽnga gipai re! Ko ima ino gu futufutuapai dunduko du tipa ai boro auru kpotosende. (Tam. 139:15-17) Sidu, ko ima rengba ka bi agu azangarengba dunduko ani adihe ti bambata avungurani. Zavura ko ima ino agu apai namangi rogo gaani raka yo, nga gu sarani ani du ni gu ngbatunga aboro du ani nga yo. Ginipai Yekova amangaha bambiko gupai nga ko ima ino rani wenengai gbe? Si nafõngbadukoyo ko naamangapai na inapai koyo du ani ni.​—Tam. 78:39; oni gedi Atambuahe 103:13, 14.

6. Waigu Yekova nayugu gupai nga ko na nyemu ka mbupai?

⁶ Yekova ima yugo gupai nga ko na nyemu ka mbupai. Ko ima ruga tiko na gupai nga, bambiko gu mangaapai nangia ga bambata kumba, nangia Adamu, ani dunduko nga aboro ingapai, na ani nika ye aye ki kpiki. (Rom. 5:12) Pai ho rengbe ani ka mangaha tipa ka banda tirani watadu kura ai boro be ingapai na kpio te. (Tam. 49:7-9) Ono tie, gaani Mbori nyemuse ayugu nunga na ki mangipai furani tipa gupai nga ani du na ranirii. Ginipai ko amangihe? A wa Yoane 3:16 ayugoho, Yekova akedi bangisa Wiriko ko kpi tipa rani. (Mt. 20:28; Rom. 5:19) Yesu akpi kuba rani tipa gupai nga ka fu ranirii fu ai gu boro du na idapase kutiko. (Eb. 2:9) Si aima du ni bakerepa imisiri fu Yekova ka bi Wiriko nga guko ko aima kpinyemuko ko nikpi iigirã gbegberẽ kpio! Nirengo, ka Yekova aaidanga ka mbupai ya, ka ko ambunga Wiriko ko kpi te.

7. Gini bete akpiapai du ho nga ga agu aboro Yekova ambupai fuyo?

⁷ Ziazia Kekeapai ima hi be akpiapai nga ga agu aboro Yekova ambupai fuyo. (Ef. 4:32) Da pa ni aye ku berãro yo? Isoke, mo naberãpa Bakindo Manase. Gu gbegberẽ kumba re aingipai kuti Yekova ngba kere agene. Ko anaairiso ziree ambori na kini ngarasi aboro i mangi kina gu bangisapai re. Ko aimi awiriko ki fuyo ni motumo fu ziree ambori.  Gu kura kerepai ko amangihe berewe kisusi nga, ko amoi kpia ziree mbori rogo ga Yekova ziazia yekaru. Ziazia Kekeapai nape gupai tipa ko nga: “Ko amangi gbigbitapai ni dungu he bangiri Yekova, ka gara gako zinga kuti ko.” (2 Peka 33:2-7) Ono tie, ho Manase amangi ndikidi saberã ni, Yekova ambupai fuko. Zavura Mbori akaraga ko ku rogo gako bangiriba nga ga du ni bakindo. (2 Peka 33:12, 13) Isoke, mo naberãpa Bakindo Davide aberã a, nga guko namangi kere aingapai kuti Yekova, kodihe na bari gbiati imo boro. Ono tie, ho Davide amangi ndikidi saberã ni na ki inipa gako ingahe, Yekova aima mbupai fuko a. (2 Sam. 12:9, 10, 13, 14) Nirengo, ani ima rengba kadu na gu kido nga Yekova ima du na nyemu ka mbupai. Na a wa ani nika bihe, ho Yekova ambupai ni, si wa gu wiri aboro ambupai te.

8. Gu kparakpara bangiriba du Yekova na ni ni basapungbanga, wai du duhe na maapai kurii gu tandu du ko na ni ka mbupai?

⁸ Yekova nga “basapungbanga zegino dunduko.” (Bam. P. 18:25) Si naida wene basapungbanga du na dudunguro giarogopaiyo tipa andiko. Gupai re nga rengo tipa Yekova, kupati gupai nga ko nga gaani Basapungbanga, ko a nga gaani Bafu Rugute. (Yes. 33:22) Boro ho ini gupai wenengai du ni ruruhe na gu du ni irairaha wa gu Yekova naini te. Gini kura pai berewe si aidaha be wene basapungbanga? Si naida ni ini agu arengo dunduko du tipa pai mbata fu ni mangi gani diaberã. Sidu, Yekova nga wene basapungbanga kisusi, bambiko ko naaino agu arengo dunduko tipa pai duho ti aregbo dunduko.

9. Gini apai duho Yekova nainihe ho ko adiaberã ni singia ko mbupai watadu ka ko mbunga pai ya?

⁹ Yekova wa agu abasapungbanga nga wiri aboro te, ti aregbo dunduko, ko ima ino agu arengo dunduko du tipa ai gupai naye ku bara bangiriko. (Bam. P. 18:20, 21; Tam. 90:8) Ko naino pai tipa apai kisusi wai wiri aboro abihe watadu kini gihe. Ko ima ruga tiko wenengai na wai du asino boro na agu asino ni adihe ti avunguni, gu ngbatunga wirikapai ni awirikihe, na gu ba ni arakaha rogoho na wai du ni berãni yo na maapai kurii gani mangaapai. Yekova nangera angera ku kpotoboro yo. Ko ima rugatiko wenengai na ndu gupai boro amangapai ti ni. Pai ho rengbe kadu ni gbugbuhe ti Yekova te. (Eb. 4:13) Sidu, ho Yekova ambupai ni fu boro, si wo mbiko gupai nga ko ima ino agu arengo dunduko duho tipa pai.

10. Tipagine rengbe ani ka pe gupai ti ni nga ga Yekova asapangbanga ti aregbo dunduko ni ruruhe? (Pa Fu Rugute ni Ue he 32:4)

¹⁰ Ga Yekova asapangbanga nidu ti aregbo dunduko ni ruruhe. Ko akparanga aboro kandara tooni te. Yekova ambunga pai fu boro bambiko gupai nga ni nangera wenengai, ni nga irakumuko, ni na nyanyakipa ni watadu ni na dungu birĩ mangaapai tini te. (1 Sam. 16:7; Yak. 2:1-4) Boro ho rengbe ka sosoda Yekova ko mangipai watadu ka fu he fuko ni mobirimo te. (2 Peka 19:7) Gberãrago watadu kungbo wai boro afura na maapai kurii gako adiaberã te. (Gate 34:7) Yekova nga wene Basapungbanga kisusi, bambiko ko ima rugutiko na agu apai dunduko du tipa rani na gupai du ani rogoho.​—Oni gedi Pa Fu Rugute ni Ue he 32:4.

11. Ngba gini gene du ga Yekova mbupai kia ti gu gene wiri aboro ambupai ngbaha?

¹¹ Agu aboro nake Kuru Ndika aima rugatiyo na gupai nga ga Yekova mbupai ima du kia. Ti kura aregbo, i amangisunge na fugo rogo pa-Ebere nga gu kura buku sa ape gupai nga “i namangasunge na ni sa kinaho i asakapa gu gene ni Mbori ambupai fu aboro ingapai ngbaha. Gu fugo re asakanga pai tipa gu bete  gene wiri aboro ambupai ngbaha fu akurayo te.” Kina Yekova sa du na pagbia beko ka mbupai ngba rengberengbe gene fu gu boro ingapai saberã ni. Gini sangbanapai nakura ho Yekova ambupai ni furani?

12-13. (a) Ginipai boro agbiaha ho Yekova ambupai ni funi? (b) Agu aundo duti ga Yekova mbupai nanye tipa bagizo regbo wai?

¹² Ho ani aidapa gu rengo ni nga Yekova ima mbupai furani, ani nika gbia ngbarago ti “zereda,” kodihe na zereda nga ga berãse yo, gbiati gigiri sangbakpotoseyo. Gu ngbatunga mbupai re arengbanga ka ye be aboro te, ono si naida si ye “yo du [Yekova] ni.” (Amo. 3:19) Ho Yekova ambupai ni furani, ko nambu rani ani da ni abakureako berewe, na si kidu wa ka i ya ani aamanganga ingapai te.

¹³ Nibasa Yekova nambupai furani, ko akitangangbanga rani watadu ka fu mbusa furani berewe tipa gu ingapai re te. (Yes. 43:25; Yere. 31:34) Yekova namaa gaani aingapai tirani tuturũ kusayo “wa turũ ku uroyo na dioyo.” * (Tam. 103:12) Ho ani aberã ni kuriipa wai du ga Yekova mbupai ni bakerehe, ani nadu na tambuahe fuko na kini gunde ti ko. (Tam. 130:4) Ono da rengbe ka gbia gi mbupai re be Yekova?

14. Ka da kuane, ginipai ani nawirikihe tipa ga Yekova diaberã ka mbupai?

¹⁴ A wa ani nabihe, ga Yekova diaberã ka mbupai arunga riipa singia gu ingapai boro namangihe ni bakerehe watadu ni umbaha te. Berewe a, ani wiriki gupai nga Yekova namangasunge na gako inohe ni du ko ni Bakusirani, Bafu Rugute, na Basapungbanga ho ko adiaberã ni singia ko mbupai fu boro. Ono gini apai Yekova aberãpaha mbata fu ko diberã singia ko mbupai watadu ka ko mbunga pai ya?

15. Ringbisihe kuti Ruka 12:47, 48, ginipai nga pai sa dagba agu apai yo Yekova aberãpaha mbata fu ko diberã singia ko mbupai watadu ka ko mbunga pai ya?

¹⁵ Pai sa dagba agu apai yo Yekova aberãpaha nga singia gu boro mangi ingapai ainihe nga gupai ni aamangaha angia irairapai. Yesu aima maa gipai re ziazia a wa duhe ni kekehe rogo Ruka 12:47, 48. (Oni gedihe.) Gu boro nasogima manga gupai nga gu ni naima ino nga Mbori aidanga na ni te na si ni  gbegberẽhe na ni kini mangihe, ni ima manga kere ingapai. Yekova ima rengba ka diaberã ka zanga mbupai fu gu boro re. (Mk. 3:29; Yo. 9:41) Ono tie, ani ima rengba ka ida gupai nga ti kura aregbo, ani naino gupai aino nga gupai ani amangihe angia irairapai. Ya mo maabangirise ho furani tipa gbia mbupai rogo gu bangiriba re? Ii! Bambiko kurapai kinaho Yekova aberãpaha a ho ko adiaberã ni singia ko mbupai furani.

16. Rogo gupai yo nga ka manga saberã nga gine, na tipagine si aida ani mangi saberã amanga ti ni ka ani aida gupai nga Yekova mbupai furani?

¹⁶ Gu kurapai Yekova aberãpaha nga singia gu boro mangi ingapai re mangi ndikidi saberã. Rogo gupai yo nga ka saberã nga gine? Ho boro amanga saberã ni, ni “nasa berãni, gani bipai, watadu ndu gani mangaapai.” Gipai re nakoda gupai nga du na biratise gbiati bakere gberãrago tipa gu gbegberẽ apai ni namangihe watadu tipa zanga manga agu apai du ni ruruhe nga gu ka ni amangihe. Boro nadu na gberãrago mbiko gu gbegberẽ apai ni namangihe, na mbiko ni ambu gani pagume na Yekova si du ni rurungburaha, nga gupai nasa ni ni mangi gu gbegberẽ apai re. Oni tingidi gupai nga Bakindo Manase na Bakindo Davide amangi kere aingapai, ono tie, Yekova aima mbupai fuyo bambiko i amangi ndikidi saberã. (1 Aba. 14:8) Ii, Yekova nambupai furani kinaho sa ko abi gupai ni nga ani ima manga saberã. Ono si naida kurapai aida kisusi gu nga kadu na gberãrago tipa agu aingapai ani namangihe. Si naida ani du regerege ka mangapai. * Na gere nga gu kurapai Yekova aberãpaha.

17. Ginihe nga ariatise, na tipagine duhe ti ni ni nyanyakipa pai ka ani aida ka ne manga agu aingapai berewe ani amangihe kusayo? (Yesaya 55:7)

¹⁷ Gu kura nyanyakipa pai Yekova aberãpaha nga ariatise. Ariatise nayugo gupai nga boro nambu manga gbegberẽ apai na ki tona raka ngba gu gene Yekova aida gako aboro naaraka ngbaha. (Oni gedi Yesaya 55:7.) Si naida boro aria berãni tipa gupai nga gu berãpai nga ga Yekova naangbe mbatayo funi. (Rom. 12:2; Ef. 4:23) Si naida ni diberã ka mbu gani gbegberẽ aberã na mangaapai. (Koro. 3:7-10) Rengo ngaha nga, gaani idapase kuti ga Kristo  motumo du nasa gupai nga Yekova mbupai furani na ki girisi rani ti gaani ingaapai. Yekova nika mbupai furani rii mburu gu motumo re ka ko bi gupai nga ani namanga ndikidi ome ka aria gaani mangaapai.​—1 Yo. 1:7.

18. Ginipai ani nawisigihe tipa ga Yekova mbupai?

¹⁸ Ani fugüngo pai ni wiri guruhe tipa bete gu memeapai ani nasakipai tipaha. Yekova ni gu boro nambupai ni bakerehe kisusi rogo zegino. Tipagine rengbe ani ka pehe ti ni wo? Bambatapai nga, ko ti aregbo dunduko regerege ka mbupai. Uepai nga, ko ima ino rani wenengai sirisiri gbe. Ko ima ino agu apai dunduko du tipa rani, na ko nga gu bawene boro kisusi rengbe ka ino singia ani ima manga ndikidi saberã. Na biatapai nga, ho Yekova ambupai ni furani, ko nambupai furani na kpotokoyo dunduko, na fuko, si ki du wa ka i ya ani aamanganga ingapai kandara tooni te. Gipai re nasa rani ani du na gigiri sangbakpotoseyo na ko ki idi na ani.

19. Wa vura duhe nga ani nga kpakpa aboro na ani nikaa ndu kindi kumbatayo kaa manga ingapai, tipagine rengbe ani kadu ti ni na ngbarago?

¹⁹ Rengo ngaha nga, wa du ani kindi ni kpakpa aboro, ani nikaa ingapai ainga kindi. Ono tie, ani ima rengba ka gbia wasa ti agu afugo du rogo gu buku nga, Insight on the Scriptures, Volume 2, kpewaraga 771, nga gu naya: “Yekova nga boro inapai, na ko ima ino gupai nga gako amoyambu ni rurungbura yo. Sidu, si aidanga i naadu na gberãrago ti aregbo dunduko bambiko gupai nga i nga kpakpa aboro na i namanga aingahe te. (Tam 103:8-14; 130:3) Ka i amanga gupai rengbe yo ka mangaha na ome yo dũ ka raka ringbisihe kuti ga Mbori agene, i ima rengba kadu na ngbarago. (Frp 4:4-6; 1Yo 3:19-22).” Nairiwo wai du gipai re nipa ngarasaro!

20. Gini apai ani nika wisigoho rogo gu kekeapai ngbefuo gere?

²⁰ Ani na tambuahe nga Yekova regerege ka mbupai furani ho du ani ni na ndikidi gberãrago tipa agu aingapai ani namangihe. Ono tie, waigu rengbe ani ka wirika ga Yekova mbupai? Rogo gini agene du gaani mbupai wakina ga Yekova mbupai, ono rogo gini agene du gaani mbupai kia ti gako? Tipagine du pa gia ani rogo gu kparakparapai du dagbaha ti ni na nyanyakipaha? Gu kekeapai ngbefuo gere nika karagapai kuti agu asanahe re.